Ercakap-Cakap Ras Dibata

Bahan Bimbingen PA Moria
Tanggal 19 - 25 Juli 2026
Wujud Kasih : Komunikasi

SI MAN OGEN : Keluaren 32:7-16

7. Nina TUHAN man Musa, “Pedas kam mulih ku teruh, sabap bangsandu si enggo ibabandu ndarat i Mesir nari enggo erdosa janah nulak Aku.
8. Itadingkenna dalan si enggo Kupedahken gelah ikutkenna; ibahanna sada lembu emas tuangen janah enggo isembahna ras ibahanna persembahenna ku je. Ikatakenna e si mabai ia ndarat i Mesir nari.
9. Enggo Kueteh kuga kengna bangsa enda.
10. Genduari, ola cubaken ngambati Aku. Nembeh kal ateKu man bana kerina, janah Kukernepken ateKu. Kenca bage, Kubahan ateKu kam ras kesusurenndu jadi sada bangsa si mbelin.”
11. Tapi meseksek ipindoken Musa man TUHAN, Dibatana nina, “TUHAN, ngkai maka bage rawaNdu man bangsaNdu, si enggo iselamatkenNdu i Mesir nari alu gegeh ras kuasa si mbelin?
12. Adi ikernepkenNdu bangsa e, tentu ikataken bangsa Mesir me maka Kam enggo maba ia ndarat i Mesir nari alu tujun munuhsa i deleng-deleng enda janah ngeradaskenca tuhu-tuhu i bas doni enda nari. Ola min Kam merawa, ola min ukurNdu bage janah ola min sehken cilaka enda man bangsaNdu.
13. Inget min suruh-suruhenNdu Abraham, Isak, ras Jakup. Ingetlah padan si enggo ibahanNdu ras ia maka iberekenNdu kesusurenna, teremna bagi buena bintang i langit, janah mereken man kesusurenna kerina taneh si enggo ipadankenNdu jadi sikerajangenna seh rasa lalap.”
14. E maka erkusur ukur TUHAN janah la isehkenNa cilaka si enggo isurakenNa man bangsaNa.
15. Nusur mulihken Musa i das deleng ndai nari, ibabana papan batu si dua e i ja tersurat pedah TUHAN i bas dua mbelahna.
16. Dibata jine si erbahan papan batu e janah IA ka pe si nuratken pedah e i je.

T E M A : Ercakap-cakap ras Dibata

TUJUN : Gelah Moria:
• Meteh kerembaken Musa ras Dibata.
• Nuriken isi pusuhna man Dibata arah pertoton.

METODE PA : Meditasi/Self Verbatim

Kata Penaruh
Kitab Keluaran nuriken peristiwa Tuhan mulahi bangsa Isarel i bas perbudaken Mesir ras maba bangsa e ndarat i Mesir nari nuju tanah Kanaan, taneh perjanjian. Kidekah 40 tahun bangsa Israel erdalan i padang gurun seh pe igenepi Tuhan janjiNa man Abraham mereken taneh Kanaan man kesusurenNa. Tupung bangsa e seh i deleng Sinai, Tuhan nuruh Musa nangkih ku datas deleng e ngaloken pedah Dibata. Sepuluh pedah Dibata siitulis Dibata alu tanNa jine i bas dua papan batu. Kidekah 40 wari Tuhan ngajari Musa kerna aturen-aturen nggeluh man bangsaNa i datas deleng e. I teruh deleng Sinai, bangsa Israel ras imam Harun nimai Musa. Perban ndekahsa iakap bangsa e, lanai ia sabar e maka iulung-ulungina Harun ras mindo ia gelah ibahan sada dibata si man sembahen guna mimpin bangsa e. Perbahanen kalak enda nembeh kal ate Dibata, sabap itundalkenna Dibata janah ibahanna sembah-sembahen arah emas si ipepulungna.

Mpebagesi Pengangkan Kerna Ogen
Nina Tuhan:"Nembeh kal ateKu man bana kerina, janah Kukernepken ateKu bangsa e." Kenca bage, Kubahan ateKu kam ras kesusurenndu jadi sada bangsa si mbelin." Ban nembehna ate Dibata ngidah perbahanen bangsaNa ersura-sura Ia ngkernepkenca. Arah percakapen e, meseksek Musa mindo man Dibata gelah ulanai Ia merawa. Musa selaku pemimpin, gancih kerina bangsa Israel mindo gelah ula ikernepken Tuhan bangsaNa.

