Erta-Erta Pertendin Bahan PJJ 12-18 April 2026

Bahan Bimbingen PJJ Tanggal 12-18 April 2026
ERTA-ERTA PERTENDIN
(Rangkaian Paskah)

MODEL PJJ: KESAKSIN

Bahan Ogen : 2 Korinti 4:7-12

7. Kami si jadi ingan nimpan erta-erta pertendin e, desken kudin taneh saja ngenca, gelah teridah maka gegeh si mbelin e i bas Dibata nari kap, labo i bas kami nari.
8. Arah apai pe kami itindih, tapi la kami meripuk. Bingung kami, tapi la seh putus asa.
9. IAyak-ayak musuh kami, tapi la kami itadingken Dibata. Idampesken kalak kami, tapi la seh getem. 10Kiniseran Jesus si maba kematen lalap ipersan kami jadi baban kula kami, gelah kegeluhenNa pe jadi tangkas i bas kula kami.
11. I bas gedang-gedang geluh kami, lalap kami iendesken kempak kematen erkiteken Jesus, gelah kegeluhenNa banci tangkas ia bas kula kami si ermasap-masap enda.
12. Dage kematen e erdahin i bas kami, tapi kegeluhen erdahin i bas kam.

KATA PERLEBE
Bahan perpulungen jabu-jabuta enda ningetken kita kerna rangkaian Paskah si iperingeti kita tengah-tengah gerejanta, menaken i bas Kamis si Badia, Jumat si Mbelin, Sabtu Pengarapen, Paskah I ras Paskah II. Ibas rangkaian kebaktin paskah i jemba kita gelah la terjang hadir dingen ngikuti kebaktin tapi pe terdauhen arah kerina rangkaian ibadah siikuti kita nuate banci mabai kita kubas kesadaren kerna keleng ate Dibata si mbelin nandangi kita.

ISI
Surat Paulus 2 Korinti 4 enda, e me surat pembelaan Paulus kerna dirina, erkiteken:
1. Sebagin perpulungen Korinti la tek nandangi kerasulenna
2. Lit ka kelompok-kelompok si ngelemahken diri ras pengajarenna.
3. Lit perbedan pandangen i bas pengajaren, erkiteken perpulungen Korinti enggo ibengketi pengajar-pengajar sikataken Paulus gelar pengajar-pengajar e rasul palsu.
   Aminna pe lit simenentang, la e erbahanca Paulus leja nehken Berita Si Meriah man perpulungen Korinti, sabab eteh Paulus pendahinna e persuruhen Kristus ras pendilo Dibata kap man bana. Labo biar-biaren Paulus nuriken kerna kerasulenna si labo nipui ras mutar-balikken kebenaren kata Dibata. Tapi kalak si la tek kerna kerasulenna ras berita sisehkenna, e tanda ukurna enggo ipepentang Dibata si palsu. Ikataken Paulus maka `abo kerna dirina si iberitakenna, sabab ia budak erkiteken Jesus,terutama faktor pengajarenna pe kerna Jesus Kristus selaku Tuhan.
Tole pe ituriken Paulus i bas ayat 6, Dibata kap si ngataken,"ersinalsallah terang i bas gelap nari", ertina Paulus enggo ngaloken sinalsal i bas pusuhna, jenari iteruskenna sinalsal terang e man jelma sinterem gelah terang e ersinalsal i bas pusuh si ngalokensa, jelas man bana pemeteh kerna kemulian Dibata si teridah i bas ayo Kristus.
E maka ituriken Paulus ka pe kerna melala kiniseran sialokena erkiteken meritaken Jesus Kristus selaku Tuhan. Aminna pe melala kiniseran sialokenna, tapi tetap nge ia ngasup ras megegeh ngalaken ras ndalani kiniseran e , erkiteken: (ayat 7)
• Ibahan Tuhan me Paulus jadi ingan nimpan erta-erta pertendin e (Jun. thisavron: harta karun, siertina erta Surga, pemeteh kerna kata Dibata ras Berita Si Meriah/sinalsal terang).
• Igambarken Paulus dirina desken kudin taneh (Junani: ostrakinois ertina secara metafora lemah ras nukah pecah).
   Tujun iban Dibata eme gelah teridah maka gegeh si mbelin e i bas Dibata nari kap, labo i bas dirina nari.
   I bas ayat 8-9, ituriken Paulus erbage-bage kiniseran siman alankenna alu kalimat ertentangen: "dirina lemah desken kudin taneh tapi ergegeh kal erkiteken erta-erta pertendin sialokenna"
- Arah apai pe kami itindih, tapi la kami meripuk.
- Bingung kami, tapi la seh putus asa.
- layak-ayak musuh kami, tapi la kami itadingken Dibata.
- Idampesken kalak kami, tapi la seh getem.
   I bas Ayat 10-12 ikawitken Paulus pe kerna kiniseranna ras kiniseran sialami Jesus. Jesus ngenanami kiniseran sialami Jesus. Jesus ngenanami kiniseran seh mate guna ndalanken sura-sura Dibata, jenari ipermuliaken Dibata Jesus arah keke i bas simate nari. Bage ka Paulus, megati inanamina perlakun igombang-gombangi, la iergaken, ifitnah, gejapkenna muas ras melihe, ipelawes ras gedang-gedang geluhna lalap ia iawihi kematen. Tapi labo lit kebiarenna, sabab kiniseran, kematen ras kekeken Jesus e jadi cikepen kinitekenna.
   E me sababna tetap ia nggeluh bagi sisuraken Dibata, ras gejapkenna pe maka arah kiniseran e ertangkasna kuasa Dibata i bas geluhna. Nina Paulus, aminna pe kematen e erdahin i bas kami selaku rasul Tuhan, tapi kegeluhen e erdahin kap i bas kam singaloken IA. Kiniteken Paulus ngatakenca kiniseran sinialamina e kiniseran kula si ermasap-masap kap, tapi arah kesetian nandangi sura sura Dibata ialokenna kap upah kegeluhen pertendin si la ermasap-masap e me Kinirajan Surga.

