Pinakit La Ngambati - Tantangen Kesehaten : Fisik, Mental, Rohani ( Bahan PA Moria 30 Juni - 6 Juli 2019 )

Bahan Bimbingen PA Moria 30 Juni - 6 Juli 2019

Tantangen Kesehaten: Fisik, Mental, Rohani

SI MAN OGEN : 2 Raja-Raja 20: 1 -11

Raja Hiskia sakit janah malem ka
(Jes. 38:1-8, 21-22; 2Kro. 32:24-26)
1. Kira-kira i bas paksa e sakit me Raja Hiskia janah menam mate. Nabi Jesaya anak Amos lawes ndahi ia nina man raja, “TUHAN ngataken man bandu maka ikatakenndu pedahndu si perpudina man kerina isi jabundu, sabap lanai kam malem. Ersikaplah kam guna kematenndu.”
2. Ikusur Hiskia ayona ku dingding, jenari ertoto ia,
3. “Ingetlah, TUHAN; alu tutus ras erkemalangen enggo kulayani Kam, janah tetap kuusahaken ndalanken kai ateNdu ngena.” Kenca bage tangis Hiskia, megogo kal atena.
4. Lawes Jesaya nadingken raja, tapi ope denga ibentasina kesain istana si i tengah, isuruh TUHAN ia
5. mulihken ndahi Hiskia, pemerentah bangsa TUHAN, janah nina TUHAN man raja, “Aku, TUHAN, Dibata nini-ninindu Daud enggo megi pertotondu janah ngidah iluhndu mambur. Kupepalem kam, janah kedun ku Rumah Pertoton kam.
6. Kutambahi umurndu sepuluh lima tahun. Kupulahi kam ras kuta Jerusalem i bas raja Assur nari. Aku mpertahanken kuta enda, guna kehamatenKu ras erkiteken perpadanen si Kubahan ras suruh-suruhenKu Daud.”
7. Kenca bage isuruh Jesaya gelah idampelken buah ara si medakdak ku bareh raja, gelah malem iakapna.
8. Nungkun Raja Hiskia nina, “Kai tandana maka ipepalem TUHAN aku janah kedun ngasup aku lawes ku Rumah Pertoton?”
9. Nina Jesaya ngaloi, “Ibereken TUHAN man bandu tanda guna mbuktiken maka isehkenNa nge padanNa. Apai ipilihndu: awih-awih si lit i bas tangga ah erdalan ku lebe sepuluh njingkang ntah surut sepuluh njingkang?”
10. Erjabap Hiskia nina, “Menukah kap erbahan awih-awih e erdalan ku lebe sepuluh njingkang! E maka bahanlah surut sepuluh njingkang.”
11. Ertoto Jesaya man TUHAN, e maka ibahan TUHAN awih-awih e surut sepuluh njingkang i bas tangga si ibahan Raja Ahas.

T E M A : PINAKIT LA NGAMBATI

TUJUN : Gelah Moria:

Meteh turi-turin kiniteken Hiskia i bas is sakit.
Tetap erjuang ras ertoto amin pe lit pinakit. METODE PA : Nonton ras-ras kerna perjuangen sekalak pernanden si paksa sakit.

Kata Penaruh.
"Saat kita sakit banyak pertanyaan yang muncul dalam benak kita. Dan kita benar-benar menginginkan orang lain mampu memecahkan persoalan dan menjawab pertanyaan kita". Salah sada si la terelakken i bas kegeluhenta eme sakit entah pinakit. Amin gia enterem kalak erusaha njaga kesehatenna alu ngatur perpan, cukup istirahat, ratur olah raga, tapi i bas sada paksa la banci lang pinakit e reh, terlepas mekelek entah lang, tupung kita sehat banci ka nge sakit. Dikune kita sakit, banci saja si sakit la terjeng kulanta ( organ tubuhta ), tapi "ukurta" pe nggo kote. Banci pe arah ukurta e peturah reh kelekna pinakit. Lit penggejapen maka lanai banci kita erkai pe, geluhta enggo tergantung man kalak sideban ( si akap kita enggo mberati keluarga ). Ulih penggejapen ras perukuren si bagenda, erbahanca kalak si sakit melukah megelut, melukah ka merawa, la stabil rukur, enggo urak semangatna nggeluh.

Dr. Andar Ismail i bas bukuna "Selamat Ribut Rukun" ngataken: i bas kita paksa sakit, payo kin kita lanai banci erbahan kai pe? Situhuna mbue denga nge si banci silakoken, silanglangna kita banci denga "ngaloken kekelengen". Perlu si eteh maka geluhta enda labo saja nehken kekelengen, tapi i bas sada paksa kita ngaloken keleng ate. Amin gia kekelengen e la bas kalak sideban nari, keleng ate Kristus labo pernah erleka nandangi kerina anak-anakNa.

Si enda tergantung ku bas uga kita ngataken perbeben pinakit e. Si pasti melala denga nge si man lakonken, emaka tupung lit pe pinakit si man alanken ula kal sempat kita putus asa, tetaplah pengarapenta man Tuhan.

Mpebagesi Pengangkan Kerna Ogen
Hiskia sekalak raja si merentah Jehuda i bas tahun 729-678 SM, anak pe-14-ken raja Ahas. Ia mulai jadi raja i bas umurna 25 tahun ras lit 29 tahun dekahna merentah, Hiskia itandai selaku raja si megegeh ras bijaksana. Hiskia erkemalangen man Dibata ras ernembeh ate nandangi penembahen man gana-gana. Cukup mbue ingan ersembah man gana-gana si iruntuhkenna. Sue ras erti gelarna "Jahwe me gegehku",tuhu-tuhu ia "ngandalken" Tuhan sedekah masa kepemimpinenna.

