Mehamatlah Man Tuhan - Pentakosta Ras Kerja Rani ( Bahan PJJ 9 - 15 Juni 2019 )

Bahan Bimbingen Perpulungen Jabu-Jabu 9 - 15 Juni

Mehamatlah Man Tuhan

( Pentakosta ras Kerja Rani )

Ogen : Kuan-kuanen 3 : 9 -10

9. Mehamatlah man TUHAN alu mpersembahken ulih jumandu si mehulina kal man baNa.
10. Adi bage perbahanenndu la banci lang dem lumbungndu alu gandum dingen lau anggurndu sampur, seh maka lanai siat ingan munikenca pe.

Erbage tanggapen si turah bas perpulungen adi ngerana kita kerna persembahen. Lit si ngatakenca maka nehken persembahen eme utang (kewajiben). Lit deba erpengakap nehken persembahen jadi pancingan man Tuhan ( teologi pancing ), adi bere ikan teri dat tongkol, bere tongkol dat kakap, bere kakap dat hiu, bere hiu gelah dat paus. Emaka perlu si pepayo motivasi ras sipekena pengangkannta kerna nehken persembahennta man Tuhan, Nehken persembahen man Tuhan eme sada bentuk kinihamaten ras tanda pengataken bujurta, labo gelah i pasu-pasuNa tapi erkiteken nggo sialoken ras sigejabken pasu-pasuNa, janah enda me ateta sirenungken arah bahan Minggu enda.

Kitab Kuan-kuanen isina eme pengajaren kerna uga kin cara nggeluh si payo, eme alu nggeluh mehamat dingen erkemalangen man Tuhan. Salah sada hal sipenting i bas kegeluhen manusia eme pentar i bas makeken erta ras kebayakenna, Sabab arus sisadari adi ngerana kita kerna erta ras kebayaken, subuk i bas ndaramisa / ngelitkenca bagepe makekenca melala jelma labo pentar, megati kal manusia ndabuh kubas dosa. Arah ogenta kita iajuk gelah mehamat man Tuhan alu erta si lit i bas kita dingen mpersembahken ulih juma si mehulina man Tuhan ( bdk. TB LAI "Muliakan Tuhan dengan hartamu dan dengan hasil pertama dari segala penghasilanmu ( ay.9a )). Ertina, teks enda nuriken man banta maka salah sada tanda mehamat man Tuhan eme alu mpersembahken ulih juma/pendahinta. Janah kehamaten e pe teridah tandana alu nehken "si mehulina", ertina la "meros", labo asal mpersembahken ntah gelah nggo ersembah saja.

Bangsa Israel iperentahken nehken persembahen ulih sipemena ( Pustaka si Badia: simehulina ) guna encidahken maka Dibata nge simada doni ( bdk. Im.23:10; Im.25:23 ). Enda sada pengakun maka Tuhan si mada kerina. Adi sipepayo kegeluhen nini-nininta ndube, bage rani si pemena labo minter itaruhken ulih juma e man kalimbubu sabab konsep budaya Karo kalimbubu eme "Dibata ni idah". Banci ka pe sibandingken ras suku-suku si deban, umpamana: kalak Bali ras Tionghoa, simehulina ( super ) nge ipersembahkenna ku kuil ntah ingan ersembah.

Janah arah ogenta ndai lit janji Tuhan : "adi bage perbahanenndu ( mehamat dingen mpersembahken si mehulina man Tuhan ) dem lumbungndu alu gandum ras lau anggurndu sampur, seh maka lanai lit ingan nimpansa pe"(ay.10). Siidah i bas teks enda lit hubungen sebab-akibat; ertina adi mehamat man Dibata alu mpersembahken si mehulina, Dibata si nggo masu-masu e, terus menerus ras "la erkira-kiran masu-masu kegeluhenta". Dem lumbung ras sampur tau anggurta ertina la kita kekurangen sabab tetap simpar pasu-pasu Tuhan e maler man banta, lit i bas kejuah-juahen, dem keriahen ras kemalemen ate.

