Perkakas ( Instrumen ) Guna Kemajun - Menggunakan IT ( Bahan PA Moria 25 - 31 Agustus 2019 )

Bahan Bimbingen PA Moria 18 - 25 Agustus 2019

Menggunakan IT

SI MAN OGEN : Jeremia 36:1-10

Baruh ngoge surat gulungen i bas Rumah Pertoton
1. I bas tahun peempatken Joyakim anak Josia jadi raja Juda reh kata TUHAN man bangku nina,
2. “Buatlah sada gulungen kertas, jenari suratken i babona kerna kai si enggo Kuturiken man bandu kerna Israel ras Juda dingen kerina bangsa-bangsa. Suratken kerina si enggo Kukataken man bandu menaken kin tangtangna nari Aku ngerana man bandu tupung Josia jadi raja seh ngayak paksa enda.
3. Banci jadi tupung kalak Juda megi kerna cilaka si ateKu Kubaba man bana, itadingkenna dalanna si jahat. Adi bage Kualemi salah dosana.”
4. E maka kulebuh Baruh anak si Neria, jenari kubelasken tep-tep kata si ibelasken TUHAN man bangku. Janah kerina si e isuratken Baruh i babo gulungen kertas ndai.
5. Kenca bage kubereken tole perentah enda man Baruh, “Aku lanai ipediat bengket ku bas Rumah Pertoton.
6. Tapi ateku maka kam lawes ku je, i bas warina tupung kalak e erpuasa. Alu megang ogekenlah gulungen kertas e man bana, gelah ibegina tep-tep kata si enggo ibelasken TUHAN man bangku, dingen si enggo kubelasken man bandu. Lakoken e i bas ingan i ja nari kerina kalak megi kam, subuk kalak Juda si enggo reh bengket i bas kuta-kuta nari.
7. Banci jadi ertoto ia man TUHAN jenari jera i bas dalan si jahat nari, sabap TUHAN ngancam bangsa enda alu rawaNa si mbelin dingen gurlah.”
8. E maka iogeken Baruh kata TUHAN i bas Rumah Pertoton, sue ras si enggo iperentahken man bana.
9. I bas bulan pesiwahken tahun pelimaken Joyakim jadi raja Juda, bangsa e erpuasa lako ndatken keleng ate TUHAN. Kerina kalak si reh i kuta-kuta Juda nari rikut ras kalak si ringan i Jerusalem ngelakoken puasa e i Jerusalem.
10. E maka iogeken Baruh gulungen surat e man perpulungen sue ras si enggo kukataken. Si e ilakokenna i bas Rumah Pertoton, i bas bilik Gemaria anak si Sapan nari. Gemaria e me sekretaris kerajan. Ingan kamarna e i bas kesain si arah datas deherken dalan bengket arah pintun gerbang si mbaru ku bas Rumah Pertoton.

T E M A : PERKAKAS (INSTRUMEN) GUNA KEMAJUN

T U J U N : Gelah Moria:

1. Meteh cara Barukh i bas mpepulung informasi ras nuliskenca bas kertas.
2. Ngidah ras makeken teknologi i bas ngembangken wirausaha.

METODE PA : Aksi ( PRT ) / Nobar.

Kata Penaruh.  
Kita nggeluh gundari i bas jaman milenial, ertina eme jaman si serba canggih ras moderen. Emaka ise si la ngasup ngikuti perkembangen jaman enda, banci erbanca ia tetap ketadingen subuk i bas pemeteh bage pe i bas carana nggeluh. Kususna Moria i tengah-tengah Gerejanta GBKP banci saja adi la ngasup ngikuti perkembangen jaman enda tentu tetap ketadingen i bas kerina dampar geluhna. Amin bage gia perlu kal kita metenget gelah la asal saja tapi ngangkai ras ngasup nentuken apai si mehuli guna ia, apai ka si man silahenken. Emaka Moria arus pentar ngidah perkembangen jaman si canggih enda bagepe la terjeng makekenca guna dirina saja tapi uga makna teknologi e ipakeken guna ningkatken ekonomina ntah kelompokna, alu bage teknologi enda tuhu-tuhu jadi sada nilai positif i bas kegeluhen Moria GBKP.

Mpebagesi Pengangkan Kerna Ogen.  
Jeremia eme sekalak nabi si ilebuh Dibata tupung bangsa Israel ngalaken perbeben ras kiniseran. Paksa e melala raja si lanai ngikutken Kata Dibata, salah sada eme bagi renungenta sendah i bas kitab Jeremia 36: 1-10. Teks renungenta enda nuriken kerna uga Dibata ngerana man Jeremia janah nuruh gelah kai si ikataken Dibata man bana isuratkenna. Tapi si jadi masalah, Jeremia kurang beluh nuratken kai si ikataken Dibata man bana, emaka ilebuhna me Barukh ( Barukh ertina eme semoga ia diberkati ) si meteh kerna cara nuratken kata i bas gulungen kertas. Tupung e jarang denga lit alat tulis menulis, kertas bagepe pulpen si ipake guna nuratkenca si ibahan i bas batang perdu, si uratna tunggal ipetelap. Emaka Barukh nulisken Kitab enda i bas tahun 605 SM. Kenca kitab e dung itullsken, emaka Jeremia nuruh Barukh ngogeken Kata Dibata i Rumah Pertoton, emaka raja Joyakim si tupung e merentah i Israel merawa perban tersinggung i bas persinget Dibata e man bana, emaka kitab enda pe icigatken ras iambengken lembar per lembar ku bas api guna i tutung (ayat 20-23).