Sada hal perbeben si cukup mberat jadi i bas kegeluhen raja Hiskia, i ja i bas sada paksa ia ndatken pinakit si mekelek. I bas keterangen Pustaka Si Badia pinakit si reh man Hiskia eme bareh ( ay.7 ), tapi piga-piga penafsir ngataken maka pinakit e eme "tumor ganas" si lanai kin banci malem. Emaka isuruh Tuhan nabi Jesaya ndahi Hiskia guna ngataken pinakitna e ras sekaligus ersikap ngalaken kematen. La terjeng ersikap guna ngalaken kematen, tapi pe gelah Hiskia nuriken pedah si perpudina man keluargana. Secara manusia lanai langlang beratna persoalen si arus ialakenna, la terjeng nahanken sui pinakit i bas daging kulana ( bareh, tumor ), tapi ngukuri ndehara ras anak-anakna si bakal megiken "pedah terakhir" si isuruh Tuhan ipeseh.

I bas ngalaken situasi si bagenda, kai nge si ilakoken Hiskia? Hiskia la nerah nandangi situasina ( bagenda nge padanku ), entah ndarami gegeh sideban guna empepalem pinakitna ( tambar kuta ), tapi i je me paksana ibukana pusuh ras ukurna si mbagesna kal guna mindo man Tuhan. Lit 2 hal si penting banci si idah arah perbebenna enda:

Ayat 2: Ikusur Hiskia ayona ku dinding, jenari ertoto ia. Enda me tindaken si pemena ilakokenna kenca ialokenna berita e: ertoto ia. Dibata nehken kataNa man Hiskia alu tegas, emaka Hiskia pe i bas nehken toto ras pemindonna man Tuhan alu tegas ras dem kiniteken. Mbelin denga kal arapenna maka Dibata banci nalihken keputusenNa, seh maka malem pinakitna.
Ayat 3: "Ingetlah, Tuhan ; alu tutus ate ras erkemalengen enggo kulayani Kam, janah tetap kuusahaken ndalanken kai ateNdu ngena." Enda me isi pertoton Hiskia janahna tangis. I bas ia la putus asa, tetap lit usaha. Kai usaha si ilakokenna? Mindo man Tuhan! Pinakit si lit i bas Hiskia la ngambati, tetap ia rusaha. Nggo ipala-palaina sedekah ia sehat denga erkemalangen ras "ngelai" Tuhan, i bas paksa ia sakit enda sada si ia merincuh eme gelah Tuhan banci ngelai ia alu mpepalem pinakitna e, janah la surung mate.

Pertoton kalak si tutus tentu la sia-sia ras enda me si jadi i bas raja Hiskia, i ja Pertotonna ibegiken Tuhan, "Aku, Tuhan, Dibata nini-ninindu Daud nggo megi pertotonndu. Ku pepalem kam" (ayat 5). La terjeng pinakitna ngenca malem, tapi Dibata nambahi umur Hiskia seh 15 tahun nari ia nggeluh. Adi nen kelekna pinakit inanami Hiskia, banci saja si akap sederhana kal tambar guna mpepalemsa, sabap cukup buah ara si medakdak idampelken ku barehna. Jenari ibereken Tuhan tanda man Hiskia arah awih-awih guna mbuktiken maka isehken Tuhan padanNa man bana. I bas Tuhan labo lit si metahat, kai pe banci jadi tambar, adi ipasu-pasu Tuhan ngasup mpepalem pinakit.

Pengkenaina.
Sada si man jagan i bas kita paksa sakit eme pusuhta ola sempat kote. Alu bage, gia kulanta bangger tapi adi pusuhta sehat, ertorosen denga dahin-dahin si man dahinken. Umpamana: ku ja ertambar, ise kade-kade si banci nampati, jenari dahin-dahin si gelgel kita ndahikenca, ise siban nggantikenca. Tapi adi ukur lanai jore, turah "kepaniken"...piah ertoto pe lanai inget. Si gulutna adi lit kenca kalak si nuduhken "tambar” entah kalak si beluh nambari, mis kal si ueken alu ia si siksiki lebe si erbahan tambar e tuhu ntah lang ras kinitekenta. Si man jagan ola sempat terjadi "percampuradukan" kuasa guna pepalem kita ( sinkritisme ). Kuasa Tuhan pe si pindo arah pertoton, tapi kuasa setan pe si undang ka arah tambar-tambar si make gegeh tabas-tabas.

Termasuk paksa kita sakit, kesempaten kal man si iblis guna reh ndahi kita gelah kita erdauhna ras Dibata, alu "menawarken" dalan pulah. Emaka metengetlah...!

"Merupakan hal yang bodoh untuk meremehkan kerja setan. Dia berkeliling dan mencari mangsa untuk menghancurkan seluruh kehidupan manusia. Dia melakukan kebohongan, penipuan dan menyalahkan dalam kehidupan kita sehari-hari melalui sekawanan pengikut-pengikutnya".

Nonton Bersama ras Diskusi:

Kai nge si dat pengalamen arah film enda ndai?
Uga kin arusna sikapta ngalaken pinakit?
Turiken pengalamenta i bas megenggeng ngalaken pinakit si mekelek! Kai nge jadi gegehta ngalakenca pinakit e?

Pdt. Dormanis S. Pandia, STh