Ngelai / Erdahin Alu Pusuh! - Spiritualitas Mamre ( Bahan PA Mamre 19 - 25 Mei 2019 )

Bahan Bimbingen PA Mamre 19 - 2 Mei 2019

( Spiritualitas Mamre )

Ogen : 1 Kronika 11:10-25 ;

Tentera Daud si terberita
(2Sam. 23:8-39)
10. Enda me daftar tentera Daud si terberita. Radu ras bangsa Israel si deban, tentera e nampati Daud gelah jadi raja. Sue ras si enggo ipadanken TUHAN, ijaga kalak enda maka kerajan Daud tetap megegeh.
11. Si pemena e me Jasobeam i bas terpuk Hakmon nari; ia me peminpin “Si Telu”. Alu make lembingna ilawanna telu ratus kalak janah ibunuhna si telu ratus kalak e i bas sada peperangen.
12. Kalak si terberita i bas “Si Telu” e, Eleasar anak Dodo, i bas terpuk Ahoh nari.
13. Erperang ia arah pihak Daud ngelawan bangsa Pilisti i peperangen i Pas Dammim. Eleasar sanga i bas juma dawa tupung bangsa Israel mulai kiam.
14. E maka ia ras teman-temanna ertahan i tengah juma e, jenari ilawanna bangsa Pilisti. Ibereken TUHAN man bana kemenangen si mbelin.
15. I bas sada wari, telu i bas kepala tentera si telu puluh e lawes ku batu mbelin, deherken gua Adulam, ingan Daud tading, sedangken gerombolen bangsa Pilisti enggo erkemah i Baluren Repaim.
16. Paksa e Daud sanga i benteng uruk-uruk, janah sada terpuk bangsa Pilisti enggo ngkuasai Betlehem.
17. Metedeh kal ate Daud kutana, e maka nina, “Merincuh kal aku sekalak maba lau i bas sumur i pintu gerbang Betlehem nari!”
18. E maka teluna tentera si terberita ndai erpala-pala ngepari kemah bangsa Pilisti e, itimbana lau i bas sumur e nari, jenari ibabana mulih man Daud. Tapi la nggit Daud minem lau e, iamburkenna jadi persembahen man TUHAN,
19. nina, “Asa ndigan pe la aku nggit nginemsa, sabap seri kap e ras minem dareh kalak si ngasamken kesahna muat lau e!” E maka la ia nggit nginemsa. E me kinirawan teluna tentera si terberita e.
20. Senina Joap, si Abisai, peminpin “Si Mbisa Telu Puluh”. Ia erperang alu lembing ngelawan telu ratus kalak janah ibunuhna kerina, e maka ia jadi terberita i bas “Si Telu puluh”.
21. Ia si terberitana i bas “Si Telu puluh” e, e maka ia jadi peminpinna; tapi la bagi “Si Telu” e kal ia terberitana.
22. Benaya anak Joyada i Kapsel nari sekalak tentera si terberita; piga-piga kali teridah kinirawanna, termasuk munuh dua puanglima kalak Moap. Pernah sekali lawes ia ku bas lubang si mbages sangana nusur es, janah ibunuhna sada singa.
23. Ibunuh pe sekalak bangsa Mesir, sekalak si mbestang, gedangna lebih dua meter, ersenjataken lembing si seh kal galangna. Benaya ngelawan bangsa Mesir e alu ciken, isintapkenna lembing kalak Mesir e i bas tanna nari, jenari ibunuhna kalak Mesir alu lembing e ka.
24. E me kinirawan Benaya. Ia sekalak i bas “Si Telu Puluh”.
25. Ia si terhormatna i bas “Si Telu Puluh” e, tapi terberitan denga “Si Telu” e asang ia. Itamaken Daud ia jadi kepala pengawal pribadina.

Perb. Rasul 23:1
1. Ipernehen Paulus anggota-anggota sidang e, jenari nina, “O senina-senina! Seh i bas wari enda aku tetap nggeluh alu pusuh peraten si bersih i lebe-lebe Dibata.”

Tema : "Ngelai/ Erdahin Alu Pusuh!"

Tujun : Gelah Mamre

1. Meteh maka ngelai alu pusuh e me panggilen pelayanen Tuhan
2. Si ngelai alu pusuh e me erpalasken keleng ate Kristus, seh maka la "pamrih" i bas ngelayani

