Njaga Kesehatan Arah Pangan - Jagalah Kulandu ( Bahan PA Mamre 7 - 13 Juli 2019 )

Bahan Bimbingen PA Mamre 7 - 13 Juli 2019

Njaga Kesehatan Arah Pangan

Ogen : Hakim-hakim 13 : 1 - 5

Tubuh si Simson
1. Bangsa Israel erdosa ka man TUHAN, e maka ipelepasNa bangsa Pilisti ngkuasai bangsa Israel empat puluh tahun dekahna.
2. I bas paksa e lit sekalak dilaki i kuta Sora, Manoah gelarna. Ia i bas suku Dan nari. Ndeharana la banci mupus.
3. Sekali jadi malekat TUHAN encidahken bana man diberu e, janah nina, “La kam pernah mupus, tapi lanai ndekah nari mehuli kulandu, ipupusndu sekalak anak dilaki.
4. Tengeti maka ola kam minem anggur ntah bir, ola pan pangan pantangen.

5. Janah kenca tubuh anak e, la banci iguntingndu bukna, sabap tangtang tubuhna nari anak e enggo iendesken man Dibata jadi kalak Nasir. Ia pagi mulahi Israel i bas bangsa Pilisti nari.”

Tema : jagalah Kulandu

Tujun : Gelah Mamre

Njaga kesehaten ( ngaturken pangan si sehat )
Ngasup nehken peraten Tuhan arah kula si sehat

Metode : Diskusi

KATA PENARUH
Lit pepatah ngataken: "di dalam tubuh yang sehat terdapat jiwa yang sehat". Kuan-kuanen enda nuriken maka lit hubungen si erkawiten kula ras tendi. Adi kulanta sehat tentu erbahansa tendita pe sehat. Sue ras si isuratken i bas kuan-kuanen 17:22 ikataken: "hati yang gembira adalah obat yang manjur, tetapi semangat yang patah mengeringkan tulang". Salah sada cara guna njaga kula / kesehaten eme alu njaga / ngaturken pangan, sabab arah pangan kulanta nggeluh. Pangan si sehat nampati kulanta sehat ras megegeh. Pangan si la sehat janah perpan si la teratur entah la sue ras keperlun banci erbanca kulanta sakit

URAIAN TEKS/TAFSIREN
Bahan ogenta I bas Hakim-hakim 13 : 1 - 5 ( 25 ) nuriken kerna ketubuhen sekalak Hakim si tergelar Simson. I bas Padan Si Ndekah, adi kalak Israel ngelakoken singena ate Dibata, ndalanken undang-undang Dibata alu payo maka ia ndatken pasu-pasu. Tapi adi ia ngelakoken kejahaten ntah pe erdosa man Dibata, la ngergaken undang-undang Dibata maka Dibata mpereh ukumen man bana. Si enda banci siidah i bas ayat sipemena i bas ogenta maka penjajahen kalak Pilistin nandangi Israel i turiken sebage perbahanen Dibata erkite-kiteken bangsa e erdosa man Dibata. Penjajahen e jadi 40 tahun dekahna. Ayat enda nuriken maka Dibata make bangsa Pilisti jadi alatNa guna ndidik Israel segelah bangsa e banci mulihken man Dibata. Tapi Padan si Ndekah pe nuriken man banta maka, aminna Israel erdosa man Dibata tapi adi ia mulih man Dibata maka Dibata mereken perkuah ateNa man bangsa e janah i pulahiNa bangsaNa i bas penindasen sireh erkiteken dosa-dosa bangsa e. Tole pe icidahken maka Dibata e Dibata si perkuah ras keleng ateNa bangsaNa. Adi siinget kuga Dibata mulahi bangsaNa i bas perbudaken i Mesir ( Kel. 6:5 ) I turiken maka Dibata mbegi perderkuh bangsa Israel. Nderkuh bangsa e erkiteken suina iakapna. Emaka reh Dibata arah Musa guna maba pembebasen man Isarel.

I bas ogennta Dibata ersura-sura mulahi bangsaNa i bas ukumen nari alu mpekeke sekalak Hakim i bas bangsa Israel nari. Hakim i jenda labo seri ras hakim bas pengadilen si genduari. Sekalak Hakim eme pejuang sebage penyelarnat si ndatken pemere khusus i bas Dibata nari guna mulahi Israel i bas musuh nari. Janah memang lit penekanen dahin Hakim i jenda sebage alat Dibata negakken ras nehken keadilen ras kebenaren.

