Bapa Si Erdiate - HUT Mamre GBKP ( Bahan Bimbingen PA Mamre 18 - 25 Agustus 2019 )

Bahan Bimbingen PA Mamre 25 - 31 Agustus 2019

HUT Mamre GBKP

Ogen : 1 Raja-raja 3:7-14

7. O TUHAN Dibata, enggo ibereNdu aku nggantiken bapangku jadi raja, aminna gia aku nguda denga kal janah la kueteh kuga ndalanken dahin raja.
8. Enda aku ringan i tengah-tengah bangsa si enggo ipilihNdu jadi sikerajangenNdu, bangsa si teremna la terkira.
9. E maka berekenlah man bangku kepentaren ngerajai bangsaNdu alu kebujuren ras kebeluhen mbedaken si bujur ras si jahat. Adi la bage, i ja nge aku ngasup ngaturken bangsaNdu si mbelin enda?”
10. Meriah kal ukur TUHAN erkiteken ipindo Salomo si enda.
11. E maka nina TUHAN, “Erkite-kiteken ipindondu kepentaren ngerajai bangsa enda alu bujur, labo ipindondu umur gedang ntah kebayaken ntah pe kematen musuh-musuhndu,
12. tentu Kubereken kai si ipindondu. Kubereken kepentaren ras pengertin man bandu lebih asa si lit i bas kalak si enggo leben ntah si pudin asa kam.
13. Kubereken pe man bandu kai si langa ipindondu: gedang-gedang geluhndu bayak dingen ermulia kam, lebih asa kebayaken ras kemulian raja-raja si deban.
14. Janah adi ikutkenndu katangKu, ipakendu Undang-undangKu ras pedahKu, bagi si ibahan bapandu Daud, Kubahan maka gedang umurndu.”

Tema : Bapa Si Erdiate

Tujun : Gelah Mamre

1. Ngangkai perbahanen si pentar
2. Ngasup jadi bapa sierdiate

KATA PENARUH
Salomo e me simbol kalak si pentar ( berhikmat ). Pustaka si Badia ngataken maka Salomo me si pentarna i doni enda, nina :.... Kubereken kepentaren ras pengertin man bandu lebih asa si lit i bas kalak si enggo leben ntah si pudin asa kam ( ay.12 ). banci si idah arah tulisen-tulisenna i bas kitab : Kuan-kuanen ras Pengerana. Arah pengoratennta sendah pe si cubaken niksiki kuga kepentaren Salomo gelah banci jadi teladan man Mamre i bas erdiate sue temanta

