Bahan PJJ 08-14 Februari 2026
Bimbingen PJJ Tanggal 8- 14 Februari 2026(Sasaren Pelayanen GBKP 2026-2030)
Bimbingen PJJ Tanggal 8- 14 Februari 2026
Tema : TERANG PENGIDAH JANAH NANDAI JESUS
Ogen : Lukas 24:13-32
Perdalanen ku Emaus
(Mrk 16:12-13)13. I bas wari e pe lit dua kalak ajar-ajar Jesus lawes ku sada kuta. Gelar kuta e Emaus. Kuta e kira-kira sepuluh sada kilometer i Jerusalem nari.
14. I tengah dalan ercakap-cakap ia duana kerna kerina si enggo jadi e.
15. Asum ia ercakap-cakap, reh me Jesus ndeheri ia dingen erdalan ras.
16. Idah si dua kalak e nge Jesus, tapi la itandaina.
17. Nina Jesus man bana duana, “Kerna kai nge si icakapkenndu janah erdalan e?” Jengang kalak e janah teridah i bas ayona maka ceda atena.
18. Sekalak i bas ia gelarna Keleopas ngaloi man Jesus nina, “Ntah kam kal nge ngenca kalak pertandang i Jerusalem si la meteh kerna kejadin-kejadin i bas wari-wari si perpudi enda?
19. “Kai kin e?” nina Jesus nungkun. Erjabap kalak e, “Kerna kai si enggo jadi man Jesus kalak Nasaret e. IA sekalak nabi janah erkuasa i bas kata ras perbahanen subuk iakap Dibata bage pe kerina manusia.
20. Tapi IA enggo idudurken imam-imam si mbelin ras kalak si erkuasa gelah iukum mate. IA ipakuken ku kayu persilang.
21. Pada hal enggo iarapken kami maka IA me si mbebasken bangsa Israel. Tapi i babo si e kerina sendah me petelu wariken kenca kejadin e.
22. Lit ka pe piga-piga teman kami si diberu si erbahanca kami sengget. Ndai erpagi-pagi si lampas lawes ia ku kuburen,
23. tapi lanai lit i je idapetina mait Jesus. Jenari mulihken ia janah iturikenna maka ia enggo ngidah malekat-malekat. Ikataken malekat-malekat e man bana maka Jesus nggeluh kap.
24. Kenca bage piga-piga kalak teman kami lawes ku kuburen. Idapetina payo kal bagi si ikataken diberu-diberu e. Tapi la idahna Jesus.”
25. Jenari nina Jesus man si dua kalak e, “Bodoh kal kam tuhu dingen mesera kal iakapndu tek nandangi kai si ikataken nabi-nabi.
26. Ma kin Mesias si ipadanken Dibata e arus ngenanami kiniseran e janah alu bage bengket kemulianNa?”
27. Jenari iterangken Jesus man si dua kalak e kai si enggo isuratken i bas Pustaka Si Badia kerna IA, mulai i bas kitap-kitap Musa ras kerina kitap nabi-nabi.
28. Kenca seh kalak e ku kuta si man dahinna, Jesus tempa-tempa nerusken perdalanenNa.
29. Tapi si dua kalak e mindo alu meseksek nina, “I jendalah kita sendah, sabap wari enggo ben nandangi gelap me.” E maka bengket Jesus ku rumah janah tading IA ras kalak ndai.
30. Ibuat Jesus roti, ikatakenNa bujur man Dibata jenari icepik-cepikNa janah iberekenNa man kalak e.
31. Kenca bage minter terang pengidah si dua kalak e janah itandaina Jesus. Tapi i je ka minter lanai iidahna Jesus.
32. Nina si dua kalak e sapih-sapih ia, “Ma malem kal tuhu ateta dingen ergiah-giah ukurta asum IA ngerana ras kita i gedang-gedang dalan dingen iterangkenNa man banta kerna isi Pustaka Si Badia?”
