Kukelengi Ndeharangku - HUT Moria GBKP ( Bahan PA Mamre 13 - 19 Oktober 2019 )

Suplemen Bahan Bimbingen PA Mamre 13 - 19 Oktober 2019

HUT Moria GBKP

Ogen : Epesus 5:25-29

25. Kam perbulangen, kelengilah ndeharandu, bagi Kristus engkelengi perpulungen, dingen ngendesken kesahNa guna perpulungen e.
26. Kristus erbahan bage guna mpersembahken perpulungen e man Dibata, alu kataNa, kenca ibersihkenNa e alu mbasuhsa alu lau.
27. Tole pe gelah iendeskenNa perpulungen e man DiriNa alu dem kinijilen desken sekalak penganten diberu bersih dingen la ersalah, la lit cungikna ntah ringutna, bage pe la lit si man pandangen.
28. Perbulangen arus engkelengi ndeharana bagi ia engkelengi kulana. Kalak si engkelengi ndeharana, engkelengi dirina kap.
29. Labo pernah lit kalak elem-elem nandangi kulana. Tapi ipekena-kenana dingen ikawalina kulana e bagi Kristus mpekena-kena dingen engkawali perpulungen.

Tema : Kukelengi Ndeharangku

Tujun : Gelah Mamre

Meteh maka ndehara e eme diri perbulangen.
Ngasup engkelengi ndeharana.

Metode : Aksi i bas HUT Moria isehken man ndehara i rumah

KATA PENARUH
I bas liturgi pemasu-masun perjabun isehken kata Dibata kempak si dilaki: "Kam si dilaki; atendu keleng rnan ndeharandu, bali ras ate Kristus keleng man Perpulungen, dingen iberekenNa badanNa kerna Ia. Si keleng atena ndeharana, keleng atena badanna jine. Ola merawa-rawa kempaksa; pertemanilah ia, bereken man bana cukup kemulian bagi man teman si ngaloken tading-tadingen kegeluhen si rasa lalap." Si jadi penungkunen man banta tep-tep perbulangen: enggo nge sedekah enda sisehken keleng ateta man ndeharanta erpalasken keleng ate Kristus? Arah oraten PA Mamre wari enda, ipersingeti kita segelah reh ngasupna kita encidahken tekadta ninta "kukelengi ndeharangku bagi Kristus engkelengi diringku."

URAIAN TEKS/TAFSIREN
Surat Epesus enda isuratken rasul Paulus tupung ia i bas penjara erkiteken ndahiken dahin meritaken Berita Si Meriah ( Ep. 3:1;4:1;6:20 ). Arah surat enda, Paulus ningetken maka; Jesus enggo mereken diriNa mate i kayu persilang guna nebusi manusia. Jesus me takal perpulungen si nelamatken manusia selaku kula ni Kristus. 1 bas si e, Paulus nehken arapenna kerna kiniersadan perpulungen bagepe kegeluhen tep-tep kalak si enggo i tebus i bas diri Jesus Kristus. Kiniersadan selaku kula ni Kristus e arus teridah arah orat geluh si mbaru i bas Kristus. Janah salah sada si seh kal pentingna e me kiniersadan ndehara ras perbulangen i bas jabu, bagi kiniersadan Kristus selaku takal, ras pepulungen selaku kula ni Kristus. I bas bahan PAnta, isingetken kai-kai si arus i dalanken kerna orat geluh perbulangen si nggeluh i bas terang, kegeluhen si mbaru i bas Kristus e me nehken kekelengen

man ndehara bagi keleng ate Kristus man perpulungen. Keleng ate Kristus man perpulungen igelari alu 'kekelengen agave', e me kekelengen si la ersyarat, si la ngarapken semulih (imbalan), si la rayo-ayo ras tujunna mulahi kalak si deban i bas kiniseranna nari. Enda me si enggo ilakoken Jesus si mulahi manusia i bas kuasa dosa nari. Erkiteken keleng ateNa, Jesus ngendesken diriNa ipakuken ku Kayu Persilang seh mate guna nebusi dosa-dosa manusia. Jesus nggit erkorban segelah manusia iperdameken ras Dibata. Erpalasken keleng ate si enggo isehken Jesus man banta manusia, kita idiloNa nggeluh i bas kegeluhen si mbaru, e me nggeluh i bas biak Kristus. Kegeluhen si mbaru i bas biak Kristus me sipersembahken man Dibata, persembahen si dem kinijilen desken sekalak penganten diberu bersih dingen la ersalah, la lit cungikna ntah ringutna, bage pe la lit si man pandangen.

