Perbulangen Jadi Usihen - HUT Mamre ( Bahan PJJ 18 - 24 Agustus 2019 )

Bahan Bimbingen Perpulungen Jabu-Jabu 18 - 24 Agustus 2019

Perbulangen Jadi Usihen

HUT MAMRE

Ogen : Kejadin 18 : 1 - 10

Sekalak anak dilaki ipadanken man Abraham
1. Ibas sada wari TUHAN encidahken baNa man Abraham deher sada batang-batang kayu si galang i Mamre. Sanga e wari seh kal lasna, janah Abraham sangana kundul i lebe pintun kemahna.
2. Tupung ia jurgak idahna telu kalak tedis i lebena. Minter kenca iidah Abraham kalak ndai, kiam ia ngalo-ngalosa. Janahna erjimpuh, ayona seh ku taneh nina,
3. “O Tuan mari ngadi lebe janah singgah ku rumahku. Berelah maka aku ngidangi kam.
4. Banci kulegiken lau man pemurihi nahendu. I teruh batang kayu enda kam lebe ngadi-ngadi. 5. Kusikapken lebe pangan man bandu, gelah banci nambahi gegehndu guna nerusken perdalanenndu. Sabap enggo kam reh ku inganku enda, e sada kehamaten man bangku, e maka kuelai ateku kam asa bancina.”
Ngaloi kalak si telu ndai, “Bujur adi bage.”
6. Minter kiam Abraham ku kemahna, janah nina man Sara, “Pedasken, buat tepung si mejilena sada guni, aduk, tasakken jadi roti asa biasna.”
7. Kenca bage kiam Abraham muat sada lembu si mburna kal tapi nguda denga; paksa entabeh man pangan. E maka iberekenna man sekalak suruh-suruhenna. Minter igeleh suruh-suruhen ndai lembu si ibereken Abraham e, jenari itasakkenna.
8. Ibuat Abraham susu si mejilena, bage pe daging si enggo itasakken ndai. Kenca bage isikapkenna i lebe-lebe temuena ndai, janah Abraham jine ngelai kalak enda man i teruh batang kayu e.
9. Isungkun temue e Abraham nina, “I ja Sara ndeharandu?”
“Ia i bas kemah,” nina Abraham.
10. Sekalak i bas si telu kalak ndai ngerana nina, “Siwah bulan nari, reh ka Aku ku jenda, i je pagi Sara enggo mupus sada anak dilaki.”
Sara megi-megi arah pudina, i balik pintun kemahna nari.

Kejadian 18 enda ngingetken kita kerna sejarah pantekna Mamre GBKP tgl 26 Agustus 1995 I bas MUPEL MAMRE GBKP I i Kabanjahe ras itetapken pantekna lembaga ( Persekutuan Kategorial ) MAMRE GBKP, alu motto : Mamre erdiate, Mamre erpemere. lja gelar ras Motto enda palasna Kejadian 18 enda. Alu enda ngingetken Mamre gelah ngusih Abraham i bas geluhna. Mamre jadi bapa kalak si erkiniteken si tetap setia man Dibata i bas kerina dampar kegeluhenna. Abraham ngalo-ngalo ras ngelai Tuhan alu ukur si tutus, ibabaina pe ndehara ras suruh-suruhenna ikut ngelai temuena. Orat geluh perbulangen si bagenda me min jadi i bas Mamre GBKP.

I bas perjumpan e, Tuhan nehken padanNa e man Abraham maka kesusurenna jadi bangsa si mbelin. Lit piga-piga hal si terjadi i bas perjumpan Dibata ras Abraham e me :