URAIAN TEKS / TAFSIREN

1. Gibeon dauhna kira-kira 9 km sebelah barat laut Jerusalem nari. Termasuk kota Kerajan. I je lit uruk, janah i datas uruk enda me ibahan rumah pertoton ( bait suci ) si igelari "Bukit Allah paling besar", si paksa sie cukup terberita. 
2. Persembahen si isehken Raja Salomo e me sebage respon nandangi kesejahteraan bangsa Israel erkiteken Dibata ( Prinsipna : "Allah menyelamatkan kita, kita harus mempersembahkan diri kita kepadaNya"). Jadi, korban bakaran Salomo e me sebage pengataken bujur man Dibata si enggo manteki kinirajan Israel alu paguh ras makmur.
3. Salomo mpersembahken korban bakaren guna bangsa Israel ( publik ), teridah maka raduken bangsa e nge ia nehken persembahen e ( bdk. 2 Kro. 1:1-6 ). Jadi Salomo nehken persembahen erkiteken igejapna bangsana megegeh ras sejahtera erkiteken ipasu-pasu Dibata, labo erkiteken sukses akapna peribadi ras keluargana ibahan Dibata ( personal ). 
4. Alu latar belakang ntah "kadar / isi" kiniteken sibagenda me maka Tuhan mereken tawaren pemindon man Salamo arah nipina : "....Kai atendu kubereken man bandu ?"
5. Kuga respon Salomo ngaloken tawaren enda :
   - Iakukenna maka jabatenna sebage raja e pe pemere Dibata nge, labo erkiteken kelebihenna. Jadi adi e pemere Dibata tentu misi Dibata nge siman dalanenken, labo sura-surana. Janah nina Salomo megah nge akapna jadi raja ipilih Tuhan, e berarti megah iakapna ndalanken misi Dibata ( seh sura-sura Tuhan ), labo megah akapna adi seh sura-surana. Sieteh maka misi Dibata man Salomo maka ia iangkat nggantiken Daud jadi raja e me guna minpin bangsa Israel gelah sejahtera ras erkemalangen man Dibata.
   - Erpalasken penggejapen Salomo sibagenda me maka, tawaren si ibereken Dibata ndai la imanfaatken Salomo guna kepentingen pribadina, tapi guna kepentingen bangsana. Salomo tetap konsisten i bas panggilenna, e maka la pakaina prinsip "aji mumpung". Nina " ....berekenlah man bangku kepentaren ngerajai bangsaNdu alu kebujuren ras kebeluhen mbedaken si bujur ras si jahat. Adi la bage, i ja nge aku ngasup ngaturken bangsaNdu si mbelin enda ?" ( ay 9 ) 
6. Pemindon Salomo enda inilai Tuhan mehuli, e maka meriah kel ukurNa ( 10 ), e maka iberekenna pe man bana si la ipindona : kebayaken, kemulian, gedang umur, rsd ( kepentingen pribadina ). Bali bagi si ikataken Tuhan Jesus : Darami lebe kinirajan Dibata, kerina icukupken man bandu....(Mat. 6:33).

APLIKASI

1. Ulu kepentaren e me erkemalangen man Dibata. Salomo banci pentar erkiteken kemalangenna man Dibata. Banci sinen kuga ersembah i Gibeon guna ngataken bujur man Tuhan ( nen Kuan-kuanen 1:7) 
2. Sukat-sukat ( standart ) pentar e me pelayanen guna kepentingen / kiniulin sienterem ( mediate sue temanta ), labo kepentingen pribadi ( personal ).
3. Si mediate ( peduli ) nandangi kepentingen si enterem ndatken melala pasu-pasu bagi salomo. Si mpelebe kepentingen pribadina ( la mediate ) kai pe labo dat 
4. Emaka kuga ninta Mamre gundari,.... la dage biak erdiate enda sada kemulian ras kunci kesuksesen ngenda man banta ? sbb si idah i bas ogenta enda ngena kel ate Dibata perbahanen Solomo enda, janah iberekenna kerina simehuli bana. Emaka adi ateta sukses bagi Raja Salomo...sitingkatken perjuangenta guna kiniulin ( kesejahteraan ) teman, kemajun Marnrenta GBKP, kemajun gerejanta GBKP enda. Sibanlah e jadi biakta nggeluh, sebab e me kepentaren e. 

DISKUSI 

1. Diskusiken ngkai maka Salomo la mperdiateken kepentingen pribadina tapi bangsana i bas penawaren si ibereken Tuhan ?
2. Diskusiken i bas kai-kai saja kita enggo erdiate mperjuangken kepentingen si enterem ( publik ), ntahpe mperjuangken kemajun Mamrenta, ntah gerejanta asangken kepentingen pribadinta. 

ESULEN ENDE-ENDEN :

1. KEE GBKP No. 221 :1-2     ( KLIK JUDUL KEE UNTUK MELIHAT LIRIK )
2. KEE GBKP No. 177 : 1,2    ( KLIK JUDUL KEE UNTUK MELIHAT LIRIK )
3. KEE GBKP No. 255 :-         ( KLIK JUDUL KEE UNTUK MELIHAT LIRIK )
4. KEE GBKP No. 273 : 1 - 3  ( KLIK JUDUL KEE UNTUK MELIHAT LIRIK )

Pdt Seth Perangin-angin, M.Th 

HP. 081397340320

Mohon Bantuan Subscribe dan Like Youtube Channel GBKP KM 8. Bujur

Share this post