Nggeluh Arus Pentar Ras Erpemeteh - Nggit Erlajar Arah Lingkungen, Budaya, Pemerintah, PKK, CU ( Bahan PA Moria 21 - 27 Juli 2019 )

Bahan Bimbingen PA Moria 21 - 27 Juli 2019

Nggit Erlajar Arah Lngkungen, Budaya, Pemerintah, PKK, CU

S1 MAN OGEN : Pengerana 7: 11-12

11. Kalak nggeluh arusna pentar; ergana pemeteh bali kap ras barang pusaka.
12. Pemeteh mereken ketenangen bali ras duit. Kalak si i bas ia kepentaren dingen pemeteh, ia terkelin.

T E M A : NGGELUH ARUS PENTAR RAS ERPEMETEH
TUJUN : Gelah Moria

• Ngangkai uga ergana pemeteh e perehken keterkelinen, ketenengen ras duit
• Nggit erlajar arah Iingkungen, budaya ras pemerintah guna nambahi pemeteh.

METODE PA : Inventarisir peluang-peluang erlajar

Kata Penaruh.
Perbedan si mbelin ibahan Dibata antara manusia ras rubia-rubia tupung ijadikenNa doni ras isina eme litna akal ras pikiren si ibereken Dibata ( Kejadin 1:28 ). Arah si enda me mpengasup manusia banci nggeluh pentar ras erpemeteh. Kepentaren ras pemeteh enda arus ipake guna ndalani kegeluhen, seh maka banci terbedaken kita apai si payo ras apai si la payo si arus idalanken. Aminna bage pe banci ka nge kita erlajar arah tinepa sideban: lingkungen, rubia-rubia, budaya bepe pe erbage hal si lit sekelewetta. Prioritas program GBKP i bas tahun 2019 enda, si utamana eme: "Meningkatkan jiwa kewirausahan ( entrepreunerhip )" si tentuna merluken pemeteh ras kepentaren guna ndalankenca. Melala dalan ras cara paksa si genduari banci ipake guna nambahi perduiten keluarga, tapi arus nggit erlajar. Adi la nggit erlajar ras la ngasup makeken dalan ras cara si lit, la banci lang ketadingen me kita.

Mpebagesi Pengangkan Kerna Ogen
Kitab Pengerana enda itulisken Salomo i bas umurna enggo metua. Enda teridah arah isi tulisenna e kerna pengalamen-pengalamen si enggo ibentasina bagepe erbage kecibal si enggo iidahna. Enggo iidahna ulihna paksa ipakena kepentaren si rehna i bas Dibata nari ras uga ka ulihna, adi ipakena pemeteh ras keriahen doni si engkuasai kegeluhenna. Lit 4 hal si perlu si man kusur-kusurenta i bas ukurta gelah jadi perenungen man banta i bas jaman enda. Alu bage i bas kepentaren e nulih kita dingen la si ulihi si la payo.

