Ngelitken Siniperluken - Entrepreneurship: Inovasi ( Bahan PJJ 21 - 27 Juli 2019 )

Bahan Bimbingen Perpulungen Jabu-Jabu 21 - 27 Juli 2019

Ngelitken Siniperluken

( Entrepreneurship: Inovasi )

Ogen : 2 Kronika 1: 13 - 17

Kekuasan ras kebayaken Raja Salomo
(1Raj. 10:26-29)
13. E maka berkat Salomo i Gibeon nari, ingan Kemah Perjumpan ras TUHAN, jenari mulih ia ku Jerusalem. I je ia jadi raja Israel.
14. Itambahina gegeh tenterana alu pepulung 1.400 gereta kuda dingen 12.000 tentera si erkuda. Deba itamana i Jerusalem dingen si tadingna itamakenna i kuta-kuta si deban.
15. I bas paksa pemerentahenna, pirak ras emas bali buena ras batu i Jerusalem janah kayu aras bali ras batang ara.
16. Suruh-suruhen raja ngkuasai perbinagan kuda si rehna i Musri ras Kilikia nari,
17. dingen gereta kuda si rehna i Mesir nari. Kuda ras gereta kuda si iperluken raja Heti ras Siria, Raja Salomo ngelitkenca. Man raja-raja e sada gereta kuda idayakenna alu erga 600 duit pirak, dingen kuda alu erga 150 duit pirak.

Bahan PJJnta enda ncidahken sada masa pergantin pemerintahen Daud nari ku Salomo. Penekanen Salomo sebage anak Daud ncidahken kelanjuten antara bapa ku anak, kerna pewarisen tahta. I bas ia ngaloken pemerintahen e Salomo ibereken kuasa. Kuasa e ibereken guna nehi sura-sura bapana ndube si lenga ilakoken. Eme mbangun pembangunen Rumah Pertoton.

Engkai maka Gibeon jadi perhatian Salomo janah ijadikenna ingan e jadi ingan pemena mindo gegeh man Tuhan guna mimpin bangsa Tuhan? Erkiteken Kemah Perjumpan Dibata si ibahan Musa ringan i Gibeon. Emaka Gibeon jadi ingan si pentingna kal akap Salomo i bas mbenai kepemimpinenna. Salomo erpengakap perlu i bas ia menaken kepemimpinenna bagi si ngena ate Tuhan. Gibeon jadi ingan pengalamen si meherga man Salomo, ije Dibata ncidahken diriNa. lje me iturikenna sura-surana man Dibata guna mimpin Israel. Kerina e terhubung alu tujun utama eme pembangunen Rumah Pertoton. Tupung si e peti perpadanen enggo itamaken Daud i Jerusalem, janah Kemah Perjumpan lit denga i Gibeon. Salomo ersura-sura mpersada Peti Perpadanen ras Kemah Perjumpan enda banci ersada i Jerusalem.

I bas bahan PJJnta enda pemerintahen Salomo nehi sura-sura bapana ndube. Erkiteken kepentaren si ibereken Dibata, emaka Salomo banci nerusken pembangunen Rumah Pertoton. Salomo ipasu-pasu alu kepentaren, erta-erta ras kuasa si ibereken man bana. I bas Salomo nambahi gegeh tenterana alu mpepulung 1.400 gereta kuda dingen 12.000 tentera si erkuda. I bas pemerintahenna pirak ras emas bali buena ras batu i Jerusalem, suruh-suruhen raja ngkuasai perbinagan kuda janah man raja-raja si deban sada gereta kuda idayaken alu erga 600 duit pirak, dingen kuda alu erga 150 duit pirak. Si enda ibahan Salomo guna ncidahken gegeh ras ngaturken "perdagangen senjata internasional" guna niaga perdamen bangsa-bangsa si lit i sekelewet Israel. Guna encidahken gegeh kerajanna, Salomo namaken gereta tenterana i ibukota, Jerusalem. Deba itamana i kuta-kuta si deban. Erbage-bage ulu kinibayaken man bangsa Israel, umpamana: arah upeti ras perdagangen bagepe "impor" guna bahan bangunen bagi pirak ras emas bagepe kayu. Perdagangen pe berkembang, erkiteken kecibal Israel "strategis" antara Asia ras Afrika, jalur perdagangen darat Mesir nari ku Mesopotami ras Asia Kitik arus mentasi wilayah si ikuasai Salomo. Arah sie me keuntungen perdagangen banci idatken. Kerina keuntungen enda la imaksudken guna inanami sisada saja. Sie kerina ertujun eme guna pembangunen Rumah Pertoton. Erkiteken Rumah Pertoton eme simbol gegeh si idatkenna arah Tuhan nari.

