Berpartisipasi Alu Motivasi Si Mehuli ( Bahan PA Mamre 27 Oktober - 2 November )

Bahan Bimbingen PA Mamre 27 Oktober - 2 November 2019

Ogen : 2 Korintus 8:1-5

Mere alu melumbar
1. O senina-senina, ate kami gelah ietehndu kai si enggo ibahan Dibata arah lias ateNa nandangi perpulungen-perpulungen si i Makedoni enda.
2. Perpulungen-perpulungen e enggo iuji alu mesangat alu kiniseran-kiniseran si inanamina. Tapi keriahenna si simpar dingen kemusilenna si la teralang e erbahanca ia melumbar mere, tempa-tempa ia bayak.
3. Pang aku ngatakenca, maka perpulungen e enggo mere asa ngasupna -- lebih nge pe asa ngasupna -- alu ukurna ersuruh.
4. Alu meseksek ipindokenna man kami gelah ibereken kesempaten man bana guna ikut muat bagin i bas nampati kalak Kristen si i Judea.
5. Labo terjeng si iarapken kami e saja! Si pentingna e me iendeskenna dirina man Tuhan. Jenari, alu peraten Dibata, iendeskenna pe dirina man kami.

Tema : Berpartisipasi Alu Motivasi Si Mehuli

Tujun : GELAH MAMRE

1. Gelah mamre nggejab maka ia dem / bayak alu lias ate Dibata 
2. Makekken kesempaten guna muat bagin i bas dahin dahin gereja

Metode : Diskusi

KATA PENARUH
Ibas kesempaten enda, ateta ercakap ras erlajar terbagesen kerna makna kata partisipasi bage pe makna motivasi. Partisipasi e me keterlibaten sekalak jelma ntahpe kelompok i bas sada-sada hal, umpamana i bas nampati ntah pe nehken keleng ate man kalak si mbutuhken. Janah motivasi e me aspek pendorong entah pe palas perukuren sekalak jelma i bas ia ikut berpartisipasi i bas sada-sada hal. Melala jelma si berpartisipasi alu motivasi si mehuli, tapi la kalah teremna jelma si aktif berpartisipasi tapi motivasina la payo. Tentu mekelek perbedan duana kecibal enda. Banci jadi, kita pe pernah mengalami salah sada kecibal enda entah pe duana. Si jelas, ola min lit kalak berpartisipasi alu motivasi si encedai diri. Erkiteken si e, arah bahan PA-nta sekali enda, radu ras kita erlajar arah perpulungen Makedonia kerna partisipasi ras motivasi si mehuli i bas nampati. Sebab melala kal gunana adi kita berpartisipasi alu motivasi si payo.

URAIAN TEKS / TAFSIREN
Perpulungen Makedonia e me perpulungen si nggeluh i bas kiniseran ras perbeben si mberat si tapukna la jelas. Janah sendalanen ras sie, perpulungen Makedoni pe mengalami kesuliten ekonomi, janah enterem jelama i bas kondisi musil ( 2 Kor. 8:2 ). Si unik e me, amin gia kegeluhenna mesera, perpulungen Makedonia nggit nampati kalak sideban. Lit dua hal si erbahanca perpulungen enda jadi teladan nandangi perpulungen si deban; (1). Perpulungen enda mere erpalasken kengasupenna bahkan lebih asa kengasupenna jine. (2) Perpulungen makedoni enda mesek-sek mindo man Paulus gelah ia banci ikut muat bagi i bas nampati dahin pembarken berita si meriah. Kai nge sierbahanca kalak enda nggit nampati perpulungen sideban arah kekurangenn dingen mesek-sek mindo gelah ikut muat bagin nampati dahin Tuhan?

Paulus naksiken maka perpulungen Makedoni nggeluh i bas kiniteken maka Pengorbanen Jesus Kristus i kayu persilang me si erbahan manusia pulah i bas kuasa dosa ras kematen si ibiari manusia. Ketenangen geluhen labo erkiteken kepentarenna njagai diri, dingen masa depan si mehuli labo erkiteken kengasupenna erbahan persiapen si lebih istimewa asangken kalak sideban. Kiniteken nandangi keleng ate Kristus erbahan perpulungen Makedoni meteruk rukur, dingen nggejabken maka keleng ate ras penjujuri Tuhan me bena-bena kiniulin geluh manusia.

