Makeken Pengertin, Kebeluhen Ras Kengasupen - Entrepreneurship: Keahlin ( Bahan PJJ 13 - 19 Oktober 2019 )

Suplemen Bahan Bimbingen Perpulungen Jabu-Jabu 13 - 19 Oktober 2019

Makeken Pengertin, Kebeluhen Ras Kengasupen

( Entrepreneurship: Keahlin )

Ogen : Keluaren 31:1-11

Tukang si erbahan Kemah si Badia
(Kel. 35:30--36:1)
1. Nina TUHAN man Musa,
2. “Enggo Kupilih Besalel, anak Uri kempu Hur, i bas suku Juda nari,
3. janah enggo Kudemi ia alu kesahKu. Enggo Kubereken man bana pengertin, kebeluhen ras kengasupen erbahan barang-barang si mejile:
4. ngerencanaken ras erbahan potongen si mejile i bas emas pirak ras tembaga nari;
5. nggarut permata ras namakenca i bas bingkena; erbahan ukir-ukiren kayu ras erbage-bage dahin erbahan barang-barang si deban si mejile.
6. Bage pe enggo Kupilih Oholiap anak Ahisamah, i bas suku Dan nari guna nampati Besalel. Man tukang-tukang si deban pe enggo Kubereken kengasupen si mbelin, gelah banci ibahanna kerina si enggo Kuperentahken e me:
7. Kemah Perjumpan, Peti Perpadanen ras tutupna, kerina perabot-perabot Kemah e,
8. meja ras alat-alatna, nahe lampu i bas emas murni nari ras kerina alat-alatna, batar-batar ingan nutungi si merim-merim,
9. batar-batar guna persembahen tutungen ras kerina alat-alatna, baskom ras tapakna ingan lau pemurihi tan ras nahe,
10. paken imam si lanai kal lang-lang jilena si man paken Harun ras anak-anakna tupung ndahiken dahin imam,
11. minak penangkuhen, ras barang tutungen si merim guna ingan si badia. I bas erbahan barang-barang si enda kerina, la banci sitik pe nimpang i bas kai si enggo Kupedahken man bandu.”

Tangkas man banta maka Dibata me sinepasa kerina si lit i bas doni enda. Janah i bas tinepaNa e, manusia me tinepa si ibereken Dibata kelebihen asa tinepaNa si deban, sebab man manusia me ibereken Dibata pemeteh ras kepentaren si banci ikembangken. Tole pe ibere Dibata kuasa guna ngusahai ras nguasai doni enda. Kemajun "ilmu pengetahuan" banci siidah i bas abad pe 20 ken, paksa sie manusia enggo lit perukurenna si cukup maju, banci siidah arah "teknologi", "informasi" ras "transportasi." Enda kerina banci jadi erkiteken arah pengertin, kebeluhen ras kengasupen manusia i bas makeken pemeteh sibereken Dibata man bana alu mehuli. Pengertin ertina akal budi si lit bas kita meteh mehuli ras lang, kebeluhen ertina kelebihen sekalak jelma guna ngangkai ras makekenca, kengasupen ertina gegeh i bas sekalak jelma lako erdahin. Pemeteh reh dekahna reh erkembangna bage pe kegeluhen manusia reh majuna arah kepentaren ras kebeluhen si ibereken Dibata. Janah adi enda ikembangken maka turah me sada kebeluhen ntah pe "keahlian". "Keahlian" ertina kemampun sekalak jelma ndahiken sada dahin si biakna kusus. Keahlin sekalak jelma banci ipebagesi gelah reh beluhna. Keahlin si lit i bas manusia tujunna eme guna ndukung keperlun ras kemajun manusia janah sipakeken guna pelayanen gelah terpuji gelar Dibata.

I bas renungenta enda ituriken kerna kinibeluhen si ibereken upata man bangsa Israel guna erbahan Kemah si Badia. Adi nai sigelari jaman batu, i bas Kitab Keluaren enda teridah enggo jaman besi tah pe emas, ije me teridah litna perubahen-perubahen i bas geluhen manusia erpalasken jamanna. I bas bahanta enda Dibata ngerana arah suruh-suruhenNa Musa ngataken maka Dibata enggo milih Basalel i bas suku Juda nari, janah idemi alu Kesah Dibata.

