HUT GBKP Ras Sehna Berita Si Meriah - Bahan PA Permata 14 - 20 April 2019

"HUT GBKP Ras Sehna Berita Si Meriah" 

Nas : 2 Timotius 2:1-7

Laskar Kristus si tutus
1. Tapi kam, o anakku, lias ate Dibatalah mpegegehi kam, si enggo jadi sikerajangenta erkiteken persadanta ras Kristus Jesus.
2. Kai si enggo ibegindu i bas aku nari i lebe-lebe nterem saksi, endeskenlah man kalak si ertanggung jabab, si ngasup ngajarkenca ka man kalak si deban.
3. Ikutlah kam i bas ngenanami kiniseran jadi laskar Kristus Jesus si tutus.
4. Sekalak laskar si sangana ertugas la icampurina urusen kegeluhen si deban gelah ngena ate komendanna.
5. Sekalak si ikut i bas perlumban labo banci menang adi la kin patuh nandangi peraturen-peraturen si lit i bas perlumban e.
6. Sekalak perjuma si enggo latih erdahin arus ndat bagin si pemena i bas ulih jumana nari.
7. Ukurkenlah kai si kukataken man bandu, sabap ibereken Tuhan man bandu kengasupen ngangka kerina si enda ndai.

Tema : Laskar Kristus

Gelah PERMATA GBKP :

1. ngangkai biak-biak laskar Kristus si nggit ikut muat bagin ibas kiniseranNa erpalasken teks
2. erbahan komitmen gelah ngasup ngalaken erbage-bage tantangen nggeluh bagi Jesus

Metode : Diskusi dan Aksi

I. BENA KATA
Lit sada ungkapen C.S. Lewis ibas buku Mere Christianity nina, "ada banyak hal yang indah yang bisa kamu buat dengan pasir; tapi jangan mencoba untuk membangun sebuah rumah yang indah di atasnya". Ungkapen enda encidahken kerna keindahan doni enda lebih bersifat sementara, sedangken hal-hal si kekal labo banci sipajekken i datas keindahen doni enda. Sebab ugapape kita akan kecewa ras la erpalas nteguh ibas bangunen si idatas pasir. Kita membutuhken sesuatu si mehaga janah la banci masap i tengah doni enda. Rikutken HUT GBKP ras bahan PAnta sendah mari sinehen kerna pendahin perberita Si Meriah si erberita janah ndatken kiniseran seri bagi penderitaan Yesus.

II. ISI 
Surat 2 Timotius si jadi bahan oratenta nuriken kerna pengajaren-pengajaren man Timotius guna mpengasup ia ndahiken dahinna alu tutus. Ibas nas enda icidahken kerna uga kin seharusna kalak si enggo ngaloken Yesus harus megegeh dingen paguh, sebab enggo ibereken pemere (anugerah) guna ngelakoken dahin si enggo i ampeken bana (ay.1-2). Ibas nas enda pe siidah kerna pengajaren Paulus ngandingken pendilo guna muat bagin ibas kiniseran e ibas telu (3) anding-andingen, eme: Laskar Kristus Jesus, si ikut ibas perlumban (Ind=Olahragawan), ras perjuma. (ay 3-7). Teluna anding-andingen enda ituriken Paulus gelah banci jadi contoh si meherga janah banci i aphkasiken ku kegeluhen nyata sebab anding-andingen enda ndeher kel ras konteks kegeluhen Jemaat Efesus mbarenda si ielai Timotius ( Kota Efesus enda salah sada kota si makmur janah jadi pusat pelabuhen, melala percampuren kebudayaan. Kemungkinen Paulus nuriken telu anding-andingen enda guna menjelasken ku kerina aspek masyarakat Efesus. Paulus berkontekstualisasi ku telu aspek kegeluhen, ibas golongen pemerintahen, ibas golongen kalak pentar, janah kalak golongan bawah (Perjuma)). Ibas nuriken Berita Si Meriah haruslah sesuai ras ingan ras cara menyampaikensa segelah siituriken enda banci iangkai janah igejapken sue ras konteksna.

