Tetap Ersembah Man Tuhan Bahan PA Moria 10-16 Mei 2026

Bahan Bimbingen PA Moria
Minggu, 10-16 Mei 2026
Tetap Ersembah Man Tuhan
Wujud Kasih Kita Kepada Allah (Ibadah: secara pribadi; keluarga; masyarakat)

SI MAN OGEN : Kejadin 12:4-9
4. Kenca umur Abram 75 tahun, berkat me ia i Haran nari bagi si isuruh TUHAN. Si Lut pe berkat ras ia.
5. Abram maba ndeharana Sarai, Lut anak seninana, kerina erta-ertana, ras budak-budakna si idatsa sanga ia i Haran, jenari berkat ia ku Kanaan. Kenca seh i Kanaan,
6. isiar-siarna kerina daerah e, janah dungna seh ia ku batang kayu Moreh, e me ingan ersembah i Sikem. (Paksa e kalak Kanaan ngianisa taneh e.)
7. Icidahken TUHAN baNa man Abram, janah nina, “Enda me negeri si Kubereken man si nursurndu pagi.” Jenari, ibahan Abram sada batar-batar ingan persembahen man TUHAN si enggo teridah bana.
8. Kenca bage miser Abram ku Selatan, ku taneh uruk-uruk si lit arah Timur Betel, janah ipajekken Abram kemahna kelang-kelang Betel ras Ai. Betel arah matawari ben, Ai arah matawari pultak. I je pe ibahanna ka batar-batar ingan persembahen, janah isembahna TUHAN.
9. Jenari pindah-pindah ka ia i bas sada ingan ku ingan si deban. Kenca si e lawes ia ku taneh Kanaan bagin Selatan.

TEMA : Tetap Ersembah Man Tuhan

T U J U N : Gelah Moria:
• Meteh ketutusen Abram ersembah man Tuhan.
• Ngumban ketutusen Abram i bas ersembah alu erbahan ibadah keluarga ras paksa teneng.

METODE PA : Diskusi Ras Aksi

Kata Penaruh
Pernah nge isuruh kalak kita ndahiken dahin si mberat kal, tempa-tempa labo kita ngasup ndahikensa? Uga nge responta, si ueken entah si tulak. Abram nehi pendilo Tuhan aminna pe mberat akapna ndalanisa, sabap lenga ietehna ku ja tujunna. I bas Kejadin 12-25 ituriken kerna perdalanen geluh Abram. Mulai i bas asal usulna seh ku bas berita kematenna. Piga-piga kejadin si inanami Abram e me: Kawiten perkade-kadenna ras pindahna keluarga bapana i Ur-Kasdim nari ku Haran (ps.11:27-33). Kejadin si mbelin simaba perubahen i bas geluhna e me pendilo Tuhan nadingken kuta bapana (Kej. 12:1-3). Berita perdalanenna tupung erdalan-dalan i Kanaan (Kej. 12:4-9). Ngungsi ku Mesir ras pengalamen-pengalamenna i Mesir, litna perubaten i bas sierdahin anakna Lut ras sierdahinna, uga cara Abram i bas ndungi perubaten e. Mbue denga kejadin siinanami Abram si lenga isuratken i jenda, saja arah si enggo si isuratken banci siidah kerna kegeluhen sekalak manusia i teruh kuasa ras penemani Dibata.

