Aku Kap Kemegahen Nini ras Bulang Bahan PA Permata 12-18 April 2026

Bahan Bimbingen PA Permata
Tanggal 12 April-18 April 2026
JAM ERTOTO PERMATA GBKP
(HUT Saitun 15 April 2015: 11 Tahun)

Nas : Amsal 17:6

Tema : Aku Kap Kemegahen Nini ras Bulang

Gelah PERMATA GBKP
1. Meteh dingen nggejapken maka ia eme kemegahen nini ras bulang
2. Jadi kemegahen nini ras bulang

Metode: Jam Ertoto dan Aksi Perayaan HUT Saitun

I. PERSIKAPEN

l. Nikapken ingan kebaktin si teneng, nyaman guna ngelakoken jam doa enda.
2. Lilin isikapken, ibentuk salib i tengah-tengah PERMATA GBKP
3. Sikapken Pustaka Sibadia, Buku Bimbingan PA PERMATA GBKP, Buku Ende-enden GBKP, kantong persembahen.
4. Nikapken si muat bagin ibas Pertoton Syafaat
5. Lagu-lagu pemena ipelajari alu mehuli, reh sikapna adi lit musik si mengiringi selama jam ertoto enda ilakoken.

II. KEBAKTIN

------ Paksa Teneng---- (iringi musik)

P: PERMATA GBKP sinikelengi Tuhan, sikataken bujur man Tuhan Dibatanta, si mereken kesempaten si meherga, atan kita pulung radu ras guna ersembah man baNa ibas paksa enda. Tuhan tetap erkeleng ate man banta, perkuah ateNa tetap ngarak-ngarak kerina perdalinen geluhta. Labo pernah ipediatna kita ndalani kegeluhen enda sisada tapi tetap ijaga dingen ikawaliNa kita ibas tep-tep musim kegeluhenta. Alu bage, mari sipesikap pusuhta, ateta nembah mungkuk i adep-adepenNa, muji gelarNa ibas pusuhta si mbagesna nari. Nembahlah man Tuhan alu ukur meriah, dahilah kuadep-adepenna alu rende meriah.

J: Tuhan kap Dibata, Ia si nepa kita, emaka sikerajangenNa nge kita, kita kap bangsana, kita kap rarasenna.

Rende: KEE 479:1 Sembah Man baNdu Yesus Kristus (iendeken 2 kali)

P: PERMATA GBKP sinikelengi Tuhan i bas PA wari enda istimewa, erkiteken bertepatan ras perayan ulang tahun orang tuanta Saitun. Sikataken bujur man Tuhan, sebab keberadaan orang tuanta enda i tengah-tengah keluarga bagepe gereja jadi pasu-pasu si meherga kel. Orang tuanta Saitun eme tanda keleng ate, usihen i bas erkiniteken dingen jadi penungkunen ras penggurun man banta singuda denga. Kegeluhen Saitun enda ningetken kita maka kesetian man Tuhan si ibenaken ibas kitik-kitik nari seh kegeluhen si dem alu kemalemen ate. Kegeluhen Saitun jadi bukti maka keleng ate Tuhan la pernah mobah seh metua dingen ubanen, Tuhan tetap singkelini dingen mereken gegeh. Andiko seh kel ulina adi perdalinen kegeluhen enda tetap sidalani ras Tuhan. Mari si muliaken Tuhan segedang-gedang geluhta.

Rende: KEE 358:1 Muliaken O Tendingku (iendeken 3 kali)

P: PERMATA GBKP sinikelengi Tuhan, kata Dibata ersinget man banta ibas Imamat 19:32 "Mehamatlah man kalak si enggo metua, janah pehagalah aku. Aku kap Tuhan". Tapi kinatana, megati la kita mehamat, la kita megiken pedah ras ajar kalak si enggo metua bagepe nini ras bulangta.

J: Tuhan, ngaku kami maka megati kel kami lanai ngergai, lanai mehamat man kalak si enggo metua i sekelewet kami, bagepe man nini ras bulang kami.

P: Lanai sitalangi pinggelta nandangi ajar si mehuli, siakap maka kai siajarkenna lanai sue ras jamanta genduari, la sisedari maka pengalamenna e eme erta simeherga si enggo ibereken Tuhan segelah iwariskenna man banta.

J: Alemi kami ibas kiniganjangen ukur kami, lanai italangi kami pinggel kami guna pedah ras ajar si mehuli.

P: Megati lupa kita notoken dingen mpegegehi ia ibas daging kulana si enggo kote, padahal ia nge ndube si tetap setia notoken kita mulai kitik-kitikta nari

J: Alemi kami Tuhan, ajari kami guna ngergai, ngkelengi dingen notoken nini ras bulang kami, Saitun i tgengah-tengah gereja kami, bagepe kalak si enggo metua sksekelewet kami.

P & J: 0 Dibata mekuah min ateNdu kempak aku, erkiteken liasNdu, sasapkenlah dosangku erkiteken perkuah ateNdu.

Rende: KEE 362:1-2 Alemi Dosangku

P: Tapi bali ras ganjangna langit i babo doni nari, bage kel me belinna keleng ateNa man kalak si erkemalangen man baNa. Bagi dauhna Timur i Barat nari, bage me ipedauhna dosa-dosanta i bas kita nari ( Masmur 103:11-12 ).

