Mamre Center ( Mamre Center Eme Ingan Jumpa Ras Nandai Tole Sura-Sura Dibata ) - Bahan Bimbingen PA Mamre 12 - 18 Mei 2019

BAHAN BIMBINGEN PA MAMRE 

TANGGAL, 12 - 18 MEI 2019 (Mamre Center) 

Ogen : Lukas 5: 15 - 16

15. Berita kerna Jesus reh mbarna, janah nterem kalak reh megiken IA dingen mindo gelah ipepalemNa ia i bas penakitna nari.
16. Tapi ulin iakapNa IA lawes ku ingan si melenget, janah i je IA ertoto.

Tema : Mamre Center Eme Ingan Jumpa Ras Nandai Tole Sura-sura Dibata.

T u j u n : Gelah Mamre

1. Nggejap kuga perluna ertoto ( retret ); eme prioritas utama i bas nggeluh erkiniteken
2. Erbahan komitmen guna ikut muat bagin mbangun Mamre Center. 

Metode : Ceramah/Diskusi

KATA PENARUH
Megati denga pengangkan ras pengertinta kerna ertoto. Megati ertoto iertiken alu sada kebiasan kalak Kristen ( rutinitas ) ras aktivitas si labo pentingsa. Arah bahan PA-nta sendah ( Luk. 5:15-16 ) bage pe piga-piga ayat sideban ncidahken man banta maka ertoto e me prioritas utama nandangi kalak Kristen.

URAIAN TEKS/TAFSIREN
Tuhan Jesus, i bas IA ndahiken dahinNa i doni enda selaku Messias ncidahken uga pentingna ( uga sentralna ) ertoto. Adi Jesus sendiri pe selaku Anak Dibata ngidah bage pentingna ertoto i bas ndahiken dahinna, apai ka kita enda selaku manusia biasa? Tentu lebih asa si e. Piga-piga ayat Pustaka sincidahken pentingna ertoto eme:

• 1 Tesalonika 5:17 "ertotolah katawari pe" 
• 1 Petrus 4:7 "Kerina sinasa lit enggo ndeher kedungenna, dage kuasailah dirindu janah petenenglah ukurndu gelah ngasup kam ertoto". 
• Roma 12:12 "Meriahlah janah ertotolah kam man Dibata la erngadi- ngadi". 
• Kolose 4:2 "Tutuslah i bas ertoto, janah sanga kam ertoto ersikaplah dingen kataken bujur man Dibata". 

Erkiteken tanda-tanda sengget si ibahan Jesus ( mpepalem kalak si sakit kusta ), mahan bana reh mbar na berita kerna Jesus ras reh teremna kalak si ngikut Jesus lako megi pengajarenNa ras naksiken tanda sengget.

Erkiteken si e me maka Jesus arus ndarami ingan si melungun guna pekesahken ras ertoto. Enda mbuktiken maka man Jesus sendiri pe ertoto e sada kebutuhen si seh kal pentingna ( ertoto e me prioritas utama ) terlebih i bas Jesus ndahiken dahinNa selaku Mesias.

Bali ras HP si menam lowbat perlu i cas gelah megegeh bateraina, bage me pe kalak si erkiniteken arus secara terus menerus ( bdk. Kata: 'ertotolah katawari pe'; 'ertotolah kam la erngadi-ngadi...') ertina ertoto sada kebutuhen / prioritas utama i bas nggeluh. Alu bage ertoto e labo kebiasan / biak saja tapi ertoto e hal si la banci lang.

Ayat 16 "Tapi ulin iakapNa Ia lawes ku ingan si melungun janah ije Ia ertoto". Ayat enda nuriken maka se sibuk-sibuk dahin Jesus, ertoto tetap jadi prioritas utama i bas geluhNa; terlebih justru erkiteken buena dahin si ihadapina erbahanca reh rusurna Jesus `nge cas' bateraina. Adi siperdiateken maka Jesus lawes ku ingan simelungun e la sekali ngenca tapi berulang kali ( rusur ). Enda ngingetken maka mundur i bas rutinitas geluh nari perlu. Mengasingken diri ku ingan si mesuni guna ertoto e perlu ras enda me landasen Alkitab kerna retret i bas gerejanta. Markus 1:35 "Pepagina erpagi-pagi silampas ope denga terang wari keke Jesus, lawes la ku ingan simelenget, ije ertoto Ia.

Kai si ilakoken Jesus secara berulang-ulang eme retret. Retret ertina sada kegiaten pribadi ntah pe kelompok guna mengasingkan diri i bas rutinitas nari jenari ngerenungken kai si enggo ilakoken kita, ertoto / erkomunikasi ras Dibata seh maka kita ndatken kesegaren mulihi guna nerusken pelayanenta. Aminna pe kegiaten retret bena-bena sejarah gereja i lakoken para rahib / biarawan / biarawati, tapi gereja Protestan pe ( khususna kategorial ) enggo nggejap pentingna ngelakoken bagi si ilakoken Jesus ndube.

APLIKASI
Mamre Center GBKP si isepakati i bas MUPEL MAMRE tahun 2015 ras si enggo iputusken i bas SKMS 2015 e me sada program si sangat strategis ija Mamre khususna mencoba menjawab kebutuhen zaman ija tantangen ras dampak / pengaruh modernisasi-globalisasi reh meningkatna' Mamre arah ngelitken Mamre Center mencoba hadir alu nikapken sarana ras prasarana pembinaan ras pemberdayaan jemaat ras masyarakat luas.

Mamre GBKP nggejap maka guna Mamre banci tetap jadi imam i bas jabu ras masyarakat, maka si la banci la ilakoken e me njadiken ERTOTO ntah pe RETRET jadi prioritas utama i bas geluh pribadi ntah pe kelompok, si arus ilakoken secara kontinuitas bagi si ilakoken Jesus.

Guna si e arah diskusi / cerarnah PA-nta sendah iajuk kita Mamre GBKP gelah sada pengidah, sada penggejapenta ras sada tekadta guna mbangun kula ni Kristus i bas doni enda arah ndungi pembangunen Mamre Center GBKP enda.

DISKUSI

1. Mari sidiskusiken engkai maka jesus, sendiri pe selaku Anak Dibata, Mesias, i bas pelayanenNa i doni enda tuhu-tuhu menekanken pentingna ertoto bage pe kegiaten mengasingken diri/retret
2. Cuba situriken mulihi kai-kai saja landasen pemikiren ( rikut bahan PA-nta ) maka ngelitken Mamre Center enda perlu i bas menjabab kemajun zaman. 

USULEN ENDE-ENDEN

1. KEE GBKP No 412: 1-3      ( Klik Judul KEE Untuk Melihat Teks )
2. KEE GBKP No 176: 1,2      ( Klik Judul KEE Untuk Melihat Teks )
3. KEE GBKP No 296: 1, 2     ( Klik Judul KEE Untuk Melihat Teks )
4. KEE GBKP No 279: 1, 2, 4 ( Klik Judul KEE Untuk Melihat Teks )

Pdt. Hermanto Tarigan, M.Th 

Pendeta Mamre GBKP 

HP.081396050383

CATATAN : Adi lit kita erbahan PA Mamre wari tanggal, Kamis 30 Mei Sabtu,.1 Juni 2019 gelah simajuken ku wari Minggu, 26 Mei - Rabu, 29 Mei 2019 erkiteken wari Kamis 30 Mei Sabtu- 8 Juni 2019 ilakoken 10 wari GBKP ertoto.

Share this post