Hari Keluarga Nasional - Jabu Si Ipasu-Pasu Dibata ( PA Permata GBKP )

PA Gabungan Kategorial

( Hari Keluarga Nasional = PA Gabungan Moria, Mamre Ras Permata GBKP )

Bahan PA Permata 23 - 29 Juni 2019

Nas : Masmur 112: 1 - 10

Kemalemen ate kalak bujur
1. Pujilah TUHAN!
Malem ate kalak si erkemalangen man TUHAN,
si ermeriah ukur ngikutken perentah-perentahNa.
2. Anak-anakna kalak si erkuasa i negeri,
kesusurenna ipasu-pasu me pagi.
3. Isi jabuna jadi kalak bayak namura,
kebujurenna lit rasa lalap.
4. Man kalak bujur, adil, perkuah dingen perkeleng,
ersinalsal terang i bas si gelap nari.
5. Malem kal ate kalak si melumbar pepinjamken,
dingen bujur i bas kerina urusen.
6. Kalak bujur asa ndigan pe la guling,
ia tetap iinget rasa lalap.
7. La ia mbiar ngaloken berita si la mehuli,
kinitekenna paguh dingen ernalem ia man TUHAN.
8. La ia mbiar dingen la aru atena,
tek ia maka talu kap imbang-imbangna.
9. Melumbar pemerena man kalak si kekurangen,
kinibujurenna lit rasa lalap,
ia ermulia dingen ihamati.
10. Kalak jahat ngidah si e janah gara atena,
erderik ipenna perbahan nembehna atena.
E maka masap me ia, jenari bene pengarapenna.

Tema : Jabu Si Ipasu-pasu Dibata

Gelah Isi Jabu:

Ngasup nuriken tempas kemalemen ate ibas jab
Njadiken kebujuren jadi palas ibas jabu

Metode: Sharing ras Aksi

I. BENA KATA
Nggeluh benar (nggeluh ibas kebadian Dibata) eme nggeluh ija arus lit erga si arus igalar. Enda igelari pikul salib. Erga si arus igalar e umpamana ibas kegeluhen enda kita itadingken / ikucilken ibas lingkungen pergaulen ( ibas masyarakat, lingkungen pergaulen, lingkungen inganta erdahin ) erkiteken kita la nggit kompromi ras ngikutken hawa nafsu / sura-sura kedagingen. Enda me perjuangen siterus-menerus selaku kalak si tek man Tuhan Jesus. Arah Masmur 112 enda itegasken maka labo lit rugina adi kita nggeluh ibas kebenaren Dibata ( erkemalangen man Tuhan ) tapi mereken keuntungen si luar biasa sebab keuntungen e la saja sinanami ibas kegeluhen si pepagi tapi genduari e pe.

II. ISI
Jabu sikuga kin si ipasu-pasu Dibata ( si ermalem ate )? Ibas ayat 1, alu tegas ngataken maka jabu si ipasu-pasu Dibata eme jabu si erkemalangen man Dibata. Erkemalangen man Dibata ertina nggeluh alu dem ketaaten ras kalak si tuhu-tuhu ertedeh ate nandangi kebenaren / kebadian Dibata. Meriah ras malem kal atena adi ia banci nggeluh ibas perentah Dibata ( yang sangat suka kepada segala perintahNya ). Lit 3 ulih si ijanjiken Dibata man kalak si tuhu-tuhu ertedeh ate nandangi kebenaren kata Dibata eme:

Ayat 2, 3 anak kempuna ipasu-pasu Dibata subuk secara doni bage pe berkat rohani.
Ayat 4, 5, 6 lit jaminen ibas Dibata nari maka ersinalsal terang ibas sigelap nari. Ertina kalak si ertedeh ate nandangi kebenaren Tuhan ia ipasu-pasu guna jadi pasu-pasu ( diberkati untuk menjadi berkat ) oge: Kej:12: 2,3. Lit jaminen ibas Dibata nari maka 'ada terang dibalik kegelapan'. Emaka man kalak Kristen la lit istilah `wari sial', celaka.
Ayat 7-9 kalak si tuhu-tuhu ertedeh ate ndalanken kebenaren Tuhan la pernah goyah ibas ngalaken persoalen geluh. Geluhna jadi geluh simelayani / erdiakoni. La pe isuruh isampatina kalak si biak man sampaten. Sada keyakinen Pemasmur maka ibas doni enda la bo lit sada posisi si aman, selain ibas Dibata.