Nina Musa: "TUHAN, ngkai maka bage rawanNdu man bangsaNdu si enggo iselamatkenNdu i Mesir nan alu gegeh ras kuasa si mbelin; Adi ikernepkenNdu bangsa e, tentu ikataken bangsa Mesir me make Kam nggo maba ia ndarat i Mesir nari alu tujun munuhsa i deleng-deleng enda janah ngeradaskenca tuhu-tuhu i bas doni enda nari." Musa mindo alu mesek-sek gelah Dibata lanai merawa. Musa pe ngingetken padan Dibata man nini-ninina Abraham, Ishak ras Jakub. Dungna erkusur ukur Dibata janah lanai isehkenNa cilaka man bangsaNa bagi si enggo isurakenNa. Kenca si e nusur Musa i deleng sinai nari maba 2 papan batu.

Musa rembak kel ras Dibata. Hubungen sindeher itandai arah perckapenna. Tanda kerembaken hubungen e me lit komunikasi, lit chemistry (percakapen mengalir ras nyaman) ras la tergejap enggo ndekah ngerana ras. Bage me Musa ercakap-cakap ras Dibata i bas deleng Sinai kidekah 40 wari, waktu si cukup ndekah. Percakapen Musa ras Dibata pe teridah chemistry-na alu terbuka Dibata nuriken isi pusuhna, merawa IA ngidah lagu langkah bangsaNa ras ersura-sura IA ngukumsa. Musa pe tawar menawar ras Dibata gelah Ia ngukum bangsana sabap tuhu itandaina Dibata e, Dibata si melias ras perkeleng Ia ndekah merawa

Pengkenaina
1. Komunikasi Tuhan ras Musa, jadi model komunikasinta ras Dibata. Tanda keleng ateta man Dibata teridah arah rusurna ercakap-cakap ras Dibata. Kita ercakap-cakap ras Dibata arah pertoton, arah ngoge kataNa ras arah kerina ibadah-ibadahta. Meriahlah siakap nuri-nuri man Dibata kerna kerina si jadi i bas geluhta. La siakap ndekahsa ercakap-cakap ras Dibata tupung ertoto entah i bas kebaktian. Adi sedekah enda langa pe erkedungen kebaktin leben kita mulih entah mbatuk-mbatuk kita erkiteken gedangsa siakap pertoto tupung kebaktin; sipekenalah ras erlajarlah kita arah Musa.

2. Ercakap-cakap ras Dibata encidahken kerembakennta ras Ia. Labo gelah enggo, bagi sekalak si mesan belanjan arah telpon/online iangkatna handphone (HP) ituriken kerina pesanen belanjann dung e itutupna HP-na. Ertoto pe labo gelah enggo ibelasken kerina daftar keperlunta man Tuhan. Entah pe ertoto erkiteken lit krisis (perbeben) geluhta, tempa-tempa

Dibata e agen sinampati situasi darurat. Ercakap-cakaplah ras Dibata bagi sekalak teman siikelengi kita. Kualitas relasinta ras Dibata labo terjeng ngerana kerna Tuhan tapi ngasup kita ngerana ras Tuhan. Adi ngerana kerna Tuhan, posisi Dibata terjeng otak, kepala ngenca. Tapi adi ngerana ras Dibata posisi Dibata lit i bas pusuh ras perukuren. Si latih dirinta ngerana (berkomunikasi) ras Dibata alu meditasi ras kontemplasi, nggejapken ras ngenanami kehadiran Tuhan.

Meditasi ercakap-cakap ras Dibata (self Verbatim)
1. Sikapken ingan meditasi ras kerina instrumen siiperluken e me ruang hening, Lilin, musik ras sidebanna guna kiniulin perdalanen meditasi.
2. Moria muat ingan kundul sekalak-sekalak la ndehersa ras temanna.
3. I bas meditasi enda la lit pemandu meditasi. Teptep moria ercakap cakap ras Dibata.
4. Tetapken kai topik percakapenndu ras Dibata sue ras kebutuhenndu, umpamana: perbeben nggeluh, karakter si la mehuli si perlu iubah, sura-sura si ate ipindo man Dibata.
5. Ope meditasi baca lebe contoh percakapen/self Verbatim siteruh enda.