MODEL PJJ: PARTISIPATIF
KATA PERLEBE
Adi situlihken perdalanen geluhta, sada hal si la pernah ngadi i sekelewetta eme perubahen jaman si encidahken erbage tantangen dingen peluang si sekaligus banci ka maba perbeben. Amin gia pemeteh reh ganjangna, teknologi reh canggihna, gereja reh buena, tapi tetap enterem jelma la mejuah-juah geluhna. Melala keluarga ngeluh i bas relasi si mbernge, keterpisahen orang tua ras anak, linon itengah jelma si enterem, kekurangen amin gia er sen. Kegeluhen si bagena seh kal rugina, dingen erbahanca kehadiren gereja jadi lemah i tengah masyarakat. Kai ndia arus si bahan? Guna njabab penungkunen enda, mari ras kita erlajar arah PJJnta wari enda.
ISI
I bas ogenta enda lit piga - piga bentuk perukuren ras proses mpelimbarui perukuren si banci si pelajari guna mpepaguhi kita i bas erkiniteken bage pe mbangun kiniersadan i bas keluarga bage pe i bas perpulungen.
Perukuren Ajar-Ajar
Kenca Jesus mate, ajar-ajar er aru ate. Amin gia ia ercakap-cakap sapih-sapih ia, fokus percakapenna iwarnai kearun ate erkiteken kematen Jesus, tapi lupa ia kerna janji kekeken Tuhan Jesus. Kitab Lukas secara jujur nuduhken maka labo kerina kalak si rusur ras Jesus dingen rusur megi kata Dibata tuhu-tuhu nandai dingen paguh erkiniteken man Tuhan.
Ayat 16 nuduhken; tupung Jesus reh ndeheri dingen erdalan ras ajar-ajar, la itandai ajar-ajarNa Jesus. Labo erkiteken ayo Jesus nggo sambar entah pe reh bentarna, tapi erkiteken perukuren ajar-ajar si serbut ngambati ia nandai Jesus. Ketidakmengertian ras kurangna kiniteken nandangi pengajaren ras padan si ijanjiken Tuhan eme ulu kearun ate. Erkiteken si e, ajar-ajar sibuk engkeriken gegeh ras waktu ngukuri kai si la bagi ukurna, sensitif ras pernembeh. E maka lesus pe sempat iakapna motu ras ketinggalan informasi.
Biasana, ajar-ajar mis megi ras ngidah perbahanen Jesus. E maka kematen Jesus tuhu erbahan perukuren ajar-ajar jadi sontar, erkiteken Jesus lanai ibegi ras idahna langsung bagi biasana. Ajar-ajar si kurang kiniteken terjebak i bas kebiasan ti kur si lepak, eme maksaken cara rukurna i bas memahami pendahin Tuhan Jesus. Wajar saja, geluhna dem alu aru ate.
Perukuren Tuhan Jesus
Arah pengogenta enda banci kita mpelajari piga-piga biak Tuhan Jesus si mpegegehi pusuhta, dingan jadi dalanta mpegegehi keluarga ras teman-temanta:
• Jesus e mediate, meteh perbeben ras kebiaren ajar-ajarNa, e maka reh IA ndahi ajar-ajarNa. Labo ipelepasNa ajar-ajarNa lolah sisada.
• E maka Jesus reh ndahi janah erdalan ras ajar-ajarNa. Amin gia Jesus meteh isi pusuh ajar-ajar, tapi nggit IA nungkun ras megiken keluh-kesah ras pengertina kerna kematen Jesus. Sabab arah nuriken perbebenna, ajar-ajar baci semakin sadar kecibal dirina.
• Jesus nggit tading (bersekutu) i rumah ajar-ajarNa, sebagai wujud kekeluargaan, gelah reh buena dalan mpepaguhi pusuh ras pengertin ajar-ajar.
• I bas meja lakon persadan, iulihi Jesus ngajar dingen ngelai guna mpekeke ingeten ras kiniteken ajar-ajar.
• Jesus tuhu-tuhu sabar i bas ngadep-ngadep kelemahen ajar-ajarNa. Jesus mereken diriNa itandai ajar-ajar alu kelemahen ras keterbatasen ajar-ajar. Erkiteken keleng ateNa, Tuhan Jesus la pernah mperidoi kalak si kurang pengertin, la IA nalahi kalak si paksana kote i bas kiniteken.
