Kesah Si Badia

Bahan BIMBINGEN PA MAMRE
TANGGAL, 31 MEI - 6 JUNI 2026
( Konpesi IV : Kesah Si Badia )

Ogen : Johanes 14:16-17

16. Kupindoken me man BapangKu gelah isuruhNa Penampat si deban man bandu e me Kesah si naksiken kebenaren kerna Dibata, gelah itemaniNa kam rasa lalap.
17. Doni enda la ngasup ngaloken IA sabap la IA idah doni enda dingen la itandaina. Tapi kam itandaindu IA sabap IA ras kam, janah kam ringan i bas IA.

Tema : Kesah Sibadia

Tujuan : Gelah Mamre :
1) Meteh kerna Kesah Sibadia
2) Encidahken ulih litna Kesah Sibadia ibas dirina arah dampar geluhna

Metode : Diskusi

I. KATA PENARUH
Bahan bimbin.gen PA Mamre ibas minggu enda e me kerna tek nandangi Kesah Si Badia. Menurut Calvin, maka salah sada pendahin Kesah si Badia emekap nuanken kiniteken bas pusuhta. Kalak si nggo tersuan kata Dibata bas pusuhna tentu jadi kalak si nggeluh alu surah-sura Dibata. Enda me si jadi perayukenta ibas PA Mamrenta wari enda. ibabai me kita guna meteh pendahin dingen ulih kalak si nggeluh bas Kesah si Badia.

II. URAIAN TEKS
   Guna meteh kuga latar belakang teks Johunes I 4 enda perlu si oge ka konteksna e me pasal 13.
   Kenca Jesus murihi nahe ajar-ajarna si ningetken maka ise si atena si mbelinna ibas Kinirajan Surga arus ipeterukna bana. Bagi ibas Johanes 13: 14-15, "Dage adi Aku Guru dingen Tuhanndu enggo murihi nahendu, maka patut pe kam siburih-burihen nahe. Enggo kubahan si man usihenndu gelah banci ibahanndu bagi si enggo Kubahan man bandu e".
   Jenari ipersingeti Jesus ajar-ajarna ise pagi si ndayaken Ia. Nina Jesus, "Kucalehken me pagi roti enda ku bus mangkuk, janah man ise kari kubereken ia me katangku e". Kenca icalehkenNa roti e, iberekenNa man Yudas anak Simon Iskariot. (Johanes 13:26) "Sekalak pe ajar-ajar la ngangkasa kai si ikataken Jesus e. Piga-piga ajar-ajar erpengakap maka Judas isuruh Jesus nukur keperlun guna perayan Paskah; ntah isuruh Jesus ia mereken penampat man kalak musil, sebab Yudas me si njemak duit. (Johanes 13:28-29).
   Emaka pasal 13 itutup alu dialog Jesus ras Simon Petrus. Nina Simon Petrus, "O Tuhan ngkai maka la banci kam kuikutken genduari ? Aku pang mate man gunaNdu". Ngaloi Jesus nina, "Tuhu-tuhu kin kam nggo pang mate man gunangku ? Kukataken man bandu " Situhuna ope denga tekuak manuk enggo ipersokenndu pagi Aku telu kali". Teridah lenga Kesah Si Badia dasar berpikir Petrus enda. Alu gambaren sibage me pe si oge pasal 14 enda.
   Ibas ayat 1-2 tersinget ije nari nina Jesus man ajar-ajarNa, "Ola aru atendu. Ernalemlah man Dibata, janah ernalemlah pe kam man bangku. Ibas rumah BapaKu mbas ingan, janah lawes me aku nikapken ingan man bandu". Jenari ayat 15 seh 17 nina Jesus, "Adi keleng atendu Aku ikutkemlah pedah-pedahKu. Kupindoken man Bapangku gelah isuruhna Penampat (parakletos) si deban e me Kesah si naksiken kebenaren kerna Dibata, gelah itemanina kam seh rasa lalap".
   Rikutken ayat-ayat enda teridah kiniersadan Bapa, Anak ras Kesah Sibadia (Trinitas). Kesah Si Badia e erbahanca kalak tek man Dibata ras Jesus Kristus, janah erpalasen kiniersadan enda me pe ipindo Jesus man Bapa gelah iutusna Kesah Si Badia mereken semangat ras kiniteken man ajar-ajarna gelah ngasup ersaksi kerna Jesus Kistus i doni enda (Oge pe Perbahanen 1:4 ras 8). Katawar enda banci banci jadi ? E me tupung wari Pentakosta (Perbahanen Rasil-rasul 2:1 rst). Ije me teridah man doni enda rasul-rasul antara lain Petrus erkhotbah kerna Jesus Kristus, erbahanca lit 3000 kalak tek ras iperidiken (Perbahanen Rasul-rasul 2:41).

III. PENGKENAINA
Adi si nen bas bahanta wari enda maka lit piga piga ulih pendahin Kesah Si Badia. Kesah Si Badia si pemena jadi teman ibas ndalani kegeluhen. Enda me si ijanjiken Jesue ibas bahan ogenta wari enda. Maka kalak si nggeluh ibas Kesah Si Badia lanai mbiar ibas ndalani kegeluhen sabab Kesah Si Badia me ni nemani kegeluhenna tetap, lit temanta ibas ndalani kegeluhen. Terdahuhen la terjeng lit teman, tapi Kesah Si Badia pe mereken gegeh man banta guna pang ersaksi nuriken kerna perbahanen Jesus ibas perdalanen kegeluhenna. Mamre pe ilebuh arah bahanta wari enda gelah encidahken ulih pendahin Kesah Si Badia, arah nggitna ersaksi. Kesaksin ulih Kesah Si Badia tentu la terjeng ibas pengerana tapi perbahanen engkelengi diri, jabu ras masyarakat.

VI. POKOK DISKUSI :
1. Uga pengertinta kerna kata Jesus bas bahanta Kesah si Badia si jadi penampat?
2. Kai ciri-ciri Mamre si idemi Kesah si Badia si teridah arah kegeluhen pribadi, jabu ras masyarakat?

V. USULEN ENDE-ENDEN :
1) KEE GBKP No. 118: 1,3 ( KLIK JUDUL LAGU UNTUK MELIHAT LIRIK LAGU )
2) KEE GBKP No. 187: 1, 3 ( KLIK JUDUL LAGU UNTUK MELIHAT LIRIK LAGU )
3) KEE GBKP No. 197: 1, 4 ( KLIK JUDUL LAGU UNTUK MELIHAT LIRIK LAGU )
4) KEE GBKP No. 450:1 (Persembahen) ( KLIK JUDUL LAGU UNTUK MELIHAT LIRIK LAGU )

Pdt. Dr. Jadiaman Porangln-Angin
HP/WA: 0815 3353 001