Topik Percakapen: Kurang harmonis ercimbang
Percakapen: (Tuhan ras Merim )

Tuhan 1: (tedis i lebe-lebe Merim) Mejuah-juah, anakKu Merim (kundul i lebe-lebe Merim)

Merim 1: (iangkatna ayona natap Tuhan) Mejuah-juah Tuhan, Kam Bapangku (itangkapna tan Tuhan ras iemana)

Tuhan 2: ndube nari kam Kuperdiateken, tempa megogo kel atendu kuidah.

Merim 2: (tungkuk ras naktak iluhna) Bapa, itehNdu kap kecibalku (sapuna matana, sinik)

Tuhan 3: Turiken nakku uga kin kecibalndu (mereken kesempaten gelah nuri-nuri Merim)

Merim 3: Tuhan, engkai maka aku lalap si salah (mungkuk.)

Tuhan 4: Turiken nakKu,kai kin si jadi i bas kam, maka lalap kam iakap salah.

Merim 4: Tuhan latih kuakap nangkelisa, kai nge harus kubahan geiahna banci meriah kami ercimbang. Mulai kin aku erjabu ras perbulangenku, lalap la pas iakap cimbangku nandangi aku. Iakapna kurang mehamat aku nandangi ia. Kai nina la bo ku simbak, kueteh nge uga arusna erkaka. Bicara merawa pe ia labo kusubuki, lit nge si mehuli i bas rawana e ateku. Tapi lalap akapna aku salah. Adi nuri-nuri aku kernpak perbulangenku, 'ula nggit subuk, beluh-beluh kam muat ukurna' nina. Lanai kueteh ku ja aku nuri-nuri, e maka man bandu aku nuri-nuri Tuhan. (Teriluh)

Tuhan 5: mehuli kel kai si enggo ibahanndu ras kai siikataken perbulangenndu nakKu.

Merim 5: (sora nangkih) Adi iakapNdu enggo mehuli Tuhan, engkai maka lalap aku salah iakap cimbangku e?

Tuhan 6: (nepuk bara Merim janah cirem) AnakKu ula ngadi erbahan si mehuli. Labo kerina perbahanen si mehuli, ialoken kalak alu mehuli. Tapi Aku, Tuhan Dibatandu ngidah kerina siibahanndu e, ngena ateKu perbahanen kalak bujur. Ku kapiti kam, kubereken gegeh si mbaru man bandu.

Merim 6: (mungkuk. Alu sora simelemuk) Kai dage si kubahan Tuhan?

Tuhan 7: Teruslah erbahan si mehuli anakKu, mehamat ras kelengi tetap cimbangndu. Labo sia-sia perbahanenndu si mehuli e. Kai si isuanndu e kange si iperanindu. Tetaplah ukurndu nggeluh i bas kebujuren ras si mehuli. Kam kupake jadi perkakasKu encidahken biakKu ula balas si jahat alu si jahat tapi bahanlah si mehuli man si jahat.

Merim 7: (ndakep Tuhan) Bujur Tuhan. Enggo kuangka si ngena ateNdu. PegegehiNdu aku gelah tetap dame pusuhku ras meriah ku akap jumpa ras cimbangku.

Tuhan 8: (senyum) Aku tetap ras kam anakku ula mbiar. Merim 8: (senyum) bujur Tuhan.

Refleksi Teolog: Tuhan engkelengi kaiak sierbahan perdamen. Malem ate tuhu tuhu iakap kalak si erbahan perdamen; sabap iakui Dibata me ia AnakNa. (Matins 5:9)

Bengket ku Meditasi:
1. Rende KEE No. 182:1 (iulih-ulihi)
2. Ercakap-cakap ras Dibata (iiringi instrumen). Idungi alu Pertoton.
3. Sharing pengalamen ngerana ras Dibata (banci entah lang fokus, perasaanndu tupung ngerana ras Dibata ras kai ulihna igejapndu).

Pdt Sariyani br Barus

"Ketika kata-kata tak lagi marnpu mengungkapkan isi hati, Tuhan tetap mengerti setiap air mata dan desah napas kita."

Minggu si reh sipepulung kolekte extra guna TK GBKP