Meriah Ukurta, Anakta Enggo Meteh Mehuli - HUT PERMATA GBKP ( Bahan PJJ 1 - 7 September 2019 )

Bahan Bimbingen Perpulungen Jabu-Jabu 1 - 9 September 2019

Meriah Ukurta, Anakta Enggo Meteh Mehuli

( HUT PERMATA GBKP )

Si Man Ogen : Lukas 15: 11 - 32

Anak si bene
11. Iterusken Jesus ngerana nina, “Lit me sekalak perbapan, dua kalak anakna dilaki.
12. Nina si nguda man bapana, ‘O bapa, bereken genduari man bangku erta-erta sikerajangenku.’ E maka ibagi bapana erta-erta e man anakna duana.
13. Kenca piga-piga wari, idayaken anak si nguda e me sikerajangenna, jenari lawes ia ku negeri si ndauh. I je isia-siakenna duitna e.
14. Kenca keri ibahanna duitna e, jadi me kelihen i bas negeri e, janah mulai me iakapna suhsah.
15. E maka erdahin ia ras sekalak anak negeri e. Isuruhna ia ku juma ermakan babi.
16. Nakan iba-iba babi e pe meriah nge min ukurna manca, tapi ise pe la mereken kai pe man bana.
17. Dungna rukur ia, janah nina i bas ukurna, ‘Kerina si erdahin bapangku riba-iba panganna, tapi aku i jenda menam mate kelihen.
18. Laweslah aku ndahi bapangku janah ningku man bana, O bapa, aku enggo erdosa man Dibata dingen ersalah man bandu.
19. Lanai metunggung pe aku igelari anakndu.’
20. E maka berkat ia ndahi bapana.
Ndauh denga pe ia i rumah nari enggo idah bapana ia. Mekuah ate bapana, e maka kiam ia ngayakisa, idakepna janah iemaina.
21. Nina anakna e man bana, ‘O bapa, aku enggo erdosa man Dibata dingen ersalah man bandu. Lanai metunggung pe aku igelari anakndu.’
22. Tapi idilo bapana juak-juakna nina, ‘Pedasken baba ku jenda uis si mejilena janah pakeken man bana! Tamaken cincin ku jari-jarina janah sepatui ia.
23. Jenari geleh sada anak lembu si mburna, gelah erbahan pesta man-man kita.
24. Sabap anakku enda nai enggo mate, tapi genduari enggo nggeluh mulihi; ia enggo bene, tapi genduari mulihken ia.’ E maka ibenakenna erpesta ras ermeriah-meriah.
25. Tapi anakna sintua paksa e i juma. Asum ia i bas perdalanen i juma nari, lanai ndauhsa ku rumah, ibegina sora gendang ras sora rende.
26. E maka idilona sekalak juak-juak, isungkunna nina, ‘Kai si jadi e?’
27. Erjabap juak-juak man bana, ‘Agindu enggo reh mulihken janah isuruh bapandu igeleh sada anak lembu si mburna, sabap agindu si enggo bene e enggo reh mulihken i bas mejuah-juah.’
28. E maka nembeh kal ate anak sintua e dingen la ia nggit ku rumah. E maka reh bapana nami-nami ia i darat.
29. Ngaloi ia man bapana, ‘Enggo piga-piga tahun aku erdahin ras kam bagi sekalak juak-juak janah la pernah kusimbak katandu. Kai kin enggo iberekenndu man bangku? Sada anak kambing pe la iberekenndu man bangku gelah aku man-man ras teman-temanku.
30. Tapi anakndu ah, enggo ikerikenna erta-ertandu ras diberu perdenggal, janah kenca ia mulihken minter igelehndu sada anak lembu pilihen si mbur!’
31. Ngaloi bapana, ‘O anakku, kam tetap ras aku janah kerina erta-ertangku sikerajangenndu kap.
32. Tapi patut pe kita erbahan kerja man-man dingen ermeriah ukur, sabap agindu si nai enggo mate, genduari enggo nggeluh mulihi; ia enggo bene, tapi genduari enggo reh mulihken.’ ”

