Keriahen Ukur Eme Tambar - Hidup Sehat ( Fisik, Psikis, Ras Kiniteken ) ( Bahan PA Moria 22 - 28 September 2019 )

Bahan Bimbingen PA Moria 22 - 28 September 2019

Hidup Sehat ( Fisik, Psikis, Ras Kiniteken )

SI MAN OGEN :

Kuan-kuanen 17:22
22. Keriahen desken tambar si mereken kejuah-juahen,
adi ukur serbut erbahanca daging kertang tading tulan.

Lukas 5:17-26
Ipepalem Jesus sekalak pangpangen
(Mat. 9:1-8; Mrk. 2:1-12)
17. I bas sada wari sanga Jesus ngajar, lit me i je piga-piga kalak Parisi ras guru-guru agama kundul megiken IA. Kalak enda ndai reh i bas tep-tep kuta i Galilea ras Judea nari, bage pe i Jerusalem nari. Kuasa Tuhan lit i bas Jesus guna pepalem kalak si sakit.
18. Asum si e reh piga-piga kalak si ngelanja sekalak si pangpangen i bas ingan medem. Ibabana ku bas rumah, ku lebe-lebe Jesus.
19. Perbahan nterem kal jelma i rumah, e maka la lit dalanna mabasa ku bas. E maka inangkihna rumah e, ibukana tarumna, janah arah e itantanna kalak si pangpangen ndai ras ingan medemna ku tengah-tengah jelma si nterem pas i lebe-lebe Jesus.
20. Kenca idah Jesus maka tek kal kalak e, e maka nina man kalak si pangpangen e, “O senina, dosandu enggo ialemi.”
21. Guru-guru agama ras kalak Parisi mulai sisungkun-sungkunen, nina, “Ise kin IA maka bagenda kal pengeranaNa ngelawan Dibata? La kap ise pe ngasup ngalemi dosa seakatan Dibata!”
22. Ieteh Jesus kai si lit i bas ukur kalak enda ndai, e maka nina man kalak e, “Kai nge si lit i bas ukurndu e?
23. Apai kin sukahen, ‘Dosandu enggo ialemi,’ asa ngataken, ‘Kekeken, erdalanken!’?
24. Genduari Kucidahken man bandu maka lit nge kuasa i bas Anak Manusia si isuruh Dibata guna ngalemi dosa manusia i doni enda.” E maka nina Jesus man kalak si pangpangen e, “Kukataken man bandu: Kekeken, angkat ingan medemndu, dingen mulihlah ku rumahndu.”
25. Minter keke si pangpangen ndai i lebe-lebe jelma si nterem, iangkatna ingan medemna, jenari mulih ia ku rumah janah ipujina Dibata.

26. Mamang kal ate kalak si nterem, alu dem kebiaren ipujina Dibata nina, “I bas wari enda enggo idah kami kejadin si luar biasa.”

TEMA : KERIAHEN UKUR EME TAMBAR

TUJUN : Gelah Moria:

Ngangkai maka kecibal perukuren ras kiniteken mabai ku kesehaten kula
Ngasup encidahken keriahen ukur ibas sikugapana pe.

METODE PA : Sharing

Kata Penaruh.
Enggo me jaminen adi daging mbestang, mbur ras mejile maka sekalak jelma pasti sehat? Tentu lang. Penelitin encidahken maka 75-85% penakit turah erdandanken gangguan psikis ( perukuren ). Selebihna erkiteken faktor sideban, mungkin perban pola hidup entah faktor genetik, kuman ras virus. Jaman gundari, melala si idah kasus penakit psikosomatis eme penakit fisik / kula si terjadi erkiteken beban perukuren / psikis. Kalak si kena psikosomatis, igejapna lit gejala-gejala penakit i bas kulana umpamana tempa-tempa jantungna terganggu, entah mesui rusur takalna, entah lit gangguan i bas beltekna entah pe gangguan kulitna ( gatal-gatal entah eksim ) ras sidebanna. Tupung iperiksa secara medis labo ijumpai penakitna. Kenca isiksiki penakit e turah erkiteken beban perukuren.

Dibata njadiken manusia eme: kula ( tubuh ) tendi ( jiwa ), ukur ( fikiran ) ras sura-sura ( kehendak ). Si lebih sederhana biasa sibagi dua bagin fisik ras psikis. Kerina bagin-bagin enda la banci ipisah-pisahken, erkiteken si kawiten sada ras sidebanna lit kebutuhenna si arus ipenuhi. Adi kebutuhen sada bagin terganggu, kerina bagin sidebanna pe ikut terganggu. Umpamana kebutuhen kula / fisik la terpenuhi dungna sakit, adi sakit kulanta ukur ras tendi pe ikut sakit. Sebalikna pe adi jiwanta sakit banci mabai kulanta pe ikut sakit. Bagi nina kuan-kuan: "Dalam tubuh yang sehat terdapat jiwa yang sehat dan dalam jiwa yang sehat terdapat tubuh yang sehat."

Mpebagesi Pengangkan Kerna Ogen
Keriahen desken tambar si mereken kejuah-juahen, adi ukur serbut erbahanca daging kertang tading tulan. Kesehaten sekalak jelma mbelin ipengaruhi perukurenna. Penulis kitab Kuan-kuanen ngajari kita gelah pentar, tetap meriah. Keriahen ukur turah labo erkiteken kita dat rejeki, anak-anak bagi ukur kerina, seh bagi sinisura, tapi keriahen ukur si turah erkiteken perukuren si mehuli ras ngelakoken si mehuli. Keriahen e desken `tambar' ( Ibrani: gehah ) si ertina penampat si erbahanca sehat ras madani. Keriahen ukur la saja terjeng njagai kulanta gelah tetap sehat tapi pe jadi tambar ( terapi ) i bas proses pemulihen kesehaten. Keriahen ukur pe mbelin ngaruhna ku bas ayo. Kalak si meriah ukurna siang ayona, terang ras teneng ayona. Arah keriahen ukur mahan bana sekalak jelma ngasup ngelawan serangen pinakit, pikiren ras erpengaruh kal ku bas kondisi fisik si megegeh ras mpegedang umur.