Mpebagesi Pengangkan Kerna Ogen
Kejadin 12:4-9 enda erkawiten ras Kejadin 12:1-3 e me kerna pendilo Tuhan man Abram ras jabapen Abram nandangi pendilo Tuhan e. Amin lenga ieteh Abram ku ja tujun perdalanenna, iikutkenna saja persuruhen Tuhan. E nuduhkensa Abram patuh man Tuhan. Lanai isungkunina terdauhen entah nimai (menunda) erkiteken perlu denga rukur. Abram erpengendes ras ernalem ku bas penegu-negu Tuhan. Respon nandangi pendilo Tuhan e la terjeng kata-kata entah cakap, tapi perbahanen i bas kegeluhen. Kenca seh i Kanaan, taneh si ipadanken Tuhan e, Abram jadi kalak pertandang i je. Ikelewatina kuta e, iperdiatekenna maka i je ringan suku asli kalak Kanaan rikut kinitekenna e me majuh gana-gana. Kalak Kanaan nggit ngamburken dareh njaga keamanan kuta, ersada kerina arihna mpertahanken kutana. E maka labo mesunah akap Abram ngiani kuta e.
'Ku bereken man kesusurenndui ' e me nina Tuhan tupung ijumpaiNa Abram i bas taneh Kanaan e. Isi kata Tuhan e me padan taneh ras sinursur. Tuhan nehken padan man sekalak guna si enterem. Labo Abram si ngenanamisa si sada tapi sada bangsa. Sinursur Abram labo terjeng ngidah ras natap taneh e tapi jadi sikerajangenna. Tetap kal ukur Abram ngaloken padan Tuhan e sabap icidahken Tuhan diriNa man Abram (Teofani). Erkiteken si e ibahan Abram ingan batar-batar guna ersembah man Tuhan i je, si jadi simbol Abram ngendesken dirina ngikutken kata Tuhan.
Gelarna pe pengungsi, la lit ingan si tetap. Abraham pindah i bas sada ingan ku ingan sideban (nomaden). I Kanaan nari Abram berkat ku Betel janah ipajekkenna kemahna i je. E sada tanda lenga lit rumahna si tetap. I bas ingan e pe ipajekken Abram batar-batar ingan persembahen, janah isembahna Tuhan, ertina erlebuh Abram man Tuhan arah pertotonna, ipilih Abram Tuhan jadi Dibatana I tengah-tengah teremna dibata-dibata sideban isekelewetna. Dungna pindah ka Abram i bas sada ingan ku ingan sideban, reh dauhna ia erdalan janah seh i taneh Kanaan bagin Selatan. Reh dauhna erdalaan ngatakensa reh dauhna Abram nirangken kutana, nirangken kiniteken kutana ras kebayaken orangtuana. Kiniteken ras kepatuhen, ertoto ras ersembah, sabar dingen mengenggem em bukti Abraham ngueken pendilo Tuhan. Perbahanen ras pengarak-Tuhan man Abram erbahansa tetap kal ukur Abram ndalani si iperentahken Tuhan. Pengataken bujurna, lalap ia ersembah man Tuhan.

Pengkenaina
Ibadah (ersembah) e me perjumpan manusia ras Tuhan. I ja Tuhan encidahken dirina man manusia janah manusia merespon alu ersembah dingen erlebuh man Tuhan arah pertoton. Perjumpan ras Tuhan e erbahansa mbue si idah ras sigejapken perbahanen Tuhan si mbelin i bas geluhta. PerbahanenNa e me jadi palasta ngataken bujur dingen ersembah, teridah alu erbahan mesbah doa i bas jabunta. Kita ras anak jabunta lit ibadah bersama alu rutin. Ertoto erlebuh man Tuhan i bas kerina situasi. Banci saja lit rasa kecewa, tempa siakap Tuhan e la setia nehi padanNa man banta, banci saja rugi sabap nadingken erta kebayaken, i je pe tetaplah siikutken Tuhan. I bas kerina situasi geluh jabu ras anak-anakta lalap kita ersembah man Tuhan.
I bas GBKP enda enggo lit rumah singgah HIV AIDS tepatna ibelakang rumah sakit Adam malik Medan. Pelayanenna i je e me nehken pendampingen man Orang Dengan HIV AIDS (ODHA) si sangana ndalani terapi awal ARV, pendampingen man ODHA si itulak keluarga, ras nampati biaya pertambar man ODHA si rehna i bas keluarga musil. Mulai kin litna pelayanen rumah singgah HIV AIDS GBKP seh asa gundari (2025) enggo lit 200 kalak si terinveksi HIV si ndatken pelayanen ras pendampingen. Ras tentuna pelayanen enda labo banci ngadi, sabap si reh ku je tetap nge lit. Mari situduhken aksi ibadahta alu majekken batar-batar persembahen i rumah singgah HIV AIDS GBKP. Radu ras kita erlebuh man Tuhan gelah ODHA banci erdame ras dirina, erdame ras keluarga bage pe masyarakat. Arah pendampingennta, ODHA pe erlebuh man Tuhan si mabai geluhna reh sikapna. Siperdiateken pe keperlunna siteptep wari alu mpepulung pemerenta asa ukurta meriah lako nampati teman temanta si tading i je.

Diskusi Ras Aksi
1. Tupung Abram ngadi i bas sada ingan je ibahanna batar-batar persembahen dingen ersembah man Tuhan. Kai kira-kira alasenna maka Abram majekken batar-batar e?
2. Aksi : Silakokenlah kebaktin keluarga i bas jabunta sekalak sekalak. Siperdiateken rumah singgah HIV/AIDS GBKP. Moria klasis memfasilitasi moria runggun lako erbahan jadwal kunjungan i bas tahun enda.

Pdt. Nurbety Br Ginting