Lukas 15:11-32 eme perumpamaan anak si bene, lit telu tokoh eme: anak sintua, anak singuda ras bapana. Anak siitekanken,  sintua eme gambaren kaiak farisi ras guru-guru agama, anak singuda eme gambaren kaiak perdosa, ras bapa eme gambaren Dibata simelias dingen perkuah. Perumpamaan siibahan Jesus enda guna njabab sada komplain ntah pe jungut-jungut kalak farisi ras guru-guru agama tupung Jesus kundul ras kalak perdosa, bagepe man Ia ras-ras ( ayat 1-3 ). Ate Jesus arah perumpamaan enda, ngataken tuhu maka si ras Ia eme kalak perdosa, kalak perdosa labo berarti arus ihindari, tapi tetap sialoken ia. Sebab tupung kalak perdosa megiken pengajaren Jesus paksa sie, nuduhkenca maka kalak perdosa e enggo jera ras mulih ia i bas persadan ras Tuhan. Ija pengakap kalak farisi ras guru-guru agama, maka kalak perdosa e igolongken i bas golongan najis / la banci ndeher ras kalak perdosa.

Perumpamaan anak si bene enda pe tole ngataken maka tuhu ia enggo nilah erkiteken kerangapenna kerna erta, tapi kepeken kerangapen e la maba kesenangen si rasa lalap. Rangap nandangi erta erbahanca lupa nandangi Dibata, la maba keriahen tapi kiniseran. Tapi Bapa si perkeleng dingen melias e tetap mereken kehendak bebas man anakNa. Aminna gia anakNa enggo erbahan salah, tapi erkiteken nggit jera ras nggit mulih, tetap ialo-alo bapana ia. Meriah kel tuhu ukur bapana, sebab sadar anakna kerna kesalahan si ibahanna. Lalit penghukumen i bas bapana nari. Justru bas keriahen ukur bapana e, ibahanna pesta, ibere bapana uis simejilena janah pakekenna man anak e, tamakenna cincin ku jari jari anak e janah pakekenna sepatuna. Cincin ngataken maka anak e ndatken sada keduduken simeganjang bas keluarga. Bage pe sepatu ngataken maka anak e sebage sada keluarga, labo ia budak tapi ahli waris.

Perumpamaan anak si bene enda pe ngajarken man banta maka, kiniseran siinanami anak singuda e la erbahanca ia putus asa. Tapi kiniseran e erbahanca sadar ia, maka i rumah bapana melala pangan sibanci ipanna. Janah kiniseran siigejapkenna e erbahanca sadar ia i bas kesalahen si enggo ibahanna, turah ukurna guna mulih dingen jera dingen ngakuken dosa man Dibata dingen ersalah man bapana. I bas penggejapen erdosa ras ersalah enda me, erbahanca meriah kel tuhu ukur bapana dingen ermulia gelar Bapa i Sorga, sebab anak si bene enggo reh mulihken.

Meriah Ukurta, Anakta Enggo Meteh Mehuli, enda me sijadi tema renungen PJJ ta sekali enda. Keriahen ukur orang tua melukah kel situhuna gambarkenca. lja i bas ia erpenggejapen maka anakna enggo meteh mehuli dingen erbahan mehuli janah tetap ncidahken biak-biak si mehuli i bas kegeluhenna, maka eme keriahen ukur orangtua. Keriahen ukur orang tua e banci siidah dingen sigejapken i bas siang ayona, cirem ia, sehat-sehat ia, dingen malem atena ndalani kegeluhenna. Perumpaman anak si bene enda ngajarken kita, maka biak orang tua simelias eme orang tua si tetap nggit ngalemi salah dikune lit anakna erbahan salah ras mindo maaf. Termasuk pe tetap nuduhken kekelengen man kerina anak-anakna, la membeda-bedaken. Dingen pe tetap mereken kehendak bebas si ertanggung jawab man kerina anakna i bas milih masa depanna, termasuk i bas pendidiken ras pendahin anak.

