Tuhan Ngasup Ngelakoken Kai Pe Bahan PA Moria 12-18 April 2026

Bahan Bimbingen PA Moria
Tanggal 12-18 April 2026
Pengalaman Pribadi

SI MAN OGEN : Jop 42:1-6

1. Kenca bage ngaloi Jop man TUHAN nina,
2. “Genduari kueteh TUHAN, maka kai pe ngasup kam ngelakokenca kai isuraNdu seh kerina.
3. O, TUHAN marenda isungkunNdu aku, ngkai maka aku la tek nandangi kepentarenNdu adi pemetehku pe labo lit. Tuhu kal, enggo kucakapken si la kuerti, perkara-perkara si mejin si la kuantusi.
4. IsuruhNdu aku megi-megi asum Kam ngerana, janah kenca si e gelah penungkunenNdu kucubaken njabapsa.
5. Kepeken pemetehku kerna Kam, terjeng si ituriken kalak ngenca; tapi genduari, alu matangku jine, Kam enggo kuidah.
6. Perban si e mela kal kuakap kerna kai si enggo kubelasken, erkadiola aku, e maka kundul aku i bas abu dapur ras abu taneh.”

TEMA : Tuhan Ngasup Ngelakoken Kai Pe

T U J U N : Gelah Moria: 12 - 18
• Meteh penandai Jop kerna Tuhan.
• Nuriken pengalamenna si mpebagesi penandaina kerna Tuhan.

METODE PA : Diskusi ras Sharing

Kata Penaruh
Megati nge kita erbera-bera nandangi gegeh dingen kuasa Dibata, terlebih-lebih adi kita jumpa perbeben si mberat ras ndekah; pinakit, kemusilen, ntah pe kejahaten si la erngadi-ngadi. Kalak si la tek man Tuhan ngatakenca, adi kin Dibata e mbelin kekelengenNa, mbelin kuasaNa, arusna iolangiNa kiniseran, pinakit, ras kejahaten. Tapi kinatana tetap denga si e kerina jadi, e maka labo lit Tuhan e. Guna njabap persoalen enda, erlajar kita arah pegalamen Job, sekalak dilaki si bujur, si ngenanami kiniseran i bas kerina dampar kegeluhenna, anakna mate, erta-ertana keri, janah ia pe kena pinakit kulit si mekelek, seh maka ciga kel ate natapsa. I bas perdalinen kinitekenna man Dibata, uga sikap Job ngalaken situasi enda, mari si siksiki arah ogenta enda.