Salomo ncidahken maka ia sekalak raja si ngukurken kepentingen rayat si rulo, bangsa Israel. Adi sedekah enda mbue peperangen si ilakoken bapana Daud, emaka tentu berpengaruh i bas "stabilitas" keamanen. Salomo ngidah maka lanai perlu erperang, erkiteken memang Daud bapana ndube nggo naluken bangsa-bangsa i sekelewet Israel. Tapi adi si idah jaman sie eme jaman kalak erperang, maka cara Salomo ngelitken si iakapna perlu man bangsana, tentu patut iergai. Arah sie tentu reh sikapna kegeluhen bangsana. Mbuka lapangen kerja, alu majekken rumah pertoton, bagi sura-sura bapana ndube. Upeti sidatkenna arah bangsa-bangsa si deban nari, ipakena guna kesejahteran rayatna.

Tema PJJnta eme "Ngelitken Siniperluken". Tentu si enda tetap nge jadi perhatianta guna ngukurken kai-kai saja si iperluken i bas kegeluhen enda bagepe ngelitkenca. Erlajar kita arah kai si ilakoken Salomo i bas ia mimpin Israel, ipastikenna kai si jadi "prioritas"na man Israel.

Sekalak si tergelar Heather Quinn lit i bas ia ide. la sekalak penjahit baju, tapi kecelakaan mobil erbanca ia la banci nerusken pendahinna. Alu "kecacaten" si inanamina, ia mulai ngidah maka salah sada perasan frustasi kalak "cacat" eme kesusahen i bas ndatken uis si cocok sue ras kecibal kulana. Emaka ibenakenna me erbahan baju man kalak "cacat" ras mengembangken sada bisnis si tepat.

Kewirausahan teridah i bas ngembangken produk ras jasa si mbaru i bas lingkungen dahin. I bas jaman si meter berubah enda, ras "perekonomian global", arus tetap kita nandai dirinta selaku anak-anak Dibata. Labo terjeng dirinta, tapi pe gereja, lembaga pendidiken, perpolitiken perlu terus mpeturah biak kewirausahan enda.

EVALUASI :
Terjeng ija enggo si lakoken nampati teman ntah sektor si kote?

DISKUSI :

1. Kai akapndu biak-biak si mehuli i bas Salomo si banci si usih i bas paksa genduari?
2. Cara kai nge si bahan guna ngelitken siniperluken kita?

AKSI :
Cuba catatken inovasi ( ide ntah kreativitas si mbaru ) si perlu ilitken i bas kegeluhen.

USULEN LAGU :

1. KEE GBKP No. 254 : 1,3    ( Klik JUDUL KEE UNTUK MELIHAT LIRIK TEKS LAGU )
2. KEE GBKP No. 255 : 1,2,4  ( Klik JUDUL KEE UNTUK MELIHAT LIRIK TEKS LAGU )
3. KEE GBKP No. 343 : 1-3    ( Klik JUDUL KEE UNTUK MELIHAT LIRIK TEKS LAGU )
4. KEE GBKP No. 280 : 1-3    ( Klik JUDUL KEE UNTUK MELIHAT LIRIK TEKS LAGU )

TOPIK PERTOTON SYAFAAT :

1. Notoken gelah jabu kalak Kristen meteh kai saja harus ilitken sue ras keperlun kegeluhen jabu.
2. Notoken gelah reh buena kalak si ngukurken ras ndalanken gelah usahana e berdampak man jelma sinterem.
3. Siturah i bas perpulungen.

Pdt. Andreas Pranata Sembiring Meliala, S.Th.

Share this post