Kesesuaian Berita Si Meriah ras konteksna mari sinehen ibas pelayanen perberita Si Meriah mbarenda. Ibas HUT GBKP si ipersingeti kita, perdalanen Perberita Si Meriah ibas nuriken kata Dibata ku sebelang belang doni enda tuhu-tuhu harus i apresiasi. Lembaga PERMATA GBKP si lit seh asa genduari e kap perbahan Perberita Si Meriah si enggo berjuang seh ku inganta sekalak-sekalak ngasa gundari. Mbarenda perdalanen perberita si meriah guna nuriken kata Dibata sungguh luar biasa. Mari sibegiken lagu "ulih latih simerdang".Sada lagu sinuriken kerna pendahin serayan si arah lebe maba Berita Si Meriah ku sebelang-belang doni enda. Kiniseran si ialamina labo ipebelinkenna, gelah kata Dibata e banci jadi cikepen kerina kalak si tek man Dibata.

Hal si menarik ibas Perberita Si Meriah mbarenda eme kerna perbeben si inanamina jadi sada pemere (Anugerah) ibas Dibata nari. Sebab ibas melalana perbeben siinanamina jadi sada kehormaten man bana ikut muat bagin ibas penderitaan Kristus. Pendahin Perberita si Meriah mbarenda ipandang sebelah mata oleh kalak, sebab pendahin e labo menghasilkan upah ras labo mengangkat status sosial ibas masyarakat. Ibas perbeben e melala kel pemere (anugerah) simungkin la i nehen manusia, tapi sada kesangapen man bana. Melala penolaken, kekurangen dana, iganggu kalak, upahna pe la sebanding ibas pendahinna, gangguan kesehatan, gangguan okultisme ( kuasa-kuasa jahat ), minimna perhatian man bana, kurangna kolaborasi, ras sidebanna. Tapi semakin melala perbeben, semakin melala ia ertoto man Dibata.

Ibas ndalani pelayanen situhuna iperluken biak-biak simehuli guna perdalanen pelayanen pe reh sikapna. Maun perbeben kegeluhen ebahan kalak si tek nandangi Dibata lanai encidahken biak si mehuli i tengah-tengah kegeluhenna. Perbeben jadi hambaten kalak si tek, labo jadi sada peluang/kesempaten guna encidahken kinitekenna guna menang ibas perbeben.Sienda teridah sikap kiniladewasan perpulungen Tuhan. Janah gundari melala pengajaren si salah si ngataken kerna kalak si ipasu-pasu Dibata labo pernah ndarken kiniseran entah pe perbeben. Si ndatken perbeben eme kalak si la ipasu-pasu Dibata.

Kiniseran Yesus ibas perdalanen kayu persilang seh matena eme encidahken solidaritas Yesus man manusia. La lit sada dibata itengah-tengah i doni enda si ngasup guna solider (merasakan yang kita rasakan) guna manusia.

Langa lit sada pe dibata i tengah-tengah doni enda si ngasup encidahken kiniteruken ukurna guna nampati manusia jadi mehuli selain Yesus. Dibata-dibata sideban hanya ngasup menuntut manusia guna menyembah ia. Kerina hanya menutut peraturen-peraturen keagamaan si maun-maun menyengsarakan manusia. Ibas "pencarian iman" kita selaku PERMATA GBKP, Yesus Kristus adalah "jawaban pertama ras terakhir" si banci ingan kita ersembah man baNa saja. Hanya Yesus si layak kita sembah janah ndatken puji-pujin kita.

III. PENGKENAINA 
Sue ras temanta bahan PAnta eme Laskar Kristus, PERMATA GBKP idilo guna ngasup encidahken kegeluhen si sentudu ras peraten Dibata. Laskar Kristus labo ngukurken dirina jine, tapi ngasup ia nampati kalak sideban ibas kerina dampar kegeluhenna.

Ibas tantangen zaman sigundari enda tuhu-tuhu melala icidahken janah ngajuk PERMATA GBKP guna nadingken kinitekenna. Hal si kitik tapi maun la teridah kita eme "budaya instan" si menjamur ku kegeluhen kaum muda gundari. Budaya enda mabai PERMATA GBKP segelah ia mengambil jalan pintas, karena dianggap pantas. Ngelakoken suap karena sienda hal si biasa ibas ngelamar dahin. PERMATA GBKP pe lanai nggit latih. Adina lit perbeben nggeluh melariken diri ku hal-hal negatif, bagi narkoba, seks bebas, ras sidebanna. adi jujur kita, situhuna kita enggo ndauh ibas kai siniarapken Kristus ibas kematenNa jine.

