Turikenlah Si Tuhuna - Iman dan Teknologi Informasi / IT ( Bahan PA Mamre 22 - 28 September 2019 )

Bahan Bimbingen PA Mamre 22 - 28 September 2019

Iman dan Teknologi Informasi / IT

Ogen : Kuan-Kuanen 6:16-19

16-19. Lit pitu perkara si nembeh janah ciga kal ate TUHAN ngenenca e me:
pengenehen mata si megombang,
dilah perguak,
tan si munuh kalak si la ersalah,
ukur si erbahanca sura-sura jahat,
nahe si mejingkat ngelakoken kejahaten,
saksi si la erngadi-ngadi erbual,
dingen kalak si peturah perubaten sapih-sapih temanna.

Tema : Turikenlah Si Tuhuna ( No Hoax )

Tujun : Gelah Mamre

Meteh maka ciga ate Dibata nandangi ranan si la tuhu
Gelah Mamre ngasup makeken teknologi informasi si benar

Metode : Berbagi ( sharing ) pengalamen i bas penggunaan Android, HP rsd.

KATA PENARUH
Salah sada dampak negatif si menggejala akibat kemajuan teknologi informasi / IT e me turahna ( muncul ) berita-berita si la tuhu, si semal igelari 'hoax'. Berita enda ibahan alu erbage tujun ras motivasi. Lit si terjeng kanam-kanam ( iseng ). Contohna, asum kejadin linur ( gempa bumi ), ibahan me berita kerna gempa susulen si lebih dahsyat. Akibatna, nterem kalak mbiar. Penyebar hoak hanya kanam-kanam, man kalak si deban nanggapisa alu serius. Tentu enda mpeturah kebiaren ras merugiken nterem jelma. Lit ka si erbahan berita hoax alu tujun politik ibahanna berita si la tuhu guna membangun pemahamen ( opini ) masyarakat si melemahken lawan politikna, padahal berita si ibahanna e labo tuhu. Selaku Mamre, perbapan si enggo tek man Tuhan jesus, sendah kita erlajar erpalas oratenta uga kita menyikapi keadaan enda. Alu arapen gelah reh pentarna Mamre 'menyikapi' kemajun teknologi informasi.

URAIAN TEKS / TAFSIREN

Kitab Kuan-kuanen itulis kalak si ibereken Dibata kepentaren ras kengasupen mereken pedah-pedah ( nasehat ) Dibata. Kalak si ngoge, megiken ras makekenca, ngaloken ras nambahi kepentaren si rehna i bas Tuhan. Bena-bena kepentaren e me erkemalangen man Tuhan ( bdk. Kua.1:7 ).
Nats PA Mamre nta nuriken maka lit pitu ( 7 ) perkara si nembeh janah ciga ate Dibata. I bas bahasa Indonesia, "Enam perkara yang dibenci Tuhan, bahkan tuiuh perkara yang menjadi kekejian di hati-Nya." Kalimat enda ijiwai sastra Israel kuno ( retorika ) si nggambarken, maka reh buena kejahaten jelma, reh nembehna ate Dibata. 'Nembeh ate Tuhan' meningkat ku 'ciga ateNa' Logikana sederhana saja, adi terjeng nembeh ate, mungkin cukup ipersingetti. Tapi adi enggo ciga ate, seh ku bas pengukumen / perligas. Enda enggo mekatep ibahanNa ras terjadi man bangsa Israel.
Perbahanen-perbahanen ras ciga ate Dibata ituriken i bas ayat 17-19:

