Aras Jadi Namo - Kalak Si Mesera Geluhna Jadi Kalak Bayak ( Bahan PA Permata 21 - 27 Juli 2019 )

Bahan Bimbingan PA Permata 21 - 27 Juli 2019

Nas : Kejadian 50 : 20 - 21

20. Jahat sura-surandu man bangku, tapi enggo isalihken Dibata e jadi si mehuli, gelah arah e banci iselamatken Dibata kesah nterem kalak si nggeluh denga genduari.
21. E maka ola pada sitik pe kam mbiar. Aku pekena-kena kam ras anak-anakndu.” Dage alu kata si melias e, ipetetap Jusup mulihi ukur senina-seninana seh maka malem atena kerina.

Tema : Aras Jadi Namo ( Kalak Simesera Geluhna jadi Kalak Bayak )

Gelah PERMATA GBKP :

1. Ngidah ras nggejapken perbahanen Dibata ibas kesuksesen geluh Jusup
2. Ngusih perbahanen jusup si memiliki hubungen si mejile ras Dibata bage pe ras manusia sue ras nas

Metode: Sarasehan( menghadirkan tokoh sukses di wilayah kamu dan menemukan kunci kesuksesannya )

I. BENA KATA 
Kecibal geluh i doni enda 'kai pe labo gel-gel' ertina i bas ndalani kegeluhen i doni enda tetap lit proses si erbahanca turah perubahen. Proses e banci ulihna ku siterulin kasa si enggo-enggona tapi banci ka reh murdena. Ulih proses e mehuli ntah lang mbelin kel ipengaruhi kuga pengalokenta ras pendalankenta proses si lit. Selaku kalak si erkiniteken, si jadi perayakenna eme kegeluhen si terulin kasa si enggo-enggona. I bas kegeluhenna ia tetap erpengarapen ras erpengendes man Dibata, sabab lit kap kata Dibata "Aku ngenca meteh sura-surangKu nandangi kam, e me gelah kam senang labo gelah cilaka. RencanangKu e me mereken wari si pepagi bagi si iarapkenndun ( Jeremia 29:11 ). Arah PA PERMATA sekali enda, kita erlajar arah kegeluhen Jusup, kuga turi-turin kegeluhen Jusup i proses ras ulihna eme kesangapen.

II. ISI 
Jusup eme anak Jakup ras Rahel, lit 12 kalak seninana ras 1 kalak turangna i bas 4 nande nari ( Lea, Rahel, Bilha ras Silpa ). Ngenan ate Jakup man Jusup asa man kerina anakna si deban, erkiteken Jusup tubuh kenca ia enggo metua. Ibanna baju jubah si mejile man Jusup ( Kej. 37:3 ). Kegeluhen Jusup , proses ras perubahen-perubahen pe terjadi ku bas kegeluhen Jusup. Proses sl terjadi i bas kegeluhen Jusup:

1. Kitik-kitik nari igejapkenna kel kekelengen orangtuana ras megati pe ia ernipi maka arah nipina teridah enterem kalak si mehamat man bana.
2. Senina-seninana ercian ate man bana, ersura-sura pe munuh Jusup seh kedungenna idayaken Jusup sanga mentas perbinaga bangsa Midian, idayakenna Jusup man bangsa Ismael e, ergana dua puluh duit pirak. Ibaba bangsa Ismael me Jusup ku Mesir. 
3. Man oranggtuana Jusup ikataken nggo mate i pan rubi-rubia.
4. Kalak Ismael ndai enggo maba Jusup ku Mesir, jenari idayakenna man  potipar, sekalak pegawai raja. Potipar e me kap kepala pengawal istana TUHAN si ngarak-ngarak Jusup, seh maka sangap ia i bas kerina. pendahinna.
5. Jusup igoda ndehara Potipar gelah ras ia medem tapi Jusup la nggit, seh maka ipalitken si jahat man Jusup. 
6. Jusup jadi tersangka-terdakwa-nara pidana, itamaken ku bas penjara.
7. I bas penjara, TUHAN kap si ngarak-ngarak Jusup dingen ipasu-pasuNa ia. E maka ngena ate penjaga rumah tutupen e man Jusup. 1suruhna Jusup ngurus kerina kalak tutupen si deban, janah iendeskenna man bana kerina tanggung jawab kerna kai si ilakoken i bas rumah tutupen e. Si njaga penjara e lanai perlu mperdiateken kasa kai dahin si iendeskenna ku bas tanggung jawab Jusup. Janah erkiteken TUHAN si ngarak-ngarak Jusup, kasa kai si idahikenna jore kerina i bas penjara.
8. Tambah si e, Jusup pe ngasup nuriken antusen nipi ras enda me dalan-dalanna Jusup jumpa ras raja Mesir. Jusup ngasup nuriken antusen nipi raja Mesir ras mereken serpang pulah.
9. Iangkat ras itangkuhken raja Mesir si Jusup jadi wakilna.
10. I bas kegeluhen Jusup enggo sangap la e erbahanca ia balas dendam man senina-seninana. Jusup tetap encidahken keleng atena, kerina keluargana i babana ku Mesir, seh enggo mate pe bapana nina Jusup "Jahat sura-surandu man bangku, tapi enggo isalihken Dibata e jadi si mehuli, gelah arah e banci iselamatken Dibata kesah nterem kalak si nggeluh denga genduari. E maka ola pada sitik pe kam mbiar. Aku pekena-kena kam ras anak-anakndu." Dage alu kata si melias e, ipetetap Jusup mulihi ukur senina-seninana seh maka malem atena kerina.

