Muji Tuhan Arah Budaya - Minggu Budaya: Iman Kristen Ras Budaya ( Bahan Bimbingen PA Mamre 1 - 7 September 2019 )

Bahan Bimbingen PA Mamre 1 - 7 September 2019

Minggu Budaya : Iman Kristen Ras Budaya

Ogen : Masmur 150 : 1 - 6

Pujilah TUHAN
1. Pujilah TUHAN!
Pujilah TUHAN i bas RumahNa si Badia!
Pujilah kuasaNa i Surga!
2. Pujilah Ia erkiteken perbahanenNa si mbisa,
pujilah Ia erkiteken kemulianNa si meganjangna.
3. Pujilah Ia alu ngembus terompet,
pujilah Ia alu suling ras tanduk.
4. Pujilah Ia alu malu gendang dingen landek,
pujilah Ia alu kulcapi iher ngembus sarune.
5. Pujilah Ia alu penganak,
pujilah Ia alu gung si erbolo-bolo.
6. Pujilah TUHAN kerina si erkesah.
Pujilah TUHAN!

Tema : Muji Tuhan Arah Budaya

Tujun : Gelah Mamre

1. Meteh maka budaya pe bagin pemere Dibata
2. Ertanggungjawab lako njagai budaya si mehuli 

Metode : Diskusi

KATA PENARUH
I bas Kamus Besar Bahasa Indonesia,"budaya" ertina pikiran; akal budi. Sementara "Kebudayaan" ertina: hasil kegiatan dan penciptaan batin ( akal budi ) manusia seperti kepercayaan, kesenian dan adat istiadat. Adi menurut Koentjaraningrat, sekalak ahli antropologi i Indonesia mendefinisiken kebudayaan sebagai "keseluruhan sistem gagasan, tindakan dan hasil karya rnanusia dalam rangka kehidupan bermasyarakat yang dijadikan milik thri rnanusia dengan belajar." Tambah si e nina, maka lit 3 wujud kebudayaan e me Sistem Ide ( agama, norma, adat istiadat, hukum (undang-undang)); Aktivitas ( upacara perjabun ) ras Artefak ( rumah adat, uis gara / beka buluh, kulcapi, tupuk lada, rsd). Si jadi bahan percakapenta i bas PA Mamre -ta sekali enda mengarah ku bas wujud budaya sistem ide e me budaya runggu ras orat ngerana si mehamat si banci si pakeken i bas pelayanen Mamre khususna ras kegiaten gerejanta umumna. Alu kata si deban kebayaken budaya Karo banci jadi dalan si mehuli si pakeken i bas kita muji Tuhan ras pe kegiaten-kegiaten gerejanta kidekah labo bertentangen ras dogma ( ajaren ) Kristen. Sabab si eteh ras-ras maka budaya si lit bas kita e me pemere Dibata man banta si arus terus si jaga / si lestariken.

URAIAN TEKS / TAFSIREN
Masmur 150 e me sada Masmur si ngajuk kita guna "muji Tuhan". I bas Pustaka Si Badia cakap Karo lit 12 kali iulih-ulihi kata "pujilah" alu variasi "Pujilah Tuhan" ras "Pujilah Ia". Adi i bas Alkitab bahasa Indonesia lit 10 kali iulihi kata "pujilah" alu variasi "Pujilah Allah" ras "Pujilah Dia" ras 2 kali kata "Haleluya" ertina "Puji Tuhan" janah 1 kali kata "memuji Tuhan" (ayat 6).

Alu litna pengulangan kata si seri i bas Masmur 150 enda, e me kata "Pujilah Tuhan" entah "Pujilah Ia", ngatakenca maka kata-kata e penting ras jadi perhatinta. Masmur 150:1-6 isina banci si bagi ku bas 4 bagin, e me:
❖ I ja kita muji Tuhan?
I bas ayat 1a isingetken muji Tuhan i bas RumahNa si Badia. Ayat enda mengarah ku bas Rumah Pertoton ( Bait Suci ) i Jerusalem ( bdk Mas. 63:3; 68:18; 74:3 ). I bas ayat 1b isingetken "Pujilah kuasaNa i surga, ingan Dibata tading ( Mas. 20:7).
❖ Engkai kita muji Tuhan?
Palasna kita muji Tuhan lit 2 hal i bas ayat 2, e me erkiteken perbahanenNa si mbisa ras kemulianNa si meganjangNa. Perbahanen Dibata e teridah i bas Dibata nelamatken bangsana Israel ( Mas. 106:2; 145:4 ) ras erbage-bage perbahanen Dibata si mbelin si ncidahken kemulianNa ( Mas. 68:34; 74:13; 86:10; Ul. 5:24; 11:2 ). Tentu banci pe sigejabken i bas pengalamen kegeluhenta sitep-tep wari.
❖ Uga carana kita muji Tuhan?
Kita muji Tuhan alu makeken kerina alat musik si lit ras semal i pake i bas kebaktin. I bas bahan PA-ta alat musik si ipake sue ras si lit ras biasa i pake i bas ibadah kalak Israel e me terompet suling ras tanduk, gendang, kulcapi, sarune, penganak ras gung. Adi i bas ayat 4 nina: Pujilah Ia alu malu gendang dingen landek. Jadi suasana ibadah teridah "meriah", "hidup" alu kombinasi alat musik ras gerak si kerina ncerminken perbahanen "Muji Dibata". Perlu ka nge di kune Mamre muji Dibata arah vocal group alu make alat musik tradisionil bagi keteng-keteng, kulcapi, surdam / baluat, suling kombinasi ras gitar, keyboard, ras si debanna. Jaga keharmonisenna. Tentu banci jadi sada ende-enden si mehuli.
❖ Ise si arus muji Tuhan?
I bas ayat 6 isuratken maka si muji Dibata e me kerina si erkesah, e me kita manusia ras kerina tinepa si deban si erkesah mpenangkih ende-enden pujin man Tuhan gundari nari seh rasa lalap.

