Bimbingen PA Moria 01-07 Februari 2026

Bahan PA Moria 01-07 Februari 2026
Konfesi Tentang Manusia : Moria / Diberu

SI MAN OGEN : 1 Korinti 11:11-12

11. I bas persadanta ras Tuhan, dilaki perlu nge diberu, janah diberu perlu nge dilaki.
12. Sabap bagi diberu ijadiken i bas dilaki nari, bage ka pe dilaki tubuh i bas diberu nari nge, janah kerinana rehna i bas Dibata nari.

TEMA : Kerinana Reh I Bas Dibata Nari

TUJUN : Gelah Moria:
• Meteh maka dilaki ras diberu, rehna i bas Dibata nari.
• Nuratken biak si engkuhi ras si ergan.

METODE PA : Diskusi ras Sharing

Kata Penaruh
Rasul Paulus melala nulisken surat man. perpulungen si pemena paksa e termasuk man perpulungen Korinti. Tujun suratna guna ngembari, mperdameken dingen mereken palas teologis kerna pengajaren kiniteken i bas kekristenen. I ja pengangkan ras pengajaren kerna Dibata mbelin ipengaruhi budaya ras Taurat Jahudi. Paksa e turah persoalen-persoalen kerna kegeuhen ras kiniteken i bas perpulungen dingen njadiken perpecahen. Perpulungen enda sue ras gelar kotana si tuhu-tuhu maju tapi ipengaruhi kegeluhen si seh kal medonina. I je lit erbage kebudayan suku bangsa jumpa, si mereken ngaruh ku bas cara geluhna. Masyarakat kota e nggeluh ndalanken kebiasan si ndekah e me nembah man dewi cinta Afrodite. Surat Paulus enda hadir i tengah-tengah erbage persoalen si ialaken perpulungen si nggeluh rikutken 'gaya hidup' i tengah kota si mbelin. Budaya-budaya ras tradisi pe ngidah dilaki ras diberu lenga setara, sierbahanca la ia ngergai diberu. Ngidah sienda Paulus nerangisa alu pengajaren teologia si isehkenna dingen mbangun pengangkan si mbaru man perpulungen.

Mpebagesi Pengangkan Kerna Ogen
Umumna surat-surat si siehken Paulus man perpulungen tujunna ngerunggui, ngembari ras mereken dalan pulah nandangi erbage-bage persoalen si lit. Kususna i bas bagin enda kerna kecibal diberu bage pe peruisna i tengah-tengah perpulungen ras masyarakat. Tradisi Jahudi, Junani, Romawi maka diberu si ndarat i rumah nari arus make tutup takal, adi lang iakap diberu si la mehuli langkahna. I bas masyarakat Korinti niakap adi si make tutup takal simbol kiniteruken ukur. Bage pe si la nutupi takalna la ngergaken perbulangen. Bagenda me pengangkan ras pengajaren si lit i bas masyarakat si seh ku bas perpulungen dingen ersembah man Dibata. Tradisi Jahudi, dilaki pe nutup takal paksa ersembah, e maka diberu pe arusna nutupi takalna dikune ersembah man Dibata. Kerina pengangkan si lit mahan diberu lit i bas kuasa dilaki. Paulus erbahan palas si mbaru jadi ikuten kerna teologi 'dilaki ras diberu.' Sabab ietehna dingen i idah i bas kinata kegeluhen teptep wari konsep duana tinepa Dibata enda la setara. Paulus nuriken dilaki ras diberu si kuhen (saling melengkapi), e maka la terpesirang. Dilaki labo ngasup adi la lit diberu, labo lengkap adi si sada bage pe sebalikna. Pustaka Si Badia naksiken kuga Dibata nepa doni ras isina rikut manusia dilaki ras diberu (Kej. 1:26) dingen ngaloken tugas ras tanggung jabap si seri i bas kegeluhen rikut 'ngkuasai ras mpekena-kena' doni enda. Janah i bas kegeluhen teptep wari tangkas kuasa (hegemoni) dilaki ku diberu megegeh kal simahanca la seri 'nanam' geluh si igeluhkenna. Arah si itekanken Paulus guna ndungi erbage persoalen rikut pengangkan si enggo tersuan paguh maka dilaki ras diberu lit i bas hubungen saling ketergantungen, saling melengkapi, alu bage arus siergan. La banci nggeluh si sada, ia mitra dingen setara. Diberu ijadiken i bas dilaki nari dingen dilaki tubuh i bas diberu nari, siapai pe enda rehna i bas Dibata nari.

Pengkenaina
Konfesi GBKP Bab IV poin pertama kerna manusia nina: Manusia adalah ciptaan Allah yang segambar dengan Allah, laki-laki dan perempuan dengan martabat yang sama (Kej. 1:26-27). Manusia diperlengkapl oleh Allah dengan hikmat dan akal budi serta dimahkotai dengan kemuliaan, hormat dan kuasa (Maz. 8:6-7).

Dilaki ras diberu duana tinepa Dibata, radu ras ngaloken kiniulin dingen imahkotai alu kemulian, keharmaten ras kuasa, ertina seri dilaki ras diberu i bas kerina si mehuli si isikapken Dibata man bana. Adi seri nge uluna, ngkai maka la seri pengidah rikut perbahanen man bana? Perbahanen si la seri nandangi dilaki ras diberu nai nari enggo lit janah i bas budaya-budaya masyarakat Timur enggo seh kal belinna termasuk Masyarakat Indonesia kususna kalak Karo. I ja perukuren si bage rupana seh ku bas hak-hak anak diberu termasuk ndehara i bas jabu labo seri. Nai anak-anak si diberu la piga lit kesempatenna sekolah, la ndatken erta tading-tadingen erkiteken la maba marga. I bas jabu diberu tukur-tukur e maka sah saja adi i ulihken ntah pe iduaken. Ia terjeng perawat anak ras perawat erta perbulangenna, la lit hak milikna.

Kenca rusur isosialisasiken pendidiken 'kesadaran Gender' mbelin gunana mpelimbarui pengangkan i bas jabu. I bas pendidiken nggo lit perubahen, enterem anak Diberu sekolah seh ku perguruan tinggi tapi dampar sideban cara pandang masyarakat lit g si lenga payo. Umparnana, kekerasen seksualitas nandangi anak diberu, perdagangan anak ras sidebanna. Enda kerina erkiteken langa seri pengidah kerna dilaki ras diberu selaku tinepa si sederajat. Terrnasuk i bas kegeluhen ernegara, hak-hak politik si megati ibahan jadi pelengkap rikutken kuota si itawarken. Secara konsep ras teori dilaki seri ras diberu tapi i bas kinatana ndauh denga kepe perjuangen si arus ilakoken.Terdauhen, sapih-sapih diberu lit denga konflik si jadi rikutken pandangen kerna dirina si ilabel masyerakat rnahluk si lemah ras emosional. Megati diberu labo ndukung diberu tapi ndabuhken temanna erkiteken kecibalna selaku diberu.

Diskusi

Sikapken kertas/karton si enggo ipotong-potong alu ukuren 6x20 cm. Rupana megersing ras meratah. Buena teptep warna 2x lipat asa si teremna si reh. Double tip si enggo itempel ibalik kertas karton. Kertas koran/plano 2 lembar guna nempel kertas karton.
1. Turiken perbedaan dilaki ras diberu dingen kuga kinatana?
2. Kai-kai saja si banci sibahan guna mbangun ras mpehuliken pengangkan si payo kerna kesetaraan enda?

Pdt. Suenita br. Sinulingga