Kepentaren Dibata Maba Kiniulin - Tanda-Tanda Kalak Pentar: Nggit Erlajar ( Bahan PA Moria 14 - 20 Juli 2019 )

Bahan Bimbingen PA Moria 14 - 20 Juli 2019

Tanda-Tanda Kalak Pentar : Nggit Erlajar

SI MAN OGEN : Jesaya 28: 23-29

Kepentaren Dibata
23. Begikenlah katangku, perdiatekenlah kai si kuturiken man bandu.
24. Labo lit perjuma si lalap nenggala ras ngeroka jumana.
25. Tapi adi enggo mesai jumana, tentu iamburkenna benih sinuan-sinuan, umpamana jera ras lenga. Ierdangkenna gandum ras dawa erteran-teran janah arah duru isuanna jaung.
26. Ietehna uga ndahiken dahinna, sabap enggo iajari Dibata ia.
27. Labo pernah ipakena palu-palu si mberat lako muat buah jera ntah buah lenga si enggo iperani; tapi ipakena ciken si menahang bagi payona.
28. Sanga ngerik gandum pe labo lalap igegehina ngeriksa seh getem buahna. Ietehna uga cara pedalan gereta arah babo gandum e gelah ola sempat ceda buahna.
29. Kerina kepentaren enda rehna i bas TUHAN si Mada Kuasa nari. Kerina rencana Dibata dem alu kepentaren, e maka tetap nge seh rencanaNa e.

T E M A : KEPENTAREN DIBATA MABA KINIULIN

TUJUN : Gelah Moria

• Ngangkai kepentaren Dibata i bas ngerancang kiniulin man manusia ( rencana ngelola usaha / pendahin).
• Pang rusaha i teruh pasu-pasu Dibata.

METODE PA : Sharing

Kata Penaruh.
Pentar eme kengasupen ngidah sura-sura Tuhan i bas ndalani kegeluhen. Kepentaren si tuhu-tuhu rehna i bas Dibata nari, labo arah kebeluhen manusia. Arah kepentaren si rehna i bas Dibata nari nge maka manusia ngasup ngerencanaken, ndahiken ras ngaturken kerina kegeluhen, pendahin ras usaha. Kepentaren Dibata ngerencanaken si mehuli nandangi manusia. Program pelayanen GBKP tahun 2019 eme meningkatken jiwa kewirausahan ( entrepreunership ), rukur kerna mbuka peluang-peluang usaha, alu tetap ngukurken kiniulin nandangi kelestarin alam, kesehatan, bagepe tetap i bas kiniteken si paguh. Gelah alu bage la ndabuh ku bas pengertin ngikut Tuhan pasti sukses ( teologi sukses ), ntahpe erpersukuten nandangi kuasa-kuasa doni guna kesuksesen dahin ras mbuka usaha. Emaka arah bahan PA Moria sekali enda, ibabai kita selaku nande i tengah jabu banci rukur kerna "entrepreunership" ngidah peluang usaha, ngaturkenca alu mehuli, banci ka tole nambahi perbeliten jabu. Guna ngelakokenca perlu kal mindo kepentaren si rehna i bas Dibata nari, sikap dingen payo rikutken si ngena ateNa.

Mpebagesi Penqangkan Kerna Ogen.
I bas Jesaya 28:23-29 isuratken kerna kepentaren Dibata. Guna meteh kepentaren Dibata pemena si arus ilakoken eme: nggit megiken Kata Tuhan, arah pengajarenna. Megiken labo terjeng ndengkehkenca, tapi ipebengket ku bas pusuh, iukuri alu mbages dingen idalanken. Kepentaren Dibata mereken kengasupen lako ndahiken dahin subuk i bas menakenca, ngaturkenca alu payo dingen dungisa alu mehuli. Iumpamaken bagi perjuma: labo lit perjuma si lalap nenggala ras ngeroka jumana. Tapi adi nggo mesai jumana tentu iamburkenna benih sinuan-sinuan, umpamana

jera ras lenga. Ierdangkenna gandum ras dawa erteran-teran janah arah duru isuanna jaung. Ietehna uga ndahiken dahinna, sabap iajari Dibata Ia. IbereNa kepentaren si maba kiniulin i bas ngaturken dahin. La terjen sinuan si utama isuanken erkiteken lit ka peluang banci nambahi sinuang-sinuan i duru juma e pe isuanken ka. Adi ihubungken ku bas dahin ntah usaha, lit dahin utama tapi adi kesempaten ntah peluang dahin sambilen si banci mere ulih rikutken pengaturen si payo e pe ilakoken. Si e banci idalanken erkiteken kepentaren Dibata si ngajari gelah ula salah, alu ngelakoken langkah-langkah ( strategi ) si tepat ras payo banci ndatken ulih si mehuli.