Mpebagesi Pengangkan Kerna Ogen
Job 42:1-6: titik balik penandai Job kerna Dibata.
   Ogenta enda e me jabapen Job man Tuhan si peduaken. Jabapen Job si pemena (Job 7) fokus man dirina jine. Tapi kenca idalanina proses si gedang i bas kecedan ate si mesangat, Job manjar-anjar ngaloken uga kitikna ia, dingen uga belinna dolat Tuhan ku bas geluhna Je nari penandaina man Tuhan pe berubah, Job ndatken titik balik penandaina kenca ia ndengkehken sora Tuhan, je nari lanai ia natap kempak dirina tapi ku Dibata rencana Dibata, kerembakenNa ras kataNa.
1. Pengakun kerna dolat Dibata ( Job 42:2 )
   Tuhan ngerana i bas pasal sebelumna, maka manusia, termasuk Job e me tinepa Dibata bali ras sinasa lit i bas doni e, kerina lit iteruh pengaturken Tuhan. Kenca e isedari Job maka Dibata erkuasa nandangi kerinana, termasuk man bana. E maka ngaku Job, genduari ku eteh Tuhan, maka kai pe ngasup ngelakokenca kai isuraNdu. I jenda kesaderanna turah, nggo iangkana ngkai maka la seri penggejapenna ras kai sinikataken teman-temanna maka kiniseranna e erdandanken dosa. Kinimbisan Dibata si sedekah enda igelem Job, teridah arah uga Dibata ngaturken ras ndalanken rencanana man bana
2. Perobahen arah "Ndengkehken" ku "ngidah" (Job 42:5)
   Job ras teman-temanna nuduhken uga kitikna penandaina kerna Dibata, e maka ersoal jabab ia empatna, bage pe ras Dibata. Tapi arah kebenen anak i tengah jabu, itadingken ndehara, kebenen erta ras gelar merim, ipersalahken i bas situasi si man alankenna, dungna ia ngenanami perjumpan personal (perjumpan pribadi ras Tuhan), si nuduhken belinna ras bagesna perukuren Tuhan kerna ia. Perkatan Tuhan si ndube man bana, mpeturah ukurna, tapi kesadarenna kerna dolat ras rencana Dibata e erbahanca ia ngidah Tuhan i bas kerina kecibal geluhna. Si ngenanami kiniseran si mbages dingen ndalanisa arah gegeh Tuhan ngenca, si tuhu-tuhu ngantusi kai ertina 'sangap min iakapndu bandu adi reh erbage-bage percuban ngkenai kam' (Jakup 1:3). Ngenanami penampat Tuhan si mbelin, kerehenNa si la terukuri, si mpegegehi i bas la megegeh e, si mereken kemalemen ate amin pe sedak pusuh idenden kinata geluh, em sangap si la kerina kalak banci ngantusisa.
3 Pertobaten Perukuren Job (Job 42:6)
   Job pernah protes kerna kecibalna, seh isumpahina wari ketubuhenna. Tapi dungna Job erkadiola alu meteruk ukurna nina: erkadiola aku (dingen menyesal aku duduk dalam debu dan abu). Erkadiola Job, dingen e me si erbahansa ia erpengendes alu bulat ukur nandangi sura-sura Tuhan, si ngeteh kecibal geluhna. Amin pe seh paksa e langa bo lit jababna secara logika, tapi sudut pandangna iubah ku bas sudut pandang singaloken pendahin Tuhan i bas geluhna.

Pengkenaina
1. Kerina turi-turin geluhta enggo iaturken Dibata.
   Rencana Tuhan man Job gelah teridah kualitas kinitekenna i lebe-lebe si Iblis. Rencana Tuhan man banta banci langa si eteh, tapi teklah Dibata ietehNa kerina situasinta, banci jadi kiniseran sigenduari e ipakena lako mpermuliaken kita i bas sada masa pe pagi, mpetelap kiniteken pe
2. Dibatanta e me Tuhan si nggeluh ras erdolat.
   Bas jaman si nai, lit konsep sinigelari teologi retribusi (pahala untuk orang baik, hukuman untuk orang jahat), enda jelas-jelas itulak i bas kitab Job. Dibata e nggeluh, IA bebas erban kai pe man manusia sue ras sura-suraNa si bebas. E maka kinitekenta pe la 'fleksibel' guna ngaloken maka banci jadi Dibata erdahin i darat logikata.
3. Iulihken Tuhan si terbelinen.
   Mbue kal kebenen Job. Tapi ulihken Tuhan dua kali lipat arah kai si nggo bene, terulin pe. Tapi lit sada tuah si mbelinna kal sialokenna e me penandai si mbages kerna Dibata ras kuasaNa bas geluhna. Enda jadi pengapul banta si bas kiniseran, Tuhan banci jadi la mulahi kita arah perbeben, tapi IA nemani kita ras ngubahken kita arah perpebeben e.

Diskusi ras Sharing
1. Uga sedekah enda pendapatndu kerna kiniseran? Ulih dosa (perbahanen) ntah lit sura-sura Dibata?
2. Cuba turiken sada pengalaman (i bas seh sura-sura, ntah i bas pinakit, i bas usaha, ras sidebanna) si mahanca kam reh bagesna nandai Dibata?
3. Itutup alu pegancihen notoken perbeben teman (berpasangen/berdua).

Pdt Franti Novita Dewi br Sembiring

"Tuhan tidakpernah menjanjikan langit selalu biru, tapi kehadirannya memampukan kita melewati gelap dan sendu, sebab Dia berkuasa atas segara sesuatu"