Ibereken me bana pengertin, kebeluhen ras kengasupen erbahan barang-barang si mejile i bas bahan dasar emas, pirak ras tembaga me (ay. 2-4). Keahlin sebage tukang, teridah maka Dibata nge simerekenca man manusia guna ipakeken alu mehuli man dirina jine, kalak si deban terlebih man Tuhan. Tole Dibata milih Oholiap i bas suku Dan nari bage pe tukang-tukang si deban guna nampatai Basalel ( ay.6 ). Kerina si pilih Dibata e termasuk tukang-tukan si deban isuruh Dibata guna erbahan Kemah Perjumpan, Peti Perpadanen ras tutupna, perabot-perabot kemah, meja, atat-alat, nahe lampu i bas emas murni, batar-batar, baskom pemurih tan ras nahe, bage pe paken-paken imam ras minak penangkuhen (ay. 7-11). Maanusia isuruh Dibata guna nikapken keperlun i bas nembah man baNa. Gelahna manusia e banci ngelakokenca ije me Dibata ngkuhi manusia alu pengertin, kebeluhen ras kengasupen. Alu kata si deban "keahlin" si ibereken Dibata guna mperembakken kita ras Dibata.

Alu bage arah teks enda sieteh maka Dibata nuruh bangsaNa guna ngelakoken pendahin labo bage-bage saja, tapi iperlengkapi Dibata. Bage pe kita selaku anak-anak Dibata, guna ndalanken perentahNa, kita enggo leben iperlengkapi Dibata alu keahlin sipelain-lain, guna mperlengkapi sada ras si debanna, bage pe sisampat-sampaten bali ras Oholiap ras tukang-tukang si deban ipilih ras ibereken Dibata keahlinna guna nampati Basalel. Bage ka pe kita perpulungen Tuhan lit nge "keahlin"ta sekalak-sekalak si enggo ibereken Dibata lit sebage tukang, pemborong, pelukis, perkolong-kolong, perende-rende ras si debanna. Guna ngangkaisa la banci lang arus erlajar ( berlatih ) gelah reh beluhna kita. Adi enggo si dat kai keahlinta arus sipakeken alu mehuli guna keperlunta, guna kalak si deban terlebih man Tuhan. Adi sipakeken alu payo ulihna banci mereken kemajun man banta bage pe kalak si deban. Tapi adi salah kita makekenca ulihna banci turah perubaten ras kinirugin. I bas ayat 11b jelas kel ikataken Dibata maka "i bas erbahan barang-barang si enda kerina la banci sitik pe nimpang i bas kai si enggo Kupedahken man bandu."

EVALUASI :
Enggo nge silakoken ibadah keluarga? Adi langa, lakokenlah!

DISKUSI :

Cubaken sigargari kai nge keahlinta?
Arah keahlin si lit, kai nge si enggo pernah ilakoken guna nampati kalak si deban?

AKSI
Sidata keahlin perpulungen bas sektorta, kenca sie aturken guna pelayanen bage pe ciptaken sada dahin ntah kegiaten ulihna banci guna nambahi kas sektorta guna nampati pelayanen.

USULEN LAGU :

KEE GBKP No. 182 : 2,5 ( KLIK JUDUL KEE UNTUK MELIHAT LIRIK )
KEE GBKP No. 209 : 1,2 ( KLIK JUDUL KEE UNTUK MELIHAT LIRIK )
KEE GBKP No. 254 : 1,3 4 ( KLIK JUDUL KEE UNTUK MELIHAT LIRIK )
KEE GBKP No. 255 : 1,3 ( KLIK JUDUL KEE UNTUK MELIHAT LIRIK )

TOPIK PERTOTON SYAFAAT :

Gelah ngawan perpulungen meteh ras ngangka keahlinna ras makekenca alu mehuli.
Gelah Dibata masu-masu pendahin perpulungenNa arah keahlin masing-masing, erguna man pribadina, kalak si deban terlebih man Dibata.

Pdt. Julianus Barus, S.Th.

Mohon Bantuan Subscribe dan Like Youtube Channel GBKP KM 8. Bujur