1. Abraham ngalo-ngalo temuena alu pelayanen si mehuli. 
• Idahna 3 kalak mentas arah lebe kemahna mis ia jurgak ras kiam ngalo-ngalosa. `Mis jurgak ras kiam ngalo-ngalosa' ( ay.2a,b ) ncidahken maka kalak si mentas e penting bana, aminna langa bo itandaina. 
• 'Erjimpuh ia ayona seh ku taneh ( ay.2c) . Enda nuduhken hubungen budak ras tuan. Abraham nggit njadiken dirina bagi suruh-suruhen lako mpebelin temue si la itandaina. 
• 'Berelah maka aku ngidangi kam' ( ay.3b ). Mindo persentabin ia gelah ibere ngidangi temuena. Ertina ngidangi kalak e dahin si mbelin emaka mindo ia leben alu meteruk ukur. 
• INgelegi lau guna pemurihi nahe' ( ay.4 ), enda kesemalen encidahken kiniteruken ukur i bas kalak Israel, si ngidah temue selaku tuan, jadi wajar si melketna pe i bas diri tuan ibersihken suruh-suruhenna. 
• 'Nikapken pangan guna nambahi gegehndu' ( 6-7 ) e ngataken maka pelayanen Abraham meciho guna gegeh nerusken perdalanen ( visi misi, masa depan ) temuena, labo guna kepentingenna. 
• Isikapkenna pangan si mehulina aminna gia temuena 3 kalak ngenca ( 1 guni roti ras 1 ekor lembu ). Pelayanenna tuhu-tuhu alu bulat ukur (la menggo). 
• Ia jine nge ngelai temuena (ay. 8), la isuruhna suruh-suruhenna si enterem. Enda nuduhken bage ergana ras hamatna ia man temuena e seh maka ia jine ngidangisa bali ras sekalak suruh-suruhen. Aminna Abraham e situhuna tuan nge i bas jabuna.
  Abraham ngelai kalak si deban alu mehuli arah nggit "korban materi." Kai si ibahan Abraham bage min ilakoken Mamre erpalasken motto Mamre CBKP : "Mamre Erdiate, Mamre Erpemere".
2. I bas perjumpan Dibata ras Abraham, Dibata erpadan nehken pasu-pasuNa njadiken kesusuren Abraham jadi bangsa si mbelin.

Lit si erpegakap jadi Mamre GBKP eme terjeng perubahen status anak Permata jadi perbapan. Erkiteken si e labo terjadi perubahen biak si banci jadi usihen man anak jabu ras kerina jelma. Perlu sieteh maka jadi Mamre eme pemere, ingan perjumpan Dibata ras manusia. Sierbahanca lit teridah kualitas kiniteken i bas diri Mamre si banci jadi usihen i bas kerina dampar kegeluhen: keluarga ras dahin pelayanan.

EVALUASI :
Enggo lit kalak si idahindu ntah ialemindu i bas sada minggu enda?

DISKUSI

1. Erpalasken ogen, turiken pengangkanta kuga kin Mamre ( Perbulangen ) si banci jadi usihen ( ideal ). Janah kai ulihna adi Mamre ngasup nggeluh jadi usihen. 
2. Kuga pengidahta kinata ( realita ) kegeluhen Mamre GBKP gundari, enggo me ideal ntah lang ? turiken alasen-alasenna, 
3. Kai langkah-langkah strategis si banci silakoken guna ndorong Mamre gelah ngasup nggeluh bagi Abraham (ideal).

AKSI : 
I bas PJJ si reh, aturken perayan HUT MAMRE alu sederhana.

USULEN LAGU :

1. KEE GBKP No. 217 : 1-3 ( KLIK JUDUL KEE UNTUK MELIHAT LIRIK TEKS )
2. KEE GBKP No. 249 : 1-2 ( KLIK JUDUL KEE UNTUK MELIHAT LIRIK TEKS )
3. KEE GBKP No. 323 : 1,2  ( KLIK JUDUL KEE UNTUK MELIHAT LIRIK TEKS )
4. KEE GBKP No. 200 : 1,2  ( KLIK JUDUL KEE UNTUK MELIHAT LIRIK TEKS )
5. KEE GBKP No. 97 : 1,3  ( KLIK JUDUL KEE UNTUK MELIHAT LIRIK TEKS )

TOPIK PERTOTON SYAFAAT: 

1. Segelah kerina anggota Mamre GBKP reh ngasupna jadi usihen.
2. Pengurus Kategorial Mamre GBKP ( Pusat, Kiasis, Runggun, Perpulungen ras PJJ Sektor ).
3. Si turah i bas perpulungen.

Pdt Seth Perangin-angin, M.Th.

Mohon Bantuan Subscribe dan Like Youtube Channel GBKP KM 8. Bujur

Share this post