Nggeluh I Bas Persadan Ras Dibata
BAHAN BIMBINGEN PA MAMRETANGGAL, 02 AGUSTUS - 8 AGUSTUS 2026( Nandai Persekutuan Mamre )
BAHAN BIMBINGEN PA MAMRE
Ogen : Kejadin 5:21-24.
21. Tupung umur Enoh 65 tahun, tubuh anakna dilaki, Metusalah gelarna.
22. Kenca tubuh Metusalah, Enoh nggeluh i bas persadan ras Dibata 300 tahun dekahna, janah ipupusna denga tole anak dilaki ras diberu.
23. Jadi ia nggeluh 365 tahun dekahna.
24. Kidekah geluhna tetap ia erdalan i bas dalan Dibata, tapi dungna lanai ia teridah perbahan iangkat Dibata ia.
Tema : Nggeluh I bas Persadan Ras Dibata.
Tujun : Gelah mamre
1) Ngasup nuriken kerna Enoh ibas persadanna ras Dibata.
2) Nuriken penandaina kerna pesekutuan Mamre.
Metode : Sosialisasi Persekutuan Mamre.
I. KATA PENARUH
Ibas gerejanta GBKP enggo iaturken ibas Tata Gerejanta kerna kategorial gender ras umur. Kategorial si lit igelari KAKR eme persekutuan anak ras Remaja; PERMATA eme persadan man permatanta; Moria eme persadan man pernanden GBKP; Mamre Persekutuan dilaki ras perbapan GBKP ras Saitun eme persadan orangtua di atas 60 tahun. Ibas bahan PA-nta ngerana kita kerna kategorial Mamre GBKP. I bas P2P Mamre ikataken maka Mamre GBKP adalah lembaga kategorial Kaum Bapak (selanjutnya disebut perbapan) yang ada di Gereja Batak Karo Protestan (GBKP). Alu tujun meningkatkan Spiritual dan memberdayakan anggotanya sebagai garam dan terang di tengah-tengah keluarga, gereja, masyarakat, bangsa dan negara. Arah PA-nta sekali enda erlajar kita desken erkaca erpalasken Pustaka Si Badia bagepe P2P Mamrenta. (minimal pengurus Mamre si hadir baba P2P Mamre GBKP) gelah sicidahken man kerina anggota, gelah anggota pe ersura-sura meteh uga kin mbagesna sura-sura TUHAN ras gerejanta kerna kita perbapan GBKP, alu pepatah "Tak Kenal Maka Tak Sayang, Jika Sudah Kenal Pasti Semakin Sayang!" Tentuna metedeh ateta tetap jumpa, siajar-ajaren, seh maka kerina Mamre erkiniteken, berdaya ngasup jadi garam dan terang itengah-tengah keluarga, gereja, masyarakat, bangsa ras negaranta.
II. URAIAN TEKS
Bahan PA-nta nuriken kerna sekalak tokoh ibas Pustaka Si Badia si tergelar Enoh, sinuriken kerna sinursur Adam rikut ras umur, benaken Adam seh ku anak Nuah, Sem, Ham ras Japet. Enoh ( ind: Henokh) ertina pengikut entah penganut. Ituriken maka Enoh nggeluh ibas persadan ras Dibata 300 tahun dekahna, tole ipupusna denga anak dilaki ras diberu. Ibas ayat 23 itegasken maka ia nggeluh 365 tahun dekahna, janah ikataken kidekah geluhna tetap ia erdalan ibas dalan Dibata, tapi dungna lanai ia teridah perban iangkat Dibata ia. Enoh nggeluh ibas persadan ras Dibata (ay.22), kidekah geluhna tetap ia erdalan ibas dalan Dibata (ay.24), ibas terjemahen Alkitab hidup bergaul dengan Allah (ay.22, 24), terjemahen J. H. Neumann erdalin ibas kerembaken ras Dibata. Piga-piga penafsiren ngertiken berjalan, bertindak, berkelakuan si encidahken persadan (persekutuan) ras Dibata alu serta. Enda seri ras kegeluhen Nuah ikataken: Ibas jamanna Nuah ngenca si mehuli, janah la lit kesalahenna. Ia erdalan ibas dalan Dibata (Kej.6:10). Piga-piga penafsir menitikberatkan kegeluhen Enoh lebih asa kepatuhen kiniteken Abraham, lit ibas persadan (pergaulan) si serta. Tapi dungna lanai ia teridah perbahan iangkat Dibata ia, Enoh iangkat Dibata (cataten : labo nangkih ku surga), Walter Lampp ibas Tafsiren Kejadin 5:1 - 12:3, ngataken baik Luther bagepe Calvin kata mengangkat (Ibr. laqach) artinya mengambil kepada diri-Nya, untuk diri-Nya sendiri. Ije iberekenna komentar "Persekutuan atau persatuan Henoch dengan Allah begitu kuat, hingga mautpun (kematian) tidak sanggup menceraikannya. Arah perikop Kejadin 5 sinuriken kerna sinursur Adam rikut ras umurna, teptep kalak iujungi alu kata "mate ia (lalu matilah ia)". Tapi Enoh ikataken dungna lanai teridah perbahan iangkat Dibata ia. Turi-turin Enoh enda me sipemenana nuriken maka kematen (maut) labo erkuasa, tapi Dibata nge si erkuasa nangdangi kematen. Nggeluh ibas persadaan ras Dibata erbahanca Enoh metunggung bengket ku ingan siisikapken Tuhan aminna pe la arah kematen.
