Nggit Berubah Erkiteken Perentah Tuhan ( Entrepreneurship : Perubahan Cara Rukur / Mindset ) Bahan PJJ 12 - 18 Mei 2019

Bahan Bimbingen Perpulungen Jabu-Jabu 12- 18 Mei 2019

Nggit Berubah Erkiteken Perentah Tuhan

Entrepreneurship : Perubahan Cara Rukur / Mindset

Ogen : Lukas 5: 1 - 11

Jesus milih ajar-ajar si pemena
(Mat. 4:18-22; Mrk. 1:16-20)
1. Sekali jadi sanga Jesus tedis i tepi Dano Genesaret, kalak si nterem siasak-asaken ngkeleweti IA guna megiken Berita i bas Dibata nari.
2. Idah Jesus lit dua perahu ngadi i tepi dano; penjala-penjala si mada perahu e enggo nusur janah sangana nikapken jalana.
3. Idatasi Jesus perahu e, e me perahu Simon; jenari isuruhNa Simon njembaken perahu e sitik ku lau nirangken tepi dano e. Kundul Jesus i bas perahu e, janah ije nari IA ngajar man jelma si nterem.
4. Kenca dung IA ngajar nina man Simon, “Baba perahundu tertengahen ku ingan si mbages. Amburkenlah jalandu guna nangkap nurung.”
5. Ngaloi Simon, “O Guru, sada berngi enda latih kal akap kami erdahin, kai pe la lit dat kami! Tapi adi Kam kal nuruhsa banci kuamburken jala e.”
6. E maka iamburken kalak ndai jalana janah melala kal datsa nurung seh maka merigat atena jala ndai.
7. E maka ikiapi kalak enda teman-temanna si lit i bas perahu si sada nari ndai gelah reh nampati. Reh kalak ndai janah isina perahu e duana seh dem, janah menam gedap pe.
8. Kenca idah Simon Petrus kai si enggo jadi, erjimpuh ia nembah man Jesus nina, “O Tuhan, laweslah Kam i bas aku nari! Aku kalak perdosa kap!”
9. Mamang ate Simon Petrus ras teman-temanna perbahan melala kal nurung si idatsa e.
10. Bagepe temanna anak-anak Sebedeus e me Jakup ras Johanes. Nina Jesus man si Simon, “Ola kam mbiar, mulai genduari nari kam jadi penjala jelma.”
11. Kenca ikayuhna perahu e ku tepi, e maka itadingkenna me e kerina, jenari ikutkenna Jesus.

Cara rukur manusia tentuna ipengaruhi alu erbage-bage dampar, umpamana kecibal lingkungen, jabu, teman ras si debanna. Kerina enda banci ngobah cara rukur manusia i bas geluhna. Aminna gia perubahen pemikiren ( paradigma ) e banci jadi sue ras sura-surana. Emaka banci nge sekalak si jahat perukuren ras perbahanenna berubah jadi kalak mehuli erkiteken Iingkungen si isekitarna mehuli kerina. Janah banci ka pe terjadi sebalikna, kalak mehuli rempet jadi gutul erkiteken pengaruh lingkungenna. Alu bage tangkas maka perubahen sekalak jelma mbelin kal ipengaruhi lingkungen sekitarna.

Pustaka si Badia naksiken man banta maka kerehen Jesus ku bas sada ingan pasti maba perubahen i bas ingan e. Perubahen si nimaksudken eme perubahen ku arah si mehuli, perubahen si mabai manusia tek man Dibata. Sabap ipetangkas Jesus nge kuasaNa si mbelin e alu erbage-bage tanda sengget si la terukuri manusia. Bali ras si isaksiken Simon Petrus ras teman-temanna, maka kerehen Jesus ku inganna erdahin e ( njala nurung ) kedungenna maba perubahen man bana. Si ndube kin enggo latih akapna erdahin tapi langa idatna ulihna, si erbahanca bene pengarapenna. Tapi kenca Jesus reh, minter ialokenna ulih si erlipat ganda i bas pendahinna e. Arah kejadin enda teridah maka i bas kinilangasupen manusia, Dibata tetap banci nuduhken kuasaNa si mbelin e. E tandana maka Dibata ngasup mpetangkas si la terukuri manusia. Bagem pendahin Dibata bas kegeluhenta, ituduhkenNa erbage-bage kuasaNa si maba keriahen ras kemalemen ate man banta.