Metode : Ceramah

KATA PENARUH
Ibas 29 September 2018 si lewat gempa bumi rikut tsunami nderpa daerah Donggala, Palu. Nterem si jadi korban i bas bencana enda, termasuk Anthonius Gunawan Agung, petugas ATC ( Air Traffic Controller ) kantor cabang Palu. Agung mengalami patah tulang erkiteken lompat i bas lantai empat tower ATC bandara Palu. Ope sie, Agung memandu pesawat Batik air, pesawat terakhir si lepas landas sanga gempa e jadi. Agung alu setia nimai seh pesawat e tuhu-tuhu lepas landas. Kenca pesawat e lepas landas, gempa reh gegehna, erkiteken si e lompat ia i bas lantai empat nari. Akibatna, ia patah tulang, janah ia idilo Dibata ope sempat ibaba ku Balikpapan guna irawat Erkiteken dedikasi, kesetiaan, bagepe pelayanen si isehkenna guna mpelebe keselamaten kalak si deban asangken dirina jine, Airnav Indonesia mpenangkih pangkatna dua tingkat selaku bentuk penghormaten ras penghargaan. Cerita kerna Agung i datas ncidahken man banta tanggungbawab pelayanen janah kesetiaan guna ndalanken dahin si enggo iendesken man bana. Minggu enda erlajar kita kerna spiritualitas pelayanan i bas tentera-tentera Daud si terberita bagepe i bas pelayanen Paulus si mpersingeti kita uga pentingna dedikasi, komitmen, perngorbanen alu pusuh si dem alu kekelengen.

URAIAN TEKS / TAFSIREN
Kenca Saul mate, Dibata mereken kuasa kerajaan man Daud anak Isai. I bas kepemimpinen Daud jadi raja, program pemena si ilakokenna e me mindahken ibukota kerajaan ku Jerusalem, kenca 7 tahun 6 bulan dekahna ibukota kerajaan e ringan i Hebron. I bas bahan oraten PA Mamrenta minggu enda, ituriken maka kesuksesen kepeminpinen Daud jadi raja Israel i dukung tentera-tenterana si tuhu-tuhu megegeh, terampil, janah luar biasa kesetian bagepe pelayanenna nandangi Daud. Selaku raja si mbaru iangkat jadi peminpin Israel, Daud tentu la ngasup ngaturken kerajaan e sisada. Melala tantangen, melala gejolak, secara khusus pe tantangen ras ancamen si reh i bas kalak Pilisti si lalap ndarami cara guna naluken bangsa Israel. I bas situasi enda kecibal tentera Daud si terberita tuhu-tuhu penting guna njaga kerajaan e tetap megegeh.

I bas ay.11-14 ituriken kerna tentera "Si Telu" ( Triwira ) e me Jasobeam ras Eleasar. Tentera "Si Telu" enda tuhu-tuhu terberita erkiteken gegeh ras prestasina si luar biasa i bas ia naluken telu ratus kalak i bas peperangen alu lembing, jenari ilawanna kalak Pilisti i bas juma dawa tupung bangsa Israel mulai kiam. Tentera "Si Telu" (Triwira) termasuk pasuken paling elit dingen si paling utama i bas kerajaan Daud. Selain tentera "Si Telu" lit ka si igelari kepala tentera si telu puluh. Senina Joap, si Abisai, e me peminpin "Si Mbisa Telu Puluh". Ia erperang alu lembing ngelawan telu ratus kalak janah ibunuhna kerina, emaka ia jadi peminpin "Si Telu Puluh" e. Selain kepala tentera si telu puluh e lit ka Benaya, anak Joyada. Ia pe sekalak tentera si terberita, si termasuk kelompok "Si Telu Puluh". Prestasina si luar biasa eme: ibunuhna dua pualingma kalak Moab, ibunuhna sada singa i bas lubang mbages sanga nusur es, jenari pernah ibunuhna sekalak kalak Mesir si gedangna dua meter ersenjataken lembing si seh kal galangna alu ciken ras lembing kalak Mesir e jine. Erkiteken prestasina enda itamaken Daud ia jadi kepala pengawal pribadina. Adi kin gundari banci siandingken ras Kepala Paspampres ( Pasukan Pengamanan Presiden ) I bas ay. 15-19 ituriken sada turi-turin ija peminpin "Si Telu Puluh" e lawes ku batu mbelin, deher gua adulam ingan Daud tading. Paksa si e pasuken Pilisti enggo erkemah dingen ngkuasai piga-piga daerah Israel, termasuk Betlehem. I bas situasi e, metedeh kel ate Daud kutana janah nina merincuh kel ia sekalak maba lau i bas pintu gerbang Betlehem nari. Pemindon Daud enda tentuna pemindon si "la masuk akal" sebab Betlehem sangana ikuasai bangsa Pilisti. Melala denga kel tentu lau i bas ingan si deban selain Betlehem. Aminna pe pemindon enda tempa "mission impossible) (Misi/ tugas si metahat) telu tentera si terberita ndahiken tugas enda. Ijenda teridah inisiatif ras keberanian si luar biasa i bas telu tentera e sebab Daud labo nuruh ntah pe mindo man kalak tertentu guna ndahikenca, tapi erkiteken ia merasa ertanggungjabab / merasa terpanggil idahikenna dahin e. Erpala-pala ia ngepari kemah bangsa Pilisti, janah mungkin pe ia terlibat perang, iayak-ayak pasuken Pilisti i bas dahin e, tapi erkiteken ia sekalak si mbisa, terlatih dingen pentar ngasup ia lepas i bas situasi e, jenari ibabana mulih man Daud. Seh kenca lau e bas Daud, iamburken Daud lau e jadi persembahen man Tuhan sebab Daud rukur adi kuinem lau e seri kap aku nginem dareh kalak si ngasamken kesahna muat lau e.

