Pasu-Pasu Tuhan Man Nande / Moria - HUT Moria ke-62 ( Bahan PJJ 6 - 12 Oktober 2019 )

Bahan Bimbingen Perpulungen Jabu-Jabu 6 - 12 Oktober 2019

Pasu-Pasu Tuhan Man Nande / Moria

( HUT Moria ke - 62 )

Ogen : 1 Samuel 2: 18-21

Samuel i Silo
18. Asum si e Samuel kitik denga, terus erdahin ndahiken dahin TUHAN. Pakenna baju si badia si ibahan i bas linen nari.
19. Tiap tahun ibahan nandena sada baju kitik jenari ibabana man bana asum ia nemani perbulangenna nehken persembahen tahunen.
20. Jenari ipasu-pasu Eli me Elkana ras ndeharana, janah ikatakenna man Elkana nina, “Mbera-mbera ibereken TUHAN man bandu anak tole arah ndeharandu enda jadi gancih anak si enggo iendeskenndu man baNa.”
Kenca bage mulih ia ku kutana.
21. Payo me TUHAN masu-masu Hanna, e maka ipupusna telu nari anak dilaki ras dua anak diberu Samuel mbelin-mbelin i bas ndahiken dahin TUHAN.

Kerina kita ersura-sura geluhta ipasu-pasu Tuhan, mulai danak-danak nari seh ku cawir metua. Umpamana: i bas kebaktin minggu si ujungi alu nehken pasu-pasu. E maka lit deba perpulungen e mbuka duana tanna. Lit ka deba iangkatna ka tanna alu pengangkan gelah minter ialokenna pasu-pasu idur Dibata nari. Situhuna, mbuka tan entah pe la mbuka tan tetap kita ngaloken pasu-pasu idur Dibata nari erkelangken pandita. Janah pasu-pasu e pemere ras kuasa i bas Dibata nari. Si ipindokenNa eme keterlibatenta arah kesetiaan, kinigenggengen, kinipatuhen ras tetap ernalem man Dibata. Janah labo mehuli, adi merincuh kita ipasu-pasu Tuhan tapi kurang kesetiannta, kurang kinigenggengenta, dingen la kita ernalem man Dibata. Terlebih bas Teologi Padan si Ndekah teridah kel hubungen sebab akibat. Adi setia, geluhta ipasu-pasu, sedangken adi la setia ndatken sumpah (bdk. Ul. 28 ras 30). Sie teridah i bas kegeluhen Hana.

I bas 1 Samuel 1 ituriken maka Hana rusur isaling-saling kiduana erkiteken la lit pupusna. Tapi tetap iendeskenna geluhna man Tuhan. La ia nggit nuri-nuri ku jah ku je si lenga bo tentu lit ulihna. I Silo i bas Rumah Pertoton, i je itungkaskenna isi pusuhna man Tuhan seh maka iakap imam Eli, Hana mabuk anggur. Hana pe pang erpadan (ernasar) man Tuhan adi ibere Tuhan anak dilaki man bana, maka kidekah geluhna iendeskenna man Tuhan dingen bukna ndigan pe la ipangkasna. Lit upah kalak si megenggeng. lbegiken Tuhan pertotonna, ras ibereken Tuhan anak dilaki man Elkana ras Hana, je nari iberekenna gelarna Samuel. Imam Eli masu-masu Elkana ras ndeharana, janah ikatakenna man Elkana maka mbera-bera ibereken Tuhan man bana ras ndeharana anak gancih si enggo iendeskenna man Tuhan. Kedungenna teridah Tuhan masu-masu Hanna, maka ipupusna telu nari anak dilaki ras dua anak diberu. Pasu-pasu si ibereken Tuhan man Hana ialokenna alu keriahen ras ipertanggungjawabkenna man Tuhan alu ngendesken Samuel ku Rumah Pertoton i Silo.

Hana selaku nande tetap njaga kerembakenna ras anakna Samuel. Teptep tahun ia berkat ku Silo ras perbulangenna, ibabana baju kitik man anakna. Si ilakoken Hana e eme tandakeleng atena man Samuel. Janah si e kerina njemba Samuel guna tutus i bas melayani Tuhan sabab igejapna maka ia bekas toto si ipindoken nandena man Tuhan.