Keleng ate Kristus man perpulungen me sijadi palas man tep-tep perbulangen i bas engkelengi ndeharana. Perbulangen e bali ras Kristus si berkorban mereken dirina, dingen ngep-kep anak-anak jabuna erkemalangen man Dibata, si jadi usihen i bas keleng ate, dingen maba kedamen man kerina isi jabu. Sekalak perbulangen arus nggeluh i bas keleng ate ras jiwa berkorban nadangi ndeharana. Perbulangen arus engkelengi ndeharana bagi ia engkelengi kulana. Sabab perbapan si keleng atena ndeharana e me perbapan si keleng kap atena badanna jine, sebab ndehara e me dirina sendiri, bagi Jesus engkelengi perpulungen selaku kula ni Kristus. alu kata sideban, kalak si engkelengi ndeharana, engkelengi dirina kap. Perbulangen ras ndehara pada dasarna sada kap, bagi nina i bas Mat. 19:4-6; "Mula-mulana ijadiken si Nepasa sekalak dilaki ras sekalak diberu. Jenari nina si Nepasa e, 'Erkiteken si enda i tadingken si dilaki me nande-bapana jenari ersada ia ras ndeharana janah si dua e enggo jadi sada.' E maka lanai bo ia dua, tapi sada. Dage si enggo ipersadaken Dibata la banci isirang ken manusia".

Tep-tep perbulangen ras ndehara ersura-sura segelah jabuna jadi jabu si sempabu ( harmonis ). La ateta lit perpecahen entah pe kesirangen ndehara ras perbulangen, errkiteken ndehara ras perbulangen enggo ipersadaken Dibata. Emaka ikataken perbulangen ndeharangku ertina `ndeher', ia me (sekalak diberu) sindeherna kal ras aku. Jadi tep-tep perbulangen si sehat / waras arus tetap mpekena-kena ndehara si enggo ipersadaken Dibata ras ia. Sabab labo lit kalak si sehat / waras ngelukai dirina. Sekalak perbulangen si nggit nakiti / ngelukai ndeharana situhuna perbulangen si nggo sakit

Kegeluhen perjabun megati iandingken desken kapal si erlayar bas lawit si mbelang. Kapal e megati iderpa badai si atena engkaramken kapal e. Pegancih angin rneter ras galumbang si merawa si banci erbahanca tombang kapal e. Bage me pe kegeluhen labo lit kegeluhen jabu si pulah i bas perbeben / tantangen geluh. Pegancih perbeben-perbeben geluh si banci erbahanca kiniersadan jabu sontar; subuk ekonomi, kesehaten, anak-anak, sangkep geluh ras sidebanna. Kuga gia sangatna perbeben si nderpa jabu, adi anggota jabu e tetap erkemalangen man Dibata, jabu e tetap paguh. I jenda me perbulangen arus tetap encidahken orat geluh selaku imam. I tengah-tengah jabu. Selaku perbulangen si erkemalangen man Dibata i bas kecibal sikugapana pe ( subuk bagi ukur ntah la bagi ukur ), keleng atena la pernah erkusur nandangi ndeharana. Alu bage maka jabu e tetap sempabu ras jadi usihen man sekelewetna. I bas HUT Moria si pe-62 tahunken enda, tep-tep perbulangen iajuk niksiki kerna keleng atena sedekah enda man ndeharana ras perbulangen nehken tanda keleng ate ( aksi ) man ndeharana.

DISKUSI

Kai nge ertina perentah enda man banta perbulangen: "Kam perbulangen, kelengilah ndeharandu, bagi Kristus engkelengi perpulungen?
Turiken rencanandu, aksi si nuatendu isehkenndu man ndeharandu tupung HUT Moria enda!

USULEN ENDE-ENDEN