Liturgi Pekan Kebaktian Penatalayanen GBKP Wari Peempatken

LITURGI
PEKAN KEBAKTIAN PENATALAYANEN GBKP
WARI PEEMPATKEN, Rabu, 21 Januari 2026

I. PERSIKAPEN

1. Nikapken kerina perlengkapen kebaktin, mehuli adi lit alat musik
2. Sikapken sepotong kertas kosong (HVS bagi dua) bagepe pulpen.
3. Sikapken sada perakan kosong 4. Doa sapaat ibabai mamre, moria ras serayan

II. KEBAKTIN

1. Kata Penaruh ( Ibabai serayan sector )
Turang ras senina i bas Tuhanta Jesus Kristus, ikataken kami mejuah-juah man banta kerina. Meriah ukurta ras sikataken bujur man Dibata i bas Jesus Kristus erkiteken lias ate ras perkuah ateNa enggo kita itaruhkenNa bengket ku bas wari sipeempatken i bas Pekan Penatalayanen GBKP tahun 2026 enda. I bas wari enda kita isingetken kerna engkelengi Dibata i bas dampar keriahen geluh. Ngidah tole dingen nggejapken Dibata lit(hadir) i bas keriahen ukur si jadi i tengah-tengah kegeluhenta. E maka arah keriahen sinigejapken kita e, iarapken sedar kita maka e pemere Dibata. Labo ulih latihta, labo bekas kebeluhenta. Man bandu serayan Tuhan simabai kebaktin enda itaruhken kami kam alu pertoton gelah ngasup kam nuriken kerna kebenaren ras sura-sura Dibata.

2. Ertoto

3. Rende KEE GBKP No. 424: 1,2           (Perp. Tedis)
I puji kami Kam Dibata si mbelin alu ende-enden si meriah
Suari ras berngi kawali kami min segelah la celus bas percuban
Reff : Sangap kap kalak si ‘rnalem baNdu e
      Daten tuah ras kesenangen pe
      Sangap kap kalak si `rnalem baNdu e
      Daten tuah ras kesenangen pe
Kam Tuhan Dibata puji sembah kami
Keleng atendu la kap erkerin
Kam kap sinjayam kegeluhen kami kin
KelengNdu man kami la erkeri-kerin Reff : ......

4. Votum + Salam
L I bas gelar Dibata Bapa si njadiken langit ras doni, i bas gelar AnakNa Jesus Kristus si engkelengi kerina tinepaNa ras i bas gelar Kesah Si Badia si nampati lako mpekena-kena doni enda. Perkuah ate ras dame i bas Dibata Bapa, AnakNa Jesus Kristus ras kerembaken Kesah Si Badia ras kita (kam) kerina gelah.

P A..min A..min, A..min ( iendeken )

5. Invocatio

L "ItuduhkenNdu bangku dalan si perlawesna kempak kegeluhen. I adep-adepenNdu dem keriahen, i bas tanNdu kap kesenangen" (Msm. 16:11).
Erpalasken kata Dibata enda, mari radu ras kita ngendeken KEE GBKP No. 374:1-2
Jesus ulu kegeluhenku, Kam me ngenca pengendesenku
Lalap tedeh ate pusuhku, kupehaga Kam bas geluhku
Reff : O Tuhan pemehen pusuhku
        Si ertedeh ate rnan baNdu
        Kugelem pedah ras padanNdu
        Kusembah Kam i bas geluhku
Kusembah Tuhan penebusku, si mereken kekelengenNa
Alu tutus reh aku Tuhan, ras kerina isi jabungku
Reff : ...

6. Ende-enden Pujin man Tuhan (Msm 117:1-2) ( Perp. Kundul)

L       O kerina bangsa-bangsa, o kerina manusia, Pujilah Tuhan!
P       Keleng ateNa megegeh kal., kesetianNa tetap rasa lalap.
L+P   Pujilah Tuhan!
L       Terpujilah Dibatanta seh rasa lalap, dage mari kita rende :
KEE GBKP No, 368:1-2
Sipuji Tuhan Dibatanta kataken bujur baNa
Sabab Ia simerekenca pasu-pasu man banta
Reff : Mbelin ras mulia kekelengen Tuhan i bas doni enda
      Ajari o Tuhan kami k'rina anakNdu.
      Naksiken kerina perbahanenNdu
Geluh kami meriah tuhu, kerina sik'rajangenNdu
Sabab kalak si nembah baNdu, ndatken pasu-pasuNdu
Reff : ...

7. Pengakun i bas kinilangasupen manusia ngidah perkuah ate Dibata
L   Mekatep kal siakap kegeluhenta enda bekas gegeh kengasupenta erbanca meriah, erbanca senang
P O Tuhan rusur iakap kami ban geluh kami nge maka si e jadi
L   Mekatep kita lupa ngataken bujur man Tuhan ulu kerinana i bas.kegeluhenta i doni enda
L   Ngaku kami Tuhan lepak rusur pengukuri kami, gegehi kami tempa-tempa lanai inget kami Kam si mereken kerina si ni perluken bas kegeluhen kami. Alemi kami Tuhan.
L I bas kita ngakuken kinilangasupenta, rende kita KEE 211:1 (iendeken 3x )
I lebe-lebe Jesus, kundeskeri k'rina geluhku
Ras isi pusuh ukurku, i lebe-lebe Jesus
L   Nina Tuhan : Ola mbiar, sabab Aku kap ras kam! Aku kap Dibatandu, e maka ola atendu aru. Ku sampati kam, janah Aku mahanca kam megegeh. Ku kawali kam janah Ku kelini pe (Jes.41:10 )

