Etika Ngerana - Ranan Si Pentar ( Bahan PA Mamre 26 Mei - 1 Juni 2019 )

Bahan Bimbingen PA Mamre

26 Mei 2019 - 1 Juni 2019

( Etika Ngerana )

Ogen : Pengerana 12 : 9 - 14

Kesimpulen
9. Si Pengerana enda erpemeteh mbages dingen pentar.
E maka iajarkenna manusia kerina si ietehna.
Melala pengajaren ipelajarina,
jenari iujina payo ntah lang.
10. Idaramina kata-kata si ngasup mereken pengapul,
tapi kata si isuratken bujur kap.
11. Ranan kalak pentar enda bali kap ras ciken permakan si entelap,
ciken si ipakena naruhken biri-birina.
Ajar dingen pedah si ipepulungna
paguh dingen nteguh desken paku si ipatukken mbages.
Kerina e perbahanen Dibata nge.
Ia kap ngenca permakanta si tuhu-tuhu.
12. O anakku, lit sada nari si perlu kal ipergermetkenndu.
Kitap la lit tampukna,
janah melala erlajar mahanca latih daging.
13. Kenca kerina enggo kutimbang,
enda me tampukna si kudat.
Erkemalangenlah man Dibata dingen patuh man peratenNa,
sabap guna si e saja me manusia itepa.
14. Dibata kap si ngerunggui kerina perbahanennta;
si mehuli ntah si la mehuli,
bage pe si terbuni.

Tema : Ranan Si Pentar

Tujun : Gelah Mamre

1. Ranan manusia penting i bas kegeluhen
2. Teptep ngerana make kata-kata si pentar ras maba kiniulin

Metode : Diskusi

KATA PENARUH
Lit kuan-kuan ngataken : "Adi ngerana la nggalar", emaka kai pe banci ibelasken kalak asa atena, asa puasna, kai pe ibelaskenna, la lit si ngelarangsa. Ngerana sitik entah melala, gendek entah gedang la lit aturenna, emaka kai pe banci ibelasken. Maun enggo terkuan, adi sesekalak si pet kel ngarana minter nina "peten ia ngerana asangken man" eme perban melala ia ngerana dingen meriah pe iakapna ngeranai. Anem gia ngerana labo bagi nggalari pulsa, perlu ka nge kita njaga maka ranan si belasken kita e la nakiti ukur kalak si deban, la erbahansa nembeh ate kalak i bas kita erbelas. Nelpeki, lenga kita ngerana, lenga turah sinanggel kalak sideban. Arah renungenta enda me ibabai kita gelah i bas ngerana belaskenlah cakap si mereken kemalemen ate man kalak si ndengkehkensa, e me ranan si pentar. Teneng pusuh kalak simegikensa i bas kita erbelas, ingetna si mehuli si belasken kita. Nandangi kalak si tuan asangken kita, mehamat kita ngerana, la mejarjar, erkesehen i bas melasken kata, enda me si perlu si gargari arah renungen PA Mamrenta i bas wari enda mpeseh kata-kata alu pentar.

URAIAN TEKS / TAFSIREN
Kitab Pengerana melala ngajarken kepentaren kerna erti kegeluhen i doni si kentisik enda, melala si jadi 'misteri' si labo siangka kai sijadi i bas kegeluhenta. Emaka kegeluhen enda sia-sia adi la kin ernalem man Tuhan, kai pe silakoken tetap ah penalemen kempak Tuhan. Kata sinibelasken pe mabai kemalemen ate man kalak si megikensa. Kata si ndarat i bas babah nari eme kata -kata si pesenangken ukur kalak sideban erkiteken e kata kebenaren. Kata-kata si ndarat i bas babah nari eme kata-kata pesenangken ukur ras dem alu kebenaren. La kata guak ras kata si terjeng "manis di mulut", gelah kata sinibelasken e la jadi kata si sia-sia. Tapi kata sinibelasken eme ranan si mehuli desken ciken permakan, ciken permakan ipake guna nelamatken biri-biri si enggo lalar. Tongkat e tajam ras entelap, tapi gunana e me ngelindungi, njagai kerina biri-biri gelah ola bene. Bage me pe kata-kata sinibelasken e, banci jadi meser, pagit iakap megikensa, erkiteken kena kel ku bas kegeluhenta, tapi gunana e me ngubahken kalak si lanai payo perdalinna, gelah banci mulihken kempak Dibata. Kata-kata kalak si pentar e me kata-kata si banci jadi gelemen ras ndorong manusia guna ngasup ngaturken kegeluhenna alu perbahanen-perbahanen si benar ras payo. Ulu perbahanen kalak si pentar e me i bas Dibata nari. Kerina perkatan kalak si pentar e me i bas Dibata nari. I bas kitab Pengerana enda lit 38 kali ikataken kerna kesia-sian i bas kegeluhen enda, e me usaha manusia si iperjuangken adi la kin malang kempak Tuhan, la ngasup pesenangken kegeluhenta. E me sinikataken sia-sia, tapi adi ulih kalak si malang man Tuhan ngasup ia ngenanami kegeluhenna dingen pe geluhna tetap ermalem ate.

