Kekelengenku Jadi Gegehku - Hari Ulang Tahun SAITUN GBKP ( Bahan PA Moria 4 - 10 Agustus 2019 )

Bahan Bimbingen PA Moria 4 - 10 Agustus 2019

HUT SAITUN GBKP

SI MAN OGEN : Kejadin 48 : 1 - 5

Ipasu-pasu Jakup si Eperaim ras Manase
1. Lanai ndekahsa nari kenca si e, iberitaken man Jusup maka sakit bapana. Erkiteken si e lawes ia ras duana anakna, Manase ras Eperaim ndahi Jakup.
2. Kenca enggo ibegi Jakup maka anakna Jusup reh ngenehen ia, ipala-palaina kundul i das ingan medemna.
3. Nina Jakup man Jusup, “Dibata si Mada Kuasa enggo encidahken baNa man bangku i Lus i taneh Kanaan, janah ipasu-pasuNa aku.
4. Nina man bangku, ‘Aku merekenca bandu nterem anak, gelah alu bage kesusurenndu jadi melala bangsa; Aku mereken taneh enda man kesusurenndu jadi sikerajangenna seh rasa lalap.’ ”
5. Tole nina Jakup, “Jusup, duana anakndu si tubuh i Mesir enda ope denga aku reh ku jenda, e me Eperaim ras Manase aku nge empuna. Duana ia bali ras anakku Ruben ras Simeon.

T E M A : KEKELENGENKU JADI GEGEHNDU

T U J U N : Gelah Moria:

• Meteh maka kehadiren Jusup ras anakna Epraim ras Manase mereken semangat ras gegeh man Jakup. 
• Pentar nikapken keleng ate ras perhatin man orang tua.

METODE PA : Nonton film ras aksi

Kata Penaruh.
Adi si oge turi-turin kegeluhen nini kalak Israel, melala banci dat kita pelajaren. Pustaka Si Badia la erbuni-buni nuriken uga situhuna kegeluhenna. Em bedana ras buku kegeluhen manusia ( biografi ) megati terjeng si mehuli ngenca si suratken. Emaka si sempabu ras si sukses teridah i je. Arah turi-turin e banci kita ercurmin nandangi kegeluhenta paksa genduari gelah banci kita jadi kalak si pentar. Sabap melala si arus si pelajari arah kegeluhen enda, subuk arah kiniulin si ilakokenna bage pe kekurangen si pernah idalankenna. Arah kiniulin si dalankenna njemba kita banci ngusihsa i bas paksa genduari, jadi kalak si patuh ras mehuli. Janah arah kekurangenna turah pengangkanta pe maka si pilih Dibata e labo kepe manusia si serta. Emaka is pe tetap perlu perkuah ate Dibata ngkuhi geluhna.

Mpebagesi Pengangkan Kerna Ogen.  
Kata Dibata enda eme tupung keluarga Jakub enggo pindah kerina ku negeri Mesir. Perpindahen kalak enda eme erkiteken kiniseran si mesangat i bas negeri inganna tading ndube janah paksa si e Jusup pe enggo jadi perdana menteri i Mesir. Ibereken raja Mesir man kalak enda ingan si mehuli ingan tading i Mesir eme daerah Gosen. Taneh enda daerah si mehumur. Pemere raja enda pe tentu la pulah i bas penampat Jusup si enggo ngertiken nipi raja Mesir janah enggo ndalanken pemerintahen alu mehuli subuk sanga paksa peranin si mbelin ras tupung paksa kiniseran enggo seh.

Lit dekahna sepuluh pitu tahun Jakub tading i negeri Mesir. Umurna pe enggo seh tuana eme seratus empat puluh pitu tahun. I bas umurna si enggo metua e, enggo pe rusur is idenden pinakit. Bage me kepe maka umur labo terbuali, daging reh tuana, maka kerina ringring i bas kula pe enggo reh kotena. I bas kecibal si bage enggo melala keterbatasen gegeh. Rumat ( semangat ) nggeluh pe banci enggo urak. Pangan ras inemen pe maun lanai bo terakapi alu mehuli. Tambah tolena banci ka pe ia enggo kelungunen erkiteken enggo i bas inganna medem nari ngenca rusur.

