Beritakenlah! Kenangkihen Tuhan Jesus Ku Surga ( Bahan PJJ 26 Mei - 1 Juni 2019 )

Beritakenlah!

Bahan Bimbingen Perpulungen Jabu-Jabu 26 Mei - 1 Juni 2019

( Kenangkihen Tuhan Jesus Ku Surga )

Ogen : Markus 16 : 19 - 20

Jesus nangkih ku Surga
(Luk. 24:50-53; Perb. 1:9-11)
19. Kenca Tuhan Jesus ngerana man ajar-ajar, iangkat me IA ku Surga. I jah IA kundul arah kemuhen Dibata.
20. Lawes ajar-ajar, janah erberita ia ku japa pe. Tuhan nampati ia ibas dahinna, janah Tuhan pe ikut erdahin ras-ras kalak enda. Ibahan Tuhan maka i japa pe kalak enda meritaken berita si ibas Dibata nari e i je pe jadi tanda kuasa ras tanda sengget.]

Kenca Tuhan Jesus ngerana man ajar-ajar, iangkat me IA ku surga. ljah IA kundul arah kemuhen Dibata. 

Biasana kenca dung kalak erdahin, ngadi ras pekesahken me ia. Itatapna dahinna ndai malem atena sabab enggo banci idahikenna kerina alu mehuli. Man kalak perjuma, ngadi ras pekesahken e biasana kundul i teruh sapo, entah iteruh batang kayu i duru juma. Man si erdahin bas kantor, kundul pekesahken ningen, e miser bas kursina nari pindah ku sada ingan lako minem ras ercakap-cakap ras teman bas sada kantor e. Adi supir motor, pengadina motorna, lawes ia ku kede, kundul-kundul ras teman-temanna janahna minem. "Kundul" ertina, enggo dung sada bagin dahin e idahinken, tapi lenga kerina erkedungen, perlu denga iterusken.

Kenca 40 wari Jesus encidahken bana man ajar-ajarNa, Jesus nangkih ku surga, ngatakenca maka dahinNa i doni enda enggo idahikenNa alu mehuli ras enggo dung ( kuh ). Arah kepatuhenNa, iendeskenNa diriNa jadi persembahen si nggeluh man Dibata, guna nebusi doni ras kerina isina. I das kayu persilang penebusen nandangi doni enda enggo ilakokenNa. Manusia ras doni enda itebus, kita jadi anak-anak Dibata, jadi sikerajangen Dibata. Erkiteken dahin e enggo dung, Jesus mulih ku inganNa i surga, sabab je nari kin asalNa.

I surga kundul IA arah kemuhen Dibata, ertina pekesahken IA, maka pendahinNa i doni enggo dung. Malem ate Dibata Bapa natap kerina pendahinNa, sabab Jesus ndahiken dahinNa erkesehen, tutus kal ateNa ndahiken dahinNa, la tanggungiNa erdahin, nggit IA erkorban seh dareh ras KesahNa pe iasamkenNa. Si e kerina idalankenNa erkiteken kepatuhenNa man BapaNa. Idah Dibata kepatuhenNa e ras uga kekelengenNa man doni enda. Emaka ibereken Dibata man baNa kemulian ras kuasa si meganjangna IA jadi Raja i surga ras i doni. Kerina si nggeluh i surga, i babo doni ras i teruh doni, erjimpuh nembah man baNa ( bdk. Plp. 2:9-11 ).

Payo doni enda enggo itebus arah pendahin Jesus i datas kayu persilang, kalak si tek man baNa enggo jadi sikerajangen Dibata, tapi lenga kerina isi doni enda tek ras ngaloken IA jadi Juruselamatna. Emaka surga nari Jesus tetap ertoto man Dibata kerna anak-anakNa ( bdk Heb 7:25) gelah ngasup naluken kuasa-kuasa si lit i doni, si banci mabai la ndauh sirang ras Dibata. Tole nari ibereken Jesus kuasa man ajar-ajar lako erberita man doni enda kerna keselamaten si enggo jadi, gelah doni enda pe tek ras reh ndahi Jesus lako ndatken keselamaten.

Tuhan Jesus ndilo ajar-ajar ras nuruhsa erberita alu kuasa. Ajar-ajar Jesus teremen kalak sederhana, biasa-biasa saja, sekolahna labo meganjang, labo arah keluarga kalak bayak. Tapi man bana ibereken kuasa, nehken kebenaren kata Dibata. Kujapa pe ia lawes erberita, Tuhan Jesus tetap nampati. Dahin ajar-ajar e pe gundari iendesken man banta ( gereja ) eme meritaken keselamaten si enggo ibaba Jesus ku doni enda. Perlu si sedari maka erberita ningen labo saja lawes ku kuta kalak janah jenari mberitaken kerna Jesus si enggo maba keselamaten man doni enda. Tapi erberita e jadi "kegeluhen", i japa pe ras katawari pe gereja erberita.

Kinata si idah maka nterem nge kalak Kristen ( er agama ), tapi la nggeluh i bas kata Dibata, sabab ije lit arus kinijeran ras perubahen. Banci saja arus itadingken kerina si sedekah enda entabeh siakap ngelakokenca umpamana erbual, korupsi, rsd. Aman denga siakap bas posisinta amin pe la bujur. Nggeluh bas kata Dibata e bagi si mesera ndalankenca, enterem denga kita nggeluh bagi padek ( katak ), dua inganna, sung i lau sung i daraten. Tupung i gereja mehuli kal kita, tupung bas endahin labo ka lit bedana ras kalak si lenga nandai Dibata. Arah renungen Perpulungen Jabu-iabunta enda ibabai kita gelah lit perubahen i bas cara rukur, perbahanen ras pengerananta. I bas ndalani proses perubahen e ije ka me kita erberita, nerusken pendahin Jesus i doni enda. Erberita e la banci singadiken, sebab e kegeluhenta. Teptep kesempaten, beritakenlah! Jesus tetap nampati i bas kita erberita.

EVALUASI
Lit nge kita muat bagin notoken calon serayan si man pilihen? Siteruskenlah!

DISKUSI

1. Turiken pengangkanndu kerna erberita e jadi kegeluhen ( gereja )!
2. Sidalanken nge sedekah enda program PI bas runggunta? Si diskusiken ras bahanlah aksinta!

AKSI
Secara pribadi sikirim 1 ntah 2 ayat teks Pustaka si Badia man temanta. Khususna man temanta si jarang reh ku perpulungen ras gereja. Secara Runggun ras-ras kita ndalanken program PI Runggunta. Adi lenga lit programna, si arihken ras sidalanken benaken bas sektor nari. Runggun si enggo lit programna perlu ipaparken man perpulungen gelah banci ras-ras ndalankenca.

USULEN LAGU :

1. KEE GBKP No. 88 : 1,2,4  ( Klik Judul KEE Untuk Melihat Lirik Teks Lagu )
2. KEE GBKP No. 209 : 2,5   ( Klik Judul KEE Untuk Melihat Lirik Teks Lagu )
3. KEE GBKP No. 295 : 1-3   ( Klik Judul KEE Untuk Melihat Lirik Teks Lagu )
4. KEE GBKP No. 322 : 1-4   ( Klik Judul KEE Untuk Melihat Lirik Teks Lagu )

TOPIK PERTOTON SYAFAAT

1. Gelah erberita kerna keselamaten si ibaba Jesus ku doni enda jadi identitas kerina ngawan perpulungen
2. Kerina perpulungen muat bagin ngelitken ras ndahiken program PI runggun.
3. Si turah bas perpulungen.

Pdt. Nurbety br Ginting, M.Th.

Share this post