Kerajan Israel iteruh kepeminpinen Daud banci aman, sejahtera, dingen makmur seh 40 tahun erkiteken i sekelewetna lit nterem tentera si tuhu-tuhu setia, berkomitmen, rela berkorban, bahkan nggit ngasamken kesahna guna Daud ras kerajan e. Kesetian ras komitmen tentera e pe erkiteken iidahna Daud pe selaku raja tetap setia man Tuhan i bas ndalanken kepeminpinenna. Kesetiaan ras pengorbanenna tentera e labo ngarapken kai pe. Labo lit medali, piagam, sertifikat, rsd, bali ras si ituriken Paulus i bas Perb. Rasul 23:1 i bas ia isidang i lebe-lebe pengadilen Agama maka ia tetap nggeluh alu pusuh peraten si bersih i lebe-lebe Dibata. La lit motivasi-motivasi si deban, la lit "pamrih" ngarapken imbalen, ipujiken kalak, rsd tapi murni eme guna meritaken Berita Si Meriah gelah reh teremna kalak si tek man Jesus Kristus dingen iselamatken.

APLIKASI
Motto Mamre eme "Mamre Erdiate Mamre Erpemere". Motto enda perlu kel sicidahken i bas pelayanen si ilakoken Mamre. Bali ras tentera Daud si terberita bagepe pelayanen Berita si Meriah si idahiken Paulus, Mamre pe perlu kel nggejapken maka Dibata ndilo kita muat bagin guna ngelai jabunta, gereja / perpulungen ras masyarakat. Mamre iajuk guna nuduhken inisiatif i bas ndahi / ngiahken temanta si lanai reh ku perpulungen ras ku gereja, merasa terpanggil mereken waktu ras kiniliten guna ikut muat bagin i bas dahin Diakonia misalna, ndahi kalak sakit, kemalangen / ngapuli, bencana alam, rsd ntah bagi si enggo idalanken Mamre GBKP i bas mereken beasiswa man anak-anak perpulungenta si berprestasi ras si susah ekonomi orang tuana. Adi si idah enggo ceda pagar gerejanta ntah lanai sikap catna, Mamre berinisiatif guna mpekena ntah pe ngecatsa. Adi lit si la siangkan i bas jabu, mamre hadir guna maba perdamen, guna nuriken si payo, si ngena ate Dibata. Adi melala pinakit sosial sekitarta ( judi, penyalahgunaan Narkoba, prostitusi, rsd ) Mamre pang guna "bersuara", mpersingeti, bahkan ngelaporkenca ku pihak berwajib. Tentu enda sada dahin si beresiko, menuntut pengorbanen waktu, tenaga, ras pikiren, tapi guna si e me kita idilo guna banci jadi sira ras terang doni enda. Janah i bas kita ndahiken dahin e, si dahiken erpalasken keleng ate, la ngarapken upah, balasen, pujin, ntahpe penghargaan bas manusia nari seh maka la kita kecewa ntah pe surut adi la ipujiken ntah iergai kalak si deban, erkiteken sidahiken kerina e selaku pelayanenta man Dibata si enggo Ieben mereken diriNa man banta i bas Jesus Kristus.

DISKUSI

1. Oge mulihi 1 Kronika 11:17-19, uga pengakapndu kerna inisiatif, keberanian, bagepe pengorbanen telu tentera si terberita e i bas ia ngelai Daud? 
2. Kai nge ndia banci siban selaku Mamre guna meningkatkan spiritualitasta? janah i bas hal kai nari deba Mamre perlu hadir muat bagin i bas ngelai?

USULEN ENDE ENDEN

1. KEE GBKP No. 68 :1-3      ( Klik Judul KEE Untuk Melihat Lirik Teks Lagu )
2. KEE GBKP No. 191 :1,3,4 ( Klik Judul KEE Untuk Melihat Lirik Teks Lagu )
3. KEE GBKP No. 471 :1-      ( Klik Judul KEE Untuk Melihat Lirik Teks Lagu )
4. KEE GBKP No. 279 : 1, 4   ( Klik Judul KEE Untuk Melihat Lirik Teks Lagu )

Pdt. Eben Karosekali 

Sekretaris Klasis Barus Sibayak 

HP. 082160629612

CATATAN : Adi lit kita erbahan PA Mamre wari /Tanggal, Kamis 30 Mei - Sabtu, 1 Juni 2019 gelah simajuken ku Wari tanggal Minggu, 26 - 29 Mei 2019 erkiteken wari Kamis 30 Mei - Sabtu, 8 Juni 2019 ilakoken 10 wari GBKP ertoto.

Share this post