Ota, Enggo Sikap Kerina!

Bahan PA Moria GBKP Tanggal 24 Februari 2019 - 02 Maret 2019

Ogen : Lukas 14:15-24

Tema : OTA, ENGGO SIKAP KERINA!

Tujun Gelah Moria :
1) Meteh maka kita iundang ku bas kerja man-man si mbelin
2) Reh mereken ukur alu nikapken diri ku kerja si mbelin

Metode PA : Drama

Erkerja, erpesta meriah ukur megati kal si lakoken. Ntah kita si erkerja nenahken kalak sideban: sangkep nggeluh, teman meriah ntah perpulungen bagepe kita kalak si itenahken i bas tegunta masing-masing. Si enda ngatakenca, la sitik undangen tenah si enggo sialoken, si ngarapken kita reh guna mpetunggungken kerja e. I bas tenah megati kal kita rutang pusuh guna ndahisa. Seh maka i bas buena tenah seh man banta, nina lit terkuan maka banci dungna man i rumah makan, i japa pe lanai jumpa waktu man. I bas jaman enda, perbahan teremna temanta meriah, sangkep geluhta, maka lanai teraturken kita guna ndahi kerja-kerja e, seh pe lit belas-belas 'setor muka' ncidahken ayo nari kita reh. Sabap megati lanai terdahi kita kerina si ertenah e sendalanen ras kesibuken-kesibuken si lit i bas geluhta.

Arah bahan HDS-ta wari enda, ituriken kerna tenah kerja man-man si cukup mereken erti ras makna man banta.

Mpebagesi Pengangkan Kerna Ogen 
Lit piga-piga tema si arus si angkai arah dua perikop sope ogenta kerna Kerja man-man mbelin. Kerna reh ndahi tenah ras ise si arus itenahken i bas kerja man-man e. I bas ayat 15-24 ituriken kerna sada perumpaman si ibahan Jesus guna ngaloi kalak si nggejabken kemalemen ate i bas tenah Dibata. Lit Piga-piga biak si arus si pelajari megati jadi i bas geluhta.

• Si mada kerja, tentuna kalak si erbahan kerja melala persikapenna: ingan, pangan, temue si man tenahenken. Ituriken I bas teks enda maka kerja man-man si mbelin e, luar biasa, banci ikataken kalak hebat maka nterem kalak si itenahkenna alu bage menu i bas kerja man-man e pe enggo isikapken. Mbelin kal sura-sura ras persiapen si mada kerja e erbahan si mehulina man temanna. 
• Juak-juak si patuh dahinna ndalanken perentah si mada kerja, nehken undangen, nikapken kerina si iperluken. Tentuna enda team si mbelin, nterem tapi si isingetken i jenda kerna juak-juak si erlegi. Juak-juak e lawes erlegi kerina kalak si enggo itenahken, nehken pendilo 'ota, enggo sikap kerina'. Kata enda nuriken maka lanai lit si man ukuren, lanai latih, tading reh dingen man. Eme sikerajangen kalak si itenahken, ihagaken, icukupken alu hidangen si mbelin. 
• Si itenahken, kepeken tenah si enggo isehken la ralo, kerina kalak si ijumpai suruh-suruhen enda nuriken kesibukenna. Ertina la ngergaken tenah enda ndai, lit dahin si menurutna lebih penting asangken reh ndahi tenah kerna man-man ndai.
• Kalak si nterem, erkiteken erpenulak kerina kalak si enggo iutamaken ngaloken kesempaten kerja man-man ndai maka ibuka kesempaten man kalak sideban. Kalak si i pasar, kesain kuta, kalak musil, cempang, kalak pangpangen ras kalak pentang. Kalak enda ndatken kesempaten guna ngenanami man-man si mbelin. Kepeken lit denga ingan si kosong, emaka tole idilo kalak si ipasar guna ndemi rumah e. 

Ironis kepe, la sada pe kalak si pemena itenahken ngenanami pangan si enggo isikapken si mada kerja. Kalak si enggo iprioritasken, iatanken reh ku bas kerja ndai nulak kesempaten e erkiteken kesibukenna jine. Bageme Jesus ngaloi kata sibelasken temue ibas perjumpan e. Malem tuhu ate kalak si itenahken Dibata ku kerja i bas kinirajan Dibata tapi malemen ate kalak si reh i bas kerja man e.

Pengkenaina
Kai si jadi paksa e banci jadi gambaren ibas kecibalta genduari enda. Adi isiksiki dingen isungkuni, nggo tuhu labuh kita ngaloken tenah guna reh ku kerja-kerja. Erbage kesibuken, la saja kerna dahinta jine tapi pe erbage kesibuken rikutken persadan, arisen, perpulungen ras sidebanna. Amin bage gia, tuhu arus pentar kita ngaturkenca. Rikutken renungenta enda, iajuk ngidah maka kita enggo itenahken Dibata i bas kerja man-manNa, iatankenNa kita ngaloken tenah e. Ula kal sempat kita nulak, la nikapken. waktunta guna ndahisa. Sabap kerina enggo isikapkenNa. Tuhu, ninta menam lanai bias 24 jam sada wari melala dahin-dahin rikutken ncukupken keperlun geluh, biaya anak sekolah ras adangen sidebanna. Anding-andingen maka si bahan Jesus man kalak si nterem paksa e nuriken maka kerina kalak iatanken Dibata guna ngenanami kiniulinNa, man i bas rumahNa. Si metunggung iakap doni enda kepe erpenulak, tapi Dibata nggo nikapken kerinana si la banci lang arus dem rumah ingan kerja e. Tuhu malem ate kalak ngenanami kai si enggo isikapken Dibata.

Kuga kita? Kita idilo guna ngaloken ras ngenanami si enggo isikapken. Mari ola sempat kai si enggo sikap e, ibereken man kalak sideban. Geluh si kentisik enda kesempaten. Labo kalak si metunggung ras si ngaloken undangen si ndatkenca tapi kalak si nggit reh, hadir ras muat bagin dingen man i bas ingan e.

Drama:
Pustaka Si Badia ioge alu ndramakenca, aturken piga-piga kalak pemeran drama enda. Rikutken situasi panggung. Usahaken drama enda i bas konteks si genduari.
a. Panggung pemena i ja tuan ngerana man juak-juakna, nuruh erlegi temue.
b. Panggung si peduaken juak-juak ndahi si enggo itenahken: si idahi rikutken kesibukenna, si nulak tenah e rikut konteks si genduari (dahin, binaga, juma, gawah-gawah ras sidebanna).
c. Panggung peteluken juak-juak ngelapur dingen ngaloken perentah guna ndilo kalak si i serpang, i kuta.
d. Panggung peempatken enggo nterem kalak i bas rumah e tapi lit denga ingan si kosong.

Peranken dingen diskusiken kuga penggejapenndu kerna PA enda, terpuk si apai nge kita?

Share this post