Sebalikna kalak si serbut perukurenna, berjut ayona ( Kuan-kuanen 15:13 ), daging kertang tading tulan. Si lit epe la ernanam, si mejile e pe lanai ternikmatisa, la meriah iakapna nggeluh sabap geluhna dem alu aru ate ras kebiaren. Perukuren si serbut melemahken saraf, daya tahan kula ( immune ) lemah seh maka melukah kena penakit.

Injil Lukas 5:17-26 nuriken kerna sekalak si enggo ndekah pangpangen ibaba teman-temanna ku lebe-lebe Jesus. Jesus mpepalem kalak si pangpangen, pemena alu ngalemi dosana kenca bage isuruhNa si pangpangen e keke ras erdalan. Lit pemahamen i bas kalak Jahudi maka penakit si jadi i bas sekalak jelma eme erkiteken dosana entah dosa orangtuana. Adi sekalak jelma sakit e berarti erkiteken lit dosana entah pe dosa orang tuana ( band. Pemikiren ajar-ajar Jesus Joh. 9:2 ). Pemahamen enda lit perpayona, aminna pe labo kerina penakit uluna i bas dosa nari. Kesalahen kalak Parisi eme ngataken maka kerina penakit turah erkiteken dosa, perukuren si bage mpeturah penghakimen ras diskriminasi man kalak si sakit. Padahal labo kerina penakit uluna i bas dosa nari. Umpamana, kitab Job encidahken maka kiniseran ras penakit Job labo erkiteken dosana. I bas kasus enda Jesus ngidah maka akar penakit kalak si pangpangen enda erkiteken dosa, emaka perlu pengalemi dosa. IpepalemNa kalak si pangpangen e, alu ngataken: "teman, dosandu enggo ialemi". Jesus la nggargari kai dosa si ibahan kalak si pangpangen enda. IberekenNa pengalemi dosa sabap eme si iperlukenna. Pengakun Jesus maka IA si ngalemi dosa kalak si sakit e, mpeturah nembeh ate kalak Parisi. Iakapna Jesus enggo ngelawan Dibata, sabap Dibata ngenca si ngasup ngalemi dosa manusia. La lit dibata sideban si ngasup ngalemi dosa, selain Dibata i bas Jesus Kristus ( Mikha 7:18 ). Arah tanda sengget enda ipetangkas Jesus diriNa selaku anak Dibata si erkuasa nebusi dosa manusia. Tapi kalak Farisi la nandai Jesus selaku anak Dibata. Kenca ngalemi dosana, nina Jesus: kekeken, angkat tilamndu ras mulihla. Emaka i bas muzijat penyembuhen e, sipemena ilakoken Jesus ngalemi dosana kenca bage nuruh si sakit e keke ngangkat tilamna.

Pengkenaina.
Arah bahan PA-nta enda banci si idah uga hubungen keriahen ukur ras kesehaten bagepe hubungen kesehaten pertendin / kiniteken ras kesehaten kula. Kalak si sehat kiniteken ietehna maka keleng ate Tuhan belinen asangken dosana seh maka lanai ia irimrim rasa bersalah, la lit perukuren si serbut, merawa, segat ate, relem elem. Kalak si sehat pertendinna ngasup ngataken bujur man Dibata i bas sikugapana pe, cukup entah la cukup, bagi ukur entah la bagi ukur, uga pengakap ras cakap kalak kerna kita. Keriahen situhu-tuhu reh i bas ukur si dem alu pengataken bujur, sabap si eteh Keleng ate Tuhan kap si njamini geluhta.

Ilmu kesehaten pe ngataken tupung kita ermeriah ukur, dagingta mpedarat hormon endorvin si erbahanca system kekebalen tubuhta meningkat, si erbahanca la menukah latih. Tupung kita tawa entah ermeriah ukur, fungsi kelenjar ras peredaren dareh reh ulina emaka metabolisme tubuhta pe reh ulina. Pendapat i bas ilmu kesehatan sejajar ras kai si ikataken Pustaka Si Badia meriah ukur eme tambar. Gundari lit ka ikembangken metode penyembuhen alu terapi tertawa. Arah terapi enda iarapken kalak si sakit banci madan entah urak penakitna. Kalak si sakit irangsang gelah banci ermeriah ukur ras tawa. Emaka enggo ka lit 'club tertawa'. I bas club enda pulung kalak si mesera kal tawa entah la sempat tawa perban melala dahin, i je ibahan uga gelah banci tawa minimal 30 menit / wari. Jadi pelajaren ka nge man banta gelah kepulungenta selaku perpulungen jadi inganta tawa ermeriah ukur, labo ingan rubat, si alo-alon, entah pe si cian-cianen.

Sharing Pengalamen.
Moria ibagi ku bas piga-piga kelompok, 3-5 sada kelompok gelah banci nuriken pengalamenna.

Turiken pengalemenndu entah pe pengalamen kalak si pernah ibegindu, maka perukuren si serbut / gulut kiniteken si kote erbahanca kam sakit? Kai pelajaren si idatndu arah pengalamen e nari.
Rencanaken ras lakoken, kai saja si banci si bahan gelah banci sehat kita subuk i bas kula, ukur ras kinitekenta.

Pdt. Sariyani Barus, M. Th

Mohon Bantuan Subscribe dan Like Youtube Channel GBKP KM 8. Bujur