Ermengkah Atendu Asa Si Lit Bas Kam - Entrepreneurship: Ngaturken Waktu Ras Perbeliten ( Bahan PJJ 23 -29 Juni 2019 )

Bahan Perpulungen Jabu-Jabu 23 - 29 Juni 2019

Ermengkahlah Atendu Asa Si Lit Bas Kam

( Entrepreneurship: Ngaturken Waktu Ras Perbeliten )

Ogen : Heber 13: 5 - 6

5. I bas geluhndu ola kam merangap nandangi duit. Ermengkahlah atendu asa si lit i bas kam. Sabap nina Dibata, “Asa ndigan pe la kam Kutadingken, asa ndigan pe la kam Kupulahi.”
6. E maka melciklah ukurta ngatakenca,
“Tuhan kap si nampati aku.
E maka labo aku mbiar.
Kai kin banci ibahan kalak man bangku?”

I bas kamus bahasa lndonesia "perubahan" labo terjeng perubahen kecibal kegeluhen tapi pe perubahan cara rukur ras perbahanen masyarakat. Perubahan cara nggeluh ras ngaturken kiniliten reh ulina, enda me si jadi renungen PJJ-nta sekalenda. Adi lit kebiasan nggeluh la erperkiran, salih jadi erperkiran, ertina ngaturken perbelitenna alu mehuli, nggeluh alu sederhana ( keugaharian ). Makeken perbeliten erpalasken keperlun labo nehi sura-sura daging. Makeken kesempaten alu mehuli guna erdahin, bagepe ngaturken perbeliten jabu alu pentar ras bujur.

I bas Kitab Heber 13 : 1-6, isuratken kerna nggeluh ndalanken singena ate Dibata alu sikeleng-kelengen bagi kalak ersenina i bas Kristus, nggit ngalo-ngalo kalak kesilang kerumahta, lit penggejaben ( solidaritas ) man kalak singenanami kiniseran, nggeluh badia bas perjabun, bage pe ermengkah ateta asa si 1it bas kita.

Ola kam merangap nandangi duit. Duit ( Bahasa Belanda : duit, bahasa Jerman : deut ) i bas cakap lndonesia uang, duit, i bas cakap Karo, sen / duit. Duit eme alat tukar guna ndatken keperlun nggeluh. Erdandanken duit labo tujun tapi perkakas guna ndatken tujun ngenca, emaka kalak Kristen ula jadi budak duit. Adi duit jadi perayaken banci jadi merangap. Merangap eme sumbul kerina kejahaten ( bdk. 1 Tim. 6 : 10 ). Merangap eme cara nggeluh si tetap mpepulung duit la erbias-bias, tole-tolen lalap, la pernah cukup akapna kerna kai si lit, dungna enggo meduit. Kalak si meduit la pernah bias akapna; kalak si erngena ate man erta la pernah idatca kai isurana ( bdk. Peng. 5 : 10 ).

Ermengkahlah atendu asa si lit bas kam, Tuhan kap sinampati aku. Ermengkah ate asa si lit, eme kalak singasup ngenanami kegeluhen alu kai si lit. "Menikmati hidup bukan soal memiliki segalanya, tapi terus berusaha sambil tetap menikmati apa yang ada pada kita". Ermengkah ate asa si lit ertina lit i bas keriahen ukur ras ngataken bujur, erdandanken igejabna Dibata simereken kiniliten. Dibata simereken rejeki arah pendahin. Dibata si nampati emaka la kekurangan, cukup kerina i bas paksana. Dibata mereken kiniliten arah erbage-bage pendahin : erjuma, erbinaga, aparatur sipil negara, pegawai swasta, buruh, supir, rsd. Dibata pe mereken kiniliten arah pengembangen usaha bage pe ulih investasi erta. Si penting uga ndahikenca, uga ngaturkenca alu mehuli ras makekenca bagi si ngena ate Dibata, jadi pasu-pasu man kalak si deban bage pe man doni enda, alu:

