Radu Mperdiateken - Tantangan Kecerdasan Sosial : Saling Ketergantungan ( Bahan PA Moria 7 - 13 Juli 2019 )

Bahan Bimbingen PA Moria 7 - 13 Juli 2019

Tantangan Kecerdasan Sosial : Saling Ketergantungan

SI MAN OGEN : Pilipi 2: 1 - 4

Jesus Kristus jadi usihen
1. Kegeluhenndu i bas Kristus erbahanca kam megegeh. Ma kin keleng ateNa e ngapuli kam? Ma rembak kin kam ras Kesah Dibata? Ma kin sikeleng-kelengen kam dingen mekuah atendu sekalak nandangi si debanna?
2. Gelah tuhu-tuhu malem ateku, kupindoken man bandu: Ersada min arihndu, sikeleng-kelengen min kam, ersada min geluhndu dingen ersada ukurndu.
3. Ola ibahanndu kai pe erpalasken kerangapen, ntah si erpalasken ukur meganjang. Tapi peteruklah ukurndu sekalak nandangi si debanna. Ola kal iakapndu ulin kam asangken kalak si deban.
4. Ola keperlunndu saja ngenca iperdiatekenndu tapi perdiateken pe keperlun kalak si deban.

T E M A : RADU MPERDIATEKEN

T U J U N : Gelah Moria

Mperdiateken kalak si i sekelewetna
Ngejapken maka ia perlu man kalak sideban ras kalak si deban pe perlu man bana.

METODE PA : Diskusi ras Aksi ( PRT )

Kata Penaruh.
Jaman enda megati igelari jaman erbana-bana ( individualis ). La sitik jelma erpengakap maka ia lanai perlu kalak sideban. Banci si idah, enterem kalak si sibuk ras HP-na saja, banci ia tawa, berjut, merawa bagepe ngandung sisada, kenca idahna isi tenah ( pesan ) i bas HP-na. Bage pe lit gundari enda rumah si make bide (tembok) meganjang kal, seh maka lanai banci si idahen ras kalak si lit i bas rumah si lit i sebelahna. Lanai ersosialisasi ras kalak sideban. Kecibal si bagenda pe ngkenai kegeluhen Moria / pernanden GBKP.

Bagin Pustaka Si Badia, si jadi ogenta sendah, ngajuk kita gelah nggeluh ersada ras kalak sideban, labo erbana-bana (individualis) ntah pe lanai erdiate kerna kalak sideban.

Mpebagesi Pengangkan Kerna Ogen
Kitab Pilipi enda isuratken Paulus man Perpulungen Pilipi. Paksa e, kuta enda masuk bagin negara Romawi. Perpulungen enda eme ulih pelayanen Paulus ras teman-temanna ( Silas, Timotius ras Lukas). Kenca piga-piga tahun Paulus nadingken Pilipi, ibegina maka lit ancamen i bas perpulungen enari ( internal ) si ncedai kiniersadan perpulungen, ancamen enda emekap biak si mentingken diri jine, kalak sideban lanai penting. Biak enda eme tempas sideban kerna kesombongen sekalak jelma si erpengakap maka dirina ulin hebaten asangken kalak sideban. Biak si bagenda tentu banci ncedai kiniersadan bagepe enghambat kemajun kiniersadan perpulungen. Arah surat enda Paulus ningetken kerna uga riahna ukurna ngelai i Pilipi perban gejapkena kerna kiniersadanna ras perpulungen pemena nari ia ngelai kuta enda ( 1:5 ). Kiniersadan enda teridah arah pengalaman Paulus kidekah nggeluh i kuta Pilipi, kuga ia ras kerina kalak Kristen mere dingen ngalo i bas persadan e ( memberi dan menerima ) alu meriah ukur ( 4.15 ) Emaka Paulus tetap erpengarapen maka kenna perpulungen mperta.hanken perbahanen si mehuli enda bagepe mpeteguhi kinitekenna alu erlajar kerna Berita Si Meriah alu tutus. Adi kerina perpulungen tetap ersada arih, sikeleng-kelengen, ersada geluh ras ersada ukur, tentu malem ate Paulus natap perpulungen enda. Janah, tentuna malem ate Dibata Si mada perpulungen. Paulus mpersingeti perpulungen enda gelah ola sempat kiniersadan si enggo ibangun i bas Kristus icurnai kepentingen pribadi, kinikengen ukur bagepe roh perpecahen ( 2 :1 - 4 ). Emaka ngergai kalak sideban penting kal iasuhi, adi ngasup kita ngergai kalak maka nggit kita ngukurken si mehuli kerna dirina. Adi lit perbedan i tengah-tengah perpulungen, arus idungi alu dem kekelengen gelah kiniersadan ras persadan kalak si erkiniteken la terpecah bagepe tercurna. Kerina anggota perpulungen nggit njaga kiniersadanna alu la mpebelin kepentingen ras kehebaten dirina saja

Pengkenaina.
Dietrich Bonhoeffer sekalak tokoh si mate i bunuh Adolf Hitler perban nehken sora kebenaren, pernah ngerana, nina : "Banyak Orang yang sedang mencari telinga yang mau mendengar dengan sungguh-sunggguh. Sayang mereka tidak menemuinya di antara orang Kristen. Sebab orang Kisten berbicara ketika mereka seharusnya mendengar. Jika orang tidak lagi mendengar saudaranya, maka dia juga tidak lagi mendengar Allah. Jika orang tidak lagi mendengar dengan sadar dan tekun, maka dia akan segera berbicara tentang hal-hal yang tidak pokok. Dan dia tidak akan berbicara dengan sungguh-sungguh kepada orang lain. Namun hal ini tidak disadarinya."

Kai si ikataken Bonhoeffer enda nuduhken situasi kegeluhen kalak Kristen. umumnna. Sura-suranta lanai terjebak ku bas sada "lingkaren setan" berulang-ulang. Umpamana, adi kalak la mperdiateken ntah la peduli man banta, maka kita pe la peduli man bana. Paulus ngajuk kita gelah erlajar mperdiateken kalak sideban si i sekelewetta. Adi lit Moria si erbebe, i bas geluhna, maka Moria sideban arusna jadi si numpak-numpaksa. Perukuren ras perbahanen saling percaya perlu ikembangken gelah reh pagulhna kiniteken, gelah reh ngasupna Moria mperdiateken sada ras sidebanna: Kiniersadan bagepe kinimediaten nandangi sada ras sidebanna banci jadi tambar si mesinteng ras maba kemalemen ate nandangi jaman enda.

DISKUSI

Oge ulihi Pilipi 2 : 1-4 si la mehuli si apai nge si lit i bas kegeluhen perpulungenta si erbanca kurang merudu kita ndahi PA Moria?
Biak si kuga nge si arus si pekeke gelah kemalemen ate e jadi sikerajangen Moria? Ras uga carana?

Aksi

Aturken 3 kalak sada kelompok. Tiap Moria nuriken sada rahasiana ( perbebenna ) man temanna si sada kelompok. Erjanji kam maka rahasia e anggota kelompok ngenca metehsa. Perbulangenndu pe la banci metehsa. Ras pegancih kam notoken perbeben temanndu si sada kelompok.
Perkunjungen Rumah Tangga ( PRT ) man Moria si enggo lanai aktif.

Pdt. Josep Sembiring, STh.