I bas ayat 2-5 ituriken maka Dibata make ndehara Manoah guna mpetubuh Simson. Sada siperlu si idah maka ndehara Manoah e gempus ( mandul ). Tapi ia ipake Dibata ncidahken kuasaNa janah banci jadi enda nekanken pendahin Dibata. Malekat Dibata reh nuriken rencana Dibata man ndehara Manoah maka ia pagi mupus sekalak anak si jadi "Nasir" Dibata. Nasir eme kalak si ngendesken dirina man Dibata janah umumna arus ngikuti aturen-aturen khusus. I bas Bilangen 6:1-21 ituriken maka sekalak Nasir la banci ncukur bukna, la minem anggur atau inemen si erbanca mabuk, la banci ngkuit mait. Nasir pe arus ngikuti kerna aturen kerna pangan si halal ras haram (bdk. Im. 11).

I bas ayat 4, Malekat ngataken man ndehara Manoah gelah metenget gelah ula minem anggur ntah bir, ula pan pangan pantangen. Jelas man banta i bas konteks enda pantangen si perlu i jaga ndehara manoah erkawiten ras anak si bakal i petubuhna, eme sekalak nasir Dibata. Emaka panganna pe la banci sembarangen. Tapi arah dampar si deban perentah malekat e pe mbaba ulih si mehuli man ndehara Manoah sabab adi sekalak Diberu si natang tuah la mehuli adi mbue minem inemen si erbanca mabuk I bas cakap Indonesia kata "tengeti maka ula kam..." iterjemahken alu kalimat "oleh sebab itu peliharalah dirimu.....". kata "pelihara" banci si ertiken sebage perbahanen njaga diri khususna sebage bagian i bas nehken peraten Dibata. Ndehara manoah arus mpekena-kena bana janah iajuk ia gelah ipesirangna dirina ras pangan-pangan si ilarang Dibata. Perentah malekat banci iertiken sada pengajuk guna njaga kesehaten alu pangan si sehat, sabab kesehaten eme media i ja pendahin Dibata banci i sehken man doni.

APLIKASI
Lit kuan-kuanen ngataken maka "adi mesepak kin batangna erkiteken buahna, mesepaklah". Kuan-kuanen enda adi i nen dari sudut pandang kesehaten lenga banci terterima kal. Sabab kai gunana melala gia buahna tapi mesepak batangna. Melala gia si banci sipan tapi adi erkiteken mbue si pan maka mesepak kita ( sakit ) tentu labo lit ertina. Emaka perlu sijaga pangannta gelah kita sehat, sabab kesehaten me kebayaken si tuhu-tuhu. Emaka perlu kita ngaturken panganta si bergizi ras sehat janah si aturken porsina. Sabab adi berlebihen pe la mehuli man kulanta.

Selain pangan si ergizi tentu arus siperdiateken kata Dibata kerna pangan si banci si pan, sabab e pe mpengaruhi kesehaten kulanta, sabab adi si pan pangan si la i pasu-pasu Dibata labo jadi kesehaten man banta. Mamre perlu mpedauh dirina / njaga kesehatenna arah pangan si la sehat / si erbanca rnabuk, obat-obaten terlarang / narkoba. Sebab kerina pangan si e labo saja erbahanca kesehatennta terganggu tapi erbahanca kita la ngasup ngkuasai diri bagepe ndalaken singena ate Dibata. Memang kerina pangan banci i pan tapi labo kerina mehuli man pangan bage pe labo kerina arus i pan.

Selaku anak-anak Dibata perlu si jaga kulanta arah erbage-bage si la mehuli. Secara kiniteken labo pangan saja erbahanca kita sehat tapi pasu-pasu Dibata. Emaka pangan si la i pasu-pasu Dibata ula si pan. Pangan ulih nangko, pangan ulih korupsi rsd. Pangan sibagenda kerina mpeturah rawa Dibata.

Njaga kesehaten kula tuhu-tuhu arus jadi perhatinnta. Sabab kula si sehat erbahan kita ngasup ngelakoken perbahanen-perbahanen si ngena ate Dibata. Arah kesehatennta kita banci jadi alat Dibata, bagi ndehara Manoah, nehken rencana keselamaten Dibata man doni enda. Tapi adi kita sakit ntah pe lemah maka mesera kita nehken singena ate Dibata.

DISKUSI

Uga nge pengaruh kesehaten kula nandangi kesehaten pertendin ras perukuren? Lit nge pengaruhna uga kita nehken singena ate Dibata?
Kai-kai saja si megati jadi tantangen man Marnre nggeluh sehat arah njaga panganna? Turikenlah janah uga solusi si banci ilakoken.

USULEN ENDE-ENDEN