Emaka i bas perayaan HUT PERMATA GBKP i bas tanggal 12 September ( 12 September 1948 - 12 September 2019), si pe 71 tahunken enda mabai anak singuda PERMATA GBKP lebih meteh mehuli janah ngelakoken hal-hal simehuli. Mperobahi lagu langkahna i bas si la payo nari. Janah i bas tambahna umur kategorial PERMATA GBKP enda, ola min hanya umur si tambah, tapi mabai anak singuda PERMATA GBKP guna banci mengisi masa ngudana alu tetap mbiar man Tuhan. Kerina PERMATA GBKP banci ngenanami masa ngudana, masa-masa si tuhu-tuhu produktif guna ngelakoken hal-hal siberkualitas, alu tetap nginget Dibata me si nepa ia, simereken kesempaten man bana ngelakoken kai si iperintahken Dibata. Janah Dibata e tuhu perkeleng, dingen tetap ngalo-ngalo kerina anak singuda PERMATA GBKP i bas si ugapana pe kegeluhenna. Dibata labo ngenen dingen nginget-nginget kesalahen masa laluna.

Dikune anak singuda e bene ( ndauh i bas Tuhan ), tetap Dibata siperkeleng e ngalo-ngalo ia, bahkan mereken keduduken siterbaik man anakNa. Tentu saja adi anak e ngakuken dingen mulihken ku Dibata ras ngelakoken mulihi kerina singena ate Dibata. PERMATA GBKP tetap njadiken geluhna jadi keriahen ukur man orangtua. Erbahanca senang ukur orangtua i bas pendidikenna, pendahinna, carana rukur, carana ngerana, carana i bas ngeloken kai pe, rikutpe i bas nentuken teman geluhna. Meriah ukur orangtua, janah terpuji gelar Tuhan.

EVALUASI
Enggo sidaftarken peluang si banci imanfaatken PJJ nta i bas ekonomi, lingkungan ras kesehaten?

DISKUSI :

1. Turiken kesaksinndu selaku orangtua i bas numpak-numpak anak i tengah jabu, bagepe selaku orangtua i bas numpak-numpak anak singuda PERMATA GBKP i tengah Gereja! 
2. Turiken kai-kai saja pengarapenta nandangi kategorial PERMATA GBKP! 

AKSI
I bas HUT Kategorial PERMATA GBKP si pe-71 tahunken enda, bahan aksi nyata i bas nuduhken keriahen ukurta dingen kekelengen man anak singuda PERMATA GBKP alu ngerayaken HUT Permata banci secara Sektor bagepe Runggun

USULEN LAGU : 

1. KEE GBKP No. 331 : 1, 2, 3 ( KLIK JUDUL KEE UNTUK MELIHAT LIRIK TEKS )
2. KEE GBKP No. 124 : 2, 3     ( KLIK JUDUL KEE UNTUK MELIHAT LIRIK TEKS )
3. KEE GBKP No. 199 : 1, 3     ( KLIK JUDUL KEE UNTUK MELIHAT LIRIK TEKS )
4. KEE GBKP No. 359               ( KLIK JUDUL KEE UNTUK MELIHAT LIRIK TEKS )

TOPIK PERTOTON SYAFAAT :

1. Notoken segelah seisi jabu tetap nggeluh setia man Tuhan.
2. Notoken segelah kerina anak singuda PERMATA GBKP tetap nggeluh meteh mehuli amin pe melala tantangen i bas zaman gundari enda.
3. Notoken Pengurus Pusat PERMATA GBKP, Pengurus Klasis PERMATA GBKP, Pengurus Runggun PERMATA GBKP, ras pe Pengurus sektor PERMATA GBKP segelah ipasu-pasu Dibata pelayanenna.
4. Siturah i bas perpulungen.

Pdt. Mira Mutianta Br. Sinulingga,S.Th.

Mohon Bantuan Subscribe dan Like Youtube Channel GBKP KM 8. Bujur

Share this post