a. pengenehen mata "si megombang ( sombong ). Kalak si sombong umum teridah pe arah pengenehen matana. Kerna kesombongen banci sinen i bas Masmur 131:1, Kuan-kuanen 30:13.
b. Dilah perguak. Lain i bas cakap, lain i bas pusuh. E maka lit istilah, "Lain cakap pedempak, lain cakap petundal" ( Bdk. Kua. 12:19; 21: 6; Msm. 109:2 )
c. Tan si munuh kalak si la ersalah ( munuh ). Munuh situhuna enggo melanggar kerina si tersena i bas tuntuten Sepuluh Pedah Dibata (Hukum Taurat).
d. Ukur si erbahan sura-sura jahat. Kejahaten memang ibenaken i bas perukuren nari. I bas perukuren e me kalak erbahan rencana-rencana si jahat ( bdk.Kua.4:23 ).
e. Nahe si mejingkat ngelakoken kejahaten. Rencana-rencana si jahat banc erbuah ( nyata ) alu litna semangat guna ndalankenca / ndahikenca.
f. Saksi si la erngadi-ngadi erbual ( dusta ). Enda mirip i bas poin b i datas, tapi enggo lebih khusus. Perguak e eme si erbual selaku saksi i bas pengadilen. Si mperberat kalak si la ersalah.
g. Kalak si mpeturah perubaten. Kalak si perguak biasana pe mpeturah perubaten ras perjengilen.

Terkait ras tema PA Mamre nta, salah sada si ciga ate Dibata e me nehken kata perguak. Perbahanen si bage mpereh persinget bahken ukumen Dibata.

APLIKASI
Temanta: Turiken Situhuna ( No Hoax )

I bas kuan-kuan Karo lit kalimat si cukup ikenal, "Ula kataken situhuna, tapi katakenlah si teng-tengna." Sekilas kuan-kuanen enda ianggap bijaksana ras ngolangi nembeh ate. Tapi adi sipergermetken, kata-kata enda desken pil ekstasi si kentisik ngenca erbahan kalak erlikas, tapi kedungenna mpeturah ngilas ( perubaten ). E maka selaku MAMRE, perbapan si tek man Tuhan, peraten Tuhan nge si man ikutenken. Palas perbahanen MAMRE eme erkiteken malang man Tuhan. E maka kerina si erbahan nembeh ras ciga ate Tuhan arus ipedauh. Nina Tuhan Jesus, "Katakenlah "Ue" adi tuhu. Janah katakenlah "Lang" adi labo tuhu, Lain asang si e i bas Iblis nari kap rehna" ( Mat. 5:17 ). Peraten Tuhan e me gelah kerina Mamre nuriken berita situhuna ( no hoax ). Saja, i bas nuriken situhu-tuhu e arus alu cara si cerdik ntah pe bijaksana. Nina Jesus, ... cerdik bagi nipe, nuriken "Selaku anak-anak Dibata, kita arus pentar ntah pe bijaksana i bas situhu-tuhu. Alu bage, ulihna e me kiniersadan ras ketentramen man kalak si benar. Adi situriken si la tuhu ntah pe guak, kita labo anak-anak Dibata, tapi anak Iblis ( bdk. Joh. 8:44 ). E maka hati-hati i bas kita erbelas ntah pe erbahan berita. Arah belas-belasta pe banci itandai kalak ise bapanta: iblis ntah Dibata?
Teknologi Informasi ( Informasi Teknologi / IT ) e me pemere Tuhan si melala kal manfaatna man manusia. Salah sada e me jadi alat / wadah i bas kalak nehken pendapat ( opini ) ras pe informasi man kalak si deban. I bas si e me, Mamre selaku anak-anak Tuhan, idilo makeken wadah IT enda guna mereken berita-berita si mereken informasi si bersifat mendidik, nambahi wawasen, persinget, hiburen ras si debanna si erguna man nterem jelma, janah guna kemuliaan Tuhan ( bdk. Kol. 3:17 ).
Mamre pe arus metenget, sabab i bas teknologi informasi pe melala siding ( jerat ) iblis guna mereken pengaruh si jahat ( meracuni ) man manusia. Banci ibahanna kalak ketagihen, terganggu kesehaten fisik ras mental erkiteken pemaken IT si la proporsional ras si debanna. Inget! Tuhan ernembeh ate ras erciga ate man kalak si nalah gunaken pemere si iberekenNa. Mamre idilo njadiken IT mpereh pasu-pasu Tuhan.

DISKUSI

Turiken piga-piga pengalamen, ntah pe berita si lit sekitarta terkait dampak berita si la tuhu!
Erpalas bahan PA Mamre nta, uga nge sikap ras perbahanen Mamre si benar nandangi teknologi informasi?

USULEN ENDE-ENDEN