Kerja Rani i bas Pustaka si Badia eme sada perayaan keagamaan i bas bangsa Israel si ilakoken i bas wari pelimapuluhken, si ibeligai mulai kenca perayaan Paskah kalak Jahudi. Entah pe sada wari kenca lepas wari sabat sipepituken, si igelari Pentakosta ( bdk. Im. 23:15-16: Ul. 16: 9-10 ). Kerja Rani enda ilakoken guna pehaga Tuhan Dibata alu maba persembahan ukur meriah man Tuhan erkiteken enggo ngaloken ulih peranin si simpar. Minggu 16 Juni 2019, agenda gerejanta eme Kerja Rani, eme salah sada cara gerejanta GBKP encidahken kehamatenta man Tuhan.

Payo, labo nari kerina pendahinta erjuma bagi kalak Israel i bas Padan si Ndekah, labo ertina lanai kita rani, sabab istilah rani banci siantusi "ndatken ulih" arah pendahin / usahanta. I bas Kerja Rani enda iajuk kita guna reh ku gereja, maba persembahen ukur meriah ulih juma / pendahinta bagi si iperentahken Tuhan i bas Ulangen 16:10 "Kenca bage maka bahanlah Kerja Rani, guna pehaga TUHAN Dibatandu, alu maba persembahen ukur meriah man baNa. Buena rikutken pasu-pasu si iberekenNa man bandu". Mari si gargari dirinta sekalak-sekalak: enggo kin sipehaga Tuhan sedekah enda alu mpersembahken persembahen si mehulina ras a patutna man Tuhan? Arah kata Dibata enda si perlu lit i bas ukurta: eme: kai silakoken kita e "guna pehagaken Dibata", Emaka ukurta i bas nehken persembahen Kerja Rani persembahkenlah si mehulina sabab tek kita ise simpehagaken Dibata, ibegiken Dibata me pertotonna ( bdk. Joh. 9:31 ), ipehaga Dibata pe ia ( bdk. 1 Sam. 2:30 ), bagepe ipasu-pasuNa ( bdk. Mas, 92:11 ).

Jenari, ulih kerja rani enda banci iaturken rikutken pembagin si ibahan gerejanta. Ulihna enempuluh persen tading i runggun guna dahin tri tugas gereja i bas runggun. Empat puluh persen iendesken arah Klasis guna kas umum GBKP nampati biaya perdalanen gerejanta secara sinodal. Mehuli adi pelaksanan kerja rani enda la iraduken ras dahin pepulung dana si deban.
SELAMAT KERJA RANI.

EVALUASI :
Uga perdalinen Pekan Doanta tahun enda? Subuk i bas jabu, sektor ras runggun?

DISKUSI :

Kai nge ertina "mehamat man Tuhan alu maba persembahen si mehulina" i bas kawitenna ku persembahen Kerja Raninta tahun enda?
Uga cara ( tehnis pelaksanan ) si payo i tengah-tengah runggunta bas ngendesken persembahan Kerja Rani gelah teptep jabu ergiah-giah muat bagin nehken persembahenna?

AKSI
Muat bagin i bas mpersiapken Kebaktin ras pesta Kerja Rani bas Runggunta, subuk secara keluarga, sektor PJJ, bage pe radu ras perpulungen kerina.

USULEN LAGU :

KEE GBKP No. 263 : 1-2 ( Klik Judul KEE Untuk Melihat Lirik )
KEE GBKP No. 408 : 1-3 ( Klik Judul KEE Untuk Melihat Lirik )
KEE GBKP No. 395 : 1-2 ( Klik Judul KEE Untuk Melihat Lirik )
KEE GBKP No. 381 : 1-2 ( Klik Judul KEE Untuk Melihat Lirik )

TOPIK PERTOTON SYAFAAT :

Pelaksanaan Kerja Rani i bas Runggunta.
Gelah Tuhan masu-masu kerina pendahin, usaha/pencarin anggota ngawan perpulungen dingen gelah ersuruh ukur perpulungen nehken persembahen si mehulina dingen asa patutna man Tuhan tanda nggejapken belinna pasu-pasu si nggo ialoken i bas Tuhan nari.
Si turah i bas perpulungen.

Pdt. Jenny Eva br Karosekali, S.Th., M. Min.