Nikapken Diri Guna Ngelai Tuhan, Bahan PA Moria 10 - 16 Maret 2019

Bimbingen PA Moria

Minggu, 10 - 16 Maret 2019

Pemilihen Pertua Ras Diaken

SI MAN OGEN : Roma 16:1-2; 12-15

1. Ateku mpetandaken turangta Pebe man bandu. Ia sekalak diaken i bas perpulungen si lit i Kenkerea.
2. Alokenlah ia i bas gelar Tuhan, bagi arusna ibahan anak-anak Dibata. Sampatilah ia i bas kai pe si iperlukenna i bas kam nari; sabap ia jine enggo nterem kalak isampatina janah aku pe enggo isampatina.
12. Mejuah-juah man Tripena ras Triposa si enggo latih erdahin guna dahin Tuhan, bage pe man Persis si kukelengi si enggo mbue erdahin i bas dahin Tuhan.
13. Mejuah-juah man Rupus kalak pilihen i bas dahin Tuhan bage pe man nandena si perbahanenna man bangku bali ras man anakna jine.
14. Mejuah-juah man Asinkritus, Pelegon, Hermes, Petrobas, Hermas, ras kerina senina-seninanta si sada kiniteken si ras kalak enda.
15. Mejuah-juah man Pilologus ras Julia, man Nerus ras turangna, man Olimpas ras kerina anggota anak-anak Dibata si ras kalak e.

T E M A : NIKAPKEN DIRI GUNA NGELAI TUHAN
T U J U N : Gelah Moria

Meteh maka enterem diberu si enggo ikut ngelai i bas Gereja mula-mula
Nggit ras nikapken diri guna jadi serayan.

METODE PA : Diskusi.

Kata Penaruh
Enggo ka menda seh masa periodesasi Pt / Dk i bas Gerejanta. Penungkunen secara umum jemaat eme: "ise ndia si pilih?" Kerna ise si ipilih, banci jadi lit i je ipengaruhi hubungen kekeluargan bagepe budaya. I bas sie, kita selaku Moria arus bebas memilih ras ipilih. Sabap i bas piga-piga pengalamen, lit nge Moria la nggit ipilih erkiteken: mbue denga nge dilaki si banci, Moria sibuk ngaturken jabu, arihken pe ras keluarga la ia senang nandena ntah pe ndeharana si erdahin ras sidebanna. Tambah sie, diberu pe mekatep kal mpekitik dirina dingen erpengakap ia la ngasup jadi si erdahin (kalah sebelum bertanding ). Erkiteken tantangan si bagenda ndai me maka enterem diberu si la nggit icalonken jadi si erdahin. Ngidah situasi si bagenda rupana maka Moria GBKP mpersingeti kerina Moria gelah nggit min nikapken dirina guna ngelai Tuhan. Ertina i bas kesibukenna, iberekenna min waktuna, talentana ras kengasupenna guna ngelai Tuhan, gelah reh majuna perpulungen e

Mpebagesi Pengangkan Kerna Ogen
Arah bahan PA-nta wari enda kita banci erlajar kerna diberu-diberu si nuria ( jaman Padan Si Mbaru ) pe enggo enterem si jadi si erdahin ( pelayan ). Si enda banci si idah arah salam si ipeseh Paulus nandangi kerina kalak si mereken dirina guna ngelai Tuhan bagepe si nampati si erdahin Tuhan i bas ndahiken dahinna. Sipemena isingetken Paulus eme Pebe. Pebe eme sekalak Kristen si asalna kiniteken si dekah (`kafir) nari erkiteken gelarna e mengandung makna mitologi Junani. Pebe ertina "yang murni" ( bening = meciho). Arah gelarna epe piga-piga teolog ngataken maka ia sekalak budak si enggo imerdekaken. Kepeken ia ersura-sura ku Roma, emaka perlu ia surat keterangen kerna dirina man perpulungen ( rekomendasi ), banci jadi ia nge si maba surat Paulus ku Roma. Pebe eme sekalak serayan i bas perpulungen, i bas bahasa Junani ikataken ia sekalak "diaken" i daerah Kankrea. Pebe eme kalak bayak, melala kaiak isampatina secara materi bagepe mereken rumahna jadi ingan kesilang man teman si sada kiniteken (12:13).

