Bahan PJJ 1-7 Maret 2026

Bimbingen Perpulungen Jabu-Jabu Tahun 2026
Tanggal 1-7 Maret 2026
RUTANG ENGKELENGI
(Tata Nilai Kasih)

Bahan Ogen : 1 Johanes 4 :11-21

11. O kam si kukelengi, adi bagenda kin kelengna ate Dibata man banta, kita rutang sikeleng-kelengen sapih-sapih kita.
12. Aminna ise pe la enggo ngidah Dibata, tapi adi sikeleng-kelengen kita, Dibata ringan i tengah-tengahta janah kekelengenNa jadi serta i tengah-tengahta.
13. Alu bage sieteh kita ringan i bas Dibata, janah Dibata ringan i bas kita, sabap enggo kita dat bagin i bas Kesah si iberekenNa man banta.
14. Janah enggo siidah ras siberitaken man kalak si deban maka Bapa enggo nuruh AnakNa ngkelini doni enda.
15. Adi lit kalak si ngatakenca maka Jesus e me Anak Dibata, Dibata ringan i bas ia janah ia ringan i bas Dibata.
16. Janah kita jine enggo meteh janah tek nandangi kekelengen Dibata man banta. Dibata kekelengen kap, janah ise si erkeleng ate ia ringan i bas Dibata janah Dibata ringan i bas ia.
17. Kekelengen e ibahan jadi serta i bas kita gelah kita la mbiar jumpa ras Dibata i bas Wari Pengadilen. La kita mbiar sabap kegeluhenta i bas doni enda bali ras kegeluhen Kristus sangana IA i doni enda denga.
18. I bas keleng ate la lit kebiaren. Kekelengen si serta erbahanca kita lanai mbiar. Ukumen nge si erbahanca turah kebiaren; e maka kalak si mbiar denga, e tandana langa lit i bas ia keleng ate si serta.
19. Kita ngkelengi, sabap leben IA ngkelengi kita.
20. Adi lit kalak si ngatakenca maka keleng atena Dibata, tapi nembeh atena man seninana, kalak si bage perguak. Sabap kalak si la ngkelengi seninana si idahna, labo tuhu ia ngkelengi Dibata si la idahna.
21. Enda me perentah si enggo sialoken i bas Kristus nari: ise si ngkelengi Dibata, arus maka ikelengina pe seninana.

MODEL PJJ: PUJIAN

KATA PERLEBE
Kekelengen eme palas ras biak kalak si erkiniteken, sue ras si ikataken Tuhan Jesus i bas Matius 22:37 maka dalan ndemi Undang-Undang (Torat) eme alu engkelengi teman ras ngkelengi Dibata. La erkekelengen eme tanda la erkiniteken. Sabab kekelengen Dibata si mbelin si isaksiken ras ipeseh (iberitaken) ku sebelang-belang doni enda teridah ras tergejap arah kegeluhen si dem kekelengen nandangi teman (e prasyaratna). E maka adi labo lit kekelengen berarti labo lit penginjilan, gia secara fisik kita lit. E maka engkelengi enda enggo jadi sada keharusen ntah pe utang nandangi temanta. Adi la lit kekelengen sia-sia nge kerina atribut ras kegiaten rohani si ipake ras si ilakoken kita.

ISI
1. Konteks ogenta enda eme lit turah pengajaren si papak si ngataken maka kejahaten rehna i bas persadan ras doni enda, termasuk persadan ras sapih-sapih manusia, sabab enda kerina iakap medoni. E maka nina ajaren enda adi ateta terkelin ulanai siukuri kerna kegeluhen ras perbahanen i bas doni enda. Menarikna termasuk kiniseran ras kematen Jesus pe ikatakenna labo tuhu sabab iakapna e hal doni kerina. Nina kerna keselamaten pe labo lit hubungenna ras lagu langkah, relasi ras kekelengen man teman sabab e kerina barang doni kap. Pengajaren si salah enda ilawan Johanes arah suratna. Ikatakenna maka kiniteken man Kristus e arus teridah arah perbahanen si dem kekelengen man sapih-sapih manusia, sabab Tuhan eme kekelengen kap. Kerehen ras keselamaten si ibaba Kristus man manusia eme tanda kekelengen Dibata si tuhu-tuhu man manusia gelah terkelin kerina kalak si tek. Erkiteken sie me maka kalak si tek man Jesus rutang sikeleng-kelengen sapih sapih ia (ay.11).

