Ngergai Dahin Ras Si Erdahin - Ngaloken Ulih Pemilihen Pertua Diaken, Kursus-Kursus ( Bahan PJJ 30 Juni - 6 Juli 2019 )

Bahan Bimbingen Perpulungen Jabu-Jabu 30 Juni - 6 Juli 2019

Ngergai Dahin Ras Si Erdahin

( Ngaloken Ulih Pemilihen Pertua Diaken, Kursus-Kursus )

Ogen : Kolose 4 : 7 - 14

Kata Pendungi
7. Gelah ietehndu kuga percibalku, ituriken Tikikus me man bandu kerna aku. Seninanta Tikikus enda, kalak tutus i bas dahin Tuhan.
8. Kusuruh ia ndahi kam nuriken kerna percibal kami kerina, gelah meriah iakapndu.
9. Ikut pe ras ia seninanta si Erguna. Ia i bas golongenndu nari janah ia kalak tutus. Kalak enda me nurikenca man bandu kerina si jadi i jenda.
10. Seninanta Aristarkus, temanku i bas penjara, nehken salam man bandu, bage pe Markus, bebere Barnabas. (Enggo ibegindu berita kerna ia, gelah ia ialo-alondu pagi asum ia reh.)
11. Josua pe, si igelari Justus, nehken mejuah-juah man bandu. Kalak enda ngenca teluna kalak Jahudi si enggo tek man Kristus si erdahin ras aku i bas Kinirajan Dibata. Mbelin kal penampatna man bangku.
12. Mejuah-juah nina Epapras. Ia i bas golongenndu nari janah ia enggo jadi si erdahin i bas dahin Kristus Jesus. Rusur kam itotokenna man Dibata alu tutus ate. Ipindokenna man Dibata gelah tetap ukurndu, erpemeteh kam, la monce-once kinitekenndu, bage pe gelah patuh kam i bas si ngena ate Dibata.
13. Kuidah tutus kal atena erdahin man gunandu bage pe man guna kalak si ringan i Laodikea ras i Hierapolis.
14. Lukas, dokter si ikelengi kita ras Demas nehkenmejuah-juah man bandu.

Erpalasken Pustaka si Badia, kerina pendahin i bas kegeluhenta si tep-tep wari eme pendilo Tuhan. Tersurat i bas Kuan-kuanen 14:23,..."Erdahinlah maka kam nggeluh", ertina pendahin si mehuli banci mereken kegeluhen ras kiniulin, man banta ras man kalak si deban. Tapi adi ngadi kita erdahin reh me kemusilen man banta ras geluhta pe banci jadi sinanggel man kalak si deban. I bas Kolose 3:23 ngajuk gelah erdahin alu tutus ( Ind. Segenap hati ) sabab kita erdahin guna Tuhan labo guna manusia. Erdahin ras cara erdahin, eme salah sada bentuk "persembahen" ras kehamaten man Tuhan. La ngarapken pujin i bas manusia nari tapi kai pe silakoken gelah terpuji Tuhan.

Kata pendungi si sisehken Rasul Paulus man perpulungen Kolose asum ia i bas penjara ( ay.18 ), e me guna petetap ukur perpulungen perlebe kerna pendahin i bas kegeluhenna ras teman-temanna. Aminna pe ia i bas penjara tapi la ngadi dahin meritaken Berita si Meriah, erkiteken kuasa Dibata si lit i bas Paulus ras teman-temanna. Mbue tantangen ras kiniseran si nderpa Rasul Paulus ras teman-temanna; nadingken pendahin, nadingken jabu, ibaba ku pengadilen agama, isiksa, ipenjara, seh lit mate pe. Bage me beratna dahin nehken Berita si Meriah, tapi la ngkurangi semangat Rasul Paulus ras teman-temanna guna tetap erberita, mereken pergegeh ras penjemba man perpulungen Kolose.

I bas nehken Berita si Meriah Rasul Paulus labo erdahin sisada tapi lit tim kerja si solid ras ikut ertanggungjawab. Enda me salah sada cara kerja Rasul Paulus i bas ngelai perpulungen Tuhan. Lit sepuluh kalak si isuratken gelarna si la seri status sosialna. Umpamana: Tikikus; kalak Kristen si tutus janah tugas utamana e me si naruhken surat. ( bdk. Kol. 4:7; Ep, 6:21 ); Erguna / Onesimus; sekalak budak si kiam i bas rumah Pilemon enggo jadi kalak si tutus; Aristarkus; sekalak si enggo jadi perberita si meriah si ngelawan penembahen man Dewi Artemis ( Junani ), janah ia ibaba ku pengadilen ( bdk. Perb. 19:29 ); Markus, bebere Barnabas; ia kalak bayak, nggeluh badia ras mbue nampati; Justus; rumahna i Korinti enggo ijadikenna jadi ingan nehken Berita Si Meriah; Epapras; ikataken Paulus ia "teman sada aron" janah pernah ras ipenjara. Tabib Lukas; kalak Junani si enggo ngaloken Jesus tubuh i Antiokia. Demas; teman sada aron Paulus bali ras Lukas ndai tapi kedungenna nadingken pelayanen. Nimpa (15); i bas Laodikea nari, sekalak diberu si beluh rende ras landek. Arkipus (17); ia si erdahin ngurus kuda. Bagenda me erbagena latar belakang kegeluhen, status sosial teman-teman Paulus si nampati ia i bas nehken Berita si Meriah. Perbedan la ngolangi tapi radu mpegegehi ras ngkuhi i bas ndahiken dahin Tuhan.