Sidebanna lit ka isingetken gelar Tripena ras Triposa, gelar enda rehna i bas cakap Junani ras latin nari. Duana kata enda erkawiten ras kata kerja i bas cakap Junani si ertina "bersolek, hidup mewah." Adi si ertiken gelarna diberu sidua kalak enda tentu enggo bertolak belakang kal ras kai si ilakokenna eme enggo latih erdahin guna dahin Tuhan. Lit si ngatakenca kalak enda kaka-agi, lit ka si ngatakenca kembar, tapi si pasti maka duana kalak enda si nampati ngelai i bas dahin Tuhan. Tole ituriken eme Persis ( sekalak diberu Persia ), si kin gelar enda biasa kal ipake man sekalak budak diberu bangsa Junani. Nina Paulus, ia melala kal nampati i bas dahin Tuhan emaka arus nge ia ihamati. Tole pe isingetken Paulus sekalak diberu sideban eme nande Rupus, si enggo ngelai Paulus desken sekalak anak. Tambah sie lit denga 2 nari isinget Paulus eme Julia ras turang Nerus; kemungkinen Nerus ras turangna eme anak Julia ras Pilologus. Alu bage enggo tuhu-tuhu mbue diberu si ngelai ras si nampati i bas dahin Tuhan si labo erkiteken la lit dahinna, tapi erkiteken ersuruh ukurna mereken dirina jadi si ngelai i bas dahin Tuhan.

Pengkenaia
Ngidah pelayanen diberu si i datas ndai tentu bangga kita selaku Moria, sabap ndube kecibal pernanden ( diberu ) labo kal iperhitungken. Banci sikataken maka menurut tradisi diberu eme kelas dua, janah labo iakap metunggung diberu jadi pemimpin i bas perpulungen. Bagenda pe situasina, enterem kal nge si idah diberu muat bagin jadi si erdahin bagepe si nampati si erdahin Tuhan tupung sie. Ertina melala talenta ntah pe kelebihen diberu i bas pelajaren i tengah perpulungen. Genduari pe talenta si erbage-bage e, lit i bas kita Moria, si njemba kita reh nggitna mereken diri jadi si erdahin i bas Gerejanta. Situhuna perlu kal si ukurken ukur Tuhan i bas milih kita. Mari si ukuri adi kune i bas dahinta lit kalak si suruh muat bagin guna ngelitken sada barang si siakap ngasup ia ngelitkenca tapi la ia nggit, uga nge ukurta? Erkiteken sie, perlu kal nge kita rukur: banci kin kita la ipilih Dibata jadi si erdahinNa erkiteken kite diberu? Si eteh maka Dibata labo ngenen jenis kelaminta, sekolahta, ekonominta, kesibukenta, kelemahenta ras sidebanna. Dibata ngenen ku bas pusuhta si patuh, adi la lit alasenta Tuhan pasti makeken kita. Emaka arah bahanta enda iajuk kita gelah ngueken dahin adi kin ipilih kita i bas sektorta, tapi tek kita maka Dibata nge pagi si ngaturken kerina kegeluhenta (selaku si erdahinNa). Sebalikna, labo ka kita maksaken sura-suranta gelah ipilih kalak jadi si erdahin, janah kai pe silakoken gelah banci terpilih. Perlu pe si inget, antara diberu ras dilaki labo ersaing, erlumba jadi si erdahin. Ateta kerina i bas inganna, adi iakap perpulungen ras Dibata kita pantas jadi serayan, ula kal tulak. Si mehulina min maka kerina kita enggo ersikap guna ngelai Tuhan, adi la jadi si erdahin ( serayan ) silang-langna kita ikut muat bagin i bas nampati pendahin Gereja Tuhan.

Diskusi:

Mari pegancihen kita nuriken tanggapenta nandangi diberu-diberu si ngelai i bas bahan PA-nta!
Sepengidahta, kai saja nge si jadi kendala (tantangen) man banta si diberu guna jadi serayan? (si enggo pernah jadi serayan banci nuriken pengalamenna).
Kai si banci silakoken gelah Moria ngueken dahin si ibereken man baNa?

Pdt. Liza Servina br Tarigan,STh.

Allah tidak pernah mempertanyakan kemampuan dan

ketidakmampuan kita.

Melainkan kesediaan kita.