Dibata Ngaturken Kula Alu Serasi - 78 Tahun GBKP Njayo ( Bahan PJJ 14 - 20 Juli 2019 )

Bahan Bimbingen Perpulungen Jabu-Jabu 14 - 20 Juli 2019

Dibata Ngaturken Kula Alu Serasi

( 78 Tahun GBKP Njayo )

Ogen : 1 Korinti 12 : 20 - 26

20. Tuhu, melala ringring, tapi kula sada nge.
21. E maka labo banci nina mata man tan, “Aku la perlu kam!” Bage pe labo banci nina takal man nahe, “Aku la perlu kam!”
22. Tapi sebalikna, ringring si tempa-tempa la megegeh e, e nge si la banci langna.
23. Ringring si la meherga siakap i bas kula, si e me si lebih sipehaga; janah ringring si mehangke encidahkenca, si e nge si lebih siuisi alu mehuli.
24. Tapi ringring si labo mehangke encidahkenca labo perlu siuisi.
Dibata enggo ngaturken kula alu serasi, seh maka ringring si kurang meherga lebih iergaken.
25. Gelah kula e la erbelah-belah, tapi sada-sadai ringring e radu seri mperdiateken ringring si deban.
26. Adi sada ringring suin, kerina ringring si deban pe ikut nggejapkenca. Janah adi sada ringring ipehaga, kerina ringring si deban ikut ermeriah.

I bas sada bangunen rumah si mejile, tentu erbage-bage bahan bangunen si lit ije. Lit batu bata, semen, pasir, kayu, seng, besi, rsd. Tukang bangunen mpersada kerina bahan-bahan e, jadi sada gedung si mejile. Kenca dung sada bangunen, lanai bo teridah bahan-bahan ndai peserap-serap, tapi teridah sada bangunen si sempabu sada ras sidebanna.

Bage me Rasul Pauius ngumpamaken kegeluhen perpulungen desken sada kula. Kula e mbue ringringna, tapi sada, utuh, si labo terpesirang sada ras sidebanna. Lit masalah si turah i bas perpulungen paksa e, ija sada kelompok gegehen ia akapna asa kalak si deban, si erbahanca lanai teridah kiniersadaan i bas perpulungen e.

Isingetken i bas ayat 13 "Bage me pe kita kerina, subuk kalak Jahudi bagepe kalak Junani, subuk budak bagepe kalak bebas enggo iperidiken alu Kesah si sada...".

Tentu ringring i bas kulanta la terpesirang sada ras sidebanna. Bicara banci ringringta ercakap sada ras sidebanna, tentu labo lit ringring si ngatakenca "aku la perlu kam", sebab labo lit kesirangen antara sada ringring ras ringring sidebanna. Kerina ringring e ersada i bas sada kula. Ringring e arus si ergan, bicara sada suin tentu tergejab pe man ringring si deban. Bage pe ringring si kin iakap la meherga i bas kula, e ka arus lebih ipehaga, gelah turah semangat i bas ia.

Ngawan perpulungen i bas gerejanta labo seri, e enggo pasti! Subuk i bas status sosial, pendahin, latar belakang pendidiken, latar belakang kuta, rsd. Kecibal si bagenda rupa banci erbahanca sekalak jelma megegeh i bas sada-sada bagin, kalak si deban banci lemah ras sebalikna. Si penting "perbedaan labo jadi kelemahen, tapi jadi sada gegeh". Justru Dibata njadiken kita pelain-lain e labo gelah erbelah-belah,tapi lit je gegeh guna banci si sampat-sampaten.

GBKP i bas tanggal 21 Juli 2019 enda enggo 78 tahun njayo, ertina ngasup nggeluh mandiri i bas teologi, daya ras dana. Tanda-tanda perpulungen si dewasa salah sadana eme mpebelin biak kiniersadan, ras mpekitik, meneken biak-biak si maba kesirangen. Tentu la terjeng bage ngenca, uga min maka banci gegehta si lit la terjeng kita ngenca ngenanamisa, tapi banci tergejab man kalak si deban subuk secara pribadi entah pe kelompok. I bas Runggunta mungkin saja lit sektor si kote, subuk secara perduiten bage pe perukuren. Tentu labo si pandangi, seh maka lanai "percaya diri" sektor e i bas dahin-dahin gereja subuk Pertua Diakenna entah pe ngawan perpulungenna. Tapi sektor si lit Iebih kengasupenna, mari si perdiateken temanta, gelah igejabkenna maka sada kula ia i bas Kristus. Tentu mehuli kel adi sikembangken hubungen antar runggun ntah pe hubungen antar klasis. Ras enda nggo me teridah i bas gerejanta, uga klasis si megegeh nampati piga-piga dahin nandangi klasis-klasis si kurang gegehna. Tentu man si enggo ngelakoken, ula ngadiken, man si langa ngelakoken, mari si benaken.

"Kupuji Tuhan i tengah-tengah perpulungenNa si mbelin, kerna kerina si enggo ibahanNa. I adep-adepen perpulungen si erkemalangen man Tuhan, kupersembahken persembahen si enggo kupadanken baNa"

EVALUASI :
Terjeng ja enggo silakoken kreatifitas ras pengembangen usaha rikutken aksi minggu si lewat?

DISKUSI : 

1. Uga nge penggejabenta adi ikataken : adi sada ringring suin, kerina ringring si deban ikut nggejapkenca ( ay.26 ). Turiken erpalasken pengalamen si enggo pernah ilakoken, baik secara pribadi bage pe sektor.
2. Bicara lit i bas runggunta sada sektor lemah i bas sada hal,  umpamana : teptep lit sayembara koor la pernah ikut erkiteken kurang beluh rende, la lit bas sektor e si beluh ngajarisa.
   Sedekah enda...kai nge si enggo silakoken : mandangisa, entah nampatisa alu gegeh silit i bas kita.
   Catt : Banci pe kelemahen-kelemahen si deban...

AKSI :
Cuba si siksiki, entah lit temanta sada perpulungen subuk bas sektor ntah se runggun si perlu man sampaten. Mari dage si sampati rikutken keperlunna...asa gegeh si lit i bas kita, gelah ula terjeng mentas bahan PJJ ta wari enda.

USULEN LAGU :

1. KEE GBKP No. 296 : 1,2,4  ( KLIK JUDUL KEE UNTUK MELIHAT LIRIK TEKS )
2. KEE GBKP No. 282 : 1,2     ( KLIK JUDUL KEE UNTUK MELIHAT LIRIK TEKS )
3. KEE GBKP No. 209 : 1,2     ( KLIK JUDUL KEE UNTUK MELIHAT LIRIK TEKS )
4. KEE GBKP No. 71 : 1,3       ( KLIK JUDUL KEE UNTUK MELIHAT LIRIK TEKS )

TOPIK PERTOTON SYAFAAT :

1. Gelah kerina ngawan GBKP ngejabken alu payo maka kita sada kula i bas Kristus, alu bage nggeluh si sampat-sampaten.
2. Gelah i bas GBKP enda la lit kelompok-keiompok si iakapna gegehen ia asangken kalak si deban.
3. Si turah i bas Perpulungen.

Pdt. Dormanis S.Pandia, S.Th.

Share this post