Perban kitab enda enggo itutung, emaka Jeremia ras Barukh rusaha erban 'duplikat kitab enda mulihi ( ayat 27-32 ). Kata perkata i bas kondisi ras situasi uga litna ( sederhana ) sue ras si lit i bas jaman e, eme alu muat PAPIRUS entah pe kulit rubia-rubia gelah isuratken i je. Penulis Kata Dibata enda labo terjeng gelah isuratken saja tapi banci iogeken man kalak sideban. Dingen pe banci iidah ras ipeseh man perpulungen gelah ola masap bage-bage saja. Tapi Kata Dibata e la ilupaken bangsa enda i bas wari-wari si reh enda.

I bas Padan Si Ndekah, salah sada alat tulis si tertua ras si terkenal eme PAPIRUS ( Papier = kertas ), enda gelar sada sinuan-sinuan si seh kai suburna i deher sungai Nil Mesir. Cara erbansa eme, tangkena i potong-potong, i belah ras ipotongka bagi suri, emaka i bayu gelah banci i gulung. Tulisen si i tulis i bas Papirus enda banci tahan ndekah. Erkiteken proses erbahansa mesera emaka kalak mekisat nuratken sada pesan i bas sada tulisen. Padin akapna nehken berita lisan saja. Tapi Barukh perban meherga iakapna pesan Kata Dibata e, emaka amin gia membutuhken proses si cukup nggedang ras mesera tetap ia erusaha mereken si mehulina. Ituliskenna kerina Kata Dibata si iogeken nabi Jeremia man bana. Amin gia tulisen e itutung raja tapi Barukh tetap rusaha erban salinen ulang kerna Pedah Dibata e, gelah kerina kalak banci ngogesa, la terjeng jaman e tapi seh ku bas jamanta si gundari enda.

Pengkenaina. 
Semangat Barukh i bas nulisken Kata Dibata e perlu iusih Moria GBKP. Kecanggihen Papirus i bas jaman Barukh banci ipakekenna guna jadi alat mberitaken Kata Dibata. Bagepe Moria gelah banci nggunaken teknologi si canggih arah HP, TV, Radio, Internet ras sidebanna ipakeken guna meritaken Berita Si Meriah bagepe guna ningkatken ekonomi i tengah-tengah Perpulungenta. Iarapken gelah Moria peka guna ngenen peluang i kemajun jaman enda, gelah arah peluang enda la terjeng nguntungken dirina saja tapi banci pe maba kesejahteran man Moria si deban.

Teknologi enggo seh canggihna i bas jaman genduari enda. Arah HP melala si dat pemeteh. Si darami pengangkan si lenga jelas man banta arah Google. Melala kal genduari Moria ngembangken usahana arah online. Tetap erkembang, Pustaka Si Badia pe banci inen i bas android, rende pe banci ka si buka arah androidta bagepe mbangun pertemanen ras erkiniteken. Moria pe perlu kal ngikuti perkembangen jaman ras erlajar kerna IT. Sabap kerina si lit i bas kegeluhen enda erguna ras jadi pasu-pasu adi ipake alu mehuli. Erbage-bage ulih kepentaren piga-piga jelma Si ibagikenna man kerina manusia. La gia kita ngasup erbahan alat ( instrumen ) makekenca ka lah gia kita terpenalem.

Diskusi:  

1. Arah pengalamen Barukh, peluang kai nge si idahndu si lit i sekelewetndu si banci ikembangken guna maba kesejahteran man Moria?
2. Kai nge si banci iban Moria arah teknologi si gundari guna mpermudah dirina i bas belanja?
3. Arihken i bas Moria sektor ras usulken man Moria Runggun gelah iban perlomban guna erban pangan khas Karo ras asesories etnik Karo banci ipasarken lewat Internet. Umpamana: 
1. Mbayu amak ras ulihna banci idayaken arah WA Moria se-GBKP
2. Erban Cimpa Tuang
3. Erban Trites ( pagit-pagit )
4. Erban Bohan-bohan ras sidebanna

Pdt. Josep.A.Sembiring,S.Th. 

Judul Film : Dampak Positif media sosial

Mohon Bantuan Subscribe dan Like Youtube Channel GBKP KM 8. Bujur

Share this post