III. PENGKENAINA
Minggu enda siperingetti wari Keluarga Nasional. Radu ras si e silakoken PA Gabungen Kategorial (khususna Moria, Mamre ras PERMATA). Arah Masmur 112 enda itegasken maka malem ate jabunta adi kita tetap ertedeh ate nggeluh ibas kebenaren Tuhan. persoalenta eme kebenaren Kata Dibata e hanya terjeng ngena ate (menyukai) kata Dibata tapi la lit follow up (tindak lanjutna); hanya sebatas pengangkan. Radu ras Pemasmur maka malem ate anak jabu eme adi Kerajan Dibata terwujud ibas doni enda (pemena lebe tentu ibas jabunta) (band: Mat. 6: 10 "Reh min KinirajanNdu, sehlah min peratenNdu, ibas doni enda bagi ni surga". Enda me si nggeluh ras jadi perayaken ibas tep-tep jabunta.

Jabu eme gereja si kitik ija jabu eme ingan / wadah ija kita mpraktekken kebenaren Dibata antara bapa, nande ras anak. Persoalenta eme megati sura-sura ras pengaruh doni enda singerintak kita seh maka la kita siap mersan kayu persilangta, la tetap ukurta mengandalken janji Dibata ( kurang tek kita maka ibas Tuhan ngenca lit posisi si aman ).

Jadi labo kerina jabu kalak Kristen mahan bana i pasu-pasu Dibata, tapi si ipasu-pasu Dibata eme jabu si katawari pe ertedeh ate / rindu ngukuri ras ndalanken singena ata Tuhan. Mungkin cara / sikapta erkiniteken pe man pekenan: ula pasu-pasu Dibata e saja ngenca sidarami, tapi jadiken lebe Dibata e jadi prioritas ras si berotoritas ibas jabunta. Umpamana: adi Dibata e ninta TUHAN ( bhs Yunani = KURIOS, si ertina Raja / yang dirajakan ), penungkunen man banta: enggo kin tuhu-tuhu sicidahken arah perbahanenta maka Dibata e sierdolat / berotoritas ibas geluhta? Entah kin sura-suranta saja rusur sipementas?

Mari sibangun keluarganta alu ngundang Tuhan guna ras-ras, sebab adi kita saja simbangun keluarganta maka kedungenna eme sia-sia; tapi adi sibere Tuhan simbangunca maka keluarganta pasti ipasu-pasuNa ( Mas. 127: 2 ).

Hidup adalah untuk Tuhan dan untuk keluarga. Emaka ula erkiteken alasen sibuk erdahin guna anak piah lupa mereken waktu man anak-anak; ula erkiteken sibuk piah lanai sempat melayani ras bersekutu. Ingetlah, maka ibas Tuhan ngenca jabunta banci aman.

Janji pasu-pasu Dibata man jabu si ertedeh ate nandangi kebenaren Dibata la saja janji keselamaten pertendin tapi pe janji kerna berkat jasmani ( masa depan ras masa sigenduari enda pe ijamini Dibata; la pernah kita cilaka amin pe mbue persoalen. Emaka sipakekenlah geluh jabunta jadi pasu-pasu man kalak sideban ( hidup ini adalah kesempatan untuk menjadi berkat ).

IV. SHARING RAS AKSI
Mari sidiskusiken / sharing antara Mamre, Moria ras PERMATA, kai nge sijadi kata kunci si dat kita arah bahan PA enda guna ndatken pasu-pasu Dibata ibas jabunta; ras kerna kai siperlu sievaluasi / man pekenan ibas jabunta guna ndatken pasu-pasu Dibata e.

V. USUL ENDE-ENDEN