PENGKENAINA
1. Aminna pe lit simenentang i bas kita ndalanken sura-sura Dibata, ula sempat kita leja ndalanken sura-sura Tuhan e i bas geluhta. Paulus jadi usihen man banta i bas meritaken Berita Si Meriah, melala kap idatkenna kiniseran, tapi tetap ia ngasup ras megegeh ngalaken kiniseran e, erkiteken ialokenna erta-erta pertendin e ras jadikenna e jadi gegehna i bas kegeluhenna. Paulus pe etehna dirina dem alu kelemahen desken kudin taneh, e maka tetap nge iandalkenna Dibata i bas ngalaken kiniseran e. Bage ka pe kita tetaplah siandalken Tuhan bas geluhta sabab kita manusia si dem kelemahen ras kulata ermasap-masap kap.
2. Tuhan enggo kap nehken keleng ateNa arah Kristus, nggeluhlah bagi sura-sura Dibata, dalanken singena ateNa. Kune sinanami pe kiniseran i bas doni siermasap-masap enda erkiteken Kristus, tapi mbelin kap upahta ibereken Dibata, eme kegeluhen si rasa lalap si la ermasap-masap e me Kinirajan Surga. Sebage pengataken bujurta i bas keleng ate Tuhan, marilah kita kerina ikut muat bagin i bas kegiaten/kebaktin rangkaian Paskah i bas gerejanta subuk Kamis si Badia, Jumat si Mbelin, Sabtu Pengarapen bage pe Paskah I ras II.
3. Rangkaian Paskah ngingetken kita:
- Pang ngalaken kiniseran i bas ngikutken dalan Tuhan ras tetap nehken kekelengenNa alu setia ras meteruk ukur nandangi sekelewetta ras ndalanken si ngena ateNa.
- Lanai mbiar kerna kematen, sabab enggo italuken Jesus kuasa kematen ras kematen pe la ngasup nirangken kita arah keleng ate Tuhan.
- Dibata enggo naluken kuasa dosa. KekekenNa mereken kegeluhen si mbaru ras rnereken jaminen keselamatan man banta e maka pakeken kula, tendi ras ukurta meritaken Berita Si Meriah bas kerina dampar geluhta:

DISKUSI
1. Oge sekali nari 2 Korinti 4:7, jenari turiken kai pengangkanndu kerna ayat 7 enda?
2. Cubaken si evaluasi i bas gerejanta/runggunta, enggo nge ndia enterem singikuti Kebaktin Kamis si Badia, Jumat si Mbelin, Sabtu Pengarapen, Paskah I ras Paskah II ? Adi enggo/lenga, kai nge ndia akapndu penyebabna?

USULEN ENDE-ENDEN:
1. KEE GBKP NO. 184; 1-2 ( KLIK JUDUL UNTUK MELIHAT LIRIK LAGU )
2. KEE GBKP NO. 207: 1-2 ( KLIK JUDUL UNTUK MELIHAT LIRIK LAGU )
3. KEE GBKP NO. 302: 1- ( KLIK JUDUL UNTUK MELIHAT LIRIK LAGU )
4. KEE GBKP NO. 212: 1,2,5 ( KLIK JUDUL UNTUK MELIHAT LIRIK LAGU )

DAFTAR BACAAN
1. V.C. Pfitzner, Kekuatan dalam kelemahan, Ulasan atas Surat 2 Korintus, Jakarta: BPK GM, 2012
2. William Barclay, Pemahaman Alkitab Setiap Hari Surat 1 & 2 Korintus, Jakarta: BPK, GM, 2008

Pdt. Elieser T. Tambun, S,Th.

HP/WA: 082277364488