La ngenca perubahen i bas ulih pendahin Simon Petrus ras teman-temanna ngenca si teridah, tapi perubahen kiniteken ras pengakun Simon Petrus pe teridah ka nge ije. Adi ndube ikataken Petrus maka Jesus e selaku guru, kedungenna iakuina me maka Jesus e eme Tuhan. Pengakun enda tentu erpalasken perubahen perukuren si lit i bas Simon Petrus tupung ia naksiken perbahanen Jesus i bas geluhna. Arah pengakunna e teridah maka ia jera dingen robah i bas perukuren. Iakuina maka ia labo ise pe iandingken ras kuasa si lit i bas Jesus Kristus. Pengakunna e me erbahansa ia tek nandangi Jesus dingen iikutkenna pe pendilo Jesus selaku "penjala jelma". Arah sie tentu tangkas si idah maka kerehen Jesus ku bas kegeluhen Simon Petrus maba perubahen si mbelin i bas dirina.

Lit kuan-kuan singatakenca maka kegeluhen manusia aruslah "dinamis". Kata dinamis ertina maka kegeluhen manusia e aruslah tetap erkembang, la banci ngadi. Tapi ia pe arus berubah ngikutken perkembangen situasi sekelewetna si terus berubah. Labo berarti maka manusia arus ngikuti sura-sura doni. Manusia arus tetap mpelimbarui dirina bagepe kinitekenna gelahna banci jadi sira ras terang man doni enda ( bdk. Mat. 5:13-16 ). Alu cara bage me manusia banci ncidahken kuasa Kristus si mbelin e man doni enda. Alu bage tentuna, tanggung jawab kalak si erkiniteken pe reh belinna nge. Sebab arus nge ituduhkenna perubahen si mehuli man doni enda. Si langlangna ituduhkenna maka kuasa Dibata ngasup ngubah ras mpelimbarui kegeluhenna. E tandana maka enggo terjadi perubahen si mbelin bas kegeluhenna.

Tambah si e, la banci lang teptep jelma arus megermet nandangi kerina situasi si lit bas sekelewetna. Bali bagi sekalak perjuma si tetap megermet nandangi perubahen musim guna kiniulin sinuan-sinuanna, tentu bage ka me sikap kalak si erkiniteken nandangi perubahen-perubahen si lit i bas sekelewetna. Ertina labo maka kita anti ntahpe bersikap "reaktif" nandangi setiap perubahen si terjadi. Tapi kita perlu jadi kalak si megermet i bas ngenen perubahen e. Segelah perubahen e labo terjeng idah kalak si deban kita la seri, tapi perubahen e terjadi erkiteken kita ersura-sura bengket ku bas kegeluhen si terulin. Guna sie tentu palas perubahen e pe arus nge jelas. Labo erpalasken kepentingen ras sura-sura manusia. Tapi erkiteken turahna pengangkan kerna hal si payo e bas kegeluhen manusia. Alu bage, bahanlah Kata Dibata jadi palas man banta ngelakoken perubahen bas tengahah kegeluhenta.

EVALUASI :
Rikutken yel-yelnta minggu si lewat enggo nge sidahiken dahinta alu bujur?

DISKUSI :

Diskusikenlah perubahen kai saja i bas diri Simon Petrus?
I bas perkembangen jaman enda, perubahen kai saja si arus ilakoken Gereja ( subuk lembaga bage pe ngawan perpulungen ) guna nerusken dahin Jesus i doni enda?

AKSI
Suratkenlah perubahen-perubahen kai saja ateta si ban i bas dirinta. Pilihlah salah sada perubahen si penting kal man banta, janah lakokenlah e sebage aksinta kenca ngikuti PJJ minggu enda. Umpamana : ngelebeken Tuhan asa gegehta ntah perukurenta.

USULEN LAGU :

KEE GBKP No. 88 : 1-3 ( Klik Judul KEE Untuk Melihat Teks Lagu )
KEE GBKP No. 264 : 1-3 ( Klik Judul KEE Untuk Melihat Teks Lagu )
KEE GBKP No. 302 : 1-3 ( Klik Judul KEE Untuk Melihat Teks Lagu )
KEE GBKP No. 381 : 1-4 ( Klik Judul KEE Untuk Melihat Teks Lagu )

TOPIK PERTOTON SYAFAAT :

Notoken perpulungen GBKP gelah tetap nteguh erkiniteken i bas perubahen jaman si cukup cepat enda.
Notoken perpulungen GBKP gelah megermet ras terbuka nandangi kerina perubahen si terjadi isekelewetna.
Siturah i bas perpulungen.

Pdt. Dicky A. Bangun, M.Th.