Rende: KEE 423:1-2 Kam Nebusi Aku Tuhan

P: Mari ersikap kita guna megiken kata Dibata

Rende KEE 468:2 Tuhan Demi aku Salu KataNdu

Renungan (Ibenai Ras Indungi Alu Pertoton)

Nas : Amsal 17:6

Tema : Aku Kap Kemegahen Nini ras Bulang

I bas sada karaben si teneng, sekalak bulang kundul i kursi i teras rumahna. Tanna si enggo mulai keriput nagangi sada album foto, sada persada italangina lembar album foto si lit ije gambar anak-anak ras kempu-kempuna, cirem kel ia. Kenca sie erdalan ia masuk kurumahna, itatapna ka dereten foto kempu-kempuna si ipajang rapi i dinding rumahna, mbue erbagena foto e, lit tupung kempuna kitik denga, tupung sekolah begepe lit ka piga-piga foto wisuda kempuna, cirem siang ayona dingen megah kel akapna. Kuan-kuanen 17:6 enda ibas bahasa Indonesia isuratken "Mahkota orang-orang tua adalah anak cucu dan kehormatan anak-anak ialah nenek moyang mereka". Ibas Pustaka Sibadia mahkota eme lambang kemulian sekalak raja. Mahkota ipake i takal segelah banci idah jelma sinterem dingen jadi tanda status kalak si makesa. Mahkota ncidahken dolat ras kuasa (Mas.89:20; Est 2:17), lambang kehamaten ras kemenangen (Kuan 4:9;16:31; Jes.62:3;Pi1.4:1) kesempurnaan ras kinibayaken pasu-pasu Tuhan nandangi bangsa-Na (Mas. 65:12;103:4), mahkota pe jadi penghargaan erkiteken kemenangen ibas pertandingen. Bageme identitas sekaligus tanggung jawab anak-anak, terus ke kempu nandangi orang tua. Ibas bahasa karo ayat enda isuratken "Orang tua gedang atena ngenen kempuna"ertina jadi atena, malem atena dingen melala arapen kerna erbage-bage simehuli si ilakoken dingen icapai kesusurenna.

Alu bage rikutken tema renungenta sendah, selaku PERMATA GBKP lit tanggung jawab si mbelin guna ncidahken kualitas kegeluhen si jadi kemegahen nandangi nini ras bulang. Sipemena, nggeluhlah ibas dalan Dibata. Kemegahen e teridah arah kualitas kegeluhen, jadi pribadi si berintegritas, erkemalangen man Tuhan dingen nggeluh ibas kebenaren. Sebalikna adi nggeluh kita bagi ate-ateta, terjebak ibas pergaulan si la mehuli dingen ncurnaken gelar Dibata, enda justru mpeturah mela dingen aru atena. Peduaken, tetap si upgrade dirinta alu pemeteh ras keterampilen, alu bage banci tetap sidahiken dahin si mehuli dingen ndatken prestasi si mehuli ibas geluhta, jadi kemalemen ate pe nandangi nterem jelma. Adi kune paksana kita sekolah ntah kuliah pe teridah ketutusen ateta memperlengkapi dirinta. Sipeteluken, sibereken waktuta bagepe perhatian nandangi nini ras bulangta. Hal si sederhana tapi banci mereken keriahen ukur man bana. ,Erkiteken menurut psikologi, usia nini ras bulangta rentan alu perasaan kesepian. Kehadiran ras kekelengenta banci nambahi keriaben ukurna. Peempatken, mehamat dingen ngergai ia. Nggit megiken pengalaman, pedah ras ajar si iberekenna. Anem gia situasi ras jamanta enggo berbeda, tapi turi-turin perdalinen kegeluhenna banci jadi ajar si mehuli nandangi kita. Arah kerina enda, pengarapenta ngasup kita ncidahken kegeluhen si jadi kemegahen man nini ras bulangta. Ibas jam pertotonta wari enda, iajuk pe kita guna notoken orang tuanta Saitun i tengah-tengah gerejanta, nini ras bulang itengah-tengah keluarga. Anem gia enggo metua janah rentan ibas erbage kekoten daging kula, tapi tetap reh paguhna ibas erkiniteken man Tuhan. Tetap min nggejapken keriahen ukur ras kemalemen ate. Amin.

P: Mari ersikap kita guna nehken persembahen pengataken bujurta man Tuhan. Kata Dibata si jadi palas ibas nehken persembahen tersurat ibas Tesalonika 5:17-18: Ertotolah katawari pe, janah katakenlah bujur man Dibata ibas sikugapanape. Enda me singena ate Dibata ibahandu ibas geluhndu selaku kam kalak si enggo ersada ras Kristus Jesus.

Rende KEE 471 Ermengkah Ukurku

Pertoton Khusus

PERMATA GBKP I: Notoken gelah PERMATA GBKP meteh dingen nggejapken maka ia eme kemegahen nini ras bulang

PERMATA GBKP II: Notoken gelah PERMATA GBKP ngasup jadi kemegahen nini ras bulang

PERMATA GBKP III: Notoken kerina Saitun GBKP si mperingeti HUT pe 11 tahun, nini ras bulang i tengah-tengah keluarga ras kerina kalak si enggo metua idoni enda

PERMATA GBKP IV: Notoken segelah PERMATA ngasup tetap ncidahken keleng ate man Saitun GBKP, nini ras bulang i tengah-tengah keluarga ras kerina kalak si enggo metua

PERMATA GBKP V Notoken Persembahen ras siturah ibas perpulungen iumputi pertoton Tuhan

Rende KEE 466 Bujur o Tuhanku (iendeken 3 kali)

AKSI
1. Erbahan Perayaan HUT Saitun ibas Runggun ntah Sektor, si iaturken PERMATA GBKP

2. Erbahan Perkunjungen nandangi Saitun si lanai ngasup ikut muat bagin ibas dahin-dahin gereja (ibas perkunjungen banci ibahan acara kebaktian, bagepe maba luah ibas PERMATA GBKP nari)

Pdt. Junita Br Surbakti S. Th

(Wakil Ketua Klasis Pematang Siantar)