Ku Kelengi Kam Uga Litna! - Oikumene ( Bahan PA Permata 15 - 21 September 2019 )

Bahan PA Permata 15 - 21 September 2019

"Oikumene"

Nas : Lukas 6:31-33

Tema : Ku Kelengi Kam Uga Litna!

Gelah PERMATA GBKP :

Ngasup nuriken nilai-nilai kiniersadan geluh ( kiniulin ras kekelengen ) ibas jelma sinterem erpalasken isi nas
Ngasup ngergaken kecibal kalak sideban ras ncidahken biak ngkelengi man jelma sinterem

Metode : Games ras Aksi

I. BENA KATA
Lit piga-piga tema si iakap penulis kitab Lukas penting isuratken ibas kitab enda eme kerna pertoton, Kesah Si Badia, ras pengalemi dosa idur Dibata nari. Kata Dibata sijadi bahan renungenta sendah, eme bagin ibas tema besar kerna pengalemi dosa. Ibas paksa Jesus ndahiken pendahinNa i tengah-tengah jelma si nterem i Galilea, ipersingetiNa jelma si nterem gelah ngasup "ngkelengi imbang". Dasar pemikiren perentah enda eme, Kristus reh ku doni enda guna mperdameken manusia ras Dibata. Ibas perdamen e, teridah uga Dibata tetap ncidahken keleng ateNa man manusia amin gia melala dosa siilakokenna ibas geluhna. Selaku kalak si enggo iperdameken ras Dibata, maka kita pe patut ncidahken biak erdame ras engkelengi bagi si enggo ilakoken Dibata.

II. ISI
Ngkelengi eme perentah ntahpe hukum pematang subuk ibas Padan si Ndekah bagepe Padan si Mbaru. Ibas Padan si Ndekah, pemikiren enda isuratken ibas Ulangen 5:6-21. Hukum 1-4, ngerana kerna hubungen manusia ras Dibata si merentahken manusia gelah tetap ngkelengi Dibata sedangken Hukum 5-10, ngerana kerna hubungen manusia ras manusia si merentahken gelah manusia tetap ngkelengi temanna manusia si deban. Ibas Padan si Mbaru, pemikiren enda banci si idah ibas kitab Matius 22:37-39 "Erjabap Jesus, "kelengilah Tuhan Dibatandu asa ukurndu, asa tendindu, dingen asa gegehndu lit Enda me perentah si mbelinna dingen si pentingna. Si peduaken bali ras si ndai e me, kelengilah temanndu manusia bagi kam ngkelengi dirindu". Memang Jesus lanai ngerana kerna bentuk-bentuk hukum bagi si isuratken ibas Padan si Ndekah tapi Ia tetap ngangkatken esensi bentuk-bentuk hukum alu perentah ngkelengi Dibata ras ngkelengi teman manusia. Arah enda banci si idah maka subuk ibas Padan si Ndekah bagepe Padan si Mbaru, ngkelengi eme sada perentah sicukup penting.

Ngkelengi eme tanggung jawab ntahpe kewajiben si arus ilakoken kalak Kristen ibas kegeluhenna. Dasar tanggung jawab ntah pe kewajiben e eme Kristus enggo ngaloken dingen ngkelengi manusia uga litna. Dibata la pernah perimbangNa manusia ibas kerina situasi ras kondisina tapi sebalikna, Dibata ngukurken cara guna mpesikap hubungen ras manusia eme alu nuruh AnakNa Jesus Kristus mate i kayu persilang. Enda me perentah si ipeseh Jesus erpalasken kitab Lukas 6:31-33.

I bas ayat 31, tangkas teridah maka sifat kalak Kristen labo "nimai" dalam arti menunggu tindaken / perlakuan kalak si deban ( objek ), tapi harus bergerak sebagai pelaku ( subjek ). Ertina maka kalak Kristen la harus ikelengi lebe maka ngasup ngkelengi jelma sideban ( bnd. Matius 7:12 ), tapi erlumba ntahpe si lebe-leben guna ncidahken kekelengen kempak jelma sideban.