Meriah ukurta i bas pergegeh si ibereken Dibata man banta, mari ras kita rende : KEE GBKP No. 333:1,3
Tuhan e tuhu melias perkuah, la `rbanca kita mejuah-juali
Ia me si erbanca ukur m'riah, Jesus e si njadiken kita ‘rbuah

Ersaksi kita kerina o teman, turiken kebenaren Kata Tuhan
Terkelin kerina si nggit ernalem
Tuhu kal kita jumpa ate malem

8. Pengogen Kata Dibata si pemena: Jesaya 12:4-6 (iogeken simada jabu)
L    Ketuahen kalak si rnegiken Kata Dibata, dingen si makekenca bas geluhna si teptep wari, Haleluya P   Haleluya, Haleluya, Haleluya (iendeken )
Kotbah   Lukas 7:11-17
Tema       Dibata Mulahi BangsaNa

9. Pengakun Kiniteken (Perp. Tedis)

10. Persembahen (Perp. Kundul)
L Kata Dibata si jadi palas man banta guna ngendesken pengataken bujurta eme Masmur 50:23 "Ngataken bujur eme persembahen si pehagaken Aku janah si patuh ngikutken Aku tentu Kukelini".
Tupung si endesken persembahen ras kita rende i bas KEE GBKP No. 385:1-2
Babalah persembahen si merimna, kuadep-adepen Dibatanta
Sehken lah puji-pujin si mehaga, man Tuhan Dibata si Badia
S'bab IA si mada kerina, si lit bas geluh enda
Kataken bujur arah g'luhta, terpuji gelah Tuhan

Ajari kami make pemereNdu, Guna mpehaga Kam O Tuhanku
Jadi e pe pebelangken kataNdu, I bas kegeluhen doni enda
`Lah gegeh ras pengertin kami, seh jadi pasu-pasu
Man k' rina kegeluhen enda, Terpuji gelar Tuhan

11. Pertoton persembahen ras Pertoton Sapaat
Topik Pertoton
a. Persembahen si enggo iendesken (ibabai sekalak Mamre)
b. Gelah kerina ngawan perpulungen ngasup megiken dingen ngikutken Dibata arah kerina dampar kegeluhenna (ibabai sekalak Moria)
c. Notoken si mada jabu wari enda ras berngi si reh ibabai Saitun
d. Siturah i bas ngawan perpulungen (ibabai Serayan)

12. Perpadanen Man Dibata Tedis    (Perp. Tedis)
L   Malem kal ateta tuhu, sabab Dibata mperdiateken kegeluhenta.
P   Tergejap i bas kerina dampar kegeluhenta, Dibata lit i tengah-tengahta mereken keriahen si tetap. Ate kami makeken kerina keriahen e jadi kesaksin man jelma si enterem
L   Malem kal ateta Dibata mulahi kita i bas kiniseran kegeluhenta, sicidahkenlah arah kegeluhenta keriahen ukurta e.
P   Mari si salamen kita ras temanta kawes kemuhen dingen ninta "Malem kel ateta sebab perkuah ate Dibata iberekenNa i bas geluhta.
L   Siberitakenlah keriahen ukurta alu rende kita KEE No. 400: 1-2,
Sib'ritaken B'rita Si Meriah, ulanai pedekah-dekah
Ku sebelang-belang doni enda, seh ku kerina bangsa-bangsa
Jesus kap si mada persuruhen mari dage si beritaken
Reff : Siberitakenlah Kata ni Dibata
      Kesah Si Badia, kap si peturahsa
           Cidahken arah kata ras perbahanen
           Jadi kesaksin man jelma si enterem
Sisuanken b'rita keriahen, i bas geluh ni perpulungen
Ersada i bas sada rarasen, kerina si keleng-kelengen
Bas si mehuli la sitoganen, radu ras si sampat-sampaten
Reff :

13. Pertoton Tuhan

14. Pemasu-masun
L Alokenlah pasu-pasu idur Dibata nari :"Ipasu-pasu janah ikawali Dibata kita (kam), siang ayo Dibata ersinalsal ibabonta (ndu) janah melias ateNa ngenehen kita (kam). Itatap Dibata ku kita (kam) janah malem ateta (ndu) ibahanNa."Amin (iendeken)

III. Sharing ras aktivitas
• Mari situriken arah kerina pemere Dibata simaba keriahen, siapai nge si belinna si iakap kita? Kerina iarapken ngerana, 1-3 kalimat saja.
• Pengurus PJJ nikapen potongenspotongen kertas kosong (HVS): Sada HVS banci ibagi dua bagian. E maka kerina si hadir enggo ngaloken sada lembar. La pedah itama gelama, ibereken waktu 2-5 menit guna nuratkenca pengalamen si meriah i bas kegeluhenna. Kenca eiaggo dung isuratken, e maka ipepulung (banci i bas peraken ). E maka secara acak sekalak-sekalak. muatsa apai baginna si man ogenna. E maka ioge bas pusulma jadi keriahen ka man banta (berkat untuk kita ). Teptep kalak bakal ngidah arah hal-hal sederhana temanta beluh nggejapken kemalemen ate Pemere Tuhan.

Pdt Kristiani F. Br. Tarigan, M.Th

HP/WA : 082165255763