Dukungan Mamre Ku Piara - Pelepas Anak-Anak E Reh Ndahi Aku ( Mamre Ndukung PIARA )

Bahan Bimbingen PA Mamre 9 - 15 Juni 2019

Dukungan Mamre Ku Piara

Ogen : Markus 10:13-16

Ipasu-pasu Jesus anak-anak
(Mat. 19:13-15; Luk. 18:15-17)
13. Lit me piga-piga kalak maba anak-anak man Jesus. Atena gelah anak-anak e ipasu-pasu Jesus, tapi merawa ajar-ajarNa man kalak ndai.
14. Sanga idah Jesus e, merawa IA man ajar-ajarNa nina, “Pelepas anak-anak e reh ndahi Aku, ola ambati ia, sabap kalak si bage nge kap empuna Kinirajan Dibata.
15. Ingetlah katangKu enda! Ise si la nggit ngaloken Kinirajan Dibata bagi sekalak anak-anak, kalak si bage labo pagi bengket ku bas Kinirajan Dibata e.”
16. Jenari idakepNa anak-anak e sekalak-sekalak, itamakenNa tanNa ku babona janah ipasu-pasuNa.

Tema : Pelepas Anak-Anak E Reh Ndahi Aku (Mamre Ndukung PIARA)

Tujun : Gelah Mamre

Meteh maka pertumbuhen rohani ras sosial anak eme bagin penting i bas masa depan anak
Mamre mendukung persikapen anak-anakta guna ngikuti PIARA

KATA PENARUH
Selaku orangtua, tentu meriah kal ukurta adi anakta mbelin i bas biak ras cara rukur si mediate nandangi kalak sideban. Adi lit biak ras perukuren si bage i bas anakta banci ia mehuli erteman, bage pe paguh i bas ngalaken tantangen kegeluhen. Tek kita, maka enda me sura-sura Dibata nandangi anak-anakNa si pagin ia me majekken ras nerusken biak nggeluh si mehuli i bas keluarga, gereja ras masyarakat. Sura-sura mehuli enda labo mahan bana jadi i bas anak-anakta. Lit proses ras perlu dukungen i bas orangtua nari. Enda me si jadi percakapenta i bas PA Mamrenta sekali enda.

URAIAN TEKS / TAFSIREN
Sope teks bahan PA-nta enda ituriken percakapen Jesus ras ajar-ajarNa kerna ngulihken ndehara. Paksa si e reh kalak mbaba anak-anak ku Jesus. Kerehen anak-anak enda i bas pengakap ajar-ajar Jesus ngganggu erkiteken:

Anak-anak e reh i bas paksa si la payo, erkiteken sangana lit percakapen kerna nggulihken ndehara si lenga erkedungen.
Ajar-ajar la atena guruna terganggu alu kerehen anak-anak enda. Iakapna pentingen man Jesus ercakap kerna ngulihken ndehara.
Banci ka erpalasken tradisi Jahudi maka anak-anak kurang meherga, apai ka i bas percakapen "formal," termasuk si lit kawitenna ras agama

Alu alasen si datas enda maka la ateta mamang ajar-ajar ngelarang anak-anak enda ndahi Jesus. Tapi sanga i dah Jesus perbahanen ajar-ajar e, merawa IA nina, "Pelepas anak-anak e reh ndahi Aku, ola ambati ia, sabap kalak si bage nge kap empuna Kinirajan Dibata. Ingetlah katangKu enda! Ise si la nggit ngaloken Kinirajan Dibata bagi sekalak anak-anak, kalak si bage labo pagi bengket ku bas Kinirajan Dibata."

Kai ndia maksud Jesus nehken kata enda man ajar-ajar?

