Tuhan Masu-Masu Kam - Entrepreneurship: Kesejahteraan, Kesehaten, Lingkungen ( Bahan PJJ 25 - 31 Agustus 2019 )

Bahan Bimbingen Perpulungen Jabu-Jabu 25 - 31 Agustus 2019

Tuhan Masu-Masu Kam

( Entrepreneurship: Kesejahteraan, Kesehaten, Lingkungen )

Si Man Ogen : Ulangen 28 :1-8

Pasu-pasu man kalak si ngikutken Dibata
(Im. 26:3-13; Ul. 7:12-24)
1“Adi iikutkenndu TUHAN Dibatandu dingen alu tutus ipakendu kerina perentah-perentahNa si kubereken sendah man bandu, ibanNa kam jadi bangsa si belinen asang bangsa-bangsa si deban i babo doni enda.  2Ikutkenlah TUHAN Dibatandu maka kerina pasu-pasu enda jadi sikerajangenndu:
3 TUHAN masu-masu kuta ras jumandu.
4 TUHAN masu-masu kam maka kam ertuah, bayak, maka nterem pupusndu, melala pagendu, melala lembundu ras biri-birindu.
5 TUHAN masu-masu sinuan-sinuanndu ras pangan si ibahan i bas sinuan-sinuan e nari.
6 TUHAN masu-masu kerina pendahinndu.
7 TUHAN naluken musuhndu adi iperangna kam. Iperang musuhndu kam arah sada dalan, tapi kiam ia nadingken kam alu marpar-merap.
8 TUHAN Dibatandu masu-masu pendahinndu, ras ndemi lumbung-lumbungndu alu gandum. Ipasu-pasuNa kam i bas negeri si iberekenNa man bandu.

I bas kinatana, erbage-bage pengangkan tep-tep kalak kerna pemasu-masun Dibata. Megati sijumpai anggota perpulungen GBKP lenga ngangkai rencana Tuhan i bas kerina dampar pendahinna ( oge: profesi ). Seh maka lupa ngataken bujur man Tuhan i bas tep-tep ulih pendahinna pe. Padahal pasu-pasu Tuhan enggo kepe leben ialokenna subuk i bas kecukupan materi, Iingkungan harmonis bagepe kesehatan. Sekaligus melala peluang i bas "jenjang karir" si ialokenna eme rehna arah kuasa Dibata nari.

Mungkin pasu-pasu Tuhan e si idah secara material ntah duit saja. Padahal kesempatan muat bagin i bas pendahin / proyek epe pasu-pasu Dibata ras arus ipegegehi alu kata Dibata gelah ola ndabuh kubas godaan korupsi, manipulasi ras ancaman pelanggaran hukum si deban. Bagepe lit ka biak ngawan si kerehenna bagi kapal selam, pasu-pasu Tuhan ianggap biasa saja aminna pe ia sehat-sehat. Sekali jadi turah pinakit ntah pe perbeben maka minter bene kinitekenna. Teks Ulangen 28:1-8 eme bagin perbahanen Tuhan mimpin Israel ndarat itaneh Mesir nari. Musa mpersingeti mulihi kerna tanggung jabab sinursur bangsa Israel si enggo 40 Tahun nggejabken kuasa Dibata si enggo ngasup ngarak-ngarak kegeluhen Israel bas kerina dampar. I bas daerah Timur Lau Jordan itaneh Moap, nina Musa man Bangsa Israel "Adi ikutkenndu TUHAN Dibatandu dingen alu tutus ipakendu kerina perentah-perentahNa..." Ulih siialoken Bangsa Israel eme : TUHAN masu-masu kuta ras juma, ertuah, bayak, nterem pupus, melala page, melala lembu ras biri-biri. TUHAN masu-masu sinuan-sinuan ras pangan si ibahan i bas sinuan-sinuan e nari. TUHAN masu-masu kerina pendahin. TUHAN naluken musuh. TUHAN masu-masu pendahin. Ertina bangsa Israel jadi bangsa si mbelin.

Tema PJJ, 'Tuhan masu-masu kam', pasu-pasu Tuhan kerna peluang man banta. Pengertin Peluang eme kesempaten ntah pe waktu. Erkawiten ras ndatken peluang i bas: ekonomi, lingkungan ras kesehaten si perlu sipakeken alu mehuli. Perpadanen si isehken Tuhan man bangsa Israel segelah tetap ngikutken ras patuh man perentah-perentah Tuhan. Alu bage Israel ngkelengi Tuhan janah jadi bangsaNa. Erdalan bas dalan Dibata njadiken kita ngasup ngidah peluang ekonomi, sembaba ras lingkungan, kesehatan si mehuli. Potensi Sumber Daya Alam ( SDA ) siialoken Israel i bas taneh perpadanen labo menjadi jaminen kegeluhen maka bangsa Israel adi la ngikutken Kata Dibata. Tapi adi patuh man kerina perentahNa, SDA si sampur e ertambah tambah man kerina sinursur Israel. Kepatuhen ngikutken Tuhan Dibata dingen alu tutus makeken perantah-perentahNa eme ulu "kemapanan" ekonomi, lingkungen si sempabu, kesehatan kula ras pertendin. Arah pendahinta ngasup min kita ncidahken perbahanen simehuli eme kekelengen ras keselamaten si rehna i bas Tuhan nari. Ekonomi, lingkungan bagepe kesehaten eme 3 bagin si jadi perayaken pelayanen GBKP i bas tahun 2019 enda.

EVALUASI :
Enggo silakoken perayan HUT MAMRE alu sederhana?

DISKUSI :

1. Kai-kai saja ulihna man bangsa Israel adi iikutkenna TUHAN Dibata dingen alu tutus ipakena kerina perentah-perentahNa?
2. Turiken erpalasken kinitekenndu i bas kai-kai saja kam enggo ngaloken pasu-pasu Dibata!

AKSI :
Sidaftarken peluang si banci imanfaatken PJJ nta i bas ekonomi, lingkungan ras kesehaten si encidahken kita patuh man Tuhan si masu-masu kita i bas kegeluhenta.

USULEN LAGU :

1. KEE GBKP No. 209 : 1-2  ( KLIK JUDUL KEE UNTUK MELIHAT LIRIK )
2. KEE GBKP No. 374 : 1-2  ( KLIK JUDUL KEE UNTUK MELIHAT LIRIK )
3. KEE GBKP No. 273 : 1-3  ( KLIK JUDUL KEE UNTUK MELIHAT LIRIK )
4. KEE GBKP No. 294 : 1-    ( KLIK JUDUL KEE UNTUK MELIHAT LIRIK )

TOPIK PERTOTON SYAFAAT

1. Gelah ngawan GBKP ngergai pendahin pemere Dibata
2. Gelah pemerintah mengupayakan peluang ekonomi man kerina lapisan masyarakat, tegas i bas peraturan melindungi lingkungan ras ndalanken pelayanen kesehaten.
3. Si turah i bas PJJ.

Pdt. Petros A. Sitepu, S.Th.

Share this post