Perbahanen Kalak Pentar - Enterpreneurship : Kreatif ( Bahan PJJ 7 - 13 Juli 2019 )

Bahan Bimbingen Perpulungen Jabu-Jabu 7 - 13 Juli 2019

Perbahanen Kalak Pentar

( Entrepreneurship : Kreatif )

Ogen : Pengerana 11 : 1 - 6

Perbahanen kalak pentar
1. Berekenlah ertandu man kalak si ndauh i kepar lawit
i bas sada paksa denggo ibereken Dibata man bandu untungna.
2. Tamakenlah duitndu i bas piga-piga usaha -- tuhu, i bas mbue usaha --
sabap la itehndu cilaka si banci reh bandu i babo doni enda.
3. Kempak apai pe perbulak batang kayu,
tetap nge ampar i bas inganna mbulak.
Adi embun enggo dem lau,
ndabuh me udan meder.
4. Kalak si nimai mehuli lebe wari,
lalap ia la merdang, lalap la rani.
5. Kai pe Dibata si njadikenca
janah la terantusi pe.
La iangkandu perbahanenNa.
Bagi la iangkandu pemenan kegeluhen i bas bertin.
6. Tupung erpagi-pagi arus kam merdang
bage ka lah perbahanenndu tupung berngi.
Sabap la sieteh apai si mehulina perturahna,
banci jadi duana mehuli perturahna.

Kitab Pengerana enda melala nuriken kerna lalit gegeh manusia ngantusi wari-warina i bas paksa si reh. Tapi i bas Dibata enggo lit kerina beliganna, enggo iaturken Dibata rikutken sura-suraNa. Rikutken perbahanen manusia si mehuli alu modal kiniteken iajuk maka pang mereken erta man kalak i kepar lawit, janah namaken duit i bas piga-piga usaha. Berekenlah ertandu man kalak si ndauh kepar lawit, i bas sada paksa denggo ibereken Dibata man bandu untungna ( ay. 1 ). Si enda banci si ertiken maka i bas kita rusaha pang nuanken modai gelah i bas paksana banci ka sialoken ulihna.

Tamakenlah duitndu i bas piga-piga usaha - tuhu, i bas mbue usaha sabap la ietehndu cilaka si banci reh bandu ibabo doni enda. Maksudna ijenda eme ngajuk kita gelah pentar, sabab labo sieteh kai kari jadi i bas sada usaha tapi adi lit piga-piga usaha, gagal sada usaha, banci ka rulih i bas usaha si deban. ljeme beluh kita ngidah peluang guna rusaha i bas geluhta. Adi perjuma ietehna kai si man suanen siiperluken kalak i tiga. Labo ikut ikuten, adi meherga lacina minter nuan lacina kerina i bas sada kuta e. Tapi ngenen peluang kai siiperluken i bas paksa ia nuan gelah banci kena ergana.

I Palestina jarang kel reh udan i bas sada tahun e, emaka tanda-tanda reh atena udan, gelap ras lenggur. Batang kayu pe mbulak i bas inganna.Tapi gejala alam si jadi la ngolangi ndahiken dahin. Ula mbiar lit masalah i bas ndahiken dahin. Tapi dahiken lebe dahin e dikune lit masalah,i je maka darami serpang pulahna. Pendahin labo pernah dung adi la pernah idahiken. Adi lalap mbiar rugi i bas rusaha, mbiar udan adi berkat ku juma, mbiar nuan erkiteken udan meder, entah erkiteken mbiar angin meter maka la surung rani. Adi buen kebiaren sisuanken i bas geluhta ndigan pe labo banci kita rulih alu melala.

Arah bahan renungen PJJ-ta enda, iajuk kita erdahin nuanken benih bas erpagi-pagi tapi I bas berngi pe banci ka ndahiken dahin si deban. Ije me situhuna kalak si pentar ndarami peluang si banci ngembangken usaha. La sada ngenca ietehna usaha, ia kerja keras ras kreatif guna nambahi kiniliten ibas jabuna rikutken pasu-pasu Dibata. Ertina maka labo erbintuas suari ras berngi. Kerja keras ras kreatif ia ngelitken "usaha sampingen" guna nambahi perbeliten jabu. Ietehna peluang siapai sibanci nambahi pemasuken man bana janah pang ia ngelakokenca.

I bas mbangun diri guna ngergai pendahin, ndarami peluang simbaru, pang ngalaken resiko gelah banci pentar dingen turah i bas dirina jine biak si kreatif. Labo sada pendahin e saja ngenca ietehna dahin, banci ka idahiken dahin si deban guna nambahi perbeliten. Kalak si kreatif, idahna peluang kal si banci runtung i bas usahana. Pang ia muat resiko, labo minter untungna lebe iayakina tapi bas proses e pang ia erpasang janah ndauh ku lebe pe pang ia rusaha. Emaka cara rukur si bage nge lebe si periu si peturah i bas dirinta. Ula min perayakenta minter ulih si metala, tapi kinipangen erpasang ras teknandangi dahin si idahikenna e mehuli dingen rulih. Tapi labo engkurangi kinigermetenta guna ngidah perubahen-perubahen si meter bas kegeluhenta enda. Getah alu bage kai pe si dahiken kita la sia-sia, tapi kerina erguna man banta bage pe kemulian Dibata.

EVALUASI :
Kai aksi si enggo silakoken nandangi serayan Tuhan bas sektor ntah pe runggunta? Adi langa silakokenlah.

DISKUSI  

1. Turiken bentuk-bentuk kreatifitas i bas pendahinta sekalak-sekalak
2. Usaha-usaha kai nge si banci ikembangken dingen lit peluang rulih rikutken inganta tading?

AKSI :
Sicubaken ndalanken jabapen diskusinta i bas wari-wari si reh enda.

USULEN LAGU

1. KEE GBKP No. 201 : 1,2 ( KLIK JUDUL KEE UNTUK MELIHAT LIRIK TEKS )
2. KEE GBKP No. 254 : 1,3 ( KLIK JUDUL KEE UNTUK MELIHAT LIRIK TEKS )
3. KEE GBKP No. 281 : 1,3 ( KLIK JUDUL KEE UNTUK MELIHAT LIRIK TEKS )
4. KEE GBKP No. 374 : 1,2 ( KLIK JUDUL KEE UNTUK MELIHAT LIRIK TEKS )

TOPIK PERTOTON SYAFAAT

1. Gelah perpulungen pang ngelakoken simehuli man kalak si deban.
2. Gelah perputungen lebih positip rukur ngalaken perbeben geluhna
3. Gelah reh pentarna i bas rusaha ras pang nanggung resiko.

Pdt. Natalidna br Tarigan, M.Th.

Share this post