Pelepas anak-anak e reh ndahi Aku, ola ambati..." Jesus alu tangkas nandai biak anak-anak, sebab IA si nepasa. Pertumbuhen pengertin ras kinitekenna mbue ipengaruhi uga ia ndatken perhatin ras "sentuhan kasih sayang." Pengertin ras kiniteken anak labo terjeng i bere konsep cara rukur entah pe teori-teori kerna Dibata. Kalak si banci jumpa ras Dibata labo terjeng kalak dewasa, tapi anak kitik si lenga dewasa pe banci, sebab ertedeh ate ndingen reh ndahi Jesus. Sie lebih penting asangken menguasai konsep entah teori kerna Dibata"
"Kalak si bagi anak-anak kap empuna kinirajan surga". Anak-anak ergantung nandangi keleng ate orangtua, ras patuh ia nandangi kalak si tuan asangken ia. Lit i bas ia biak si meciho (tulus). Anak-anak la banci nggeluh adi la i kelengi orangtuana. Sekalak anak la banci sehat adi pusuhna mbera-mbera entah pe curiga nandangi orangtuana entah pe jelma i sekelewetna. Kiniteken ras perukuren si meciho si lit i bas anak-anak labo erkiteken ia enggo cukup dewasa carana rukur, jenari muat keputusen jadi kalak si merincuh jumpa ras Jesus. Kiniteken anak-anak turah arah terus ia iperdiateken ras ndateken kekelengen si cukup.
Kiniteken si payo, bali ras sekalak anak si ertima nandangi nande si mulih belanja i tiga nari. Pusuh anak-anak i demi ate tedeh ras pengarapen, amin gia jam kemulihen nande i tiga nari la terpastiken.
Ngaloken ( ngalo-ngalo ) kinirajan surga bali ras ngalo-ngalo sekalak anak tubuh ku tengah jabu. I bas nimai ketubuhen sekalak anak, pusuh orangtua dem alu ketedehen, arapen, banci ka pusuhna betbeten, tapi radu ras lit keriahen ukur.
Jesus jine ngandingken kinirajan Surga ras diriNa selaku anak-anak( anak manusia). IA ipadanken Dibata ras kerehenNa la terduga, banci jadi kerehenNa jadi i bas paksa si payi tah pe la payo.

Biak si ertedeh ate nandangi Jesus ras keleng ate nandangi kalak sideban arus lit i bas anak-anak Dibata, sebab man kalak si bage me kinirajan surga si enggo isikapken Dibata man kita anak-anakNa.

APLIKASI
Secara khusus, bahan PA-nta minggu enda e me ncakapken kerna tanggungjababta selaku orangtua guna ndukung pertumbuhen kiniteken ras orat nggeluh anak-anakta. Tugas utama banta eme: Gelah tetap ndeher kita ras anak-anakta. Si cidahken keleng ate (sentuhan), mperdiateken kinitekenna. Adi anak nggeluh bas perukuren sierbera-bera kedungenna mesera turah kinitekenna man Dibata alu mehuli dingen mesera akapna encidahken keleng ate teman manusia.

Ibas tahun enda, ilakoken me PIARA ( Pesta Iman Anak ras Remaja ). PIARA enda jadi sada kesempaten anak-anakta jurnpa ras Dibata bage pe ras teman-temanna. Secara khusus tema PIARA tahun enda eme nggeluh i bas kesalingtergantungen sada nandangi sidebanna; Mediate nandangi teman, bage pe nandangi lingkungen. Salah sada "inspirasi" pelaksanaan PIARA e me Wari Raya Pondok Daun ras Wari Raya Roti si la er ragi i bas tradisi kalak Israel, si lakoken teptep tahun i Jerusalem. Perayan enda ilakoken guna nginget keleng ate Dibata si la ersibar tupung bangsa Israel erdalan mentasi padang gurun kidekah 40 tahun. Padang gurun e me gambaren ingan nggeluh cukup mberat, keperlun geluh si la pasti. Ingan tading pe bas tenda-tenda. Pangan ras keperlun geluh tuhu-tuhu terbatas. Tapi Tuhan tetap njagai ras encukupken keperlun geluh bangsa Israel.

I bas PIARA ( si ilakoken i bas tgl 1-6 Juli 2019 ), teremen anak-anakta tading i bas tenda, amin gia piga-piga tading i bas gedung. Kecibal enda mabai anak-anakta nggeluh sederhana ras kebersaman. PIARA mabai anakta mediate nandangi kalak si deban, jadi kalak si paguh ngalaken erbage kecibal si terbatas. Kegeluhen si mediate erkiteken nggejap keleng ate Dibata jenari icidahkenna man teman-temanna.

DISKUSI

Kai ndia si perlu sipersingeti man anakta gelah banci ia ndatken ulih si mehuli arah kegiaten PIARA?
Kai saja dukungen si banci silakoken guna menyuksesken kegiaten PIARA tahun enda?

USULEN ENDE-ENDEN

KEE GBKP No. 279:1,2,4 ( Klik Judul KEE Untuk Melihat Teks Lirik Lagu )
KEE GBKP No. 334:1,2 ( Klik Judul KEE Untuk Melihat Teks Lirik Lagu )
KEE GBKP No. 360:1 ( Klik Judul KEE Untuk Melihat Teks Lirik Lagu )
KEE GBKP No. 285:1,3 ( Klik Judul KEE Untuk Melihat Teks Lirik Lagu )

CATATAN : Minggu, Tanggal, 23 - 29 Juni 2019 eme PA Minggu keluarga. lbas minggu e ilakoken PA bersama Mamre, Moria, Saitun ras Permata. Ngarap kami gelah silakoken PA gabungen Mamre, Moria, Saitun ras Permata.

Pdt. Krismas Imanta Barus, M.Th, LM

Kabid Koinonia Moderamen GBKP

HP. 081263194100