2. Ngkai maka kita rutang nehken kekelengen?
• Erkiteken mbelin kal kekelengen Tuhan, si enda teridah arah enggo iendeskenna anakNa sitonggal man manusia gelah arah IA kita iperdameken ras Dibata alu ngalemi dosa-dosanta. Jadi kita engkelengi sabab enggo leben IA ngkelengi kita (ay 9-11, 19).
• Sikeleng-kelengen eme tanda Dibata ringan i tengah tengah kalak sierkiniteken, sabab Dibata e kekelengen kap (ay. 12,16).
• Gelah serta kekelengen Dibata i tengah-tengahta, sabab kekelengen Dibata serta i bas kegeluhen kalak si dem alu kekelengen, enda me pra syaratna (ay. 12).
• Enda me perentah si nggo sialoken i bas Kristus nari: ise si ngkelengi Dibata, arus maka ikelengina pe seninana (ay.21).

3. Kuga carana nehken kekelengen (ay. 20-21) : Ngkelengi senina maksudna ngasup ngidah ras mperdiateken sapih-sapih manusia desken ersenina, ntah pe alu kata si deban kadar kekelengenta bagi kalak ersenina. Ngkelengi teman bali ras senina eme implementasi engkelengi Dibata. Adi lit kalak si ngatakenca maka keleng atena Dibata, tapi nembeh atena man seninana, kalak si bage perbual kap. Sabap kalak si la ngkelengi seninana si idahna, labo tuhu ia ngkelengi Dibata si la idahna (ay. 20-21).

4. Ulih nehken kekelengen : Ay.13-14,17-18
- Dat bagin i bas Kesah si ibereken man banta, ertina ndatken padan keselamaten.
- Ngidah ras ngasup meritakan man kalak si deban maka Bapa enggo nuruh AnakNa ngkelini doni enda, ertina eme jadi penginjilan pribadi ras komunitas kalak sierkiniteken sue amanat agung Tuhan Jesus (nen. Mat. 28:19-20).
- Erbahanca kita jadi serta, lanai mbiar ngalaken Pengadilen Kristus (eskatalogi) sabab lit kepastian keselamaten. I bas ay.18 nina : ..Kekelengen si serta erbahanca kita lanai mbiar. Ukumen nge si erbahanca turah kebiaren; e maka kalak si mbiar denga, e tandana langa lit i bas ia keleng ate si serta.

Pengkenaina
1. Kekelengen eme inti i bas erkiniteken (hukum kasih), si wajib ras arus sidalanken i bas kerina dampar kegeluhenta. E maka i bas GBP GBKP pe ibahan kekelengen jadi tata nilai siman ayaken baik secara pribadi, keluarga bage pe persadan gerejanta. Intina Kekelengen eme jadi jati diri ntah pe biakta selaku gerejanta.
2. Harus siangka maka kekelengen Dibata teridah ras serta ku tengah-tengahta eme arah perbahanen kegeluhen perpulungen si dem kekelengen. Praktek kekelengen si jadi i bas kita eme dalan kekelengen Dibata seh man banta. Berarti kekelengen eme kebenaren, sabab ibanna me maka kita ersada ras Dibata sierbuahken keselamaten.
3. Erkiteken kekelengen eme nilainta, e maka enggo harus kita pang subuk selaku pribadi bagepe institusi GBKP mproklamirken ntah mastiken maka lanai lit anggota jemaatta si terabaiken erkiteken kiniseran, umpamana ula min lit anakta la sekolah erkiteken kesusahen ekonomi, bage pe lanai lit jemaatta la ertambar erkiteken la tergalari, rsd. Adi ersada kita kerina nggejapken rutang nehken kekelenggenta (sue tema-nta) janah enggo ngasup njadiken kekelengen jadi hobbyna, dingen banci terkoordinir se GBKP, maka enggo pasti kita megegeh ras gerejanta pe maju.

DISKUSI :

1. Turiken pengangkanta, kai nge alasenna maka kita selaku kalak sierkiniteken rutang nehken kekelengen.
2. Ban aksi nehken kekelengten man temanta si lit i bas kesusahen i bas PJJ ntah i bas runggunnta.

USULEN ENDE-ENDEN:
1. KEE No. 424:1-2 ( KLIK DISINI UNTUK MELIHAT LAGU )
2. KEE No. 177:1-2 ( KLIK DISINI UNTUK MELIHAT LAGU )
3. KEE No. 281:1- ( KLIK DISINI UNTUK MELIHAT LAGU )
4. KEE No. 254:1-2 ( KLIK DISINI UNTUK MELIHAT LAGU )

Pdt. Seth Perangin-angin, M.Th

HP/WA : 081397340320