Arah uraian teks i datas, maka Masmur 150 isina kerna pendilo si mbelin lako muji Tuhan si bengket kubas kumpulan Masmur Haleluya. Masmur enda ngataken man banta maka memuji Allah merupakan tujuan dari seluruh ciptaan dan harus menjadi pernafasannya. Hidup adalah untuk memuji Tuhan. Orang yang memuji Tuhan mulai mengenal Allah dan mengenal dirinya sendiri. (Barth-Pareira, 2013).

Alu bage maka Mamre si muji Tuhan e me Mamre si enggo nandai Tuhan alu payo ras nandai dirina jine. Si man pujin ras man pehagan e me Dibata. Uga pa pe ganjangna pangkatta entah uga gia kita bayakna, labo kita man pujin ras ngarapken pujin. Kerina Mamre i bas erbage-bage pendahin ras kiniliten labo kita ngasup "nandingi" kuasa Dibata si mbisa ras kemulianNa. Kinilitennta e kerina bekas pemere Dibata kap. Kita tinepaNa. E maka jagon ras hebaten nge si nepa asangken si itepa. Dahin si itepa e me muji si nepa ia.

APLIKASI
I bas bahan PA-ta si oge maka ulih pikiren manusia ndai erbahan alat-alat musik ipake kalak Israel jadi alat ( sarana ) guna muji Dibata. Kebayaken budaya lokal ( si semal i bas cuping kalak Israel ) ipakeken alu harmonis rikut ras landek guna muji ras mpermuliaken Dibata si mbisa ras mulia e. Adi Masmur 150:1-6 ngerana kerna alat musik ( sebage kekayaan budaya Israel ) ipake guna muji Dibata, arah PA-ta sekali enda kita Mamre GBKP iajuk gelah makeken unsur budaya Karo e me adat runggu / arih-arih ras kehamaten ngerana Kalak Karo seh min i bas gereja jadi alat ras kesempaten muji ras mpehaga Dibata. Alu kata si deban arah kerina aspek kegeluhenta ( budayanta ) kita banci ras iajuk guna muji Tuhan baik arah ende-enden bage pe arah kita melasken kata, misalna arah Runggu.

Arih-arih ( runggu ) e me sada wujud budaya Karo si meherga si perlu terus si lestariken. Arah budaya runggu me iarihken erbage-bage dahin adat bage pe persoalen anak kuta. Arah pelaksanan runggu e teridah budaya demokrasi i bas kalak Karo si enggo lit mulai kin jaman orangtuanta si adi si perlu si terusken ku wari-wari si reh enda. I bas runggu, kerina si muat bagin e ibegiken katana ras kerina berperan sue ras fungsina masing-masing. I bas runggu adat kalak Karo ( dahin meriah entah ceda ate ) lit 3 unsur si ikut runggu e me Sukut, Kalimbubu ras Anak Beru.

Kerina pihak / unsur runggu e iergai ras meteh alur percakapen alu make cakap lumat ras sihamat-hamaten, siergan sada ras si debanna. Labo lit cakap si potongen. Timai lebe dung ngerana si sangana erbelas nehken sura-surana e maka ialoi alu mehuli. Bagem seterusna. Ras ulih percakapen i bas runggu ipebetehken ( i momoken ) man kerina si pulung gelah kerina si pulung meteh kai ulih percakapen i bas runggu e guna idalanken ras-ras.

Si buat salah sada contoh, i bas suasana menai percakapen runggu kalak Karo, sanga erbelas Anak Beru man Kalimbubuna mehamat kal ia rikut ras pertedisna pe, misalna nina Anak Beru erbelas: Kalimbubu kami, bas kami anak berundu arih-arih, tertinggel-tinggel dage kam janahndu ngisap-ngisap Kalimbubu kami, Mama, impal janah man kam mami, nina turangku man belo. Gelah dikune lit kari pemelasken kami ranan la payo iakap kam, gelah iembarindu kami Kalimbubu, Mama, mami, nina turangku.....ras seterusna. Manis tuhu dikuene bage cakap si man beginken.