Kiniseran si inanami Yesus ibas Kayu Persilang encidahken kekelengenna si mbages nandangi kita manusia si seharusna ndatken "Murka Allah". Janah ibas minggu enda sipersingeti kerna kiniseran Yesus guna sigejapken ras sihayati kubas pusuh perukurenta. Berita Si Meriah siidatken kita gundari e gratis, tapi tuhu-tuhu meherga ibas pihak simerekensa. Kerina kelemahen-kelemahen kita labo jadi sada alasen guna la ngikutken Kristus jadi LaskarNa. Justru ibas kelemahen-kelemahenta, Kesah Si Badia mpengasup kita ngelakoken si ngena ateNa. Ibas kiniseran si inanami kita, situhuna Dibata erdahin guna maba kiniulin man banta.

PERMATA GBKP iajuk guna ngikutken Kristus ibas kegeluhenna. Amin gia melala perbeben si ngolangi kita, seharusna kita encidahken kegeluhen si taat nandangi Dibata. Ula min kita bagi bindoran si robah-obah warnana, tapi jadilah batu mamak si nteguh si la tergoyahken zaman enda. Selaku PERMATA GBKP kita harus dinamis ras inovatif, tapi ula kita nadingken keuniken Yesus i tengah-tengah kegeluhenta. Melala gundari ajaren-ajaren si bertebaran ibas media social, tapi kita harus ngasup encidahken eksistensi

(keberadaan) PERMATA GBKP si berdampak nandangi doni enda. Ibas kita megenggeng ndalani kiniseran, teklah kita lit masa depan si cerah menanti arah lebenta. Ibas kita taat bagi Kristus enggo taat, lit upah si menanti kita i doni enda janah isurga kari. Seri bagi kisah kegeluhen Yesus doni enda "happy ending" (akhir yang bahagia), kita pe Iit pengarapenta ibas kisah kegeluhenta pe seri bagi Yesus, happy ending.

IV. DISKUSI 

1. Uga nge pengangkanta kerna nas sioge kita ndai ras kinata kegeluhen gundari si menekanken"budaya instan"? Janah kuga adina sibandingken ras pendahin Perberita Si Meriah ibas lagu ullh latih simerdang??
2. Kai nge sibanci silakoken guna encidahken biak kegeluhen selaku Laskar Kristus i tengah-tengah konteks kegeluhenta? 

V. AKSI 
Bahanlah aksi PERMATA GBKP guna merayaken HUT GBKP ras sehna Berita Si Meriah. Contohna: Asa bancina sibahan napak tilas, entah erbahan pertemuan ras Perberita Si Meriah si lit denga ibas inganta sekalak-sekalak. Mbelin kel sibahan "sarasehan" ras ia guna bahan pelajarenta.

VI. USULAN ENDE-ENDEN :

1. Ulih Latih Simerdang (asa bancina lagu enda ilitken janah iputar sope denga silakoken diskusi. Pengurus Mpersiapken lagu enda minggu silewat gelah banci ipelajari. Adina banci lagu enda pe iendeken kerina PERMATA GBKP ibas kebaktin minggu) 
2. KEE GBKP No. 211 ( KLIK JUDUL LAGU UNTUK MELIHAT LIRIK LAGU )
3. KEE GBKP No. 328 ( KLIK JUDUL LAGU UNTUK MELIHAT LIRIK LAGU )
4. KEE GBKP No. 207 ( KLIK JUDUL LAGU UNTUK MELIHAT LIRIK LAGU )
5. KEE GBKP No. 120 ( KLIK JUDUL LAGU UNTUK MELIHAT LIRIK LAGU )

Anak Allah menjadi seorang manusia untuk memampukan manusia menjadi anak-anak Allah. 

C.S. Lewis

Pdt Demar Boliccius Ginting, S.Th

Share this post