I bas ndalani proses geluh, Jusup tetap erkemalangen man Dibata, teridah arah tutus erdahin, erbintuas, bujur perbahanenna, pentar, nehken kekelengan ras la nggit erbalas si jahat alu si jahat tapi alu perbahanen si mehuli. Ulihna eme kemalemen ate man kerinana.

III. PENGKENAINA 
Tema PA PERMATA: 'Aras Jadi Namo' enda sada anding-andingen / Pribahasa i bas kalak. Karo. Aras: dangkal, bagian pinggir dari aliran sungai; Namo: air tenang mbages ras ingan pulung nurung. Megati iandingken ku bas kegeluhen kalak si berubah kecibal geluhna, 'aras jadi namo' ntah. namo jadi aras' ertina kegeluhen kalak si gel-gel susah nggo jadi sangap ntah si gel-gel sangap nggo jadi susah/liah. Arah turi-turin kegeluhen Jusup teridah tuhu-tuhu si dua enda. Adi ia tading ras bapana, tuhu-tuhu sangap ia tapi bas lit sangap e liah ka jadina erkiteken perbahanen senina-seninana. I bas ia liah e erbage-bage perbeben, kesusahen ras kiniseran si nderpa geluh Jusup. La e erbahanca Jusup putus asa, iendekkenna uga gendangna tetap ia terpengendes, ras erkemalangen man Dibata, Dibata tetap masu-masu kegeluhenna seh kedungenna ulihna eme 'aras jadi namo'.

PERMATA GBKP pe tole banci erlajar arah kegeluhen Daud ,Daud si dahinna sekalak permakan, tupung Tuhan nuruh Samuel ku Betlehem ndahi Isai guna milih sekalak anakna jadi raja Israel nggantiken Saul. Tupung pemilihen e Daud ngenca la iatanken orangtuana. Daud erdahm, ermakan i mbal-mbal. Kai si jadi? Tuhan milih Daud, itandai Tuhan kap kalak si erkemalangen man baNa ras kalak si tutus erdahin. Kegeluhen Daud pe aras jadi namo sedekah enda pendahinna ermakan salih jadi raja, sedekah enda tading i mbal-mbal salih jadi i bas istana.

Anak si nguda ula mbiar gagal, kegagalan adalah sukses yang tertunda. Si iperluken prinsip i bas kegeluhen enda eme nggeluh 'optimis' wari si pepagi ulin kap kasa wari enda. Alokenlah proses geluh enda alu mehuli, kai gia dahinta paksa enda dahinkenlah alu tutus, erbintuas ( kerja keras ), disiplin ras i babo si e kerina tetaplah erkemalangen man Dibata. Dibata pasti nehken pasu-pasuna man kalak si erkemalangen man baNa. Labo lit kalak si jore geluhna ( sukses ) reh bage-bage saja, tapi lit proses si man bentasen seh erbahanca taras jadi namo'.

IV. SHARING PENGALAMEN 
Adi lit kalak si iundang ku bas PA enda, ibereken kesempaten man bana lako nuriken pengalamenna seh nggo jadi 'aras jadi namo ( kunci kesuksesenna ) tapi adi la lit iundang, tep-tep PERMATA GBKP nuriken pengalamenna.

V. USULEN LAGU 

1. Jangan Lelah Bekerja Diladangnya Tuhan ( KLIK JUDUL UNTUK MELIHAT LIRIK )
2. KEE GBKP No. 255 "Talenta"
3. KEE GBKP No. 68 "DahinNdu Si Mbelin Tuhan"
4. KEE GBKP No. 381 "Sura-Sura Yesus Bangku"

Pdt Dr. Kalvin Jawak

Share this post