Pindolah Man Tuhan - Entrepreneurship: Okultisme ( Bahan PJJ 22 - 28 September 2019 )

Bahan Bimbingen Perpulungen Jabu - Jabu 22 - 28 September 2019

Pindolah Man Tuhan

( Entrepreneurship : Okultisme )

Ogen : Sakaria 10 : 1 - 3

TUHAN erpadan mereken kepulahen
1. Pindolah udan man TUHAN tupung paksa merdang. Sabap TUHAN kap si mahanca embun erkilap, dingen Ia si pesusursa udan, maka sinuan-sinuan meratah i juma man kerina manusia. 2. Isungkuni kalak berhala-berhala ras guru pertendung, tapi jabap si idatca e me kata guak dingen la tuhu. Deba iturikenna antusen nipi, tapi si e mabai kam papak ngenca; pengapul si iberekenna la lit gunana. E maka bangsa e mampa-mampa desken biri-biri si papak. Ia ndat kiniseran erkite-kiteken la lit peminpinna.
3. Nina TUHAN, “Nembeh ateKu man bangsa si deban si merentah bangsangKu. E maka Kuukum me ia. Aku kap empuna kalak Juda, e maka Aku, TUHAN si Mada Kuasa, ngarak-ngaraksa. Ia kap kuda perangKu si me gegeh.

Pindolah! Sada kata sibentukna nuruh gelah kita mindo. Erkiteken si e perlu tangkas alamat ku ja entah ku ise kita mindo, kai si man pindon ras kai perluna si ipindo kita e. Adi lenga jelas alamat inganta mindo ras kai si man pindon tentu latih siakap sebab labo tersehi kai si ipindo kita e. Bahan renungenta sekali enda mabai kita gelah tetap mindo man Tuhan kerna kai pe siiperluken bas kegeluhen enda, ikut pe kerna pendahin si teptep wari. Si pindo gelah Tuhan ikut erdahin i bas kita ndalani kegeluhen. Jadi jelas alamat inganta mindo.

Pengajuk Sakaria maka perlu mindo man Tuhan. Sabab Tuhan ermeriah ukur adi bangsaNa mindo man baNa. Tupung manusia mindo man Tuhan teridah kal ikatan batin si ndeher i bas manusia ras Tuhan. Ras tupung manusia e mindo encidahken maka manusia terbatas gegeh kengasupenna ngaturken kegeluhenna. Si ipindo bangsa Tuhan paksa si e eme udan tupung paksa merdang, guna peturah sinuan-sinuan. Adi la lit lau la lit sinuan-sinuan, la lit man peranin, la lit siman panganen, emaka reh me musim kelihen, jadi me kematen. Sieteh maka daerah Timur Tengah entah pe wilayah Israel wilayah gurun pasir si melas, i je jarang reh udan siiperluken sinuan-sinuan e. Erkiteken si e pindo udan man Tuhan, labo man Baal, entah pawang udan. I bas kitab 1 Raja-raja 18:22-46 ikataken maka pernah perlego i Israel 3,5 tahun, maka ipindoken Nabi Elia apai gegehen nabi Baal 450 kalak asangken sekalak nabi Tuhan eme Elia mindo udan man Dibata si isembah. Tereteh maka lalit kengasupen nabi Baal e mpereh udan, tapi Dibata encidahken kuasaNa erkelangken nabi Elia reh udan meder i Israel.

Kiniteken bangsa Juda paksa e surut, sabab imam-imam lanai jadi usihen ras pe kiniperbegun nini-ninina leket denga bas pusuhna (Sak. 1:4). Enda me erbahanca ndatken kiniseran. I bas paksa si lepas ndekah ia erteman ras bangsa si la nandai Dibata. Ulihna kiniteken bangsa Juda salih nembah ku Baal ras nggit nungkuni guru pertendung alu ngaloken jabap si labo tuhu, si mbabai bangsa Tuhan jadi papak. Tuhan la ermeriah ukur erkiteken bangsaNa la nembah baNa, jenari mesui atena kerina iteruh pemerentahen bangsa si deban. Nembeh ate Dibata adi kalak si deban si merentah bangsaNa, emaka reh Tuhan ngukumsa.

Ndilo wari udan ( erdogal-dogal, ersimbu, erlau-lau, sicocon ) semal denga ilakoken kalak Karo i bas daerah tertentu. Di kune ndekah wari perlego, maka ersada arih anak kuta ikut pe ije pemerentah setempat, maun warga gereja pe ikut. Isirami lau simbue-mbuena man ise saja si mentas, ngelakoken perbahanen si mereha ( pantang ), lanai lit sihangken. Bage me rikutken kiniteken kalak Karo i bas agama pemena. Kerina enda taki pacik iblis man anak anak Dibata.

Curak kiniperbegun si mbue i bas paksa enda tempa la salah rikutken kinitekenta. Sabab perkakas si ipake guru si baso pe lanai si man kebiarenken umpamana uis dagangen, ntah lau pangir. Siipakena maun-maun Pustaka si Badia seh maka banci kita tek tempa e i bas Dibata nari. Isuruhna ka maka ertoto Iebe rikutken kiniteken si reh nungkuni guru si baso e. Ikatakenna maka Dibata nge si mere bana kengasupen guna nampati (Perb. 8:9-11).

Gegeh iblis naluken kiniteken manusia lit, tapi Dibata ngasup naluken gegeh iblis e, erbahanca lanai ia ngasup ngkuasai manusia si lit i bas kuasa Dibata. Enggo sieteh maka Kuasa Dibata gegehen asangken kerina kuasa-kuasa si nasa lit i doni enda ( 1 Joh. 4:4 ). Emaka endesken dirinta man Tuhan, lawan iblis e, emaka kiam iblis e i bas kita nari (Jak. 4:7). Kuasa Dibata mereken keterkelinen rasa lalap.

EVALUASI :
Kuga perencanan ceramah kerna 'Etika Kerja', enggo idatken jadwal ras nara sumberna?

DISKUSI
Praktek-praktek 'okultisme' si kuga nge curakna si idah kita lit paksa enda?
Kai-kai saja si perlu silakoken gelah ola kita ndabuh ku bas taki pacik iblis i bas ndatken rejeki?

AKSI
Adi lit i bas kita si ersukuten kempak praktek-praktek okultisme (kuasa kegelapen), si pebetehken man runggun gereja segelah ilakoken pelayanen.

USULEN LAGU