Pengorbanen Jesus e me pondasi si enteguh man perpulungen Makedoni. Bagi Jesus nggeluh la ngukurken ras nelamatken diriNa, perpulungen Makedoni pe termotivasi guna mereken dirina jadi penopang man perpulungen si deban. Bagi Jesus nggit mpeteruk baNa ras mereken diriNa guna keselamaten manusia, perpulungen Makedoni pe nggit mereken diriNa guna kiniulin perpulungen sidebanna. Menarik pe jadi catatenta, maka lalit sitik pe ukur perpulungen Makedoni guna ndatken pujin erkiteken ia lebih berpartisipasi asangken perpulungen sidebanna. Bahkan ia mindo alu meseksek gelah banci ikut muat bagin i bas dahin pembarken berita si meriah. Kerina enda rehna i bas penggejapen maka kiniulin Dibata la banci ngadi i bas dirina saja, tapi perlu kal igejab ras icecap kerina jelma. Kemalemen ate siialokenna Arah Dibata, perlu kal jadi keriahen kerina jelma. Sebab reh teremna jelma nggejab keleng ate Dibata, reh pedasna kejuah-juahen jadi i doni selaku tanda kehadiren kinirajan Dibata.

APLIKASI
I bas acara "reality show" siaren televisi swasta; lit topik: "berbagi kasih - minta tolong". Acara e irancang guna ngidah tingkat kepedulian jelma nampati kalak si mesera baban geluhna. Si unik i bas acara e, e me, teridah maka mesera kal ndanken jelma si nggit muat bagin mere penampat man kalak si butuh bantuan. Melala kal jelma mereken alasen menolak, umpamana: "La man sampaten kalak si bage, banci kari manja". Deba ka nina, bas aku pe langa bias, emaka la mungkin aku mere". rsd. Salah sada si erbahan geluh manusia melawen maka jore, banci jadi erkiteken buen manusia fokus kubas kebiaren nandangi kecibal geluhna, emaka perjuangen manusia pe berkutat sekitar kebiaren ras penyelamaten dirina. Sangat isayangken adi palas perjuangen masa depan eme kebiaren, labo kiniteken ras kekelengen. I bas dampar si deban, lit ka jenis partisipasi si sada paket ras ate mesui. Kemungkinen enda terjadi erkiteken partisipasi si salah rnotivasi. Berpartisipasi alu motivasi si payo maba kiniulin ras keriahen ukur, partisipasi si salah motivasi maba ate mesui man si berpartisipasi, dingen maba kecedan man kalak si deban.

DISKUSI

1. Turiken pengalamen motivasinta i bas barpartisipasi nampati temanta sedekah enda
2. Kai ndia hambatenta nggeluh i bas biak mediate ras berkorban nandangi temanta manusia sedekah enda?
3. Adi biak Tuhanta Jesus eme berkorban guna kiniulin geluh manusia, pengorbanen kai nge ndia si banci sibahan gelah reh buena temanta menjuah-juah?

USULEN ENDE-ENDEN

1. KEE GBKP No. 9: 1,3      ( KLIK JUDUL KEE UNTUK MELIHAT LIRIK )
2. KEE GBKP No. 198: 1,2  ( KLIK JUDUL KEE UNTUK MELIHAT LIRIK )
3. KEE GBKP No. 171: 1,4  ( KLIK JUDUL KEE UNTUK MELIHAT LIRIK )
4. KEE GBKP No. 249: 1,3  ( KLIK JUDUL KEE UNTUK MELIHAT LIRIK )

Pdt Januar Jesuil Eliasta Ginting Munthe HP. 081370152654

Mohon Bantuan Subscribe dan Like Youtube Channel GBKP KM 8. Bujur

Share this post