I bas bulan Januari-Maret 2019, enggo ilitken panitia pemilihen Pertua Diaken periode 2019-2024,pemekaren PJJ adi lit, ras pe ngaturken tata cara pemilihen calon Pertua Diakeni bas PJJ.. Janah i bas bulan April 2019 enda enggo silakoken pemilihen i bas PJJ-ta, Mei 2019 penelitian ras penetapan calon. Minggu si pemena bulan Juni 2019, pemilihen i bas runggun. Minggu peduaken ras peteluken momo kerna ulih i bas runggun ras bulan Juli-Agustus 2019 ngelakoken kursus man kerina Pertua Diaken si enggo terpilih. Tentuna gerejanta enggo me rukur alu mbages guna proses enda, maka patut kel si ergaken alu mehuli, terlebih ngergaken ras ngaloken kerina Pertua Diakenta si enggo terpilih i bas Periode 2019- 2024. Bagi tersurat arah lebe erpalasken Kata Dibata si jadi pengogenta sendah, erbage-bage ka nge latar belakang ras pendahin serayan Tuhan enda. Tapi ije me kebayakenta i bas erdahin, i bas rukur ras i bas erbahan keputusen-keputusen gerejanta ku wari si reh enda. Dahin pelayanen eme tugas utama Pertua Diaken. Lit paksana ia nadingken pendahin ntah pe jabu guna nehken tanggungjabab pelayanen i bas gerejanta. I bas ndahiken dahin e banci ka meling. Si enda kerina labo ngolangi adi enggo si gejabken tuhu-tuhu pasu-pasu ras pendilo Tuhan.

Guna ngkuhi serayan Tuhan i bas ndahiken dahinna, maka perlu ia ngikuti pembekalen / pernbinaan / kursus. Alu reh tambahna bekalta maka reh ngasupna kita ndahiken dahin Tuhan e alu tutus. Situasi jaman si terus berubah, emaka kita pe terus erlajar i bas metode / cara ngelai perpulungen. Enda me si jadi arapenta guna mabai anak-anak Tuhan tetap ernalem man Tuhan i bas kerina perbebenna. Kita meherga i bas pendahinta erkiteken kita ipilih ras iergaken Tuhan ndahiken dahin e. Emaka, pengaloita nandangi pendilo Tuhan si cidahken arah ketutusen ras kesetianta ndahiken dahin e. Tuhan si nampati kita.

EVALUASI :
Enggo me si litken kas diakonia bas tengah-tengah jabunta?

DiSKUSI :

Turikenlah sedekah enda uga kita mediate nandangi serayan Tuhan?
Uga carana kita mediate nandangi pendahin serayan Tuhan si payona ku bas wari-wari si reh enda? Mari sidiskusiken.

AKSI
Arihken bentuk 'mediate' si banci silakoken man serayan Tuhan si lit i bas sektor ntah pe runggunta.

USULEN LAGU :

KEE GBKP No. 181 : 1-3 ( KLIK JUDUL KEE UNTUK MELIHAT LIRIK TEKS )
KEE GBKP No. 68 : 1-2 ( KLIK JUDUL KEE UNTUK MELIHAT LIRIK TEKS )
KEE GBKP No. 86 : 1-3 ( KLIK JUDUL KEE UNTUK MELIHAT LIRIK TEKS )
KEE GBKP No. 183 : 1-4 ( KLIK JUDUL KEE UNTUK MELIHAT LIRIK TEKS )

TOPIK PERTOTON SYAFAAT :

Notoken kerina Pertua Diaken se-GBKP periode 2019-2024, ngergaken dahin si enggo ibereken Tuhan. Dahin e me kap jadi sada kesempaten guna ngelai Tuhan ras doni enda.
Notoken gelah jemaat GBKP tetap mendukung alu ngergaken dahin si enggo idahiken serayan Tuhan.
Si turah i bas perpulungen.

Pdt. Amos R. Ginting, S.Th