1. Nggeluh arusna pentar.
   Ertina, kepentaren si payo labo saja reh arah pemeteh ras cara rukur manusia saja entah pe arah pelajaren si datken kita i bas sekolah ( Ilmu Pengetahuan ). Tapi pe kepentaren e idatken sekalak jelma arah kerembakenna ras Dibata ( hubungan pribadi dengan Tuhan ). Kai kin gunana kepentaren ( hikmat ) i bas kegeluhenta enda? Kepentaren mpengasup kita guna ngangkai persoalen-persoalen i bas kegeluhen enda. Ertina bayak gia kita, mbue pemetehta, adi la kita pentar ( bijak ) makekenca kebayaken ras pemeteh e dungna mpeturah persoalen, subuk man banta bagepe man, kalak sideban. Lit istilah kalak Karo; "seh sura-sura, turah sinanggel".
2. Pemeteh bali ergana ras barang pusaka.
   Erpemeteh penting i bas kegeluhen enda, sabap adi la erpemeteh kita pasti ketadingen. Salomo encidahken uga ergana pemeteh e i bas sekalak manusia, iandingkenna desken ngaloken barang pusaka. Barang pusaka biasana cukup meherga, la terjeng erga duitna tapi nilai sejarahna pe. Kalak si erpemeteh pasti kekal, iinget kalak amin gia seh paksana kita mate. Kai si enggo si bahan si mehuli tetap jadi kenangen nandangi jelma si enterem ( lestari ). 
3. Pemeteh mereken ketenangen, bali ras duit.
   Salomo ngidah maka kalak si erpemeteh pasti teneng geluhna, la aru atena adi kuja gia perdalanna. Emaka i bas ayat 12 ikataken, "pemeteh e mereken ketenengen bali ras duit", ertina lit asamta ( modal ). I bas kegeluhenta enda duit perlu, sabap kai pe ate si man tukuren adi la lit duit labo banci. Salah sada kepentingen duit eme nampati erbahan usaha guna ndarami duit, perlu modal dasar ( awal ). Labo banci kai pe sibahan adi la lit modal guna erbahan usaha e. Banci nge "pemeteh" ngeraih guna muat modal, banci ku bank, banci ku koperasi ras sidebanna, tapi tentu labo tenang ngukurken guna nggalarisa. Tapi adi lit duit, tentu lebih tenang sabap lanai man tangkelen guna nggalari utang. Tentu bage me kalak si erpemeteh, lit modal pemeteh i bas kita, emaka kuja ras kai pe ate ilakoken lanal kita mbiar.  
4. Kalak si pentar ras erpemeteh: Terkelin!
   Salomo erbahan kesimpulen i bas ayat 11 ras 12 enda, alu mpersada antara erpemeteh ras pentar. Kepeken adi duana lit i bas sekalak jelma ( pentar ras erpemeteh ) lanai tanggung-tanggung ulihna, terkelin. Enda pengalamen Salomo i bas kegeluhenna, pengalamenna ituriken lako njagai manusia.

Pengkenaina
Megati si begi belas-belas kalak nina "pasrah saja, enggo nge padanta nggeluh bagenda, enggo Isuratken ndube bas tan. Kata si bagenda lit erkiteken pengakapna ia enggo talu i bas kegeluhenna. Surut pe la tersuruti, usur-usur pe lanai bo lit dalan ngerehken rejeki.

Selaku kalak Kristen, kita la banci talu janah surut, alu nalahken padan ras pengindo. Enggo kal ibereken Tuhan kengasupen man banta guna rusaha alu mereken pemeteh ras perukuren si mpeturah kinibeluhen ras kepentaren man manusia. Guna si e perlu si pakeken kepentaren ras pemeteh ndarami cara ras dalan si jadi serpang pulah. Ola bene ukurta.

I bas perkembangen jaman kepentarenta arus i bas erbage dampar. Ertina kita la banci berkembang sisada, kita arus ngasup bekerja sama ras kalak sideban. Kita arus mperdiateken erbage potensi si lit i sekelewetta. Umpamana: pentar kita ngidah peluang kai si iperluken masyarakatta, kai si hasilken sekelewetta ( produk local ) si banci si kembangken.
- Ise temanta banci kerja sama, i bas kuta, organisasi diberu ( PKK ntah CU )
- Nilai-nilai kai saja kearifan lokal si banci si kembangken, banci jadi wisata la saja ingan tapi bentuk pangan.

I bas usaha ras kerjasama si enda banci saja labo minter rulih. I bas si enda ula kal minter kita kelsehen ( putus asa ). Kerina enda banci silakoken adi si pake pemetehta alu pentar, si e jadi kesempaten man banta ngembangken dirinta.

Inventarisir Dalan Ras Caranta Erlajar.  

1. Perdiateken dingen siksikilah kai-kai saja si lit i sekelewetta si banci si kembangken arah pemetehta. 
2. I bas sie ras ise ka kita banci kerjasama.

Pdt. Dormanis. S. Pandia, STh

Share this post