Manusia la ngasup ngangkai pendahin Tuhan i bas kegeluhenna, sabab manusia la ngasup ngangkai Dibata e alu cara rukurna. Si penting tek nandangi penjayamen Tuhan, malang man Tuhan. Arah kerina kai si enggo idatken ras ipertimbangken Pengerana, kegeluhen enda labo uluna i bas dirinta jine tapi i bas Dibata. Emaka pang ia mereken jabab i bas kerina perkara sinidalanina alu ngataken : enda me tampukna si kudat : 'erkemalangenlah man Dibata dingen patuhlah man perentahNa sabab guna sie me manusia i tepa ( Peng. 12:13 ) Intina e me la perlu kita ngukurken kai si la banci si jaka ras siangka, tapi tek dingen yakin kita nandangi penjayamen Tuhan. Malang man Tuhan, nanamilah pemere Dibata si enggo iberekenNa man banta. I bas umur manusia si labo ndekah enda, ngasup kita ngenanami pemereNa e dingen kegeluhenta pe ernanam man kalak sideban.

APLIKASI
Mari dage si isi kegeluhenta si labo ndekah i doni enda alu hal-hal si mehuli i bas kegeluhen pelayanen ras keluarganta. Ibadah ras pendahinta si erguna man kalak sideban bagepe ras sekelewetta. Adi si renungken bicara pagi me wari kematenta, sendah eme wari terakhir kegeluhenta, ula sia-siaken waktu sinibereken Dibata man banta. Isilah kegeluhenta alu hal si mehuli buah si meramis ras entebu man kalak sideban, bahan pe kegeluhenta jadi pasu-pasu man kalak sideban. Dari pada erdalan la ertujun ngkeriken wari ras jam kegeluhenta alu bage-bage saja mari si isi kegeluhenta alu erbahan si mehuli, geluhta erguna gedang entah pe la gedang geluhta, erguna ras ernanam man kalak sideban guna ngelai Tuhan ras jadi pasu-pasu man kalak sideban.

Melala kalak hebat ras populer ump. Michael Jackson, Marylin Monroe, Elvis Fresley, Jhon Lennon ras sidebanna, tapi kegeluhenna labo dame, i bas erti lanai ternikmatisa kinibayaken ras popularitasna si terkenal erkiteken kurang pentar. La jaminen malem ate adi la kin nggeluh i bas Jesus. Kerina popularitas, kinibayaken, jabaten ras kerina si lit i bas kegeluhenta enda pemere Dibata, kita terjeng alatNa guna ngenanamisa ngenca. Kegeluhen enda desken sada perdalanen ngenca, idalani anem gia melala nge perjuangen guna mentasisa, pagit, melam, mesui, latih ras melala lingkaren si megeti ije-ije saja lalap kegeluhen siman bentasen, tapi uga dage kegeluhen si jadi perjuangen enda banci erguna ras ernanam nandangi kalak sideban, sekelewet ras keluarganta. Pentar kita makeken pemere Dibata, malem ate kalak i bas ndengkehken kai sinibelasken kita, inget kalak si mehuli arah kita erbelas, erbekas erkiteken maba ku bas kiniulin. Kerina min kita malang man Tuhan gelah la sia-ia kegeluhen si kentisik enda ngenca.

DISKUSI

1. "Ranan kalak pentar enda bali kap ras ciken permakan si entelap " pengerana 12:11, kai nge erti kata enda i bas kegeluhenta ? janah enggo nge kita pentar i bas nehken ranan ? diskusikenlah alu mbages.
2. Cubaken gargari i bas pusuhndu, pernah nge lit pengerana ras perbahanen kalak si erbahansa sakit kel iakapndu, janah kai dampakna man dirindu pengeranana e. Saksiken dingen turiken salu terbuka gelahna salang pusuhndu. 

USULEN ENDE ENDEN  

1. KEE GBKP No. 198 :1, 4    ( Klik Judul KEE Untuk Melihat Teks Lagu )
2. KEE GBKP No. 482            ( Klik Judul KEE Untuk Melihat Teks Lagu )
3. KEE GBKP No. 249 : 1,4,5 ( Klik Judul KEE Untuk Melihat Teks Lagu )
4. KEE GBKP No. 282 :1-3     ( Klik Judul KEE Untuk Melihat Teks Lagu )

Pdt. Natallidna Tarigan, MTh 

Sekretaris Moria Pusat 

HP. 085297075555

Share this post