Ngaturken kiniliten alu bujur ( ula nipu, ula nangko, ula ngerampas, ula korupsi, rsd ).
Ngaturken kiniliten erpalasken keperlun ula erpalasken sura-sura saja. Banci jadi alu la sigejab ndabuh kita ku bas cara nggeluh alu la erperkiran ku si la perlu. Umpamana: man banta sidiberu piga pasang kin sekali make uis? Nggo piga lemari uista i rumah? Lit mode baru merincuh rusur nukursa. Labo perban perlu nari tapi nggo riah-riah saja. Gia memang mungkin erkiteken lit duitta maka situkur. Ntah ulin nge ipakeken duit ndai ku si erguna. Umpamana iaturken erbahan dana kas diakoni jabunta, emaka adi lit man sampaten kade-kade ntah temanta sada perpulungen banci jenari sibuat guna nampatisa, nggeluhta pe tole jadi pasu-pasu man kalak si deban.
Ngaturken nggeluh sederhana umpamana : i bas perpan, adi rusur man i tiga ntah i restoran tentu lebih mbue pengeluaren adi ibandingken sitanggerken i rumah. Man i darat ( wisata kuliner ) mehuli nge, saja ula ndabuh ku bas cara nggeluh la erperkiran, ula ka jadi mediker ( pelit ) ipan pe rugi iakap.
Ngaturken waktu erdahin. Perlu kel Ngaturken waktu erdahin alu mehuli. Nina kuan-kuan kalak ku juma, ula dekahen kundul-kundul asangken ncamet. Ula dekahen ngukurken dahin asangken erdahin e. Lit ka kuan-kuan: "Ngadi-ngadi erdahin e," kuan-kuan enda biasana i sehken man kalak si mejingkat, gelah la lupa ngelitken paksa pekesahken. Tapi lit ka kuan-kuan "Ngadi-ngadi, ngadi e," kuan-kuan enda njula man kalak perkisat.
Ngaturken peluang pendapaten alu ngkurangi pengeluaren si banci ilakoken, umpamana: adi lit halaman rumah ntah taneh kosong banci si suan sere, jahe, ntah gule-gulen, lanai rusur nukur. Nambahi dahin, usaha tambahan, umpamana: alu make Hand phone ras komputer banci erbinaga pulsa, token listrik, tiket pesawat, tiket kereta, online shop. Pegawai entah karyawan biasana seh Jumat erdahin i kantor, i bas wari Sabtu libur pakena mobil ntah motorna guna isewaken ( rental, nge grab / gojek ). Arah kerina si enda enggo sipakeken geluhta: perbeliten ras waktunta alu mehuli, tama keriahen pe man banta ras sekelewetta.

EVALUASI :
Uga penggejapenta kenca kita rukur ras ngerana alu mehuli?

DISKUSI :

Saksikenlah rikutken tema renungen PJJ nta sekali enda, i bas kai-kai saja enggo gejabkenndu, "ermengkahlah atendu asa si lit bas kam?"
Perubahan kai tole banci ibahan i bas geluhta, jabunta, ngelitken kiniliten ras makekenca alu payo?

AKSI :
Litken tabungen / kas diakoni pribadi ntah jabunta.

USULEN LAGU :

KEE GBKP No. 16 : 1,2 ( KLIK JUDUL KEE UNTUK MELIHAT TEKS LIRIK )
KEE GBKP No. 255 : 1,4 ( KLIK JUDUL KEE UNTUK MELIHAT TEKS LIRIK )
KEE GBKP No. 315 : 1,5 ( KLIK JUDUL KEE UNTUK MELIHAT TEKS LIRIK )
KEE GBKP No. 325 : 1,3 ( KLIK JUDUL KEE UNTUK MELIHAT TEKS LIRIK )

TOPIK PERTOTON SYAFAAT :

Notoken ngawan perpulungen gelah nggeluh i bas ermengkah ate kerna si lit bas ia.
Notoken ngawan perpulungen gelah tutus erdahin, nggeluh sederhana, pentar ngaturken waktu ras duit bagepe kiniliten siibereken Tuhan alu mehuli, banci tole jadi pasu-pasu man kalak si deban.
Notoken ngawan perpulungen gelah tetap paguh i bas kiniteken, la aru ate, Tuhan sinampati.

Pdt. Karvintaria br Ginting. S.Th.. M.M