Perjuma labo pernah ipakena palu-palu si mberat lako muat buah jera ntah buah lenga ( bhs.Indonesia: jintan hitam / jintan putih ) si enggo iperani; ipakena ciken si menahang bagi payona. Sanga ngerik gandum pe labo lalap igegehina ngeriksa seh getem buahna. Ietehna uga cara pedalan gereta arah babo gandum e gelah ula sempat ceda buahna. Labo terjeng uga menaken dahin tapi uga ngaturken ulih pendahin e pe penting gelah ula salah i bas ngaturkenca gelah ula jadi sea-sea. Kepentaren enda rehna i bas Tuhan nari. Kerina rencana dem alu kepentaren, emaka tetap nge seh rencanana e.

Pengkenaina.
Moria GBKP melala si erdahin subuk ASN, pegawai swasta ntah si mbuka usaha bage pe perjuma. Moria e, erdahin guna ncidahken potensi si lit i bas dirina bage pe erguna i bas nambahi perbeliten jabu. Kai pe dahinta si gejap min e jadi erkiteken kepentaren Dibata, labo erkiteken kebeluhen ras kengasupenta. I bas ndahiken kerina dahinta subuk i bas perencanan bagepe paksa ngelakokenca perlu si pindo rusur kepentaren Dibata gelah ngasup kita ndahikenca alu mehuli subuk dikune lit sura-sura mbuka usaha arus si ukurken kerna gegeh subuk modal perduiten, pemeteh ras gegehta.

Pang erpasang saja alu la ngukuri gegeh kengasupen banci lepak pendungi erkiteken ngadi i tengah dalan. Kebutuhen pasar pe perlu si eteh gelah ula sea-sea si buka usaha tapi la erkembang ras la nghasilken erkiteken labo iperluken kalak sideban seh maka banci bangkrut erkiteken la lako. Perlu mbuka jejaring ( rekanan guna pengembangen usaha ) alu pe mbue teman, langganen si banci ikut guna masarken usaha ntah dahinta. Nambahi dahin ras usaha ( nyambi ) pe banci ilakoken, umpamana: bagi sekalak Aparatur Sipil Negara ( ASN ) kenca mulih jam kantor lit ka ku juma nuan rimo, kopi, gule-gulen, cina, jaung, bunga, ras sidebanna. Lit ka deba

alu erban usaha sambilan i rumah bagi ndayaken produk-prodid, kecantikan ntah pe perabot rumah tangga, masarken ulih keterampilen sulamen, rajuten, ngerangkai bunga, erban kue, roti ras sidebanna.

I bas jaman genduari enda melala pe peluang usaha si banci ilakoken alu makeken teknologi, umpamana : erdaya pulsa, erdaya barang ( online ), erdaya tiket pesawat, erdaya tiket kereta ras sidebanna. Erbage-bage banci idahiken ras iusahaken, erkiteken kepentaren Dibata si ngajari kita. Adi nggo rulih, ersukutenlah tetap man Tuhan i bas makekenca gelah la salah pake dingen la sea-sea. Ipakeken guna si mehuli, erguna man kalaak sideban ras tetap ermulia gelar Dibata.

Sharing:

1. Cuba situriken, kai nge palas si erbahanca maka dahin ntah usahanta si lit paksa enda banci denga tetap idahiken ras idalanken.
2. Adi lit si akap peluang dahin ntah usaha si banci ikembangken subuk secara pribadi ntah ras-ras guna kiniulin temanta ntah anak-anakta si lenga dat dahin, cuba si sharingken.

Pdt. Karvintaria br Ginting,STh, M.M

Share this post