III. PENGKENAINA
Arah oratenta tangkas man banta kerna kerembaken Enoh ras Dibata, nggeluh ibas persadan ras Dibata, erdalan ibas dalan Dibata. Selaku bapa tentuna mabai anak-anakna si dilaki ras si diberu nggeluh erkemalangen man Dibata. Penilaian labo ibas manusia nari, kiniteken Enoh ipeseri ras kiniteken Nuah, ibandingken ras manusia sekelewetna, tapi la ia tergoda ikut ibas dosa ras kejahaten. Kegeluhen Enoh enda jadi usihen kal man banta Mamre GBKP; arusna kita pe tetap njaga persadanta ras Tuhan. Litna kategorial Mamre iarapken ngasup meningkatken kiniteken perbapan GBKP nguban Enoh. I tengah-tengah keterpuruken doni si la ernalem man Dibata, ije me teridah kerembaken Mamre ras Dibata e. Erdalan ibas dalan Dibata, tentuna si ertiken ku bas cara entah palasta rukur, ngerana ras perbahanenta. Sue ras tujun ilitken kategorial Mamre, P2P Pasal 4 Tujun : Guna meningkatken kegeluhen spiritual ras memberdayaken anggota jadi sira ras terang itengah-tengah keluarga, gereja, masyarakat bangsa ras negara. Guna mencapaisa lit kegiaten-kegiaten, P2P Pasal 6 : Ngelaksanaken kegiatan ibas bidang persekutun, pelayanen ras kesaksi. Ngelakoken PA (Penelaahen Alkitab), Perayaan-perayaan gerejani, PI (pekabaren Injil). Erbahan pembinaan arah kursus, ceramah, reatret, olah raga, penelitian, studi banding, ras si membangun kegeluhen spiritual ras pemberdayaan kerina anggota Mamre. Ikut mendukung upaya peningkaten kesejahteraan masyarakat (sosial, budaya, ekonomi, hukum ras politik) arah kegiaten studi kemasyarakaten, aksi sosial ras lingkungen hidup, rst si la bertentangen ras kiniteken man Tuhan Jesus. Bageme arapen nandangi kerina perbapan GBKP (Mamre), mari arah PA enda mpepaguhi komitmenta ibas Mamrenta, wadah kiniersadanta ras encidahken ketedehen ateta er-Dibata. So siarap bagi Enoh kita ersada ras Dibata, erdalan ibas dalan Dibata. Bagem ketedehen ateta, ibas kerembaken Enoh ras Dibata, iatanken kita pagin bengket ku bas ingan siipadanken Dibata man kalak si tek.
IV. DISKUSI
1. Arah bahan PA-nta, ikataken Enoh nggeluh ibas persadan ras Dibata (ay.22), kidekah geluhna tetap ia erdalan ibas dalan Dibata, mari sidiskusiken uga maksudna.
2. Ibas P2P Mamre, pasal 4 kerna tujun litna persekutuan Mamre ras pasal 6 eme kegiaten Mamre, mari sidiskusiken kai nge jadi kendala-kendalanta ibas pelaksananna gelah tersehi sura-sura arah litna kategorial Mamrenta.
USULEN ENDE-ENDEN :
1) KEE GBKP No 368:1-3. ( KLIK JUDUL LAGU UNTUK MELIHAT LIRIK TEKS )
2) KEE GBKP No 350:1-2. ( KLIK JUDUL LAGU UNTUK MELIHAT LIRIK TEKS )
3) KEE GBKP No 249:1,5. ( KLIK JUDUL LAGU UNTUK MELIHAT LIRIK TEKS )
4) KEE GBKP No 15 : 1 (Persembahen) ( KLIK JUDUL LAGU UNTUK MELIHAT LIRIK TEKS )
0 Response to "Nggeluh I Bas Persadan Ras Dibata"
Post a Comment