Dikune suasana runggu adat kalak Karo enda ilakoken i bas Rapat Mamre, Mamre tentu lebih mehuli ka jadina. Kerina pengurus Mamre Runggun entah Mamre Sektor uga pa pe lit nge orat tuturta kerina i bas rakut si telu: Ersenina, Erkalimbubu ras Eranak Beru. Dikune si minpin Rapat rembang tutur Kalimbubu nta, kita si nungkun tegun Anak Beruna, me banci nge kita erbelas: "Man bandu Ketua MAMRE kami, Kalimbubu ningku sekali ( banci la ibelasken ), kenca ku oge laporen MAMRE Runggun enda, khususna menyangkut Retreat Mamre -ta, entah banci nge inganta Retreat ula padah ndauh-ndauhsa kal impal. Sabab labo kuakap bali kerina gegehta, janah di kune terdeheren si ban entah reh buena nge kari temanta Mamre si banci ikut Retreat", ninta misalna. Beda kange di kune ninta: "Engkai kin maka kena Pengurus Marnre runggun ena ate-ate kena saja erbahan ingan retreat e, ndauh-ndauh ka ban kena, tempa kena si bayakna pe".

Sura-suranta jelas: "uga gelah ingan retreat ula ndauhsa". Tapi cara pertama ras si peduaken berbeda kal penendengna man si megi-megi terlebih-lebih man si ngaloken ranannta.

Entah di kune menyangkut keuangen, rembang Bendahara Mamre seninanta, inget prinsip kalak ersenina, peseh kata mpersingeti senina alu anjar-anjar kerna penataan keuangen. Adi rembang Sekretaris Mamre Runggun Anak Beru-ta, embar-embari ia uga erban surat alu rnehuli, ras seterusna. Ras ula lupa kai ulih percakapen sosialisasiken ( momoken ) gelah kerina anggota Mamre meteh kai ulih ( keputusen ) rapat e.

Ertina, cara kalak Karo erbelas i bas runggu adat merandal kal di kune siterapken i bas arih-arih i bas gerejanta GBKP enda. Ula min sempat ulin suasana runggu adat asangken runggu i gereja ( kegiaten gereja ). Enggo ka ibenaken alu Kebaktin Singkat, ertoto pe enggo, kalak sinandai Dibata je kerina pulung, tapi suasana runggu panas ras megara mbiring ayo peserta rapat e. Pujilah Dibata arah kita runggu alu cara ras bia\ak riggit pekenaken, sisampat-sampaten ( Gal. 6:2 ) bage pe adi kita ngerana maba Kiniulin man simegisa ( Ep. 4:29 ) sue ras Tema PA Mamre-ta enda : "Muji Tuhan Arah Budaya".

DISKUSI

1. Uga nge pengertin ras penggejapenta kerna muji Dibata arah runggu / arih-arih alu make cakap si membangun kebersamaan ras kiniteken . Turiken dage anjar-anjar ras usahaken ula sipotongen cakap sanga seninanta Mamre erbelas. 
2. Kai nari siakap unsur-unsur budaya Karo si banci si pake guna muji Tuhan ras si kembangken arah Kategorial Mamre?

Cataten Usulen (e pe adi pas iakapndu): Adi lit pagi kegiaten HUT Mamre, ban sada perlombaan "Cara Rapat Mamre si Membangun" bagi model runggu adat kalak Karo. Lit jadi Ketua Mamre, Sekretaris Mamre ras Bendahara Mamre, lit ka jadi peserta rapat Materi rapat banci kerna Retreat Mamre, Kebaktin Lapangen Mamre, Olahraga Mamre, HUT Mamre, Keuangen Mamre ras si debanna. Cuba ukur-ukurindu entah lit iakapndu gunana. Adi labo iakapndu lit gunana, banci ka si darami bentuk perlumban si deban. Entah melebesa gia iakapndu aku sekali enda, ersentabi kal aku. Bujur i bas kam nggo nggit ngoge usulenku enda senina, impal, mama, bengkila ningku sekali.

USULEN ENDE-ENDEN

1. KEE GBKP No. 196:1, 2 ( KLIK JUDUL KEE UNTUK MELIHAT TEKS )
2. KEE GBKP No. 274:1 - 3 ( KLIK JUDUL KEE UNTUK MELIHAT TEKS )
3. KEE GBKP No. 354:1 - 3 ( KLIK JUDUL KEE UNTUK MELIHAT TEKS )
4. KEE GBKP No. 304:3, 5 ( KLIK JUDUL KEE UNTUK MELIHAT TEKS )

Pdt. Jekson Barus M.Th. 

HP. 081370273729 

Mohon Bantuan Subscribe dan Like Youtube Channel GBKP KM 8. Bujur

Share this post