Ayat 32-33, kekelengen si rehna ibas Dibata nari sifatna universal ertina terbuka man kerina jelma. Ibas konteks si bagenda, kita ipake Dibata jadi alatNa guna mpetangkas keleng ateNa e man kerina jelma. Emaka sukat-sukat guna ngkelengi e arusna ipake sukat-sukat si ibahan Dibata labo sukat-sukat manusia. Sebab sukat-sukat si ibahan manusia erbahansa la ia ngasup ngkelengi kalak si la engkelengi ia. Ayat enda pe sekaligus jadi kritik man kalak Farisi bagepe golongen kalak Jahudi si deban si menganggap maka ia me golongen si benarna janah iperimbangna pe kalak si la seri ras ia. Enda banci si idah ibas larangen guna bengket ku bas rumah kalak non-Jahudi bage larangen guna ergaul ras kalak enda. Sikap enda mempertegas maka kekelengen ibas konsep kalak enda hanya terbatas man golongenna saja. Ayat enda eme sada pengajuk gelah PERMATA GBKP tuhu-tuhu ngasup ncidahken biak "kekelengen tanpa syarat" eme alu ngkelengi temanta manusia uga litna sebab bekas tinepa Dibata kap ia janah tuhu-tuhu meherga kerina i lebe-lebe Dibata.

III. PENGKENAINA
Arus si sadari maka la kap lit manusia si serta. Kerina lit kelebihen ras kekurangenna. Ibas kekurangenta e, temanta si deban si ngelengkapisa janah ibas kekurangenna e kita hadir guna ngelengkapi ia. Cara pandang enda tentu mabai kita guna ngasup ngaloken manusia si deban ibas kerina situasi ras kondisina. Kita iajari gelah lanai nuntut kalak si deban gelah seri ras kita tapi erlajar guna ngaloken dingen ngkelengi ia uga litna.

Bahan enda pe sekaligus pengajuk man PERMATA GBKP gelah ngkelengi labo erkiteken lit motif-motif tertentu si menguntungken secara pribadi man banta. Kita iajuk guna melampaui bentuk kekelengen Eros, Storge, Filia janah seh kubas bentuk kekelengen Agape eme kekelengen si la menuntut balas ras syarat.

Si perpudina, bahan enda pe jadi perenungen pribadi man banta maka kekelengen e labo hanya sebatas konsep pemikiren tapi kekelengen eme perbahanen ntah aksi nyata ibas kegeluhen. Labo tuhu adi sikataken keleng ateta Dibata si la pernah si idah adi la kita nggit ngkelengi manusia si banci si idah ras banci si sampati. Kekelengennta man manusia si idah kita eme bentuk nyata kekelengenta man Dibata si la idah matata.

IV. GAMES RAS AKSI
Masing-masing anggota PERMATA GBKP nikapken sada kertas ras sada pulpen. Suratken gelarndu ibas kerta si lit ibas kam. Dung e, lipat kertas e janah masukken kubas sada kotak ntah tas si enggo isikapken. Kenca kerina kertas e ipepulung ibas kotak ntah tas, masing-masing anggota PERMATA GBKP muat kertas e secara acak. Buka kertas e janah pepayo gelar ise si isuratken ibas kertas e. Nggo kenca ietehndu gelar PERMATA GBKP si tersurat ibas kertas e, suratken kai atendu si ibahanndu man bana janah kai atendu si lanai ibahanndu man bana. Dung kenca isuratken, endesken kertas e man PERMATA GBKP si bersangkuten janah bahan komitmen masing-masing guna ngelakoken kai si enggo isuratken. Dungi kegiaten e alu pertoton.

V. USULEN ENDE-ENDEN

KEE No. 175:1-3 (Bage Pedah Tuhan) - Klik Judul Untuk Melihat Lirik
KEE No. 177:1-2 (Kekelengen Ni Dibata) - Klik Judul Untuk Melihat Lirik
KEE No. 209:1-2 (Perpulungen Ersadalah) - Klik Judul Untuk Melihat Lirik
KEE No. 254:1-3 (Isuruh Dibata) - Klik Judul Untuk Melihat Lirik
KEE No. 286:1,3 (Kuikutken Me Dalanndu) - Klik Judul Untuk Melihat Lirik

Pdt Wisely Pinem