Kiniteken Ras Kepatuhen Maba Pasu-Pasu Tantangen : Keberlangsungen SDA La Ipikirken ( Bimbingen PA Moria 19 - 25 Mei 2019 )

Bahan Bimbingen PA Moria 19 -25 Mei 2019

Tantangen : Keberlangsungen SDA La Ipikirken

SI MAN OGEN : Imamat 25:1-3;

Tahun pepituken
Ul. 15:1-11
1. Ngerana TUHAN man Musa i das Deleng Sinai merentahken ia
2. mereken peraturen-peraturen enda man bangsa Israel. Adi enggo kam seh ku taneh si ibereken TUHAN, tep-tep tahun si pepituken arus maka ola isuani taneh e, guna mereken kehagan man TUHAN.
3. Enem tahun dekahna banci isuanindu jumandu.

Imamat 25:18-22

Persoalen i bas tahun pepituken
18. Patuhi undang-undang ras perentah TUHAN, maka selamat kam nggeluh i bas negeri e. 19. Taneh e mereken ulihna, e maka cukup nge man bandu kai atendu ipanndu, janah mejuah-juah kam ngianisa.
20. Tapi banci jadi lit kalak nungkun, “Kai kin ipan i bas tahun pepituken e, adi la lit juma si erdangi dingen labo lit ulihna si iperani?” 21. Ipasu-pasu TUHAN taneh e i bas tahun peenemken, maka ulih taneh e bias man nakan dua tahun. 22. Sanga ierdangindu jumandu i bas tahun pewaluhken, ipanndu denga kai si iperanindu i bas tahun peenemken. Bias nakanndu, seh iperanindu ka kai si ierdangkenndu i bas tahun e.

T E M A : KINITEKEN RAS KEPATUHEN MABA PASU-PASU

T U J U N : Gelah Moria

Meteh Tahun Sabat bagi si iajarken Tuhan.
Ikut njagai keberlangsungen sumber daya alam seh ku anak kempu.

METODE PA : Inventarisir sumber daya si nandangi punah.

Kata Penaruh.
Dibata nepa langit ras doni bagepe kerina isina alu mehuli. I doni turah erbage sinuan-sinuan eme dukut-dukut ras kayu si erbuah. Ijadiken Dibata kerina erbage rubia-rubia subuk si meliar bage pe si melemuk. IkuhiNa alu terang ras gelap suari ras berngi. Manusia ibere Dibata kuasa ngusahai ras njagai taneh bagepe ngkuasai kerina rubia-rubia ndai subuk si i darat bage pe i laut ras i awang-awang. Ngkuasai labo ertina rate-rate nandangi doni ras tinepa si lit. Manusia selaku makhluk si rukur arus njagai tinepa e gelah ola ceda, alu bage tetap mehuli seh jadi pasu-pasu man geluh manusia terus ku anak kempuna. Arah PA Moria sekali enda, Kata Dibata ngajari kita lako njagai taneh rikutken kai si iperentahken Tuhan ndube man kaiak Israel kerna Tahun Sabat.

Mpebagesi Pengangkan Kerna Ogen
I bas kitab Imamat 25:1-3, Tuhan ngerana man Musa i deleng Sinai, mereken peraturen-peraturen si arus ilakoken bangsa Israel adi nggo seh ku taneh si ibereken Tuhan. Taneh si ibereken Tuhan nandangi ibengketi, ingani, jadi ingan erdahin alu nuan-nuan ras nerusken kegeluhen bangsa si ipasu-pasu Dibata. Taneh e arus idahiken alu mehuli gelah lit ulih dingen taneh e banci mereken kehagan man TUHAN. Perentah Tuhan man bangsa Israel e me: tep-tep tahun si pepituken ola isuani taneh e. Tuhan merentahken bangsa Israel guna mpengadi taneh ( tanah di istirahatkan ) e me i bas tahun pepituken si igelari e me Tahun Sabat. Taneh la isuani, ola perani si turah-turah bana, ola perani buah anggur si la iranggasi. Kasakai Si turah adi lit ulihna banci ibuat budak, kalak upahen, kalak pertandang, bagepe kerina rubia-rubia banci manganisa. Arah perentah enda turah Penungkunen i bas manusia nari, kai kin ipan kami i bas tahun pepituken e? Nina Tuhan erkelang-kelangken Musa, gia taneh la isuani i bas tahun pepituken, bias nge pangan dingen Ia kekurangen. Bangsa Israel pe banci jadi pasu-pasu man kalak sideban bagepe man rubia-rubia. Tahun Sabat ihubungken ku keberlangsungen alam, kepeken taneh si ngadi isuani, erbahanca taneh e tetap mehumur. Tapi adi tetap isuani maka "bunga tanah" eme lapisen taneh si arah datas si mehumur meter terkikis ( aus ), taneh banci lanai mereken ulih. Si idah gundari, taneh-taneh perjuman si la ngadi-ngadi isuani nggo lanai mehumur emaka arus ipupuki maka lit ulihna erkiteken nggo lanai mehumur. Pemaken pupuk kimia ras obat kimia banci mere dampak kurang mehuli nandangi kesehaten manusia bagepe banci erbahanca mate rubia-rubia. Adi taneh la mehumur sinuan-sinuan la turah, kai si jadi? Sinuan-sinuan ras rubia-rubia banci bene ( punah ). Arah si enda banci si idah uga pentingna taneh e "iistirahatken" (la isuani). Tahun sabat perlu kal ilakoken gelah tetap taneh e mehumur.

