Ngangkai Kerna Keselamaten Alu Payo - Konfesi GBKP: Konsep Ras Dimensi Keselamaten ( Bahan PA Mamre 14 - 20 Juli 2019 )

BAHAN BIMBINGEN PA MAMRE TANGGAL, 14 - 20 JULI 2019

( KONFESI GBKP: KONSEP RAS DIMENSI KESELAMATEN )

Ogen : Epesus 2: 1 - 10

I bas kematen nari ku kegeluhen
1. I bas paksa si lewat, erkiteken salahndu ras dosa-dosandu, mate pertendinndu.
2. Paksa si e nai iikutkenndu kebiasan doni si jahat. Iikutkenndu peminpin penguasa-penguasa si lit i bas awang-awang, e me kesah si genduari erdahin i bas kalak si la nggit erkemalangen man Dibata.
3. Si tuhuna kita pe nai bali nge ras kalak enda. Kita nai nggeluh rikutken sura-suranta saja janah sidalanken si sentudu ras sura-sura kulanta ras ukurta. Sue ras biakta, kita pe bali ras kalak si deban, patut ngenanami pernembeh ate Dibata.
4. Tapi perkuah ate Dibata la ersibar, janah mbelin kal keleng ateNa man banta.
5. Seh maka asum kita mate i bas pertendin erkiteken salahta, ipegeluhNa kita mulihi radu ras Kristus. Erkiteken lias ate Dibata nge maka kam enggo terkelin.
6. I bas persadanta ras Kristus Jesus, ipekeke Dibata kita ras Kristus, janah ipekundulNa kita ras IA i bas ingan si meganjang.
7. Si enda ibahan Dibata gelah seh rasa lalap icidahkenNa kiniulinNa si lanai kal lang-lang belinna, e me lias ateNa man banta i bas Kristus Jesus.
8. Sabap erkiteken lias ate Dibata nge maka kam enggo terkelin, erkiteken tek kam man Kristus. Labo bekas perbahanenndu, tapi pemere Dibata kap e.
9. Labo ulih pendahinndu e, e maka labo lit dalanna ise pe muji bana.
10. Tinepa Dibata kap kita; i bas persadanta ras Kristus Jesus, ijadikenNa kita guna ndahiken dahin-dahin si mehuli si enggo leben irencanakenNa, gelah sidahiken e.

Tema : Ngangkai Kerna Keselamaten Alu Payo

Tujun : Gelah Mamre

1. Ngangka maka Keselamaten e erkiteken Perkuah ate Dibata si iaminken i bas Kiniteken erkelangken Berita Si Meriah.
2. Meteh maka keselamaten e la terjeng sipepagi ( surga ) ras la saja kerna keselamaten tendi. 

Metode : Ceramah/Diskusi

KATA PENARUH
Salah sada tandana GBKP enggo jadi sada gereja simandiri ( dewasa ) eme arah lit na pengakun kiniteken ( konfesi ). Konfesi eme sada ulih pergumulen GBKP erpalasken konteks GBKP ( Karo ). Erpalasken Tema ras Tujun PA-nta enda, sijadi pembahasenta sada bagin i bas konfesi eme 1. Kerna Konsep keselamaten ras 2. Dimensi keselamaten.

1. Konsep Keselamaten: encakapken kerna kuga cara / dalanna kita banci ndatken keselamaten; ise si iselamatken Dibata; kai sibahan manusia i bas ia enggo iselamatken Dibata.
2. Dimensi Keselamaten: ertina: katawari kita iselamatken ( ndigan waktuna ) ras kai / kadenta si iselamatken Dibata. 

Arah 2 bagin si jadi percakapen i datas iarapken pengangkanta Mamre banci reh sertana sekaligus reh ngasupna kita ngidah nilai-nilai kebenaren ajaren kiniteken Kristen, bage pe sieteh ija bedana ajaren Kekristenen ( khususna Protestan ) ras agama sideban.