Perobahen Diri Ajar-Ajar
I bas pendungi ogenta, ituriken maka:
• Kedungenna, talang mata ajar-ajar, dingen ietehna maka Jesus lit itengah-tengahna; megiken, ngajari, ngelai dingen mpepaguhi ia kerina. Tapi kenca ajar-ajar sadar, ije ka minter lanai idahna Jesus.
• Amin gia Jesus lanai idah ajar-ajar; enggo lit perobahen i bas dirina, eme meriah kal ukurna, tambah pengertinna, ergiah-giah ia meritaken Berita Si Meriah.
Relasi Jesus ras ajar-ajarNa lanai secara fisik, tetapi i bas kiniteken, pemahamen dingen ersada i bas kegeluhen Kristus, eme ersaksi dingen nggeluh bali ras Jesus si reh ku doni enda guna ngelai, ngajari, nemani, ngenanami kiniseran guna keselamaten manusia.
PENGKENAINA
I bas jamanta enda, melala kal kalak Kristen merincuh megiken kata Dibata melalui erbagai cara ras media, merincuh ngidah tanda sengget, dingen melala make pernak-pernik kekristenen alu pengakap maka e jadi simbol kehadiren Jesus i bas geluhna. Tapi adi la kita nggeluh i bas pengertin ras kiniersadan ras Jesus, maka kerina e la mpegegehi kita i bas ngalaken geluh si dem alu perbeben.
Situhuna, banci nge Jesus hadir alu cara si menakjubkan bagi "Super Hero". Tapi Jesus la make cara-cara si bage. Jesus nuduhken diriNa alu kedekaten, berempati, berjalan bersama, megi-megi dingen mereken pengajaren. La lit si istimewa. Bahkan Jesus man roti ras anggur ras ajar-ajarNa, (bagi kegeluhen rutinitas keluarga si saling melayani, peduli ras berbagi).
Persekutuan (Kedekatan, kekeluargaan) ras pengertin si payo; e si terpentingna kal asangken pernah megi Kata Dibata ngenca dingen mbue make simbol-simbol kekristenan.
• Erkiniteken eme ngangkai maka kegeluhen Jesus si reh ku doni enda eme guna nehken peraten Dibata; nggeluh guna manusia, ngenanami kiniseran, mate guna nebusi dosa, keke dingen nangkih ku Surga guna nikapken ingan man manusia.
• Demonstrasi kebangkitan ras tampilan Jesus si mbaru tidak begitu penting. Tuhan Jesus labo make "Mata saja jadi Penggurun" i bas erkiniteken, tapi mbangun pengertin si payo i bas kata Dibata, dingen nggeluh kiniersadan ras Dibata.
• Erkiniteken eme ngantusi ras ersada i bas kegeluhen Kristus (Labo sekedar pernah ngoge kata Dibata ras lit bas ia simbol-simbol kekristenan)
Kiniteken si si paguh ibangun i bas penggertin, kiniersadan i bas kiniseran / pengorbanen Kristus. Alu bage kita pe ikut ipekeke i bas kemulian Kristus. Iblis pernah ncubai kesetian Ayub man Dibata alu ngagui kerina fasilitas rasa nyamanna. Sabab i bas perbeben me kiniteken ras kesetiannta i uji. Perbeben mabai kita ku bas kedalaman kualitas diri (perukuren, pengerana ras perbahanen). Kiniseran megati ipake Tuhan guna membentuk kepribadian anak-anakNa gelah paguh i bas kiniteken.
DISKUSI
1. Kai nge ndia si enggo berobah i bas dirinta ras keluarganta kenca kita bengket ku bas Berita Si Meriah?
2. Kai ndia rongketna maka kata Dibata si enggo mbue sipelajari langa jadi "pengendali" i bas perukuren ras perbahanenta masing-masing?
USULEN ENDE-ENDEN:
1. KEE GBKP No. 321:1,3 ( KLIK UNTUK MELIHAT TEKS LAGU )
2. KEE GBKP No. 361 (i ulihi 3x) ( KLIK UNTUK MELIHAT TEKS LAGU )
3. KEE GBKP No. 343:1- ( KLIK UNTUK MELIHAT TEKS LAGU )
4. KEE GBKP No. 303:1-2 ( KLIK UNTUK MELIHAT TEKS LAGU )
0 Response to "Bahan PJJ 08-14 Februari 2026"
Post a Comment