Ayat 18-22: "Patuhi undang-undang ras perentah TUHAN, maka selamat kam nggeluh i bas negeri e. Taneh mereken ulih, e maka cukup nge man bandu kai atendu ipanndu, janah mejuah-juah kam ngianisa". Tuhan masu-masu ulih taneh seh tahun peenemken, gia mulai ka nuan-nuan i bas tahun pewaluhken janah mereken ulih i bas tahun pesiwahken. Bias nge nakan guna dua tahun man bangsa Israel gia lanai isuani taneh i bas tahun pepituken, erkiteken nggo ibere Tuhan ulih taneh e sedekah enem tahun. Si enda jadi pengujin kiniteken man bangsa Israel guna tetap ersukuten man Tuhan kerna pangan bagepe keperlun geluhna. La pernah kekurangen ibahan Tuhan. Tuhan mereken pasu-pasu si simpar man tinepaNa terlebih man manusia si ikelengiNa. Kiniteken ras kepatuhen maba pasu-pasu man manusia.

Pengkenaina.
Ndube bangsa Israel kenca enem tahun isuanina taneh, tahun pepituken ipengadina. Cuba si ukuri alu mbages enggo piga tahun juma ntah sabahta terus isuani? Pernah nge si pengadi sekalilah gia? Perlu kal taneh e iistirahatken guna pemulihenna. Bage pe perlu kita rukur guna ngkurangi pemaken pestisida ntah pupuk kimia si erbahan ceda struktur taneh. Mehuli kal man si perjuma-juma guna nalihken i bas pupuk kimia nari ku pupuk organik, alu bage taneh pe mehumur ulih sinuan-sinuan pe kurang kandungen pestisidana. Adi taneh tetap mehumur, kerangen pe mbelang denga ( la ceda ) bahan baku i bas usaha industri pe banci tetap lit. La terjeng sie ngenca tapi rembus denga angin erbanca malem, banjir pe la

terjadi erkiteken Ia lit pengikisen taneh (erosi), rubia-rubia pe Ia bene. Arah www.tentik.com banci si oge, nina: lit 10 sumber daya alam si nandangi punah eme pasir, bunga taneh, sarden, kaviar, madagaskar, madu, helium, anggur, lau, galuh. Ngkai pasir jadi uruten pertama si nandangi pulah? Erkiteken naikna permukan laut, lit peningkaten aktivitas badai, erosi erkiteken pembangunen sekitar garis pantai. Enda me sebagin kitik gambaren doninta genduari enda. Lanai kaiak mediate ngukurken keperlun kaiak sideban, sinilakokenna eme mpebayak dirina jine si la erbias-bias. Erkiteken enterem kaiak si erkuasa make kuasana guna mpebayak dirina labo keperlun kaiak si enterem. Mari radu ras kits notokenca, sibenaken i bas dirinta nari.

Inventarisir.
1. Cuba si inventarisir (si pepulung) sumber daya alam kai saja si nangdangi punah i daerah inganta tading?

2. Mari si inventarisir kai banci silakoken aksi nyata secara pribadi bagepe secara kategorial Moria, usaha-usaha ntah kegiaten guna njagai ras ngelestariken taneh