URAIAN TEKS / TAFSIREN
Ngerana kerna konsep keselamaten, man kalak Kristen pe banci lenga seri pengangkanta. Lit denga si ngertiken maka guna ndatken keselamaten eme alu ndalanken perbahanen simehuli umpamana tutus ku perpulungen, nampati kalak si man sampaten, nehken pengataken bujur arah persembahen / duit, rsdna. Payo kin pengangkan si bage?
1. Konsep Keselamaten:
Ayat 1-3 nuriken kerna kecibal manusia ope iselamatken ija kita si genduari enggo iselamatken, kita pe nai bage ka nge. Biak perukuren dosa enggo ngelangketi manusia seh maka manusia la nai ngasup pulah i bas ukumen nari. Kecibal enda igelari 'mate secara pertendin.' Arah usaha ras perbahanen manusia, ia la ngasup mulahi dirina guna selamat.
Ayat 4-10, ijelasken ras itegasken Rasul Paulus maka manusia iselamatken eme erkiteken lias ate / perkuah ate Dibata. Perkuah ate Dibata e eme pemere Dibata si cuma-cuma ( anugrah ). Alu bage keselamaten e la arah usaha ntah pe perbahanen manusia. Peristiwa kiniseran seh mateNa i kayu persilang eme bukti si tangkas ija Dibata mewakili rnanusia si arusna kita si nggengkenca. Perkuah ate Dibata e i ialoi manusia alu kiniteken ( iman ). Pengangkan / kesadaren manusia si bagenda rehna arah Berita Si Meriah si ialoken / respons manusia janah respons / kiniteken enda i cidahken manusia arah ndahiken dahin-dahin sirnehuli singena ate Tuhan.
I bas "semboyan Reformasi" si ilakoken Martin Luther ras teman-temanna eme si igelari: Sola Gratia = keselamaten erkiteken Anugrah / perkuah ate Dibata; Sola Fide = keselamaten erkiteken kiniteken ( iman ); ras Sola Scriptura = keselamaten manusia erkiteken pendahin Berita Simeriah ( Pustaka / Firman Allah ). Erkiteken si e tole nina Paulus: la lit alasenta guna muji bana sebab keselamaten e labo ulih perbahanen manusia.

2. Dimensi Keselamaten: 
Jabapen si rusur si begi adi lit penungkunen: enggo kita iselamatken? Jawabenta alu tegas 'enggo!' sebab asum kita nandai ras ngaloken Jesus jadi Tuhan ras Juruselamatta kita enggo iselamatken. Sie si iertiken ras si teki asum kita iperidiken. Tapi jawapen si lebih serta la cukup sada "dimensi waktu" saja ( enggo )sebab Dibata si itandai kita eme Dibata si terus-menerus erdahin guna keselamaten manusia. Emaka lit 3 dimensi keselamaten eme: 1. ENGGO ( past tense ) eme asum kita ngaloken Jesus selaku Tuhan; 2. SANGANA ( Present Continuous Tense ), ertina: genduari e pe secara terus-menerus Dibata nelamatken kita i bas doni enda;

3. PAKSA SI REH ( future tense ) eme: keselamaten si sempurna si jadi 'ketedehen' nandangi kerina kalak si tek man Jesus, eme asum kerehenNa mulihken mbaba kita ku surga Rumah Bapa.
Arah 3 dimensi keselamaten enda jelas maka keselamaten e la terjeng keselamaten tendi ( roh ) tapi pe keselamaten kula ( jasmani ). Enda igelari pe keselamaten si kuh ( holistik = keselamaten si menyeluruh entah pe lahir batin ).

APLIKASI

1. Kita iselamatken erkiteken perkuah ate ( anugrah ) arah kematen ras kekeken Tuhan Jesus. Enda me Berita Si Meriah ( berita Injil ) sijadi inti / pusat kinitekenta. Litna pengangkan / kesadaren sibagenda eme arah kesaksin ras pendahin Berita Si Meriah si seh man banta.
2. Keselamaten e labo tendi saja tapi pe kula ( keselamaten seutuhna eme lahir-bathin ); labo pagi i surga saja, tapi genduari i doni enda.
3. Perbahan keselamaten e labo arah perbahanen, maka agama Kristen labo agama moral ( labo agama legalis ); janah agama Kristen tidak mengenal istilah 'amal'. Adi silakoken perbahanen si mehuli, tutus ku PA, perpulungen, erdiakoni, e pengataken bujurta man Dibata.
4. Selaku kita si enggo ngaloken keselamaten si Cuma-Cuma ( anugrah ) e, mahan bana kita pasti ( arus ) mpehaga Dibata arah perbahanenta si teptep wari.

DISKUSI

1. Mari turiken mulihi dalan keselamaten ras ulih keselamaten i bas kinitekenta ( diskusiken! )
2. Arah pengangkanta si reh payona kerna keselamaten i bas kinitekenta, kai banci sibahan jadi komitmen / tekadta selaku Mamre / imam itengah jabu?

USULEN ENDE-ENDEN

1. KEE GBKP No. 282: 1-3  ( KLIK JUDUL KEE UNTUK MELIHAT LIRIK TEKS )
2. KEE GBKP No. 62: 1, 2    ( KLIK JUDUL KEE UNTUK MELIHAT LIRIK TEKS )
3. KEE GBKP No. 290: 1-3   ( KLIK JUDUL KEE UNTUK MELIHAT LIRIK TEKS )
4. KEE GBKP No. 254: 1-3   ( KLIK JUDUL KEE UNTUK MELIHAT LIRIK TEKS )

Pdt. Hermanto Tarigan, M.Th 

Pendeta Mamre GBKP 

HP. 081396050383

Share this post