Jusup selaku anak, tuhu banci kita erlajar arah kai si ibahanna. Ia sekalak tokoh si ituriken i bas Pustaka Si Badia si melala encidahken usihen nggeluh. I bas kecibal bapana Jakub sakit ituriken i jenda maka reh ia ndahisa. Janah ibabana pe anakna duana eme Manase ras Eperaim. Engkai maka ibabana anakna? Tentu ieteh Jusup pe maka salah sada kemegahen orang tua eme tupung idahna kempu-kempuna. Enda pe lit ituriken i bas kitab Kuan-kuanen 17:6 Orang tua gedang atena ngenen kempuna, kemegahen anak-anak e me kap orang tuana. 

Janah payo, tupung ibegi Jakub maka anakna Jusup reh ngenehen ia, ipala-palaina kundul i das ingan medemna. Enda encidahken uga bagesna erti kerehen sekalak anak ras kempu ndahi orangtua si enggo gedang umurna.

Ipasu-pasu Jakub si Jusup alu ngataken "Dibata Si Mada Kuasa enggo encidahken baNa man bangku i Lus i taneh Kanaan, janah ipasu-pasuNa aku." Enda ngataken maka Dibata si enggo masu-masu ia, eme Dibata si nepati padanNa alu mereken sinursur si enterem jadi melala bangsa. Bage pe ikatakenna Eperaim ras Manase aku nge empuna, ertina Jakub erpengakap maka kempuna enda duana bali ras anakna jine. Duana ia ndatken hak si seri rikutken budayana tupung sie. Bali akapna ras anakna Ruben ras Simeon.

Pengkenaina.  
I bas ogenta sendah ibabai kita erlajar arah usihen si icidahken Jusup man banta. Jusup la ngukurken terjeng dirina jine. Sikapna kecibal geluhna. Mesir ikut pe atena kerina keluargana ngenanamisa. Bage pe la terjeng Je saja, Jusup mperdiateken tuhu-tuhu kecibal bapana si enggo metua janah rusur sakit. Kerehenna ndahi bapana alu mbaba anakna duana jadi sada perukuren si mbages man banta.

Paksa genduari banci jadi enterem kita enggo kurang nulihken orang tuanta si nggeluh denga. Lit nge si ban rusur alasen si masuk akal. Salah sadana eme uga kesibukenta ndahiken dahin ndarami keperlun Jabu termasuk anak sekolah. Soal kesibuken ninta, tentu Jusup selaku perdana menteri melala dahin si arus idahikenna, tapi sempat denga ka nge ia ndahi bapana. Dage, soal waktu situhuna labo jadi persoalen, ukurta nge penting ntah lang dahin e. Sekalak perbapan si super sibuk seh maka cek kesehaten pe la sempat. Sada wari sakit ia janah ikataken maka ia kena pinakit kanker. Kenca sie enggo melala waktuna guna cek, kemotrapi ras konsultasi. Engkai? Gelgel la iakapna penting, tapi kenca enggo idat pinakit dai minter melala waktu guna ngaturkenca.

I bas PA enda pe kita ipersingeti kerna HUT Saitun. Jadi Saitun enggo sada kesangapen gundari. Umur si gedang e sada si meherga kal si akap. Umur jelma pe rata-rata enggo reh meterukna. Emaka adi lit denga orangtuanta megahlah si akap. Adi lit Kategorial Saitun i bas Gerejanta meriahlah si akap sabap teridah salah sada janji Tuhan alu mereken umur si nggedang man bana. Emaka si litken waktunta ndahi ia ras erbahan aksi guna ncidahken keriahen ukurta i bas HUT-na enda. Sabap keleng ateta e me salah sada jadi gegeh orang tuanta. Selamat HUT Saitun man orangtua kami!

Sebintun keriahen ku tiga ras

Tatap page i berneh jadi lukuten

Saitun kemegahenta ras-ras

Tetap paguh ras megegeh i bas kiniteken

Aksi : 

• Uga nge pengalamenta er-orangtua sedekah enda rikutken film!
• Cakapken dingen banlah aksinta ku YAPOS ras rende i bas paksa HUT SAITUN i Gereja.

Pdt. Junus Bangun,MTh.

Judul Film : Kisah tentang Pohon Apel ( bisa ditonton langsung di bawah )

Share this post