Puji Tuhan i bas bulan Oktober enda kita merayakan HUT Moria GBKP si pe-62-ken, banci ikataken secara organisasi enggo metua umurna. Kedewasaan labo mahan bana erkiteken reh tambahna umur, tapi erkiteken pilihanta. Biak dewasa banci teridah arah kinigenggengen, kesetian, ngasup ngalaken erbage-bage persoalen geluh ras terpenalem i bas jabuna, bagepe selaku Moria i tengah gereja. Kegeluhen si enggo ipasu-pasu Tuhan tetap min mpepaler pasu-pasu e ku sekelewetna secara kusus bas jabuna. Ula sia-siaken pasu-pasu Tuhan si enggo iberekenNa banta. Sada kehamaten man Moria ibereken Tuhan kesempaten jadi nande, jadi orang tua man anak-anakta. Labo mesukah jadi orang tua. Anakta e rehna i bas Tuhan nari, pemere Tuhan man banta. E maka siajari, sipebelin anak e gelah tetap erkemalangen man Tuhan.

Labo terjeng keperlun kulana sicukupi, tapi pe alu nehken keleng ate ras mperdiateken keperlun pertendinna. Desken Hana si ngendesken anakna si enggo ipindona man Tuhan guna banci erdahin ngelai Tuhan. Enterem kita la ngasup jadi orang tua man anakta si erbahanca anakta la erkemalangen man Tuhan, dingen rate-ate geluhna. Sibabailah anakta erkemalangen man Tuhan ras banci ngelai Tuhan la terjeng sibere anakta masuk sekolah Teologi ras kedungenna jadi pandita, umpamana. Tapi ajarilah menaken kitik-kitikna nari, keleng atena Tuhan, ngelai Tuhan, kenca ia mbelin pe tetap e idalankenna. Meriah ukurna mereken waktuna, gegehna, talentana, kinilitenna guna ngelai Tuhan. Sibiasakenlah pe lit kebaktin itengah jabu.

Pasu-pasu Tuhan man nande (Moria) arus ijabap alu ngataken bujur si teridah arah perbahanen subuk selaku nande bagepe Moria i tengah gereja. Selaku nande tetap sidalanken tanggungjabapta sebage nande si pentar, si terpenalem man anak-anakta. Selaku Moria ngasup kita mereken usihen, penjemba man Moria si deban. Selamat Ulang Tahun MORIA GBKP. Terpujilah tetap Tuhan si enggo masu-masu geluhta.

EVALUASI :
Kai nge ulihna kenca sikirimken ayat-ayat Pustaka, renungen bage pe kata-kata penjemba ( motivasi ) man temanta?

DISKUSI :

Kai nge si erbahanca maka nggit Hana ndalanken padanna man Tuhan ngendesken anakna man Tuhan kidekah geluhna, padahal guna ndatken Samuel pe labo mesukah?
Perbahanen kai saja si banci ilakoken orang tua, khususna nande (Moria), gelah anakna menaken kitik-kitikna nari seh mbelin nggit ndahiken dahin Tuhan?

AKSI
Man banta jabu si lenga ngelakoken ibadah keluarga, gelah i bas sada minggu enda sicubaken erbahan ibadah keluarga setiap wari. Man banta jabu si enggo ngelakoken ibadah keluarga secara teratur bahanlah sada aksi man anak si kurang ndatken perhatin ( anak melumang, anak terlantar, entah pe adi lit anak-anak i bas perpulungenta ) alu nehken sada bentuk konkrit perhatin, umpamana:

Radu ras ertoto ras anak ndai kerna kai si jadi perbebenna
Nenahken anak ndai guna radu ras makan bersama entah pe rekreasi bersama.

USULEN LAGU :

KEE GBKP No. 339 : 1-3 ( KLIK JUDUL KEE UNTUK MELIHAT LIRIK )
KEE GBKP No. 374 : 1-3 ( KLIK JUDUL KEE UNTUK MELIHAT LIRIK )
KEE GBKP No. 316 : 1-3 ( KLIK JUDUL KEE UNTUK MELIHAT LIRIK )
KEE GBKP No. 414 : 1,3 ( KLIK JUDUL KEE UNTUK MELIHAT LIRIK )

TOPIK PERTOTON SYAFAAT

Gelah pengurus Moria GBKP secara organisasi ( pusat, klasis ras runggun tetap ipasu-pasu Tuhan).
Gelah jadi Moria / nande si ertanggungjabap ras terpenalem.
Gelah lit hubungen si mehuli antara orangtua ras anak.
Siturah i bas perpulungen.

Pdt. Larena Sinuhadji, M.Th.

Mohon Bantuan Subscribe dan Like Youtube Channel GBKP KM 8. Bujur